2013 暑期班活動

由 Be 三歲起

我都會同 Be 報讀一啲暑期班

目的係 ~ 俾佢打發時間、避暑

以興趣班為主

今年加插咗一樣學術科 ~ 數學

上完數學暑期班後

Be 對數字敏感咗好多

仲有亳外收獲 

培養出興趣添!!

興趣班 - 電子昆蟲

(都幾得意, 入電之後會郁架! Be 好鍾意上呢堂)

興趣班 - 小煮角

(Be 指定項目, 一定要參加)

興趣班 - 游泳班

(因國慶船難事件, 令我哋要 Be學識游水一技傍身

超爸給 Be 指定項目, 一定要參加)

雖然 Be 未至愛上游泳, 至少唔抗拒

佢仲話 : 姐姐好溫柔 (圖中) 我好鍾意上堂~~ 

電子昆蟲同小煮角喺邊度上堂??

喺婆婆屋企附近啲青少年中心上

又好玩

價錢又平

魂魄唔齊...

自暑假起

我家少爺完完全全活在自己嘅世界裡面 (大雄... 上身...)

陷入一個腦放假狀態

(如果唔係, 又點會一個暑假肥成六、七磅肉吖...)

將之前學過嘅嘢

一次過 delete 咗...

雖然已經同佢 keep 住溫習...

但佢一啲都無入過個腦...

加上"懶懶蟲"+"多口曳曳蟲"上身...

呢個暑假真係激到我好似個癲婆咁... ...  

好頹...（￣へ￣）

佢完全係挑戰緊我嘅 EQ 極限

嬲到想講粗口 (兜口兜臉醒佢嗰隻...)

當然佢都得到適當、合理、可接受嘅 ~ 體罰啦!!

(唔係虐兒呀吓!!)

佢有幾唔掂當?? 

*** *** ***

腦放假, 例一 :

Be 在做暑期功課時問 : mamemo, 我有個字唔識, T-R-E-E 係咩字? 點讀? 點解??

 真係作死佢吖!! 係咪想死吖!!

腦放假, 例二 :

｢喜愛｣寫成｢起愛｣

｢吃｣ ...  已經唔記得點寫...

*** *** ***

懶懶蟲, 例一 :

唔願做功課或拖住做

懶懶蟲, 例二 :

求求其其做

懶懶蟲, 例三 :

佢可能想"應節" ~ (盂蘭節)

啲字寫到鬼劃符咁...

功課啲字真係好似寫符咁

從未咁衰...

*** *** ***

多口曳曳蟲, 例一 :

一同佢講嘢就駁嘴... 或用嬉皮笑臉式重複我講嘅說話一次或以上

多口曳曳蟲, 例二 :

姐姐放假, 無人湊佢時... 有幾日帶埋佢返工

啲同事見到佢, 問 : Be 返暑期工呀?

Be : 唔係呀! 係媽咪迫我返嚟知嘛!! (+賴皮樣)

(零家教...)

多口曳曳蟲, 例三 :

食飯時, 好似餓鬼咁...

(又係想"應節"...)

話極唔聽...

多口曳曳蟲, 例四 :

出街食飯

個屁股好似生釘

坐唔定或"棟"高對腳...

仲要叫佢唔好咁做

佢偏要做...

*** *** ***

佢啲曳嘢...

真係多到數唔晒...

好似想追返過去七年無做過嘅衰嘢...

*** *** ***

經過我呢三個星期嘅 "杜蟲"

情況開始好轉

腦放假 - 康復中

開始記返少少學業上嘅事...

懶懶蟲 - 由危殆變為嚴重

1. 寫字不再寫符

2. 有點自動自覺做功課+認真

3. 不再拖住做功課 (速度仍比其他人慢...)

**用藥 : 

1. 半鼓勵半恐嚇

~ 當佢做得好時 : 大讚賞

~ 當佢死蛇爛蟮時 : 限時收工, 做唔完自己同老師交代

2. 搵返K2 剛學寫字時啲功課簿俾佢睇
佢自己睇完 K2 啲字, 都唔多好意思...

2. 印仔獎勵計劃 

~ 如能態度認真+字體端正+依時完成功課+溫習

可以2個印仔

隻齊50個

可自選一架車仔 ($30以下)

(雖然呢個方法我唔多想用, 不過都要一試...)

多口曳曳蟲 - 由嚴重到普通

減少嬉皮笑臉/ 軟皮蛇嘴臉/ "棟"高腳

**用藥 : 

1. 同佢解釋何謂 "尊重別人尊重自己"

(佢一格衰, 我就變 "嫦娥"... 尊重別人尊重自己)
2. 要佢用受害人或第三者身份想一想感受

3. 屢勸不聽, 會有肢體處分

 *** *** ***

無法啦!!

撞著個 "奀皮" 嘅...

咩方法都要試...

要設法招返佢個魂返嚟...

如果太耐

好難調教返正常...

保佑我...

我們的主題曲~~

早兩個星期的某一天

有個小朋友突然問咗我一個問題

Be 問 : ｢mamemo, 你記唔記得我哋嘅主題曲 ??｣

我  : ｢主... 題... 曲...?? 咩... 主題曲 ??｣

Be : ｢我哋一家三口嘅主題曲, 你唔記得嗱??｣

我  : ｢乜... 我哋... 一家三口... 有... 主題曲架咩 ??!!｣

Be : ｢咪係 "家事香港"囉...｣

我 : ｢吓! "家事香港"... ｣

Be : ｢ Eason 同張學友唱, 電視有播架! 你唔記得咗??｣

我 : ｢哦... 同舟之情...  知啦!!｣

Be : ｢係呀! 以後我哋隻主題曲就係"家事香港", 記住啦!!｣

跟住下一幕係...

佢... 大聲高唱... 

還有希望能前往   還有親善眼光

騰躍於鬧市海港   愛狂舊城窄巷

誰也經歷過迷惘   人間的恩怨幾許已淡忘 ...

天下太平

尋日

同個衰人玩「天下太平」

佢將我哋細個時玩嘅 ~「防護罩」

改裝成「反彈簧」

佢仲話... 

無論點攻擊佢都無用

只會令自己受傷... 

因為「反彈簧」係會彈返去發彈人嗰度...

如果係咁... 

唔使玩啦...

ah Be 甩掉第二、三隻乳齒

Be 繼上年 (17/10/2012) 甩咗第一隻乳齒 (右下正門牙)之後, 喺2012年11月21日朝早甩埋左下正門牙.  嗰朝, 我沖沖下涼, 有個細路突然拍門大叫:｢媽咪, 我隻牙甩咗呀!!｣.  跟住, 我叫佢等等我.  我沖完涼出去, 發現佢瞓返. 最後喺張床嘅某處搵返隻牙... 原來佢係瞓瞓下覺時, 隻牙甩出嚟嘅... (唔通發夢佢食緊野??) 其實我細個都試過瞓瞓下覺甩牙, 不過我爛瞓啲, 無起身, 只係含住隻牙... 到瞓醒, 隻牙已經失蹤...

喺今晚 (9/8/2013), Be 甩佢第三隻牙 ~ 右下側門牙~~ 我執執下行李, 又聽到個細路大叫:｢媽咪, 我隻牙終於甩咗啦!!｣.  呢隻牙困擾咗佢好耐, 搖咗幾個月都唔甩, 令佢周身唔自在好耐... 佢終於得到解脫 lu~~
無牙仔~~

最近食咗 ｢唐細拾義｣, 食得又瞓得~~ 體重、身高暴升~~
儲定脂肪留待開學後暴跌~~

Captain Q

Captain Cool 的魔力~~

沒法擋...

Captain Q 晚晚喺屋企

將啲玩具左拼加拼

自製機場

燈塔 (紅燈用單車尾燈做)

口中念念有詞

**Skylette 224**

晚晚自娛一番

衝上雲霄~~

小心地骨~~

今日返老媽子家 hea

去洗手間時

見到洗手間門上

貼咗一張小便條

▼
▼
▼
▼

小心地骨??!!

問問老媽子

咩係小心地骨??

原來, 有個曳人喺朝早去洗手間時

整到洗手間濕咗

佢驚佢婆婆滑底

所以寫咗呢張便條提醒婆婆

"小心地骨"

我大笑完

都讚一讚佢細心

跟住再教佢個 "滑" 字

修正後
▼
▼
▼
▼
▼

小一生活最後一天~~

新鮮滾熱辣

ah Be返埋今日學

佢嘅在校小一生活

即將完結

多謝ah Be過去十個月的努力

嚟緊呢兩個月

我要同ah Be 要過一個開心、溫馨又有溫習的暑假~~

(如果唔溫習, 兩個月後要重讀小一啦~~)

我哋要好好享受呢個沒有"洪水猛獸"式學業壓力嘅暑假~~

Happy summer vacation~~~

真係開心到想放煙花~~~

我每日可以瞓多兩粒鐘~~ yeah~~~

小一成績年結表

小一成績年結表

2013年7月2日下午11:40朋友及親人累積瀏覽 284

隨著暑假即將開始

ah Be 嘅小一生涯亦快將完結

一直都無報告佢嘅學業成績

我唔係報喜不報憂

係因為我太懶...

想同佢一次過埋單

嚟一個 ~ 小一成績年結表 (ah Be 私隱, 不變公開詳情)

由左至右 (第一學期、第二學期、第三學期)

品行 B+ / B+ / B+

整體平均分 84 / 76 / 81

順利升上小二

老師評語:
語文科, 特別係中文課, 要加緊溫習, 睇多啲課外書, 做多啲閱讀理解.  做卷時, 不小心... 大意... (可以扣成十幾廿分架... 真係唔係講笑.. 佢可以照抄都抄錯字... 串字串到係咁意... 唔知以為電腦咁有 auto spell check....)  為人友善、關愛同學、守秩序、上堂尚算專心 (不過有時都會... 靈魂出竅... ...) 個人唔夠主動...
個人評語:
第一學期 - ah Be 仲係一舊飯... 一俾卷佢做, 即做.  轉數唔太快, 勝在要佢勤力, 佢都肯勤力.
第二學期 - 免強過關, 成績比第一學期差.  好明顯唔再一舊飯, 一俾卷佢做, 就呀支呀咗... 扭扭擰擰, 極唔專心... 我日日好似亞"對穿祥"咁... 噴血...
第三學期 - 蠱蠱惑惑, 開始試搵捷徑讀書應付考試... 我要將佢個搵捷徑同真讀書比例由佢嘅10:0 調較成 1:9 先, 基本巧唔可以無架嘛... 佢好似有少少開竅... 可惜"懶"蓋過一切... 要keep 住鞭策佢... 唔係佢就懶鬼上身架啦... 今次輕輕鬆鬆讀書應付考試, 成績比第二學期好.

*** *** ***

對於ah Be 嘅小一成績

雖然成績唔標青

不過, 我都收貨架嘞!!

鬼叫我早幾年選擇咗俾佢有一個｢快樂的童年｣咩!!

有朋友問 : 擔唔擔心ah Be 平均分咁低, 會跟唔上或者會跟得吃力啲??
我唔算好擔心嘅... 係有少少吃力架!!

不過, 我信可以同佢一齊克服囉!!

我最擔心係佢啲大意分落差好大

分分鐘扣十幾廿分架

大意分可以導致佢唔合格架嘛...

*** *** ***

講真, 我由細到大讀書唔叻

啲成績一路都係中中間間

好彩,出來做事

自己努力 + 加點貴人

工作同人際關係都算ok 啦~~

係性格有啲古怪囉...

所以, 我真係唔介意 ah Be ｢輸在起步線｣為咗提高 ah Be 嘅士氣

我同ah Be 有句口號 : 無九十分? 唔緊要, 最緊要有七十分以上

希望佢每次都有進步

每日一小步, 將來一大步~~

花臉貓

家燕弟弟嚟啦!!!

額頭多粒墨!!!

唔想發生嘅事情終於發生

破相啦!!! >.<''

有人喺尋日打網球時

手痕...

"R" 到個額頭損咗

另加左邊臉有一道損痕 (好淺, 不過有三吋長...)

都有兩粒已經淡化咗嘅"蚊難"...

佢細個嗰時

啲死人蚊

下下針佢塊臉

成日針到佢豬頭咁...

好鬼肉赤架嘛!!

雖然話男仔破相無所謂...

不過... 塊臉... 最好唔好啦...

我當破咗相架啦吓...

*** *** ***

講到破相

戴眼鏡都係破相嘅一種

我自己本身對眼唔多好...

有近視、散光 (遺傳...) + 老花 (近來至有...)

所以我真係好鬼驚花臉Be

接收咗我對眼啲衰嘢...

(我就係收晒我老豆同老媽啲嘢...)

所以我好有陰影架...

我好驚ah Be 要戴眼鏡

盡可能我都提佢

要保護眼睛...

第一次花佬@七七婚禮

講都唔信

ah Be 係未做過花仔架喎

原本三歲半嗰時係有機會嘅

嗰時係堅叔同堅嬸結婚

不過, 因為公公剛離開我哋無耐

我哋唔多好意思紅白二事太近

所以推卻咗

之後都無咩機會做花仔嘞~~

*** *** ***

六.一七七大婚之喜

原定花仔、花女係由表弟名堂妹擔任

但表弟有要事要遲少少到

所以 ah Be 要臨時拉伕做花佬 (超齡花仔=花佬)~~
 拖住妹妹做一個不一樣的花佬~~

我覺得佢好型呀!!

行得好淡定~~

Be, good job~~

(sorry, 我妄想症又發作...)

細心 (更新)

ah Be 從小對我嘅愛係不用懷疑

佢本身性格係比較粗心大意

但佢對我有時都好細心架!! (約K2尾起)

如果而家我唔記低佢

我真係驚... 我會唔記得佢對我嘅好

到佢大個咗(二十年後)唔理我嗰時

我都可以睇返

回味一吓

佢對我嘅好~~

*** *** *** *** *** ***

例一 : 佢一聽到我有啲咳 或 喉嚨有啲唔舒服 或 超熱 或 食完嘢要飲水

佢會倒一杯水 (冬天時係暖水) 俾我飲

*** *** *** *** *** ***

例二 : 每晚一齊瞓覺時

佢都會幫我"襟"被

傾咗一陣之後

我會扮瞓咗或真係瞓咗 (如果唔扮瞓, 佢會不停講架...)

佢會起身幫我整理一下啲被

確定我真係有"襟"被

佢先會瞓架

仲要一"襟"完被

反身即瞓著

*** *** *** *** *** ***

例三 : 食飯 或 飲熱湯時

佢會突然一句 : 媽咪, 小心熱呀!!

有時我要高難度做/攞一啲嘢時

佢喺旁邊陪我同埋提我 : 媽咪, 小心啲呀!!

*** *** *** *** *** ***

例四 : 最近佢又有新花樣

如果佢當日有用食物盒帶小食返學校

小息時, 佢食完小食, 會去洗手間洗乾淨個食物盒

佢第一次洗盒後

佢有解釋過俾我聽個原因

原因係 ~ 我要返工又要湊佢

佢話我會好辛苦

所以佢要幫手減輕我嘅工作

*** *** *** *** *** ***

真係好 sweet 架佢~~

唔知佢大個咗仲會唔會咁細心對我呢??!!

無賴

ah Be 出世後

幫 Be 改中文名嘅師父 + 提議 Be 英文名字頭嘅塔羅牌大師

都不約而同地講出 Be 嘅一生同性格為人

二人口中嘅 Be 係一樣嘅...

其中一樣性格係 ~ 無賴

死剩把口...

我個人覺得兩位大師好準架!!

今日, 同 Be 溫習時

我問佢 : 你記唔記得我同你講過 xxx... xxx,.. xxx...呀??

Be 答 : 媽咪, 我唔記得喎... 我剩係記得你好愛我咋!!! 

我登時... 忍唔住... "啤" 咗佢一眼... ←_←

跟住...

忍唔住... 大笑!! 

Be 真係一個切切實實嘅 ｢無賴｣!!!!

另類(傳統)娛樂~~

每年四~五月春雨連連

屋企附近會有大戲睇

所以

Ah Be 每年一度另類(傳統)消遣~~

"睇大戲"

好新不了情啊！

近呢三年

佢都會要求我哋帶佢去睇幾次

我哋喺星期六日都會盡量同佢去睇

其實佢係貪得意~~

未必係好鍾意/ 識得欣賞

至少, 佢肯去認識一下國粹

今日 (21/5) 係大戲嘅 Last call~~

下午放學後去睇咗一陣

仲俾我哋發現咗一個"茶粿婆婆"

啲茶粿好好味 (我唔吃茶粿架, 今日係第一次~~)

我仲偷聽到婆婆話賣茶粿唔係為生活, 而係消磨下時間~~

我仲打聽到佢喺附近賣開

遲啲可以再幫襯佢 hehe

返屋企時

士多伯伯、嬸嬸話今日係尾日

所以今晚尾場係重頭劇~~

會大打 "北派"

會好好睇

最後士多伯伯、嬸嬸送咗贈劵俾我哋

多謝士多伯伯、嬸嬸~~

今晚有位坐，keke

返到屋企, 咋咋淋做功課+溫習

食完晚飯, 去睇戲 lu~~

第一次劃位 (大戲) ~~

睇到成十點鬆啲至走...

多得超爸對 ah Be 自小薰陶

另ah BE 對音樂嘅熱誠

可接受音樂嘅領域好廣泛

上至classic 下至囗水歌

佢都願意去聽

人生係要多啲選擇架嘛...

keke

愛... 是無限... ... ...

 

每晚同ah Be 傾吓心事, 有開心、有唔開心、有無聊、有認真...

講得最多嘅係我好愛您、我好鍾意您... 等等... (好肉麻...)

早幾晚...

ah Be : 媽咪, 你愛唔愛我??

mamemo : um... 愛呀!! 有200%~~

ah Be : 吓?? 200% 咁少??

mamemo : 少?? 200% 喎!! 多過100 喎!!

ah Be : 應該係無限架嘛!! 無限多好多架!! 你快啲答無限啦...

mamemo : 哦... 係... 無限...

ah Be 聽完我答無限之後, 佢好滿意咁錫咗我一啖... 

*** *** *** *** *** *** *** ***

有晚, ah Be 要求上大床一齊瞓.  好啦!! 一晚咁多啦!!! 瞓到半夜, 突然聽到有人講嘢...

有人 :  吓! 黃小姐??

有人 : 你要搵黃小強?? (我個全名!!!)

我同超爸即時彈起對望, 繼而大笑!!  有人發開口夢呀!!!!

*** *** *** *** *** *** *** ***

有日, 我哋同婆婆去食日本拉麵, 有個小朋友攞咗我杯飲品嚟飲, 然後話...

小朋友 : 嘩!! 真係好解渴喎!! 不過我有少少急 v v...

解渴同急 v v 有咩關係呢?? 令人費解... ...

意外驚喜@校內才藝比賽

(我想打人... 打完篇 blog, 成篇無晒... 要重頭打過!!!!! 唔好怪我呢篇打得咁乸犀...)

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

年初, 收到有關才藝比賽通告

如有興趣, 自行交回條報名

一向懶惰的 Be 家

唔係太熱衷報名比賽

但今次... 我有點唔好意思...

成日對學校嘅活動無反應

我自覺要ah Be 對學校有多啲歸屬感+投入感

所以, 我叫佢自選一項目報名

佢選擇咗 ~ 粵語獨誦  (有點叫人意外... 粵語!!! 真係估佢唔到...)

報名後

我要ah Be 背熟學校指定文章

(學校無訓練提供俾參賽者, 食自己)

我同超爸用謹有少少朗誦知識教佢

例如 : 聲音控制同感情表達...

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

農曆新年假期後

進行初賽

初賽完畢, 問 Be 順利嘛??

Be 答 : 順利, 老師讚我聲音夠響!!

不過, 朗誦到中段時... 突然唔記得 (斷片??!!)

要老師提水...

佢自己有少少唔好意思

我話 : 唔緊要啦!! 呢次係一個教訓, 下次要認真練習啦!!

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

三月收到通告

ah Be 入咗決賽

復活節假期後進行決賽

喺復活節假期尾聲

同佢再練習一下, 執執啲細位...

至少... 唔好再斷片啦...

比賽完, 當日放學問 Be 順利嘛??

Be 答 : 好順利呀!! 今日係喺禮堂個台上獨誦

我問 : 你唔驚咩??

Be 答 : 唔驚! 我仲大大聲表演
.
我問 : 咁犀利??

Be 答 : 係呀! 好勁! 有啲同學好細聲, 好似讀俾自己聽咁...
(邊講, 邊遮住個嘴, 陰陰笑, 好似啲八婆講是非咁...)

一去到呢啲位

佢就會鬆毛鬆翼

個衰樣懶得戚

典型獅子座個樣出晒嚟...

嗰刻真係好想打佢... 囉!!!

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

上星期五 (3/5) 放學

ah Be 話佢攞到季軍!!

 好驚喜呀!!!

返到屋企睇通告...

咦!! 亞軍喎....

ah Be 話 : 老師真係話我季軍架!!

哦... ok, 到頒獎禮時咪知囉~~

唔使擔心~~

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

(11/5) 今日家有喜事

要返學校出席頒獎禮
(真係無幾可... 可能呢六年小學生涯得呢一次, 要好好珍惜!! 爆!!)

返到學校報到時

謎團解開啦!!

原來...

ah Be 個同名同姓(唔同寫法) 嘅隔離班同學都有獎

ah Be 係亞軍

同名同學係季軍

老師提醒佢哋聽清楚班別先好上台攞獎...

ah Be 領獎一刻

我真係好開心架

我開心唔係完全因為佢贏咗

輸贏對我嚟講唔係最重要

最重要係

佢贏咗個自信心同成功感返嚟

希望佢可以繼續努力!!