巴士奇談

22/2/2019

夜晚坐巴士回家途中

我同Be位置係T字位

我望他側臉

佢面向落車大門

頭轉左可望向我正面

佢拖著我手

Be：媽咪，我好鍾意坐呢個位......

我：點解呢？

Be : 因為坐呢個位正面可以望到車，一擰過嚟就可以見到你❤️❤️

🤦🏻‍♀️🤦🏻‍♀️🤦🏻‍♀️

坐喺我旁邊嘅爸爸呆咗😳😳

忍不住喺我耳邊：xyz@$~~係佢先講得出... ...🤣🤣

感恩有一個青春期得嚟都仲會氹我的兒子❤️

夫復何求⋯⋯

偽中產

今早坐地鐵

我見到FB 有啲靚装修嘅post

跟住叫Be睇

我：靚唔靚呀？

Be：靚，不過都冇機會住㗎啦！

我：吓！😮😮你係咪話我哋冇本事無靚屋俾你住？

Be：唔係呀！正常嘅中產其實都買唔到樓同住唔起啦⋯⋯

😱😱😱

#估你唔倒

#別人笑你太瘋癲你笑他人看不穿

#偽中產

員工之子

每一日都會同臭Be 傾下偈

學校丶生活趣事丶新聞丶上至天文下至地理同鬼古(佢近期愛上了)

今朝早

二人攤喺床度又傾下 

(自上小一起, 每年六月初大考後至八月尾係一年之中最美麗嘅親子時光)

同Be傾吓佢嗰班嘅WhatsApp群組

平日傾啲咩內容架呢？

Be：平日呢... ... ... ... ...

mamemo：哦... .... 哦.... ... 哦... ... 咁搞笑... ...

Be：尋日, 有同學將會轉電話no. ，叫admin 加返佢入嚟！admin同埋其他同學個個都回覆'nobody cares'，好好笑！

mamemo：佢咁慘 😂  😂

Be：仲有就係傾吓打online game 啲嘢！←_← (戲肉嚟啦......）有乜乜game 同乜乜game (下刪百字） 不過，我無乜乜game喎！我可唔可以download 呀？

mamemo：吓！ 梗係唔得啦⋯⋯

Be：媽咪，作為xXXx其下員工個仔無download 個game, 即係唔支持公司啦！係咪？

mamemo：我唔覺喎！要公還公，私還私～～

故事應該... ...  

完～了吧～如無意外～～

鴨脷洲口音

小六最後一個考試

如火如荼進行中

學校一直安排

星期四丶五 + 一、二

中段回一回氣

（我好鍾意呢個安排）

小三第一次轉校長玩新嘢

測驗連考三丶四天

大人丶細路吃不消⋯⋯

好快轉回正常運作

*** *** ***

今晚

有位中童讀緊佢最鍾意嘅GS

我問題目

佢口答

我囗痕問：xxx(答案)點串?

中童答：starvatio_ 🙄🙄 （好明顯係同佢阿娘玩遊戲⋯⋯）

我：咩口音呢？點解咁串？

中童答：鴨脷洲口音囉！你唔係唔知呀～～媽咪... ... 

（懶得戚地笑）

只可以講中童已日漸長大

唔會再任阿娘搓圓撳扁丶任人魚肉了......🤔🤔

防波堤

啱啱同Be 傾開

港珠澳大橋人工島防波堤嘅把石躉散咗啲
（應該係，除非唔係）

姑且不談係真特登定假特登

喺我地睇緊人工島設計圖 vs 實物圖時

Be突然指著人工島圖話 : 媽咪，個設計有問題！

我：有咩問題？

Be：個人工島應該升高啲嚟起，點解起得咁低？如果有海嘯點算？咪冲冧曬個島？啲水湧入隧道?

我：你諗多咗⋯⋯

Be：唔係呀！有機會海嘯㗎！起高啲，安全啲呀！

我：係嘅，你都講得啱嘅！

正義英雄

Be 學校會喺每個長假期時

要求同學寫中英文各一篇生活隨筆

喺新年假呢篇生活隨筆題目係 — 正義英雄

剛剛派返嚟

我一睇忍不住偷笑

個傻瓜居然寫我😂😂

我問：點然寫我？

Be : 作文，無特別

我問：你幾時同人打架？

Be：作咋，唔係真。

我：吓！

Be：作文，求其交功課... ...

Cool 到一個點🙄🙄

使唔使咁Cool 呀！🤔🤔

**佢已進入青春期.......

簽名

返咗學已經兩個星期

功課、通告開始多

Be 狀態尚可

一如以往

甩漏。。。小六。。。仲係多

某晚

Be 遞手冊俾爸爸簽名 

(好少俾爸爸簽, 通常我唔簽佢就俾爸爸簽)

Be : ｢Daddy, 幫我簽手冊吖, 唔該!｣

爸爸 : ｢簽名?! 簽邊度? ｣

Be : ｢呢度!｣

爸爸 : ｢簽咩名好?｣ (玩嘢mode)

Be : ｢嗯。。。金秀賢啦!｣

爸爸 : ｢哦。。。｣

陪著你走

8月中某夜

睡前講悄悄話

其中一段話 :

我: ｢Be, 如果將來有機會去外國... ...  ｣ (下刪百字)

Be : ｢媽咪, 我唔想去呀!我想同你.....   ｣ (下刪數十字)

我: ｢不過, ... ... ｣(下刪百字)

突然... 

耳邊有一把好輕嘅聲音響起唱... ... (不禁一怔... ... 咩料!)

｢ 陪著你走(走... 有震音...)　一生一世也不分


天天編出兩雙足印　過千山過千海


如果(果... 有震音...)　走到這世界邊端
 (端... 有震音...)

我倆已是無力前行　跟我一起飛去... ... ｣

接著... ... Be : ｢媽咪, 你明唔明呀?｣ ←_←'

我... ... 投降... ...了

我: ｢明... 明... ｣

愛上同一個人

今日難得假期

齊齊食飯睇電視

睇｢與諜同謀  ｣

劇情講兩父子愛上同一人... ...

我:｢有無可能兩父子愛上同一個人呢?? 編劇諗多咗... ...｣

我突然靈光一閃... 

我問 : ｢Be, 你會唔會同爸爸愛上同一個人架?｣

兩父子表情係 ~ 。。。( ☉_☉) 問呢啲!!!

然後... ...

我同爸爸齊齊看住Be 等答案

Be 碌大眼... 諗咗一秒答 : ｢會呀! 嗰個咪係你囉!｣

我同爸爸齊爆笑!! 

爸爸撘一撘佢膊頭 : ｢醒目!｣

故事創作 ~ 小人國奇遇奇

 今次作文開正Be嗰瓣......  老作...

配合佢唔多鍾意寫字嘅性格

係有點求其... ...

我好鍾意 ｢心想... 壁虎嗰段｣

佢完全投入星戰世界... 有白兵出現...

可惜... 老師唔多欣賞... ...

MEMO ~ 充電中

家中有位 memo 王

佢成日出 memo/告示俾我哋...

我同 memo王支電動牙刷壊咗好耐

差唔到電

我哋只係用返普通牙刷

呢幾日

memo王身痕

想用電動牙刷

所以佢搵返支牙刷出嚟

再擺好個陣 ~ 試圖差電...

佢仲喺個差電陣上

貼咗張memo 俾我哋 \0/

我有一對... ...

今朝 Be 起咗身之後

自己出廳搞搞震 (我聽到... )

到十一點佢入房睇我瞓醒未? 

(其實醒咗好耐... 但唔願郁之嘛...)

跟住佢瞓喺我隔離同我傾偈

Be : Miffy (我個新名... ,,,) 我 ... ... (下刪百字... ...)

我 : 頭先你喺度做咩??

Be : 無嘢做呀! 喺度坐, 等你囉... ... (語氣有啲心虛... ...)

我 : 坐?!... 😏 做咩講大話?? 你明明係玩緊!!!

Be : 吓... (真慌張樣) Miffy... 你點知架... ... 你明明瞓繄覺... ...

我 : 嘿嘿...  你知唔知你媽咪我... 對眼係會見到啲人哋見唔到嘅嘢架??

Be : 吓...  (假驚慌樣)... Miffy... 你睇到人哋見唔到嘅嘢架??

我 : 係呀! 

Be : (瞪眼)Miffy... 唔你通... 有陰陽眼??

我 : 吓 ... 陰陽眼 ... 

Be : 係呀! 你話你會見到啲人哋見唔到嘅嘢架嘛! 咪陰陽眼囉! 唔係陰陽眼係咩??

(真係... 一山還有一山高...  ... 佩服...)

表達能力比較好

Be 學校今年舉辦咗第一次小四台灣交流團

Be 話佢想參加 (需要面試同筆試)

我話如果Be 考到

我就俾佢參加

最終佢考到

今日回校聽行程內容

離校返家途中。。。

我問：Be，點解頭先Miss Wu喺中場成日問你問題嘅？

Be答：係呀！Miss Wu 上堂好鍾意問我問題

我問：點解？因為你成日發夢？定唔專心？

Be (充滿自信樣)答：嗯！可能我表達能力比較好啦！

我答：叻喎！(心感一沉)

**其實心諗...佢咪誤會咗老師嘅意思呢⋯⋯

嘮蘇怕熱

尋日朝早叫人起床

發現嘮蘇跌咗落床

我 : 喂! 嘮蘇跌咗落床, 好慘! 快啲帶返佢上床!

答 : 吓! 佢唔係跌落床, 係佢尋晚話好熱, 要瞓地下! 唔關我事架!

我 : 佢話熱?

答 : 係呀! 佢話佢鍾意瞓地下多啲喎!

我 : 快啲執起佢!

答 : 下次唔好咁百厭瞓瞓下自己落地下瞓, 知唔知呀? (一邊摸住嘮蘇個頭, 一邊送佢返床)

其實... 佢真係來自"火星" 架... 

唔信?  睇下呢篇 -> 好友 ~ 林永星

私人重地

而家嘅 Be 好似準備踏日青春期

有時啲思想丶行為都幾情緒化...

有時又有啲怕醜

十分搞笑

今日俾我發見佢房內有個廢紙波波 (垃圾)

我執嚟睇下... 上火!!

心諗... 佢意思係咪叫我以後唔好入佢房? (之前鬧過佢)

今晚臨瞓前

我問佢係咪以後唔好入佢房?

佢即時爆喊話唔係

佢以為今日"奶奶表哥"會嚟我哋屋企

所以畫家張紙唔俾佢入房...

原來係咁...

時事常識題

由今年起常識科測驗丶考試玩新嘢...

時事常識題不供詞填寫

即係識答案, 但唔識寫/ 寫錯字都無用... 無分嘅

今晚同佢溫一溫時事常識題

我隨口問

佢要寫答案...

問題有 :

1. 口問 : 香港現任行政長官係邊個?
    寫答 : 粱 _ 英 ( _ = 唔識寫) 仲要用口問 : 如果寫689 有無分架, 媽咪? @_@

2.  口問 : 香港現任政務司司長係邊個?
     寫答 : 林鄭月鵝

3.  口問 : 香港現任律政司司長係邊個?
     寫答 : 原國強

4.  口問 : 香港現任財政司司長係邊個?
     寫答 : _ _ 華

5.  口問 : 中國現任國家書記係邊個?
     口答 : 李克勤...
     寫答 : 李克強

6.  口問 : 邊個中國現任國家領導人去咗美/ 英訪問?
     寫答 : 習近平 (終於都啱一題...)

7.  口問 : 美國現任總統係邊個?
     口答 : 奧巴馬...
     寫答 : 奧斑馬

真係有圖有真相... 唔係作出嚟... 

有個咁可愛嘅仔

我真係三生有幸!!

Water... Car

剛剛喺FB

睇返2011年今日 (05-10-2011) 嘅 status

原來Be 有段咁嘅說話

"Ah Be 剛剛見到一架水貨車

同我講：媽咪，水貨車呀！

然後佢喃喃自語... Water... Car...

Kekeke... 囝，你的外語又進步了... -.-"

都真係幾無聊...

因為呢個 Blog 會喺將來送俾Be

所以無聊事都會盡量記低... 見諒!

頂心杉

我家有條頂心杉

開始進入反叛期

叫佢行東, 佢走西

駁嘴駁舌

目的係想激死佢阿媽... 我

*** *** ***

有晚食晚飯

冷氣涷

叫佢著返件外套

我 : Be, 冷氣涷, 快啲著返件衫

臭Be : 我唔涷, 唔使著

我 : 要呀! 如果唔著, 好快流鼻水

臭Be : 嗯... 媽咪, 人會流鼻水係好正常嘅事

我... 碌大眼望住佢

臭Be : 真係架! 人人都有鼻水, 流出嚟係好正常架!

我 : 係呀! 人人都有鼻水, 不過唔會隨便流出嚟! 病就會流鼻水.  著衫!

Be 死死地氣著返件衫

牙醫

我最近又牙痛

要做咗杜牙根

真係越窮越見鬼... (慘過撞鬼...)

又跌錢...

打咗折都要兩千幾...

上星期四(10/9)

做完第一次杜牙根

晚飯時同超爸講起杜牙根價錢

超爸 : 做牙醫都幾好喎! 幫到人又搵到錢.  Be 不如大個咗讀牙科啦!

Be : 吓! 我唔做牙醫架!

超爸 : 點解? 你怕血? 點解唔做牙醫?

Be : 牙醫係醫人, 我咁論盡, 啲病人好危險.

超爸 : 到時大個咗, 你會無咁論盡.  你小心啲就ok.  你試下啦!

Be : 唔得! 牙醫同醫生一樣, 都係醫人. 人命嚟架! 我唔想害人

超爸 : 嗯... Be 其實唔只做醫生要小心! 大個咗做咩都要小心, 如果唔係, 會有意外, 傷害到人. 知唔知呀?

Be : 知到! 不過我會揀啲無咁容易害人嘅工作

(我同超爸忍唔住... 反眼...) 

*** *** ***

口甜吞滑嘅Be

同佢去下午茶

佢食緊米粉時

問我食唔食

我婉拒

佢卷起"注"米粉遞埋我口邊

Be : 媽咪, 快啲食, 呢個充滿好愛、愛、愛、愛、愛、嘅愛心米粉

我當堂打個凸 

有時真係頂佢唔頫...

Inside Out

今個暑假

有好多好戲

其中...我覺得最好睇係

Inside Out

角色簡單、清楚、直接、易明

由一出生

人人心中(正常)都會慢慢建立好幾個開心正面城堡

但人長大咗...

心中嘅開心正面城堡慢慢退色、倒塌

阿樂 (Joy)會喺心中慢慢由前線退下 

取而代之喺心中嘅係 ~ 阿燥 (Anger)、阿愁 (Sadness)...

嚴重啲嘅話... 仲會出現阿憎 (Disgust)同阿驚 (Fear)

睇到中段... 心情若有所思...

好感慨... 無奈...

但願臭Be 可以將阿樂永留心中 

*** *** ***

Sue 問 Be : 你嘅朋友係咪阿樂?

Be : 係呀! 佢成日同我玩.  不過呢排我鍾意阿愁同阿燥喎!

Sue : 點解係佢兩個?

Be : 因為阿燥個嬲樣好搞笑, 阿愁個愁樣好型! (一邊講一邊扮佢地個樣) (*´ｪ`')

Sue : 咁爸爸呢?

Be : um... 爸爸工作辛苦, 佢係阿燥加阿愁.  不過佢係外表阿燥, 心係阿愁囉... .(咁你都知... )爸爸將阿燥同阿愁放咗喺長期記憶區到.

Sue : 媽媽呢?

Be : 媽媽成日俾我激到阿燥出晒嚟, 有時又阿愁.  不過佢成日都係阿樂嚟架!  所以我同媽媽成日都好開心架! (又開始離題...)