字典大比拼

Be 由上年小三開始

中文科要查字典

學部首、查註解

所以要買本字典看門口

我搵返我小四時用嘅中、英文字典出嚟睇

發現... 兩者有好大分別...

呢兩本中文字典嘅容量已經相差好遠...

Be 小一時

契爺契媽送咗本小學生英文字典俾Be

但係... 有好多字都查唔到...

咁啱, 超爸要考試

買咗本新字典

父子兩份用

睇下! 我四年級時本字典幾... 流....

講真...

而家小四同我以前嘅小四課程

真係相差好遠

呢篇係Be 小四第一篇英默...

老師唔會照書讀默

會臨場改句子讀默

讀得好快

所以Be 要聽的好清楚

(Be 試過錯咗8個生字, 其中6個係漏s, 兩個係錯大小楷同標點

我真係激到變咗"對穿牆")

仲要加unseen (小一已有unseen)

所以每次默書都要好小心...

相比起佢默書

我以前啲默書... 真係蚊脾一隻

自制Uno

放暑假

唔想 Be 玩手機電玩

由其是 Minecraft

實在太受小朋友歡迎

太誘惑了...

同朋友外出聚會

盡量收起手機

唔俾佢玩

不過...有時又好難控制...

因為當一群小朋友都喺度玩手機...

佢被孤立出嚟...

會好唔開心...

有時我會俾佢玩一陣手機

有時我會叫佢畫下畫

佢嘅最新作品係 ~ 自制Uno

好有我細個時

太嫲玩嗰啲 "十五糊" 、"紙麻雀" 嘅 feel

Inside Out

今個暑假

有好多好戲

其中...我覺得最好睇係

Inside Out

角色簡單、清楚、直接、易明

由一出生

人人心中(正常)都會慢慢建立好幾個開心正面城堡

但人長大咗...

心中嘅開心正面城堡慢慢退色、倒塌

阿樂 (Joy)會喺心中慢慢由前線退下 

取而代之喺心中嘅係 ~ 阿燥 (Anger)、阿愁 (Sadness)...

嚴重啲嘅話... 仲會出現阿憎 (Disgust)同阿驚 (Fear)

睇到中段... 心情若有所思...

好感慨... 無奈...

但願臭Be 可以將阿樂永留心中 

*** *** ***

Sue 問 Be : 你嘅朋友係咪阿樂?

Be : 係呀! 佢成日同我玩.  不過呢排我鍾意阿愁同阿燥喎!

Sue : 點解係佢兩個?

Be : 因為阿燥個嬲樣好搞笑, 阿愁個愁樣好型! (一邊講一邊扮佢地個樣) (*´ｪ`')

Sue : 咁爸爸呢?

Be : um... 爸爸工作辛苦, 佢係阿燥加阿愁.  不過佢係外表阿燥, 心係阿愁囉... .(咁你都知... )爸爸將阿燥同阿愁放咗喺長期記憶區到.

Sue : 媽媽呢?

Be : 媽媽成日俾我激到阿燥出晒嚟, 有時又阿愁.  不過佢成日都係阿樂嚟架!  所以我同媽媽成日都好開心架! (又開始離題...) 

自剪手指甲成功

平時烏瀡瀡嘅臭Be

上年自已嘗試剪手指甲剪到流晒血之後

要求我繼續幫佢剪

到咗今日

佢話佢想自已剪手指甲

好! 你自己試下啦!

大叔捩咁棄咁埋頭苦幹剪剪剪

成功!

雖然剪得唔多靚

又磨得唔多滑

不過, 我收貨啦!!

好嘢!! 佢又獨立多一件事

我又可以放手多一件事

其實... 我開始有老花... 我係有機會剪到佢流晒血架... keke

2015暑期日程

今年暑假

可以話有70% Be 話事!

佢有份參與嘅日程

有時充實

有時大腦大放假

星期一最忙... 朝早要上3小時+下午1小時學術班

星期二 ~ 下午1小時學術班

星期三 ~ 下午1小時學術班 + 畫畫

星期四 ~ 冰球

星期五 ~ 游泳

星期六 ~ 冰球

其餘時間 ~ 

早上喺婆婆屋企煮早餐 (真係開火煮)/ 做暑期作業/ 同婆婆去買餸

下午其餘時間係同我去買餸/ 書局打書釘/ 踏單車/ 喺屋企做下功課/ 玩手工剪剪貼貼

無無聊聊又半日

最新剪貼玩意

一時掛喺冷氣機

一時掛喺風扇

一時掛喺電視

*** *** ***

逢星期五朝早就大近視

打仗一樣...

去邊?

去麥當當囉...

換 minions 公仔

見佢平時唔多換公仔

今次佢要求要換

就同佢癲吓啦!!

第一個星期

我哋星期六去食仲換到

第二個星期五下午去食... 已經換晒... Be 即時謝晒... 無晒心機...

我都無晒心機... 我最鍾意嗰隻... wuwu...

所以跟住嗰幾個星期五

晨早起床去食早餐...

返學唔見佢咁神心...

今日係最後一個星期啦!! yeah!!

柳暗花明又一村...

上星期有朋友話幫我睇下仲有無多一隻我換唔到的

終於佢幫我搵到 ~ 我的至愛了...

紅圈中嘅御林步操軍 (真係好靚仔)

yeah!!

古董電話

上星期Be 上完中文補習班

準備去地鐵站會合我時

喺lift 度

有個大叔問 : 小朋友, 你嗰個係古董電話嚟架喎!  而家無架啦! 搵唔到啦!

Be : 係呀! 我阿公留俾我用架!

大叔 : 嘩! 你阿公好錫你喎! 留啲咁好嘅嘢俾你.  你要好好用呀!

Be : 係呀! 我阿公真係好錫我架!

~ 完 ~

真係要好鴨記至搵到佢啲親戚架! keke

P3 學校畫作 (一)

星期三

臭Be 帶咗幾張喺視覺藝術堂畫嘅畫返屋企

佢話有一張仲未派返嚟

今年嘅VA 老師比以往VA老師手鬆

俾Be 嘅分數都高咗

題目 : 給聖人設計新衣

題目 : 古怪鐘

題目 : 水墨畫練習 ~ 蝌蚪一 

題目 : 水墨畫練習 ~ 蝌蚪二

題目 : 墨趣 ~ 自選 : 小狗 

巴士站廣告設計

Be 無咩叻

至叻係同交通工具有關嘅事物

佢一返婆婆屋企

就會攞返兩歲時玩嘅 Lego 出嚟砌~ 砌~ 砌~

最近

佢又設計咗一個巴士站廣告

佢將小豆啲 Avengers 公仔拎晒出嚟

砌咗一個巴士站同一架巴士

成日係我耳邊扮廣告聲 : de... Avengers... (The Avengers)

無謂嘢... 佢真係好叻架...

第一本漫畫出版

六月頭某天

Be 帶咗張紙回家

摺到風琴咁

佢話佢畫緊一本漫畫

喺週末時

見本書釘好咗

又畫好咗...

(明明考緊試... 仲咁得閒嘅...)

書名 : 賽車比賽 

有埋出版社

文圖介紹

內容... 係無咩字嘅... 

只有一句開場白...  

紅色部份係火山... 

故事大綱 : 兩幫人賽車, 有一幫人經過火山, 跌咗落火山, 另一幫人贏咗...

~ 故事完 ~

簡單到無朋友

書底...

全書我最喜愛的部份係以下呢句

注意 : 不可以給三歲半以下的小孩看

我問：點解三歳半以下唔睇得？

Be : 因為內容有少少暴力, 所以太細個唔好睇好啲

仲有 bar code 同售價... 

自動 mode 溫書

過去兩個幾星期

我感冒再支氣管炎

病到個人溫溫沌沌

頭一轉睇支氣管炎

堅持唔食抗生素

兩日後死咗一半

再睇醫生...

無得揀

焗食抗生素

求醫生開隻輕手啲嘅

因為我唔係好食得抗生素

一食就無咗半條命... 

有手尾跟...

而家感冒、支氣管炎好返

但手尾係... 爛脷... + 成身散晒...

病期間

撞啱 Be 考試 (4/6-9/6)

真... 係... 濕... 濟...

加上之前應承咗做花球

有點吃力...

今次佢真係要自動 mode

我最多只能瞓住覺

教時間制

聲控佢做練習...

*** *** ***

到尋日

佢要繼續溫習常識科

繼續自己做工作紙同串生字

到我要佢當考試咁做卷時

佢話佢已經準備好試卷

原來佢一早寫好咗所有長問題

仲要漏空答案(Ans)位置

 同埋改正 (Correction)位置

上面嗰4幅畫嘅原圖... 

考核完之後

我再睇下佢本練習簿

原來佢都寫咗唔少嘢落簿 

梗係唔少得畫公仔

出年

我應該可以輕鬆啲呱...

突發事故

今朝喺保姆車等候處

收到保姆姨姨電話

保姆車壞咗

撻唔著架車...

吓...

佢叫我自行帶小朋友返學

同埋幫手通知已到等候處嘅家長

連臭Be 在內

共有9個同學

只有4個同學有家長在身邊

有2 個同學係自行等車

其餘同學只有姐姐

突然無車坐

大家都有啲混亂

本來諗住同Be 一齊返學

但時間緊迫

要飛的士

又怕無的士

*** *** ***

所以

我提議分兩架的士

第一架的士

主要係姐姐帶的同學

由一位小六哥哥帶住四名小二至小四嘅同學出發 (連Be)

我同司機交帶地址

然後交帶小六哥哥睇住四個小的

再交帶四個小的要聽哥哥話

我放底錢俾小六哥哥

第一批隊出發了

(坐後排嗰四個細路, 鬼咁興奮)

*** *** ***

第二架的士

其中一位家長要姐姐跟回校

所以姐姐要上樓取銀包

各人等得有點著急...

差不多 7:25 先上車

希望大家都可以準時安全到達

*** *** ***

而家回想起 ...

我發覺我 ... 太大膽 ...

幫其他同學揸主意 ...

重點係... 未經佢哋家長同意 ...

有咩事 ... 擔當唔起 ... 

發誓

最近

Be 進入反叛期

出現阿崩叫狗

越叫越走

叫佢行左

佢會行右

叫佢十聲都唔會應一聲

上星期日

突然發高燒

食退燒藥

瞓咗一日

第二朝 (18/5)

無事, 返學

放學後

佢話自己唔多妥

喉嚨痛

去睇何醫生

疑似手足口/ 腸病毒

(之前有同學喺學校嘔, 噴到佢同另一女同學, 最兩個都病咗)

最後... 病咗四日

呢兩日瘋狂清功課

佢當然係懶虫上身

籟死唔做

激到我火燒心... 爆血管...

加上我病緊....

我人都癲!!!

今朝

我火滾到頂點

我出廳坐

坐坐吓

有人問我發誓個 ~ ｢誓｣字點寫?

我仲火火地!!

所以答 : ｢唔知!!!｣

跟住嗰個人行返入房

隔咗一陣...

有人拍我

放低張紙

呢個係封面

右下角隻雀係郵票嚟架! 

(唔好意思, 我哋在家係用環保紙嘅)

打開一望

道歉信!!!!

有幾個錯別字喎...

最得意係嗰個人唔識寫 -  ｢誓｣

畫咗個發誓手型喺其中一句度

喺信底

再畫咗一個大嘅發誓手型

啲手指甲、手形係錯晒!

十分搞笑!!

第一次獨自搭車

上篇提到

壓力overload...

我其中一個中招位係... 無記性

*** *** ***

今朝

我送臭Be 出去上校車

臨上小巴前...

我 : 咦! 我個袋呢??

Be : 媽咪, 你好似無攞袋喎...

我 : ... 點算呢... 如果返轉頭實趕唔到上校車... 我又無錢喺身...

Be : 媽咪, 我自己搭車出去吖!

我 : ... 嗯... 要過三條馬路... 其中兩條係小巴站同的士站, 啲車左穿加插, 好危險架喎

Be : 媽咪, 我OK 架! 俾我試下啦! 我會小心過馬路. 好似你平時帶我過馬路咁.

我 : ... 好啦... 你小心啲呀... 你得唔得架??...

Be : 媽咪, 我得架! 信我啦!

送完 Be 上小巴

我摩打腳返屋企攞袋追出去

打俾保姆姨姨

姨姨話Be 已經安全上車

鬆一口氣... 

*** *** ***

放學後

我問Be 今朝獨自搭車情形

Be : 媽咪, 我其實好緊張架! 小巴叔叔好好人, 知我埋站落, 叫我等埋站先落, 仲泊車喺路中心擋住啲車, 俾我過馬路.

我 : 叔叔真係好好人, 咁過的士站條馬路呢?

Be : 啲的士叔叔都好好人, 停車俾我過馬路.

我 : 啲叔叔真係好好人呀!  所以咁順利,  你以後過馬路都要好小心, 睇清潔, 唔係個個司機叔叔都咁好人架! 知唔知?

Be : 知道,  媽咪!

將來的家、辦公室

尋日臭Be 放學

話有禮物送俾我

然後由書包拿出呢張紙俾我

我打開張紙一看

臭Be : 媽咪, 呢個係我哋一家三口將來的家, 你鍾唔鍾意呀. 媽咪?

WOW... 作為媽媽嘅我

確實... 有點... 感動~~ 

我 : 臭Be, 我好鍾意呀! 多謝你!

跟住, 我哋一齊討論下點樣再修改下

*** *** ***

呢張係上星期畫嘅

臭Be 介紹我知

呢個係佢將來間公司嘅圖則

*** *** ***

呢兩張都係上星期畫嘅

應該係複式單位

地下 (左上角應該係車房)

 

一樓 (目不識丁嘅佢... 又寫錯字... 1數....)