｢生命熱線｣賣旗日

26-12-2015

Be 過咗一個 Happy Boxing Day Morning

為｢生命熱線｣賣旗

自Be上咗小三後

功課超忙

少咗出去同人分享

今次活動正正喺聖誕節假期

主辦機構嘅理念亦好意思 

(而家買/賣旗真係要好小心睇清楚)

所以我哋同公主 (林世伯嘅千金) 一齊登記咗賣旗

當日 8:30am

我哋同公主、林太一齊出發

整個活動過程由Be 主導

Be 同所有人嘅對話由佢自己應付

我... 只係佢身後5步嘅 ~ 保鏢

因長假期中

街上行人唔太多

每當Be 遇見佢認為可埋手嘅路人時

Be 會講 : ｢早晨! 請問可唔可以幫生命熱線買支旗?｣

如果路人願意買

Be 會答 : ｢多謝你! 聖誕快樂! Bye Bye｣

如果路人唔願意買

Be 會答 : ｢唔緊要! 聖誕快樂! Bye Bye｣

過程中, 分別有二、三個叔叔、嬸嬸喺買旗前

都問咗Be 知唔知 ｢生命熱線｣係咩機構? 係做啲咩?

(好彩活動前有同佢講過...)

Be 答 : ｢知呀! ｢生命熱線｣係幫助緊一啲心情上出現咗問題嘅人, 好似好想自殺... ... 下刪百字｣

當Be 解答完問題後

幾位都好滿意Be 嘅答案

認為Be 喺賣旗前有瞭解機構性質, 唔係被家長迫出嚟賣旗

所以佢哋好慷慨解囊

活動喺12:00 前完結

Be 好開心! 仲話要繼續参加有關活動!

探訪老友記@賽馬會復康中心篇(4)

潛咗水一排

去咗邊??

咪係要應付大考囉 (*´ｪ`)

今日六月十六日

去咗老人院探老友記~~

我哋有啲緊張

因為有成四個月無見面

唔知佢哋點呢??

去到老人院

見到一張張熟悉嘅臉孔

疇婆婆、開伯伯、關伯伯、珍婆婆等等...

見到佢哋仲健健康康、精精靈靈

即刻開心晒~~

今日嘅節目有... 由ah Be 代讀義工們俾老友記嘅心意咭、代老友記寫心意咭、唱吓歌仔、扮靚靚影相, 同埋大食會

大家好開心咁玩咗兩個鐘~~


要等下次再見啦~~

bye bye 老友記~~

平等分享行動

上年年尾開始

知道一位朋友係一個有心人

佢幫另一位發起人

幫助一啲長者、路宿者或基層人仕

為佢哋打點一啲基本需要

自己出錢買一啲飯票俾以上有需要人仕

有需要人仕可以持飯票到指定飯店

換領二/三餸飯盒一個
令佢哋身、心得到一份溫暖

我好認同發起人的信念
我哋唔係幫助人/ 做義工

而係 ~ "平等分享"

即係話有能力, 可以一齊分享

無分階級

佢哋呢個行動亦由深水埗開始

伸延至新界北、土瓜環等地區

同時, 有其他小食肆願意加入

希望 "區區有飯開"

我哋一班朋友知道後

都紛紛自動加入呢個 "平等分享行動"

我都由上年年尾開始加入

每兩、三個月分享一次

我計劃喺暑假時
帶埋 Be 去外勤

身體力行

去支持呢個 "平等分享行動"

為 Be 上身教課~~

讓佢認識社會其中一面~~

呢啲飯票, 起碼可以供應 200 個飯盒啦~~

大家加油~~~

2012 老友記秋季生日會@賽馬會復康中心篇(3)

ah Be 喺九月廿三日又出動嘞! 今次係同老友記開生日會 (1000-1400) ~~ 院方喺院舍擺咗幾圍賀慶生 因為佢哋係一班弱視/ 失明嘅老人家, 所以今次嘅任務係獻唱娛賓同埋幫手照顧老友記, 例如 : 夾餸、酙茶遞水等等~~

ah Be 獻唱咗唔同版本嘅生日歌.  因為佢發台瘟, 所以無唱其他歌.  只係周圍幫啲老友記影相.  成班老友記都玩+食得好開心!!

秋季生日會嘅 backdrop~~

好好味嘅蛋糕~~ Happy Birthday to 老友記ssss~~~~

今日識咗一個新伯伯, 佢叫關伯伯, 佢好健談同識好多電工知識,  佢仲邀請咗我哋一家人去佢個床位傾偈, 又分享咗一啲佢以前係大酒店(係真人住嗰啲) 做廚師時候寫嘅英文菜譜.

我又發現我童年時用過嘅舊牌子爽身份(而家都應該停咗產...) 即刻影低佢... 大家有無用過佢呀??

今次我帶埋老媽子去(佢坐埋一邊睇我哋), 佢都有得著架~~ 活動後, 佢突然同我講, 其實佢自己都好幸福, 原來有好多人好慘架... 我話係架, 起碼有家人同你住, 唔算憂柴憂米啦! 佢都忍唔住話係呀! 要珍惜~~

小小義工日@賽馬會復康中心篇(2)

上星期六 (14/4/2012) 我哋一家又去探訪老友記嘞~~ 開叔、胡婆婆、儀婆婆等各人都身體健康, 人人龍精虎猛!! (THANKS GOD).  班老友記見到我哋都好開心架~~  今日無狗醫生, 所以主要由各人(包括老友記) 輪流表演唱歌, 老友記們都好踴躍表演獻唱. 有幾個朋友開始煲腐竹蛋糖水. 

ah Be 一共唱咗五首歌 ~ 轉轉轉綠燈、校歌、親愛的老師、快樂的一天開始了、那誰 (爆!!)

Ah Be 間場地獻唱完五首歌之後, 埋位食糖水~~~  佢真係唔多客氣... 食咗一大碗+1.5隻蛋...... 食量驚人......


今次同老友記歡聚兩個小時.  臨走前, ah Be 揸住相機同公公、婆婆影相 (個人私隱問題, 不便公開佢哋嘅容貌), 個傻仔仲影自拍照, 超 hyper~~
嘩~~ 好大個黑眼圈呀~~~ 小朋友, 瞓多啲啦~~

自備啦啦球~~ 不過臨場唔肯用嚟表演, 只係用嚟玩~~  激死人~~


我哋由3:30 玩到 5:30 走.  初步約定下次探訪會改為 outing, 帶老友記衝出院舍~~ yeah~~ 期待中~~~

2012 義工日@育賢學校

唔好誤會, 唔係 ah Be 做義工, 而係我公司每年一度義工日(我都幾欣賞我公司呢種回饋社會嘅精神架!!).  今日, 我哋兵分一路, 一路係踏單車, 另一路係幫學校粉飾校園.  今次籌到嘅善款會捐俾｢仁人家園｣.    而我...  係揀咗服務學校啦.  今次嘅服務單位係上水區嘅 ~ ｢育賢學校｣, 我哋拍住 ｢仁人家園｣為育賢學校大變身!!!
朝早十點鬆啲到達, 入禮堂聽｢仁人家園｣負責人講解今日工作細節同分工.

由校長介紹學校歷史 ~ 原來學校有七十年歷史, 因為資源唔係好足夠, 所以需要我哋同一眾學生幫忙粉飾學校.  (我見個校舍係平房式設計, 課室唔多, 只有幾個.  應該係一年級一班, 人數唔多, 電腦室都係半露天式. 好有以前啲學校感覺.)

聽完分組分工後, 開工!! 其間, 啲同學依舊上體育堂~~

有同事同同學仔一齊做園藝~~ 好投入吓喎!!!

有高大外國同事油鐵閘~~

有同事油外牆~~

而我嗰組係要同啲同學仔喺其中一幅外牆度設計壁畫同上色.... 都幾趕時間架... 雖然有｢仁人家園｣幫我哋執手尾... 但得三個鐘頭... 我哋都唔想留手尾俾佢哋... 一開始我哋同啲同學仔喺張大紙上起草圖, 然後用粉筆喺牆身上再畫一次~~  

然後上顏色~~ 我哋盡量用口同示範如何上色、用顏色 (因為用磁漆, 比較難上色...), 等佢哋用自己方法去完成幅畫, 佢哋個個都好聽話, 有商有量, 一有唔明即刻問我哋, 大家都好投入去畫呢幅壁畫 (我都中咗幾下招... 幾個油漆印喺身... ) 喂... 就夠鐘喎... 點解無人畫埋隻雞嘅??

既然無人畫隻雞... 咁我畫啦... 好趕呀...  要召集啦!!! 暫時完成作品... 希望校長收貨啦...

園藝組都完成任務喎!! 其中一個花圃...

入禮堂頒過感謝狀之後, 出操場影張大合照先!!

兩點鬆啲出發去白石會合單車組同事一齊BBQ, 真係又凍又落雨... 玩到五點散會~~ BYE BYE~~

小小義工日@賽馬會復康中心篇(1)

今日跟Sue 姨姨+一個有三隻狗醫生嘅義工團隊嚟到｢東華三院賽馬會復康中心｣某一個病院做老人探訪.  今次服務對象係一群視力有啲問題嘅老人家 (時間: 1500-1430). 

ah Be 與老死 ~ Fluffy (不過 Fluffy 唔係狗醫生嚟架!! 佢嚟見識吓架咋!!)

義工團隊介紹緊三位狗醫生俾一班老友記認識.

ah Be 好嘆咁坐喺到聽義工姨姨講笑話~~

喺一班老友記食緊糖水時, 我問ah Be可唔可以唱吓歌俾老友記聽呀? 如果唱, 佢哋會好開心架!!  ah Be諗咗一諗, 點頭話可以!!

交咪啦!! ah Be 緊張到呢... 成個人僵硬晒...

第一首係朗讀 ｢新春到｣~~

朗讀完 ｢新春到｣, 好評如潮.  大家都想 ah Be 唱多一首歌, 於是 ahBe 決定表演校歌.  (佢呢排喺學校好忙, 忙於彩排體操表演同埋畢業禮, 老師狂操小朋友記校歌)

｢新春到｣+｢校歌｣

今次, ah Be 一共表演咗三首歌, 仲有一首係 ｢親愛的主耶穌｣(聖誕歌, 無辦法啦... 佢怕醜, 唔肯唱 ｢年少無知｣, 仲話表演俾老友記聽, 要唱學校啲歌喎...) 

跟住輪到狗醫生出場, 我哋又四圍同老友記傾吓偈...

呢個係胡婆婆, 佢好好人架~~

眨吓眼, 個半鐘頭就過咗, 我地要同老友記講 bye bye lu~~  下次再見!!

小小義工日@2011

一年一/二度嘅義工日又到嘞!! 我哋同心家相約一齊食 lunch, 然後一齊出發!!!

去到中心, 等緊收 briefing!! 玩陣先!!

收到個服務對象 file 啦!! file 面有探訪指引 ~

仲有義工秘笈添呀!!!

最後係有服務對象嘅資料, 今次係有五位對象 (上幾次係三位, 今次多咗兩位)

又係呢個 backdrop, 只係日期唔同咗...

今次個禮物包多咗少少嘢... 就係一包仔 ~ 米...

因為今次禮物包多咗米同多咗兩位服務對象, 所以都幾重下!! 因為超爸有少少腸胃炎, 佢都嚟參與, 所以我幫佢攞兩大袋!!

禮物包中的禮物

ah Be 都有幫我攞架... 不過實在太重嘞... 好快俾返我!!!

今次要去嘅目的地有少少遠... 所以我哋決定坐車!!

兩父子尋路中~~

約兩個鐘頭, 我哋探訪完四户, 五位老人家.  見到佢哋開心, 我哋都好開心!!  五點幾離開中心, 我哋去咗九龍城逛咗一陣, 然後去咗食晚飯.

ah Be 碟面隻熊貓係咪好似 ah Be 呢?? 我覺得好似呀!!!

感想 : 今次服務對象嘅生活條件 (根據眼見生活環境) 比上幾次的老人相對富裕, 但係從閒聊中知道佢哋嘅心靈都係好寂寞... 子女長大, 各有生活, 可能一星期都見唔到一次面... 有位婆婆甚至一年先同女見面幾次 (因為個女已經移民, 所以每年個女返港見媽媽, 都好有心啦..)  每次講起子女, 佢哋就會好開心架!! 我哋素未謀面, 見到我哋嚟探訪, 佢哋都好熱情同開心, 攞啲飲品、小食出嚟俾我哋食! 好好招呼架!! 希望佢哋生活愉快同身體健康!!