小學雞小四旅行

消失咗成個月...

返嚟了...

尋日Be 考完今個學期嘅第二個試

今日係小學雞小四旅行日

是日午餐 ~ 今朝做咗 Salami+Chesse包

應該都好味呱...

今日天氣轉涼

口叫Be 執風褸入袋

最後當然無執入袋啦...

激死!!

*** *** ***

上年小三旅行日

烏瀡瀡的我...

居然帶漏咗Be個午餐盒...

臨上校車前

衝去聖nana 買包...

但聖nana 唔賣俾我... 因為仲欠3分鐘正式開門...

唯有去美金...

好彩店長見我趕校車

所以賣俾我... 感激萬分!!

*** *** ***

小二那年的冬天

有日

Be 拉唔到條褲嘅拉錬

叫我幫下佢

我好快咗一手執褲浪. 一手拉拉錬

拉完拉錬後...

見到Be 碌大眼望住我...

我問 : 拉錬又夾到你呀?

Be : 唔係... 媽咪... 你錬住咗我... J (好細聲...) ... 呀...

我 : Oh... sorry... sorry... 即刻鬆手....

 sorry... 又係我...

第一次獨自搭車

上篇提到

壓力overload...

我其中一個中招位係... 無記性

*** *** ***

今朝

我送臭Be 出去上校車

臨上小巴前...

我 : 咦! 我個袋呢??

Be : 媽咪, 你好似無攞袋喎...

我 : ... 點算呢... 如果返轉頭實趕唔到上校車... 我又無錢喺身...

Be : 媽咪, 我自己搭車出去吖!

我 : ... 嗯... 要過三條馬路... 其中兩條係小巴站同的士站, 啲車左穿加插, 好危險架喎

Be : 媽咪, 我OK 架! 俾我試下啦! 我會小心過馬路. 好似你平時帶我過馬路咁.

我 : ... 好啦... 你小心啲呀... 你得唔得架??...

Be : 媽咪, 我得架! 信我啦!

送完 Be 上小巴

我摩打腳返屋企攞袋追出去

打俾保姆姨姨

姨姨話Be 已經安全上車

鬆一口氣... 

*** *** ***

放學後

我問Be 今朝獨自搭車情形

Be : 媽咪, 我其實好緊張架! 小巴叔叔好好人, 知我埋站落, 叫我等埋站先落, 仲泊車喺路中心擋住啲車, 俾我過馬路.

我 : 叔叔真係好好人, 咁過的士站條馬路呢?

Be : 啲的士叔叔都好好人, 停車俾我過馬路.

我 : 啲叔叔真係好好人呀!  所以咁順利,  你以後過馬路都要好小心, 睇清潔, 唔係個個司機叔叔都咁好人架! 知唔知?

Be : 知道,  媽咪!

意外@日本池袋 2008

最近突然諗返起一件ah Be 外遊時發生嘅意外事件, 一諗起就忍唔住笑咗出嚟.... 真係好好笑架!! (無人性!!)

日期 : 2008年6月某日 (十零號)
地點 : 日本池袋 Sunshine City
人物 : ah Be (22個月)

嗰日應該係臨離開日本前一、兩日, 我哋一家三口喺池袋游嚟游去作最後衝刺~~ 而ah Be 喺呢個旅程勁癲~~ 勁癡媽筋~~ 扭到我想 ｢打佢鑊甘｣ 嘅!!  軟硬兼施都唔得... 攪到我都癲癲地~~~

佢喺 Sunshine City 行行下街時, 又係勁扭我抱, 我狠狠的教訓完佢, 然後要佢坐上 BB 車, 佢當然又係扭啦~~ 扭扭下又有啲攰...

我推住架BB 車... 行行吓... 突然間停低咗...

咦! 點解架車唔郁嘅?? 有啲野頂住咗喎...

再望吓前面地下... 咦! 點解 ah Be 唔見咗嘅???  去咗邊呢??? ( ☉_☉) 
原來係 ...

▼

▼

▼

▼

▼

▼

▼

▼

▼

▼

ah Be 趴咗喺地上 (正確嚟講係坐坐下BB車向前仆咗落地...)
 
形態如下圖... (背脊向天, 臉貼地)


我同超爸即時反返佢過嚟, 抱起佢...

當時佢臉容扭曲... 痛到喊唔出...  (陰公豬...)

我同佢檢查身體一輪, 確定佢無內傷

只係個鼻哥尖紅腫咗少少

OK 啦~~ 小朋友要跌下至會大架嘛~~

無事~~ 無事~~

我... 就緊係俾超爸鬧到隻嘢咁啦... 

咁唔小心... 咁唔安全... 唔扣實安全帶...

係... 佢碌落地嘅原因係... 無扣安全帶...

我唔想架... 佢扭到... 大家都無時間做安全措施...

下次唔會啦...

SORRY SIR!

最後隻陰公豬要熄燈抖一抖

想重溫2008 日本之旅, 請按此 "重溫" 

虎媽親子剪髮回憶錄

話說四年幾前嘅某一朝早

我悶悶地, 手痕痕

捉咗ah Be 入厠所

同佢剪咗呢個靚髮

識我嘅人都知我湊ah Be 湊得好粗

唔會好"就" 住佢

去到邊, 食到邊 (返大陸除外...)

只要無危及生命嘅事 (其實我湊佢至係最危險嘅事~~)

我都唔介意俾佢試多啲唔同嘅野

入返正題~~

喺剪到耳仔邊時

ah Be 好驚, 係咁縮 (佢好驚聽啲怪聲架...)

突然之間, 佢 "哎呀" 咗一聲

我捉住佢望清楚... 檢查一下

無事喎! 跟住繼續剪...

終於剪完嘞!!!  同佢梳返靚仔樣

望吓 o 唔 ok 先~~

一望...  咦... 點解佢右邊耳仔頂有啲嘢嘅?? 

哦... 原來係... 一滴血...

原來頭先... 我剪到佢隻耳仔呀~~~

我呢位虎媽真烏龍... 好彩我有個刻苦嘅囝囝

真係天作之合啦~~ 

*** *** *** *** *** ***

仲記唔記得 ah Be 兩歲零時呢個 look 呀??

咪就係我同佢親子剪(耳) 髮嘅髮型囉~~

我覺得好得意架~~ 

其實原本可以剪得靚啲架

喺剪前額時...

有一下, ah Be 突然大郁咗一下....

弊傢伙... 剪崩咗...

唯有將前額剪短啲啦...

講真, 我又覺得呢個短髮 look 好得意, 好搞笑

*** *** *** *** *** ***

兩歲零舊相回顧~~ (嗰陣時, ah Be 真係好快樂, 無憂無慮架~~ 我好懷念~~~)

超鍾意佢呢張相~~ 小時嘅么果眼係我最愛~~

拉拉錬

大意嘅我 ~ 喺尋晚返緊屋企時, 見天氣好凍、好大風, 驚 ah Be凍親條頸 (氣管).  

於是, 我好順手幫佢拉拉錬, 由心口拉到上頸, 點知條拉錬順滑得濟... 臨拉到尾時... 有野頂實咗... 

噢! 原來夾到ah Be 條頸呀...  當時我哋四目交投... ah Be 係滿臉通紅+一對水汪汪嘅眼睛 ... 九秒九流出眼淚, 好真心咁邊喊邊講 : 媽咪, 我好痛呀... 嗚... 嗚... (我諗真係好痛囉...) 我唯有安慰下佢啦... (其實我係有少少忍唔住笑嘅... + 少少內疚嘅... ) 返都屋企, 睇一睇個傷口, 都ok 嘅... 係有個拉錬頭印囉...

到今朝我再睇下個傷口, 嗯... 個拉錬頭印淺咗好多, 即係好返嘞!! ah Be 一路同我講, 尋晚真係好痛... (哦, 我下次會輕手啲嘞!!!)