最後決定 ~ 選出K1學校結果

喺上年10月至12月期間, 先後去咗6間學校到做K1面試, 最後有3間學校收咗小Be ~ 循理、靈食糧、斷鬚 (排名不分先後) 

我同爸爸就喺靈食同斷鬚兩者之間爭扎咗好耐... 諗咗好耐, 邊間好啲、啱小Be多啲呢... 諗吓一個月, 諗吓又一個月, 喺4月25日前一定要有決定 ~ 因為4月25日係靈食嘅註冊日...

之前我哋聽姨媽講斷鬚有到我哋住嗰區, 而我打電話問靈食校務處, 佢哋就話無... 你知啦!  有無校車好緊要架嘛! 打風落雨唔使咁頭痕嘛... 又唔使冒險俾姐姐湊返學. 大家平時都見, 大部份嘅姐姐喺單獨湊小朋友(無論小朋友幾多歲都好)姐姐都會掛住講電話而忽略咗身邊嘅小朋友, 任佢哋自己行, 周圍走, 好危險架嘛... 所以, 校車對我嚟講, 好重要.  加上斷鬚係2文2語 ~ 英語 + 普通話, 所以我哋已經決定咗 ~~ 小Be 將會入讀 ~ 斷鬚幼稚園 ~  希望呢個決定無錯啦!! 係啱小Be讀啦~~ 路就幫佢揀咗, 佢行唔行到, 就要睇佢嘅 ｢造化｣ 喇!!!

我哋最後都無去到靈食註冊. 到咗今個星期一, 我哋收到斷鬚嘅信, 內容係會喺5月9日去學校辦理入學手續... 點之揾晒成封信都見唔到我哋區嘅校車資料... 死火啦! 原來係無校車到架... 要自己揾保母車架... 天啊!! 典解咁架!!! (*靈食然都係無校車到, 但封信係有埋保母車資料... ).  睇完封信, 直刻企咗响度 ...(*´ｪ`;) 典算呀!!!  俾姨媽｢跣｣咗一嘢o忝... 我今朝發晒"芧"咁周圍揾保母車, 打電話去校務處問, 就話要自己揾, 不過佢就俾咗貼士我, 叫我喺5月9日喺學校門口揾, 好有機會揾到喎... 我又上BK揾 (我十年都唔上一次BK架嘛...). 好彩, 小柔媽媽都幫我揾到個聯絡電話, 我咋咋淋打電話去問, 佢話要"度一度"個路線先覆我, 叫我留底聯絡喎. 我個心先定啲咋... 喺呢度, 真係要多謝 ~ 小柔媽媽嘅幫忙!! 多謝!!

*做人父母甚... ... 母親節就到, 要好好孝順媽媽先!! 

K1面試@斷鬚+星光

今日小Be 有最後兩個interview, 分別係 12點30分嘅斷鬚同2點20分嘅星光.  

小Be 今日嘅狀態唔好幾好, 因為佢嘅鼻敏感由入冬開始纏擾到依家, 個鼻不停流鼻水. 見到都心痛死我.  

第一場斷鬚, 入到課室老師同佢玩串 "pooh pooh" 積木, 佢玩得好投入, 直情唔想放手, 好專注咁玩.  

到玩生果, 有一個雪梨同蘋果, 老師問小Be鍾意食邊個? 佢答鍾意食蘋果, 仲咬咗個蘋果一啖 

跟住老師又攞咗一個puzzle出嚟叫小Be砌 (小Be嘅弱項... ...) 小Be當然係砌得一撻糊塗, 仲係有老師提水嗰隻... 

轉頭又話要玩 "pooh pooh" 積木... 

最後老師問Be 跟唔跟老師出去睇下學校係點嘅樣?  小Be 點頭, 跟住老師拖住小Be出走廊, 小Be 好乖咁拖住老師, 好安靜咁睇操場啲小朋友玩.  interview完, 小Be喺操場玩咗一陣, 但一路都玩唔到車車, 最終係痛哭離埸... 

好趕咁食咗麥奴奴, 就去星光interview.  

小Be喺星光嘅表現好差, 開始時睇video都ok, 但到入課室時唔肯行去擺滿書嘅枱, 老師唯有帶佢玩煮飯仔.

小Be 都唔係好肯講嘢, 老師都忍唔住問我佢係咪唔識講嘢... 

後尾佢肯講嘢, 老師就叫小Be 攞隻香蕉俾佢,  小Be居然俾咗隻雞脾老師, 仲同老師講 : 呢隻係香蕉 ... (真玩嘢...) 

到小組遊戲時間, 小Be堅拒參與, 要繼續玩煮飯仔... 

最後仲大喊收場... 所以應該係考唔到星光lu.

睇到小Be呢個look 就知佢今日狀態有幾唔掂啦!!!  新登場 ~~ 憂鬱小生"be"先生

一連兩封拒絕信

今晚朋友們紛紛打電話俾我話貓記有通知啦

好趕急返屋企睇下有無信

返到去發現有兩封信

分別係貓記同創價

我滿懷希望咁拆信 (天真地以為取錄先有信收...) 

但結果係兩間都唔收... ... 算啦! 

爸爸講得啱

我哋都無力谷小Be

其實有兩間收佢都已經好好啦!!! 

K1面試@創業

今日嘅 interview 係喺朝早9點正, 由於小Be 尋晚疲勞過度, 起唔倒床, 所以我要 "移動"起佢, 幫佢搵衫 (記住 : 小Be仍然喺睡夢中), 我同爸爸好似走佬咁攞埋包維他奶 (糧餉) 再搬埋小Be上的士.  

8點55分到學校, 小Be 都起咗身, 去等候室報到之後, 小Be 就飲咗包維他奶, 跟住同佢去洗手間, 小Be 見到牆上好似開籠雀咁不停講,不停講. 連喺門口位老讚小Be講得好.  到入課室面試, A老師開始問小Be問問題. 問題如下 :

A老師 : 小朋友, 你叫咩名呀??

小Be : 小Be

A老師 : 你幾多歲呀??

小Be : 兩歲

A老師 : 今日邊個帶你嚟呀?

小Be : ... ... ... (沉默不語... 次次interview 問呢條問題, 小Be 都唔答架! )

A老師 : 咁佢係邊個呀 (指住爸爸)? 咁佢又係邊個呀 (指住我)?

小Be : ... ... ...  (仍然沉默不語... 次次interview 問呢條問題, 小Be 仍然唔答架! )

A老師 : 呢啲係咩嚟架? (生果盆 - 有apple, orange, banana)

小Be : apple 呀 (但佢係指住個橙囉 ...) apple 呀! banana 呀! (正確! 當時佢係指住蘋果同香蕉架!)

A老師 : 咁你鍾意食邊樣呀??

小Be : apple 呀 (但佢又係指住個橙囉 ...明明識橙叫orange, 都要話apple, 明玩我哋啦...)

A老師 : 好, 我哋收埋佢, 玩第二樣啦!

小Be : 姐姐, 唔該切咗佢 (咁都得...不過老師聽唔明, 要我哋講佢聽)

A老師 : 呢度邊度嚟架? (攞咗本圖書出嚟, 主題係遊樂場)

小Be : 公園

A老師 : 小朋友做咩呀? (指住滑梯)

小Be : "sir"滑梯 (跟住小Be 自己 "sir" 咗落枱底.... 激死人啦!!!)

A老師 : 小朋友做咩呀? (指住韆鞦)

小Be :  um... 做運動 (小Be 從未打過韆鞦, 所以唔識.  不過, 佢識執生喎!)

A老師 : 哦, 小朋友做運動呀! 咁你鍾唔鍾意做運動呀?

小Be : 鍾意呀!!

A老師 : 咁呢個係咩嚟架?? (指住隻狗)

小Be : 狗狗呀

A老師 : 好啦! be你自己玩住積木先

小Be : 好呀! (自己喺度玩積木)

跟住老師問左我同爸爸以下幾個問題:
(1) 你最欣賞be啲咩? 爸爸答
(2) 點解揀呢間學校? 媽媽答
(3) 揍小朋友遇到咩困難? 媽媽答

跟住走得, 小Be仲執拾積木同泊齊啲櫈.

下午上完playgroup, 我哋同Sue,  小龍同 Sil 姨伉儷去大埔郊遊 (其實係食,食同食).  小Be就同Sil 姨隻老狗玩.

K1面試@維記

今朝11:00到下康嘅維記 interview, 一入校門, 我同超爸呆一呆, 因為有位護士小姐棟咗喺門口, 幫入門每一位小朋友探熱...

去到等候室玩車車時, 小Be嘅狀態都仲好好, 玩完每架車仲識泊埋位tim. 到爸爸會見完副校長之後, 到我同小Be入課室, 入到課室有位ABC 老師同小Be傾偈. 對答如下 :

ABC 老師: what's your name??

小Be: @#$%^%^~~~~

ABC 老師: what's your name?? (我一邊翻譯俾小Be聽)

小Be: 豬仔

ABC 老師: Chu Chai, how many years old?? (我一邊翻譯俾小Be聽)

小Be: 2歲 (邊講邊豎起兩隻手指)

問完小Be, 老師就問我小Be平時嘅母語係咩? 我話母語係廣東話, 小Be都識一啲簡單嘅單字.

到小朋友到齊, 開始以play group型式圍圈聽英文故事同玩遊戲 (我心一沉... 小Be無耐性玩呢樣嘢...實周圍走架...).   圍圈聽英文故事時間約5分鐘, 小Be都ok 肯坐喺度聽 (不過無反應之麻), 到唱 twinkle twinkle little star, 小Be識唱架但唔肯唱同唔郁... 尾段仲話要 shu shu tim.  唯有同老師講要去洗手間啦!! 

去完洗手間, 小Be已經好唔願意返入課室, 老師攞咗個箱出嚟話玩波波, 原來係抽波波分顏色 (紅色, 黃色同綠色) , 再放入啱顏色嘅籃度 ( 唉又係小Be嘅弱項... ) 一到小Be抽咗個黃色波, 佢正想放入紅色籃時.... 突然縮手轉方向, 將個波放入黃色籃呀!!! yeah!!!! bingo!!!!! 

到唱遊時間, 老師派拍指棒棒, 要求小朋友隨拍指搖動, 小Be已經無耐性跟隨, 只係搖咗幾下就算...  到老師送小禮物 (手指公仔套) 時, 小Be開始扭計同喊, 佢話要出去搵爸爸喎 (平時又唔見咁好感情... , 借爸爸過橋...) 仲要碌地下...  唔肯要小禮物... 好無奈... 我唯有幫佢接小禮物.  安撫咗一陣, 佢卒之肯收聲兼肯同老師講多謝同 bye bye.... 完蛋啦!!! 實唔收佢啦.......

In 完維記之後, 我哋就去咗星光幼稚園交學生相同睇下學校嘅環境, 星光interview 嘅日期係12月6日.  星光有個幾大嘅户外遊戲空間, 小Be都玩得幾開心架.  跟住就 join 契爺同契媽飲茶同上佢哋新居.  

4點零我哋就同契爺,契媽, Sue姨姨入元朗去Winnie姨姨屋企玩.  

Winnie姨姨屋企有4隻狗, 其中一隻小狗 - Pepper, 每次喺小Be一落地就會"蝦"佢, 有一次係咬咗小Be個屁股一啖 (返到屋企發現小Be個屁股瘀咗tim), 另一次抓損咗塊臉... ... 不過, 小Be 無怕咗佢哋, 仲好有善咁摸佢哋同叫佢哋.  我哋玩到11點幾先返屋企. 

P.S. 食糧已經收咗熙熙讀下午班 lu, yeah!!!!

星光學校室外遊樂場

BBQ時間, 同Barry哥哥 (其實係叔叔至啱) 玩做運動!! 好開心!!!

狗狗, 乖乖!

Hello! smile!  

K1面試@循理

小Be in 咗循理, 表現都唔錯(我覺得).  

interview 時間喺下午2:30, 係小Be午睡時間, 我都有啲擔心. 

去到學校, 登記完去咗interview房玩, 我同小Be坐喺一張有火車玩嘅枱度, 小Be好聚精會神咁玩火車同切生果. 玩咗一陣老師行過嚟請小Be過枱. 

老師自我介紹叫黃老師, 小Be只叫:老師早晨! 

玩火車時, 老師問顏色? 小Be當然係咩都答紅色. 

玩完火車, 老師攞咗啲生果樂器出嚟, 小Be自己講 : apple 蘋果, orange 橙, banana 香蕉, 同粟米 (仲將個假粟米當真食)

當老師叫佢搖生果樂器, 小Be 就搖, 老師叫停, 佢就停兼大笑

跟住老師又攞咗啲上鍊公仔叫小Be選出3隻代表我哋一家各人, 然後帶返屋企.  

小Be挑選咗大嘴鳥俾爸爸, 小雞俾我同小鴨俾自己.  

到最後小Be同老師講再見時, 居然講 : bye bye 黃老師! 哈哈! 真係好意外呀!! 仲識泊埋張櫈tim.  

我覺得小Be嘅表現好好呀! 小Be, 媽咪mo 俾你一百分!!! yeah!!  

K1面試@食糧 + 昂平360

今日上午11:45到食糧面試, 去到學校時小Be有啲怯場, 唔肯自己行入遊戲室. 

入到遊戲室就見到哲哲, 哲哲好乖咁俾車車小Be玩. Warm up 完老師叫名排隊上等候室, 喺等候室睇video~學生表演, 小Be睇得好開心、好投入。

等咗一陣，老師又叫名排隊分組面，５人一組。但今次唔同哲哲一組。

入到課室土老師要小Be自己揾一樣玩具，小Be揀咗一架運牛車，又將啲牛羊搬上搬落，小Be一直唔肯聲。到老師攞咗啲套積木出嚟同佢玩，小Be唔係好肯玩，老師問佢咩顏色? 小Be又答: 紅色。老師都好就佢，特登攞個紅色問佢tim。玩完呢兩樣玩具後，小Be都有擺放好，再玩木火車後同老師講bye-bye。

我哋再到另一間課室等校長，又重遇哲哲。今次係考小朋友耐性，坐喺度等校長。小朋友圍大圈坐，一位家長企小朋友後面，我哋等咗約十五分鐘校長就入口口一咗嚟，跟住校長就同班小孩玩唱遊。

唱遊完，校長會同每一個學生講bye-bye同傾偈做評分。

到小Be時，小Be突然指住自己對腳話 : 無腳趾嘅? 跟住又指住我對腳話 : 媽咪無腳趾嘅? 於是校長伸出隻腳問小Be有無腳趾 (露趾鞋)，小Be答 : 校長有腳趾嘅，最後小Be同校長同各老師講bye-bye。

呢間學校係我同爸爸都覺得幾好，希望小Be有機會入讀啦!!

面試完，我哋同七七、Kate姐姐飲荼，然後去咗昂平360，小Be好興奮咁指住纜車叫Cable car 車車。

坐纜車時小Be都有啲驚，唔肯自己坐要我拖實佢先得。上到市集，小Be好開心四圍走，不過好大風好凍，行咗個圈食埋碗豆腐花就回程。

喺我哋去食飯途中(八點)，小Be忍唔住瞓咗，十點零起身飲咗支奶又瞓返lu