小義工日 ~ '09 中秋篇

承蒙心爸嘅邀請, 小Be有機會成為小義工, 參與送月餅活動. 今次嘅服務對象係 ~ 老人. 真係好有意義架!!!

我哋一早起身, 因為唔知醒嘅關係, 要極速刷洗!! 然後出發去接心悠一家食早餐. 跟住去紅磡聖公會聖匠社區中心集合, 由社工講解一啲注意事項同埋攞服務對象嘅資料.  每個組別會探訪3個老人家庭, 我哋一家嘅探訪對象係 3位獨居老人, 年齡係 82、86同87歲嘅婆婆.  最估唔到嘅係 ~ 中心俾咗小Be 一張感謝狀!!!

晨早啱啱瞓醒, 魂都未返嚟!!小Be 幾專心聽 briefing!!!

手執各婆婆嘅資料同義工守則

同心一家分開後, 我哋就去探訪87歲嘅麥婆婆, 麥婆婆住喺唐7樓, 真係好高呀!! 行到我哋氣咳, 小Be 都忍唔住叫爸爸抱佢... 上到麥婆婆屋企, 小Be 即時送上月餅禮品包俾佢同加一句 : 婆婆, 中秋節快樂!! 婆婆好開心又熱情, 仲俾封利是同餅乾俾小Be做回禮(我哋唔收得佢封利是, 所以我靜靜雞擺咗封利是喺枱上.)  同婆婆傾咗一陣, 同做咗份問卷, 眨下眼時間又到!! 要走喇!! bye-bye!!!

跟住我哋要去搵一位86歲嘅陳婆婆, 但地址錯咗, 打電話搵佢又無人聽, 中心又無人聽電話, 所以我哋決定放棄.  然後我哋去探訪最後一位82歲嘅譚婆婆.   譚婆婆家住3樓, 樓下大閘係鎖咗嘅, 佢要行落嚟開門俾我哋... 真係... 唔係幾好意思...

... 我哋入到屋, 我好似發現寶藏咁 ~ 嘩!!! 成間屋佈置係維持喺30幾年前 ~ 有吊風扇、綠色板間房、鐵書枱、紅色鐵水壺、舊式電視櫃、磁地磚、細摺枱同舊式鐵日曆托盤等等... 令我諗起細個時屋企嘅感覺... 唔知係咪因為咁, 我對譚婆婆好有親切感.  譚婆婆比較靜, 不過佢都好好客, 成日都要斟茶俾我哋飲, 又開電視俾小Be 睇.  佢又會講解屋內掛起嘅牌扁由來... 小Be 都好識做咁送上月餅禮品包俾佢同一句 : 婆婆, 中秋節快樂!! 小Be 仲唱咗首歌 ~ 讀書不要懶惰俾佢聽, 氹到婆婆好開心!!! 跟住我哋同婆婆傾咗一陣同做咗份問卷, 時間差不多要走喇!! 婆婆仲想送我哋落樓添... 唔好啦!! 太辛苦喇! 譚婆婆!! bye-bye!!! 有機會下次見!!!

跟住我哋滙合返心返中心交底所有資料, 然後返 playgroup lu!!! 睇下! 有兩個街童喺街度等車車返學!!! 好好笑!!!

 真係咁攰??!!

今日上playgroup 玩七色彩虹布, 個個小朋友都玩到好開心!!

是日茶點係 ~ 甘大支呀!!!

小Be 影相個 look 幾 "Pro" !!!

上完堂, 我哋送公公去醫院洗傷口, 然後返爺爺屋企吃晚飯!! 

媽咪開心 ; 小Be傷心...

尋晚媽咪mo 放工後約咗同學仔 ~ Connie 食飯, 好開心呀!! 自從我哋兩個生咗BB之後, 都無單獨約出嚟食飯、飲嘢.  每次都係家爺仔乸、一家大細咁出嚟, 忙到氹氹轉... 傾唔倒兩句, 又要講 bye bye!!  尋晚真係有成兩個幾鍾頭屬於我哋, 由中學時代講到依家. 

其實, 我同Connie 嘅友誼唔係喺讀書時代開始嘅, 而係因為一個出買我哋嘅 ~ ｢朋友｣, 唔係呢個 ｢朋友｣喺一次約會入面臨時提早走, 我同Connie 先有機會進一步嘅認識對方, 同埋知道我同佢一路唔多鍾意對方嘅原因... 原來係呢個｢朋友｣喺我同Connie 嘅面前數對方嘅不是... 最後我同Connie 一路 keep 住有聯絡, 感情仲好好添

反而嗰位 ｢朋友｣ 已經無再聯絡 lu... 人同人之間往往就係好玄... 一定要珍惜身邊嘅一切!!!

講返小Be 先, 因為我遲咗返屋企, 所以無接小Be 屋企, 我打電話俾佢, 同佢講佢會喺婆婆屋企瞓一晚, 佢起初喊住詰唔好, 仲話唔想同婆婆瞓.  我一話叫婆婆沖奶奶俾佢飲, 佢即刻唔喊兼話好!!! 掂咗!!! 

今朝出門口時打電話俾婆婆問下佢小Be 嘅情況, 點知... 婆婆話... 小Be 嘅睡眠情況好差... 尋晚成點先瞓 ... 今朝六點就起咗身喇!!!

唔係嘛... 攪乜東東呀??? 返咗大大間幼稚園之後, 佢嘅｢癡 ~ 媽 ~ 筋 ｣情況又嚴重番... 唔想喺婆婆屋企過夜... 我既心痛 (佢瞓得唔好...) 又有啲擔心...  今晚返工, 睇完醫生, 咋咋淋接返佢囉!! 一見面, 佢就攪實我叫媽咪!! 冧死人...

• 
  

殘酷的媽媽 vs 曳曳小Be 豬 ~ 戰後結果

尋日俾咗小Be 一個大教訓之後, 唔知佢會唔會記住呢???

今朝一路行一路諗... 一陣間小Be 到港鐵站時會點呢? 有無反應呢... (超緊張呀!!!) 我如常咁拖住小Be落小巴, 過馬路入港鐵站, 再入閘 (此時, 小Be 係自己行嘅) ... 然後行去搭 lift, 就喺呢個時候, 小Be 回頭企定等我, 同我講 : ｢媽咪mo, 要拖住我, 唔拖住會唔見架!!｣

噢!!! 真係謝天謝地啦!!! 佢記得呀!!!!

感淚!!!! 我忍唔住俾咗10 個 good 俾小Be 呀!! ★★★★★★★★★★

我拖住小Be 對小手落月台等車, 由上車到落車, 我倆雙手都係緊扣住架!!!

小Be 真乖!!!! 媽咪mo 鍚晒您!!

殘酷的媽媽 vs 曳曳小Be 豬

前提 : 星期日, 小Be 將 Mini Cooper 藏於地上嘅兩個 cushion 中間, 導致媽咪mo 誤中 ｢地雷 ｣.  左腳腳趾公無咗一"忽"肉 舊肉仲係"吊吊 fing"嗰隻... 好鬼痛呀!!! 小Be 都有即刻衝過嚟慰問我同講 sorry 嘅.  不過, 直至今日仲係好鬼痛!! 有發炎嘅跡象... 行路時仲係一拐一拐咁行... 泣...

入返正題 : 今朝同小Be 搭港鐵, 一出 lift, 隻衰嘢話要去睇黑 mum mum (去車站盡頭睇隧道), 我話 : ｢唔好啦! 個 lift 喺中間, 要行好遠架! 媽咪隻腳好痛, 喺呢度上車, 一陣落車又可以搭 lift lift, 好唔好?? ｣ 隻衰嘢聽完即刻話唔好, 之後就向前跑, 叫極都唔睬, 逃之夭夭

當時有列車到, 人又多, 又多人上車落車, 搞到我一頭煙, 直情係七孔出煙 !!!

於是我把心一橫, 決定俾一個教訓佢, 嚇佢一嘢, 等佢唔好咁曳曳, 唔聽話兼唔拖住周圍走.  一諗到呢度, 我忍唔住偷笑咗一下.

我搵咗條柱"柄"埋自己扮走失, 然後離遠觀察住佢.  當列車走咗, 小Be 見月台空空如也... 佢嘅臉部表情由得得戚戚變成臉無表情, 成個人慌晒咁... ... 我覺差不多達到我嘅效果, 好啦! 就放過佢啦!!! 點知... 佢驚恐得滯, 一路搵、一路跑、一路喊、一路叫媽咪mo, 喺我身邊擦身而過都唔知.  我又捉唔住佢, 跑得唔夠佢快喎! (真架!! 我隻痛腳真係好鬼痛呀!!) 佢跑咗去月台嘅另一邊, 呆咗咁企喺度搵我, 啲途人都好好奇, 不過佢哋只限睇, 係唔會幫小朋友架喎!! (唔怪得知啲人話 : 香港人情味薄啦!)  真係一場 ｢大龍鳳｣, 我只好臉懵懵咁行埋去扮搵返佢啦!  點知, 小Be 含住一泡眼淚、楚楚可憐咁話 : ｢媽咪mo, 我好驚呀~~ 唔見咗呀!!｣  登時... 我內心一酸...
 好啦原諒你啦!!! 錫一啖!!! 小Be 當堂笑返, 仲話下次唔敢喇!! (希望啦!!)

送完佢去搵姐姐, 我一路行一路諗... 佢得3歲人仔, 我係咪對佢太苛刻、太嚴呢?... 我係咪做錯咗呢?... 咁樣對佢, 係咪太大懲罰呢?... 有一陣子覺得內疚... 但一諗到, 如果我唔教訓佢, 繼續縱容佢嘅話, 佢會越嚟越放肆架喎!! 所以, 有啲位我係要硬起心腸對佢, 如果唔係, 咪無人搞得佢掂咪弊傢伙!!! 我寧願有時嚴啲對佢, 好過慈母多敗兒... 

*其實... 我今朝好想拍底整個過程... 俾佢第日大個睇返... 不過, 好似有啲變態囉... 爸爸實鬧死我呀...

小Be 新生活時間表

開學咗差不多3個星期, 小Be都開始習慣新嘅時間表,  新時間表如下 :

09:30 前到達婆婆屋企

10:30 (如有時間, 會洗白白)

11:00 開始食午餐

11:40 ~ 11:55 換校服, 然後出門口

12:15 到達侯車處, 上校車

17:20 姐姐到侯車處接回小Be, 回家食茶點 (有時會小睡片刻...)

之後嘅活動如常.  係喇! 係喇! 問題就係出喺呢度... 就係 "無瞓晏覺" 喇!!!!! 有時小Be 會攰得滯, 攪到發晒脾四!!! 每晚我放工接佢返屋企時, 佢都捽晒眼, 好眼瞓同好攰咁.  一返到屋企, 就咋咋淋沖奶佢飲, 然後刷洗瞓覺.  日日都好似好趕咁... 泣...  到第二朝, 小Be 又好辛苦咁起身...  睇嚟我要早啲放工湊佢返屋企早啲瞓先得...

睇吓! 佢口腫臉腫嘅樣... 每朝小Be都係呢個懵樣

扮站長, 喺到等小巴

唔好影呀!!! 唔好影呀!!!!

一到夜晚, 小Be 就出現大昏迷嘅現象!!!
(時間過得好快, 之前小Be係矮過 Pooh Pooh, 依家... 佢高過 Pooh Pooh 好多 lu...)

｢是end打｣受傷了 ~~ 嗚嗚

大近視!!!!  ｢是end打｣車車俾人"界"花咗!!!

傷口位於司機位車門, 闊度有一隻車門咁長. 傷心死我同爸爸.  究竟喺邊度俾人割花架呢!!!

 有咩咁大仇口呀?? 有咪出聲囉!! 用啲咁唔文明嘅方法!!!  ｢是end打｣仲要咁可愛, 都可以下毒手嘅!!!  

  我祝嗰個粉擦 (兇手) : 雙手健健康康!!!

囧囧囧囧囧囧囧囧囧

回憶 ~ 於小Be一歲時

初生至一歲大嘅小Be係一份天賜的禮物.  點解?? 易湊囉!!! 

1.  喺屋企, 係唔需要抱佢架!! 只要放佢喺梳化、搖搖椅、床或學行車, 佢就會自己娛樂自己喇!!

2.  唔夠半歲大, 佢已經自己揸奶樽飲奶奶.  喺無刻意戒夜奶嘅情況下, 差不多兩個月自行戒咗.

3. 夜晚瞓覺覺豬唔需要人抱住, 只要飲好奶奶同換好尿片, 然後放佢上床同熄燈, 佢就會自行覺覺豬.

4.  瞓覺能力一流, 可以由晚上十點零瞓到第二日中午十一、二點, 間中會朝早九點零起身飲支奶, 然後再瞓返.

5.  打針、食藥 (西藥、保嬰丹、涼茶)、探熱 (肛探、耳探) 同睇醫生係唔會喊嘅, 只係坐定定唔郁, 任我哋舞.  打針時, 一定唔可以捉實佢, 一捉實就會大喊.  反而扶一扶佢, 佢仲鎮定添. 

6.  由佢學扶住企開始 (約九個月大), 公公就教佢點樣由梳化落地嘅技巧, 所以佢係無試過跌落地架.  又由嗰時起, 我係會放佢喺企缸到, 俾佢扶住櫈仔企喺度, 然後, 我用花灑同佢沖涼 (冬天除外) 不過, 唔可以淋頭架喎!! 佢到依家都未克服到花灑淋頭 ...

7.  從無手多多摸 / 搶抱佢嘅人嘅眼鏡

8.  識坐之後, 可以同我哋坐定定食飯, 可坐成3個鐘都無詐型架!! (依家緊係唔得啦!!)

。。。。。。。。。。。。。。。。。。。。。。。。。。。。。。。。。。。

不過, 人係無十全十美嘅, 小Be 都有難湊嘅一面架!!

1.  第一項頂級難湊嘅 ...

 就係 ~ ｢癡 ~ 媽 ~ 筋 ｣喇!! 唔好心邪!! 我意思係佢癡得我好緊要, 喺屋企要喺佢視線範圍, 如果唔係會喊死佢.  只要我喺度, 無論去到邊, 我同小Be 係會癡實, 佢唔會俾其他人抱 (包括爸爸、婆婆、公公同姐姐都唔得)  一出街... 真係抱到我手斷架...

2.  我夜晚未返屋企, 佢係唔會瞓... C唔斷氣咁... 不停飲泣...  一見到我, 我一抱起佢, 佢即刻安樂晒... 即瞓!!! 死未!!!

3.  一出街就會痾大大篤 ｢K｣俾我哋嘆!! 仲要係大篤到上晒背脊嗰種!!! 次次都搞到我 "呢咁hea"... 佢兩個月大時, 同佢去濕地公園, 佢又係痾到大大篤上晒背脊, 抺完個背脊, 都要喺露天洗手盆沖一沖先乾淨咋!!!

4.  一發起皮四上嚟, 真係唔係人咁品!! 喪喊到震... 無人搞得佢掂... 多數係我可以安撫到佢咋...

小Be 最近成日要扮初生嗰時咁, 要我哋抱住佢飲奶... 真玩嘢!!! 

佢仲要玩埋扮掃風添 ...

廣告篇 ~ 第四輯

今次真係要多謝 Connie 姨姨喇!!

話說喺7月時, 好朋友 ~ Connie 打電話俾我, 話我知佢喺屋企樓下嘅藥房見倒小Be 個 ｢蜘蛛俠 ｣ 廣告, 係 2D 掛畫 (bunting) 同埋 3D 掛畫 (所謂嘅3D, 其實係一個三角形嘅掛畫).  佢即刻厚住臉皮同老闆講, 可唔可以落畫後留俾我呢? 點知老闆話無問題, 8月嚟攞啦!! (因為張廣告合約係一年 ~ 8 '08 - 7' 09, 所以7 月尾一定要 落畫).  於是一到8月, Connie 真係去攞, 而老闆又真係俾佢喎!!! 多謝大家!!!   擺咗喺 Connie 屋企成個幾月, 懶惰的我, 卒之喺尋日嘅 ｢擇日不如撞日｣約會下, 順手攞埋返屋企.

Connie 姨姨, 真係唔該晒你呀!!!

藥房老闆, 唔該晒!!!

呢個就係2D 掛畫 (bunting) 同埋 3D 掛畫個 layout 喇!

3D 掛畫個實物, 有3面圖案架!!

個3D箱有幾大?? 等小 model 併埋去俾你哋睇下有幾大啦!! 話大唔大, 話細唔細咁囉!! 都唔易收埋架!!                        

咁呢舊嘢擺喺邊鼠好呢??