Water... Car

剛剛喺FB

睇返2011年今日 (05-10-2011) 嘅 status

原來Be 有段咁嘅說話

"Ah Be 剛剛見到一架水貨車

同我講：媽咪，水貨車呀！

然後佢喃喃自語... Water... Car...

Kekeke... 囝，你的外語又進步了... -.-"

都真係幾無聊...

因為呢個 Blog 會喺將來送俾Be

所以無聊事都會盡量記低... 見諒!

苯蛋? 定復活蛋??!!

回帶到今年四月的某一個星期六晚~~ 

某電視台首播｢那些年... 我們一起追過的女孩｣.  

我同超爸坐定定睇, 

而 ah Be就斷斷續續、邊玩邊睇.  

有一幕講柯敬騰同沈佳宜互相罵 : ｢苯蛋! ｣時,

ah Be 睇到眼定定~~ 入晒神... 

第二日朝早, 我突然聽到ah Be 大嗌 : ｢你是個復活蛋! ｣(普通話)

我立刻望住佢, 當時嘅ah Be 係用柯敬騰嘅神情+情感+語調再講一次 :  ｢你是個復活蛋! ｣(普通話)

我忍唔住大笑, 話: ｢你是個苯蛋! 呀苯蛋!! ｣(普通話) 

ah Be 即時露出尷尬嘅笑容+" R "頭, 回答: ｢係咩.... 苯蛋??｣

圖表

上星期四做完天灸, 帶咗ah Be 返公司執埋少少手尾.

當時我做緊呢類圖表, ah Be 指住高位話 : ｢媽咪, 呢點係升喎! 呢個跌咗好多呀! ｣(指住低位...)

我個心驚一驚... 

心諗 : 吓... 阿仔千其唔好做媽咪呢行... 真係夕陽工業... 賤過地底泥... 零尊嚴呀... (又陷入妄想中... 唔怪得我架... 壓力大吖嘛... 如果睇唔開, 好易有妄想被迫害症... )

跟住ah Be 叫返我個魂魄返嚟, 問我攞紙畫公仔

ah Be 畫咗無耐... 我聽到佢講野... (唔好驚, 唔係講"怪"野...)

ah Be 口中唸唸有詞 : ｢中國海洋跌兩毫子, 跟住升五毫... (下删數十字) ｣ 一邊畫線

ah Be開始畫第二條線, 又唸唸有詞 :  ｢中國痕河跌五毫子, 然後升三毫... (下删數十字) ｣

就係咁... 佢好忙咁畫 + 唸唸有詞... 

完成圖... 嘩!! 我偶像 ~ 方展博呀!!!!    點解 ah Be 會變方展博架!! (我又癲咗...)

學習游泳篇

8月11日下午, ah Be 同 Joshua 又再見面 (短聚)~~  今次係玩水

地點 : 喺燒姨姨屋企個天台嘅吹氣泳池

起初, ah Be 堅持個頭唔濕水.  後尾佢見到 Joshua 哥哥游水游咁好, 加上小龍嘅鼓勵, 終於佢肯踏出第一步 ~ 試閉氣入水.  ah Be 聽住小龍口述如何閉氣入水 + Joshua 從旁鼓勵, 好快就學識閉氣潛水嘞~~ 

ah Be 游嘅泳式係 ~~ 狗仔式 ~~ 去片~~

**多謝小龍同Joshua~~

Joshua哥哥回港篇

ah Be 日望夜望都想再見返佢好鍾意嘅 Joshua 哥哥... 終於喺一年半之後嘅8月4日, Jim 豬帶咗Joshua哥哥返香港.  小龍提出接 ah Be 返屋企小住兩日(原本小龍係想佢住三日架, 不過隻衰野驚自己喺其他人屋企瞓唔著, 所以佢想住兩日試下先喎~~ 最弊又後悔唔玩三日... 真麻煩 )

8月9日朝, 我約咗小龍喺公司附近交收人質~~

ah Be, Joshua 重遇嗰剎那間... 啲花火大到呢~~ 仲嚟一個大擁抱~~ (非筆墨可以形容...)

短短兩日, 佢哋好遊客地去咗好多地方~~

海洋公園

太空館

坐渡海小輪~~

可惜Joshua返得嚟十日就要走... 唔知幾時再見啦~~~  希望好快可以再見面~~

**頭先佢哋兩個 facetime 呀~~ 好搞笑~~

續... 釣魚台對話

mami : ｢ah Be 去日本旅行啦!!｣

ah Be : ｢我唔去日本! ｣

mami : ｢咁... 我哋去日本, 去捍衛釣魚台, 好唔好??｣

ah Be : ｢好呀!! 好呀!! 去釣魚台捉返啲警察... ｣ ... 當時的 ah Be 壯志盛盛 ....

**當時, 佢mami ~ 我真係想死... 頭上有隻烏鴉由左至右飛過 + 滴汗....

釣魚台 + USB (飛虎)

釣魚台

尋日 (18/8)下午, 我哋一家三口喺 ｢一風堂｣食拉麵, 超爸講起免費機票換領期限到, 要快啲換!  超爸提議目的地 ~ 東京 (我家亂談時間, 唔代表真係去東京架~~). 
於是, 我問吓ah Be :

mami : ｢ah Be, 去唔去日本旅行呀??｣

ah Be : ｢我唔去日本喎!  ｣

mami : ｢...吓... 點解唔去日本呀?｣

ah Be : ｢日本好曳架... ｣ ... mami 有十萬個問號喺頭上....

ah Be 再續 : ｢日本成日扮釣魚台扮係自己架... ｣

mami 試探中 : ｢哦... 日本將釣魚台扮係自己嘅..., 咁其實... 釣魚台係邊個架? ｣

ah Be : ｢係我哋中國架囉!!  ｣  你哋無睇錯, 我亦無打錯, 佢真係用"我哋中國"... 成個愛國大叔咁...

**個人感想 : 其實阿吳局長使乜咁急強推國民教育, 慢慢嚟都得啦!!! 而家啲小朋友都已經好愛國啦~~ o徒氣!!

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡ ♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦

USB (飛虎)

食完 lunch, 我哋要去玩飛虎體驗... ah Be 入課室受訓完之後, 佢第一句同我講嘅說話係 :「我係USB！」

我心裡即時大笑... + 想講 :「係SDU呀！傻仔~~」wakakaka...

有朋友將 "USB" 翻譯為 ~ Unexpected Smart Boy... (我覺得用呢個名詞套落 ah Be 度... 有啲牽強囉... ...)

生肖...

喺ah Be 未出世之前, 我已經知道千萬唔好同小朋友講你嘅真正生肖係咩東東.  如果唔係佢哋知道咗就"大近視" 啦~~ 好快... 識你同唔識你嘅人都會知道你嘅生肖 (即係知道你幾多歲啦...).  佢哋真係會唔理任何場合, 會爆俾人知你屬咩生肖....

今朝, 我同ah Be 搭車時, 同佢傾傾吓偈... ah Be 突然話自己係狗....

ah Be : ｢我係一隻狗!  ｣

mami : ｢...吓... 狗???  咩狗?? 唔好話人係狗呀! 好侮辱人哋架, 好無禮貌架...｣

ah Be : ｢哦, 知道.  不過我屬狗架喎, 所以我係一隻狗! ｣ ... mami再一次滴汗....

mami : ｢...哦... 原來係咁... 下次表達得小心啲呀, 知唔知? ｣

ah Be : ｢知嘞~~ 咦! mami, 你屬貓架喎, 咁你咪係 "貓"mi 囉 ｣  (哈! 哈! 我係咪好聰明呢... 咁都俾我諗到~我係屬貓嘅... kaka~~ 沾沾自喜中~~  )

mami : ｢係呀! 係呀! ｣

ah Be : ｢咁爸爸係屬龍架喎! 佢可以叫佢龍爸囉... ｣

mami : ｢係呀! 係呀! ｣ ~  陪笑中...

ah Be 在小巴中再揚聲講 : ｢以後呢, 我叫 "狗 B", 你叫 "貓 mi", 爸爸叫 "龍爸" 啦!! 好唔好呀?? ｣

mami : ｢好... 好... ｣ 登時... 頭上有隻烏鴉由左至右飛過 + 滴汗....

天灸

ah Be 由出世到而家, 一直俾鼻敏感+氣管敏感纏繞

上星期有位中醫師話天灸 (穴位敷貼療法) 應該可以幫佢改善敏感問題

(註 : 三次為一個療程, 最好效果係全年最熱嗰三日貼)

不過我哋錯過咗其中最熱嗰兩日

所以, 只可以喺第三個日子 ~ 上星期二 7/8 立秋, 貼第一伏 (醫師話唔跟最熱嗰三日, 效果會差少少)

今晚係貼第二伏


ah Be 對天灸反應 : 

第一伏, 只係貼咗四十五分鐘, 就嗌晒救命!! 要除出嚟.  第二朝, 出現傷風徵狀...
(醫師話ah Be身體迫咗啲風寒出嚟) 

第二伏, 可以貼到一個鐘頭三個字.  未有不適...

成效未見到, 有待觀察~~

下星期貼埋最後一伏藥再報告~~

與海馬對話...

最近見到一則報導 ~ 因為環境+人類濫殺海馬, 所以有專家估計海馬將會喺數年內絕種... (好可惜...)

尋晚喺藥房執藥時見到啲海馬乾, 於是同 ah Be 講呢段報導

ah Be 問 : ｢咩係絕種? ｣

媽咪答 : ｢絕種即係解.... (下刪數十字....) ｣

ah Be 答 : ｢哦... 啲海馬好可憐呀... 俾我哋殺死晒... ｣

媽咪答 : ｢係呀... 我哋要.... (下刪數十字....) ｣

*** *** *** *** *** *** *** *** *** *** *** *** *** *** *** *** *** *** *** ***

對話完之後, 大家又繼續等...

喺呢個時候, 我見+聽到ah Be 望住玻璃櫃入面一盤海馬乾講嘢...

ah Be 問 : ｢海馬仔, 你哋好嗎?  你哋喺度住咗幾耐?  仲未有人帶你哋返屋企呀?? ｣

等咗兩秒, ah Be 再答 : ｢吓... 無人呀? 咁我下次嚟見到你, 帶你返大海住啦, 好唔好?? 乖乖... ｣

 媽咪答 : ｢傻豬, 呢啲係海馬乾, 唔可以返大海架! ｣

ah Be 問 : ｢媽咪, 佢哋死咗嗱? ｣

媽咪答 : ｢係呀, 無得復活lu... ｣

ah Be 答 : ｢佢哋好慘呀...｣

I so love you

頭先同 ah Be 睡前親子talk完 (其實晚晚都要傾一傾...), 我要出房做少少家務, 要 ah Be 自己瞓先~~

轉頭我入房睇吓佢有無踢被.  果然踢被~~ 

當我幫佢蓋被時, 佢朦朦鬆鬆地講咗一句 : ｢唔該媽咪! ｣

我打咗個突  ... 然後我邊拍拍佢個屁股, 邊話 :  ｢唔使客氣!  乖仔,快啲瞓!! ｣

個傻佬 Be 又邊笑邊瞓, 好細聲答 :  ｢I so love you! ｣

我話 :  ｢吓! 咩話?? ｣

個傻佬 Be 再好細聲答 :  ｢I so love you... ｣

我話 :  ｢吓!  哦... ｣ 其實我都係聽得唔多清楚... 仲係估估下... 我諗佢當時係半夢半醒狀態...

個傻佬 Be 再答 :  ｢我超愛你呀! 媽咪... ｣, 一講完, 再陷入半昏迷狀態...

我真係想...

** 我要即刻寫低佢... 我真係驚我會唔記得... (我真係會唔記得架...) 都係嗰句, 呢個 blog 係留俾將來嘅 ah Be 睇嘅.  如果我同超爸 / 我自己老來無人陪, 超爸/ 我都可以慢慢重溫, 細看回味吖嘛... (雖然而家嘅 ah Be 好識做, 話咗佢大個之後會點... 點... 點對待我哋兩老.  不過, 我哋老來都要識做, 要有自己嘅生活 (呢段係留俾自己老咗睇嘅...).  唔通要佢做個裙腳仔咩...)

那些年

28/7生日會後,

一眾表兄弟姐妹要求我哋幫佢哋拍一張「那些年」嘅相。

佢哋仲未受生活洗禮, 仍然係一臉無邪~~

希望佢哋二十年後感情如一!

咪郁~ 舉起雙手!!

上星期二(24/7) 係嫲嫲死忌, 大家要返爺爺屋企食飯.  

飯後, 突然有人大聲講 : 咪郁~ 舉起雙手!!

原來係 ~~~ 呢個臭 Be


佢攞咗爺爺俾佢嘅香蕉嚟玩... (◎_◎) 

幫佢影張相時, 仲扮個 chok 樣... (*´ｪ`)

ah Be 的幼稚園生活 ~ K1第一天和K3最後一天

好唔捨得.... 

終於嚟今日嘞~~

2012年7月17日 ~ ah Be 最後一日的幼稚園生活...

佢將要離開快樂的幼兒期
(我會盡力將ah Be嘅快樂童年延續落去~~ 因為我相信快樂童年係人世間最真貴嘅禮物...)

由九月三日起, 佢會踏入人生嘅第二階段 ~ 正式成為一隻"填鴨小學雞" (我都唔想佢... 咁...)
(我一定唔要自己成為"怪獸家長", 我要ah Be 有愉快學習 )


今日睇返 ah Be ~ K1 第一日返學嘅相片, 我有啲感慨... 有啲激動...

我好想同 ah Be 講 :

K1第一天和K3最後一天的ah Be, 整個人有很大的分別~~
但在媽媽的心中，您永遠是媽媽的一塊肉。
無論您將來是一個怎樣的人，媽媽也會很愛您！
媽媽對您沒有很大期望，只希望您能做一個光明磊落、有同理心的人！
 同時亦要做一個快樂人！

與爺對話

有日爺爺同ah Be傾偈,

同ah Be 數ah Be去過邊到旅行.

爺爺數完之後,

同ah Be講 : ｢你都去咗好多地方喎! 日本都去咗幾次!｣.  
跟住大伯父話: ｢係囉! 你真係去咗幾多地方喎!!｣

ah Be 好誠懇地答 : ｢唔係呀! 我仲有好多地方未去架! 英國未去, 美國都未去....  ｣

 爺爺同大伯父即時唔知點反應...  

亮化詞語

近呢兩個月, ah Be 講說話技巧又進一步.  好多時會避重就輕, 又或者亮化一啲詞語, 美化咗成件事.

例子一 : 做功課寫錯生字時 ~ ah Be 會自言自語講 : ｢弊家伙!! 寫錯咗, 等我攞"魔法擦紙膠"出嚟變走個字先得....  ｣  ~~ 魔法擦紙膠... 個名真係好得體呀...

例子二 : 夜晚刷完牙, 我耐唔耐會檢查一吓佢刷得佢乾唔乾淨.   有晚要檢查佢時, 佢依起棚牙話 :  ｢你睇吓 ~ 閃令令架!! 好乾淨... ｣ (又自己讚自己啦...)

例子三 : 當佢見到啲佢好想食嘅食物, 佢就會形容啲食物係 ~ "香噴噴"、"so yummy"、"超好味"... 等等...

例子四 : 每當超爸爸煮飯佢食, 佢食緊啲佢覺得好好味嘅餸嘅時間, 佢就會同超爸講 : ｢爸爸, 你真係全世界最叻嘅廚師... ｣  誇張到無朋友...

串燒豬柳

今晚係公司 annual dinner, ab Be 唯有留喺婆婆屋企等我哋返去接佢, 最慘係...  婆婆跟咗佢細佬返咗鄉下玩~~ 悶到ah Be 發毛~~  耐唔耐就打電話俾我, 問我幾時返?? 到差不多十一點, 開始喊住咁打電話嚟話要返屋企~~    我唯有安慰佢叫佢等下啦~~ 媽媽好快返~~ 約十一點半, 佢好開心咁打電話俾我, 話舅父買咗串燒俾佢食, 啲串燒好好味!! 仲話要留啲俾我食.

annual dinner 完咗之後, 我同超爸即刻返婆婆家接已熟睡嘅 ah Be (如果當晚唔接佢返屋企, 佢第二朝會好早起身兼勁喊架...), 姐姐送上一個袋子~~ 原來係ah Be留給我的一串~串燒豬柳~~

Be, u r so sweet~~   

曱甴怕甜定怕臭??

頭先傻Be 食完藥上床瞓覺, 當佢錫我一啖時, 我發現佢個嘴仔仲係甜嘅, 我叫佢快快抺嘴, 如果唔抺, 啲曱甴會爬入佢嘴巴,  佢抺完嘴返嚟之後, 就張開口俾我聞一聞, 然後問我 :

傻Be : ｢ 媽咪, 我個嘴巴臭唔臭呀?｣
媽咪  : ｢ 少少臭啦! 快啲合埋口.｣
傻Be : ｢ 臭呀!  咁啲曱甴咪唔敢爬入我個嘴巴囉!!｣ 
媽咪  : ｢ 吓! 唔係喎...  曱甴鍾意臭... 好鍾意匿埋喺臭地方喎... ｣
傻Be : ｢ 哦...  曱甴鍾意臭嘅... 咁... 佢哋好似怕甜架喎... 如果我個嘴巴有甜味,  啲曱甴就唔敢爬入嚟囉... ｣  
媽咪  : ｢ 其實曱甴鍾意臭味、污穢、甜味同埋食物, 知唔知呀?? ｣ 
傻Be : ｢ 知道啦! 咁我個嘴巴要有咩味, 啲曱甴先怕呢?? ... ... ｣   (仲諗咩味??!!)

好彩,  傻Be 突然瞓咗! 如果唔係都唔知點講落去...我驚我會忍唔住打佢呀... (佢成日都瞓得好突然架, 話瞓就瞓...)

四眼怪~~ (這篇 blog 內容涉及驚嚇情節)

上星期六 ~ 警方發現一隻 ~ 有手有腳嘅 ｢四眼怪｣喺元朗區一棟村屋出沒

最後由｢捉怪｣專家 ~ mamemo 捉拿返家作檢查、研究

因 ｢四眼怪｣屬罕有動物, 所以暫時保密住處

｢四眼怪｣個人資料如下:
暫名 : 傻 Be
身高約 120cm
體重約 23-25 kg
年齡約 5.5歲

▼
▼
▼
▼
▼
▼
▼
▼
▼
▼
▼
▼
▼
▼
▼
▼

｢四眼怪｣容貌密絕曝光

｢四眼怪｣ 朦豬 look


｢四眼怪｣ 扮精靈 look


mamemo 無聊完畢, 多謝收看!! 

童言 ~ 爸爸出差記

超爸每年需要出trip約兩、三次, 每次都會離港約五至十日.  以前超爸出trip 對ah Be嚟講無咩感覺 (佢癡mami 筋嘛...), 爸爸喺唔喺度都無所謂.  不過自ah Be 四歲起, 情況有轉變嘞~~  佢開始好享受同爸爸相處嘅時間  每次爸爸出 trip, 佢都會好唔捨得, 會掛住爸爸嘅~~~

星期一 (28/5), 爸爸要去峇里五日, 個傻 Be由星期日晚開始, 不停同我講會好掛住爸爸, 又會問點解爸爸要去開會開咁耐? 

星期日晚臨睡前, 傻Be問我又同我講以下對話 :

傻Be : 爸爸會唔會返唔到嚟架...
mamemo : 爸爸去開會幾日咋, 唔係去打仗, 梗係會返嚟啦~~ 傻瓜! (◎_◎)
傻Be : 哦... 真架?? 真係會無事??

星期一朝早, 傻Be 特登7點起身同爸爸講bye bye, 仲要飲泣咗好耐添... 話唔捨得爸爸飛咁多日喎...  我唯有叫爸爸啜佢一啖啦~~

父子兩人幾癡纏~~ 一早起身牙都未刷、臉都未洗就視像傾偈~~