慈善獎券活動

之前收到學校通告, 告知其學校嘅總教會 ~ 竹園區神召會需要籌募經費, 作提供安老, 幼兒及家庭等服務... 所以希望家長幫幫忙協助銷售.  我同爸爸都覺得有意義, 因為學校係非犀牟利團體, 平時學校灌輸好多心靈滿足嘅概念俾小朋友, 例如 :  協助小朋友送衫給需要的人.  所以今次活動我哋一家全力支持....  

喺呢度, 我要多謝幫我哋買慈善獎券嘅朋友.  再一次送上感謝詞. (唔係抽獎券都買仲唔係朋友!!!  )                                                    

http://hk.video.yahoo.com/video/video.html?id=1478957  

第一次學校冬季大旅行

行程 : 9:15分學校集合 -> 粉嶺香薰園 -> 元朗吃自助餐 -> 馬灣公園 -> 16:30回程

今日係小Be 第一次學校冬季大旅行, 好期待!! 原本我哋心情好興奮, 但差不多到達香薰園時, 小Be 突然嘔吐, 嘔到我右邊身至大腿全濕 ... ... 唔使驚, 小Be 有衫換, 係我無囉, 去到香薰園我9秒9沖入洗手間 "沖衫", 然後喺太陽底下晒乾... 跟住同小Be 喺薰衣草園影相, 餵魚魚(仲餵到忍唔住攞魚糧食tim) 同睇羊咩咩, 而婆婆就坐喺小食部等我哋.  中午去到元朗食簡單自助餐, 小Be 同婆婆食得好開心!! 跟住我哋就去馬灣公園, 不過小Be 不敵睡魔喺車度瞓著咗, 去到馬灣我哋揾咗度地方坐俾小Be 瞓.  小Be 今日好扭計, 唔知係咪今朝嘔完唔係好舒服呢. 小Be 瞓咗一陣就起身.  我哋只係周圍行下, 婆婆就坐定定唔郁. 到4點半就回程.  仲返婆婆屋企同公公一齊"打邊爐" tim. 

同學仔合照   

拖婆婆去洗手間~真乖!!       

 

• 生活記敍, 
• 男

冬季校服

呢幾日開始涷啦! 學校喺星期一先派冬季校服, 但過大啱唔著要換.  喺星期二同三小Be發燒 (如小Be所願) 無返學.  到今日星期四先返學, 我同佢換上新季校服, 小Be覺得好新鮮... 周圍走... 哈哈!

扮model 喎!                                                   

但好快出現疲態, hehe!                              

媽咪mo, 開門走啦! 慢吞吞... ...                            

• 生活記敍, 
• 男

下雨天

今朝早好大雨, 唯有等爸爸起身同我哋一齊出門口.  

小Be當然會遲到啦!! 

我仲俾公公鬧我無時間觀念, 令小Be遲到tim... ... 媽咪mo 真係好無辜呀!!! 小Be呢幾晚唔舒服, 瞓得唔係幾好, 所以唔願起身... ... ...

雨褸 x 校服                                                               

學習看書本

學校為鼓勵學生從小培養閱讀興趣, 推行每星期閱讀2本圖書獎勵計劃. 老師會喺圖書館選出適合圖書, 每星期五會連同閱讀報告放入學生書包內, 家長在週末陪同學閱讀及做閱讀報告, 每星期五交回學校.  所以小Be由前星期日開始學習睇書... ... ... 辛苦晒! (呢句係同我自己講嘅... 因為捉小Be睇書好似玩麻鷹捉雞仔咁... )

第一次同小Be睇書, 激到我同爸爸嘔血... , 睇得兩頁就拒絕睇落去... 好辛苦先完成!!

第二次(尋晚), 情況好轉咗, 可能我用咗另一個approach, 就係臨瞓前開住床頭燈, 同佢用好生活化嘅語氣講解佢聽.  仲要有互動架喎. 好順利地用咗20分鐘就完成咗2本書, 今朝小Be仲話要睇多次tim 

小Be而家成日表情多多, 好鬼馬, 好浮誇... 

N1開學的第六～九天

第六日(8/9) ~ 今日小Be 入校門時, 喊得地犀利, 攬到我實一實, 唔肯放手.  要校長強行抱佢入課室.  不過, 根據我嘅觀察, 小Be 一入課室已經收聲... 

第七日(9/9) ~ 今日出門前, 我同小Be 講, 返學咁開心, 唔好再喊啦, 好唔好?

小Be 答 : 好呀! 咁我哋咪開開心心出門口囉. 

去到學校附近, 小Be要自己行到學校門口, 跟住好順勢咁入校門, 最後同校長入埋課室 tim.  整個過程非常順利!! yeah!!! 

第八日(10/9) ~ 我嘅心情有啲緊張!! 因為唔知今日小Be 入校門會唔會喊呢?? 我送小Be返學途中嘅心情異常忐忑!! 

喺學校附近時, 小Be 要我抱佢, 我個心一涼 (莫非今日佢會攬實我喊??) 

好彩, 小Be 喺校門前要落地地, 原來佢要自己行入學校!!! 小Be 真叻仔!! 我要喺度送粒俾佢!!! yeah!!!! 成功!!!

第九日(11/9) ~ 今日小Be 除咗自己行入學校外, 仲回頭同我揮手講 bye-bye tim, 然後同老師擁抱.  我真係好開心呀!!! 俾想像中容易handle. 小Be 好乖仔啊!! 

根據我同爸爸呢兩日嘅觀察 (其實係靜靜雞由窗外裝入課室), 小Be嘅校園生活如老師所講, 係鍾意企埋一邊望住同學玩, 然後自己喺度笑, 傻傻的...

等的士等到無晒心機 ... 

每朝早都會出現呢個瞓唔醒嘅 look!! 死未!!!

N1開學的第三～五天

呢３日係小Be自己上堂嘅日子，每朝早我同小Ｂｅ都風塵僕僕咁搭的士返學！特別係喺星期三（３／９），嗰日大落雨，又無的士又無小巴，真係好傍偟．．．最後咪遲到囉．．．　

呢３日小Be都喺入學校時喊，但老師話佢入課室已經收晒聲．咁我又問吓老師小Be嘅上課情況，老師話Be嘅表現都 ok，不過就少同同學玩，成日自己玩同坐埋一邊，最好笑係小Be成日坐埋一邊睇其他小朋友，跟住喺度傻笑．．．　

每日小Be都同我講返學好好玩，又成日提住老師，老師．我諗小Be其實都幾鍾意返學，只係未適應同我分開．希望下星期會好啲啦！！

N1開學的第二天

今日係小Be 返學嘅第二日，表現都ok 啦！都會聽老師話，玩完大車車之後泊返車車埋原位！仍然係唔肯做體操囉！同仍然唔肯同同學玩囉！

時日茶點係～粟米粥．到放學時，老師又準備咗一份"小禮物"俾各位小朋友，份禮物係 ～一把米奇老x手扇！

 唔該爸爸！

運動服 look！

又係玩大車車，厭唔厭架！

茶點好味道！

喂！係係！好！Bye-bye！

狗狗，你好 ma！

畫畫先！！

N班開學的第一天

今日 (1-9-2008) 係小Be 人生好重要嘅一日 ～ N1 預備班開學日．一早 8:10 起床，然後飲奶奶同梳洗，再換校服，一行3人 (爸爸,媽媽) 喺 8:45 出發 lu！返到學校小Be 嘅表現都算ok 啦！耐唔耐走過嚟拖住我，(因為爸爸,媽媽喺第1，2日可以陪佢) 佢都算肯聽老師話，不過唔肯做體操囉！

雖然只係返一個鐘頭學 (今個星期每日只需要返學一個鐘 9:00~10:00)，但都做咗好多嘢．首先喺遊戲室玩 -> 做體操 -> 排隊去洗手間 -> 入課室吃小食 -> 玩玩具 -> 放學．放學時老師仲準備咗一份"香港迪x尼玩具"作見面禮俾各位小朋友 tim！

今晚喺瞓覺時，我問小Be 鍾唔鍾意返學，對答如下：

媽咪mo：Bebe 鍾唔鍾意返學呀？

小Be：鍾意返學呀！

媽咪mo：鍾唔鍾意老師呀？

小Be：鍾意老師呀！

媽咪mo：鍾唔鍾意同同學玩呀？

小Be：＠＃＄％＾&*()_＋～ (係無正面作答！！ 仲要成身扭來扭去 tim)

到我叫佢送個"Goodnight Kiss" 俾我，有以下內容：

媽咪mo：Bebe可唔可以鍚媽咪一啖呀？

小Be：唔得！

媽咪mo：嗚．．．嗚．．．嗚．．．嗚．．．．． (我唯有扮喊啦！)

小Be：媽咪mo，唔好喊！乖！唔好喊！ (佢行埋嚟，好似輕輕攬住我，一邊拍我肩膀，一邊講！跟住錫番我！)

媽咪mo：好呀！(我用咗佢嘅語氣回答，同偷偷哋奸笑 tim！)

喂！婆婆，我要返學啦！

爸爸抱！

媽咪 mo，你做咩呢？

初嚟步到，玩啲文靜啲嘅玩具先！

我好鍾意玩呢架車架喎！

喂！同學仔，咪撞過嚟，好危險架喎！

茶點時間，有cereal＋牛奶，好味道！

姨媽，做咩呀？

好叻仔喎！識得自己食mum mum！

食完mum mum，執完碗，玩多陣先．

玩車車先．．．

請問有無見過咁為食嘅小朋友呢？茶點完仲要扮食嘢！！

時間到！放學 lu！bye-bye！聽日見！