小Be 的惡夢 (*´ｪ`;)

今朝清晨時份 (約六點零), 小Be發咗一個 ~ 惡夢 , 仲要係... 真係嚇到醒咗, 繼而大叫兼捉住我隻手搖醒我!!!

小Be 嘅第一句說話係 (佢對眼仍然係合埋架!!) : ｢媽咪! 我好驚!!! ｣.

睡醒惺忪的我答 : ｢驚咩!!! ｣. 

小Be 口震震答 : ｢我食咗醫生小巴落肚呀!!! ｣(註: 醫生小巴 = 廿四坐位小巴)

真係好驚喎!!!  我攬住佢、拍拍佢同佢講 : ｢唔使驚... 發夢咋!!! 瞓覺啦!! 乖...乖...｣. 

果然係發惡夢, 小Be 九秒九入睡!!!!

小Be~K1上學期之學習活動評估家長會

尋晚 mamemo 同超爸爸參加咗堅堅嘅 Bachelor party 至零晨, 加上小朋友唔可以入課室聽評估, 所以小Be 好可憐地留喺婆婆屋企瞓.  喺 party 期間, 佢有打電話俾我, 問我幾時返屋企接佢架!!!  

到今朝, 我哋宿醉至醒... (真係一對壞父母喇!!! 其實無飲醉架 ~ 我!! ) 晨早十點到達學校嘅課室門外等候, 睇下小Be 班啲畫冊.  我哋見到有啲同學仔真係填顏色填得好靚架!  而小Be 嗰啲呢...  都係求求其其亂咁填囉 ...  毫無美感可言!!!

所以我哋睇咗好幾本畫冊時發現小Be 嘅作品好多時都係夾喺畫冊嘅後半或最尾嗰幾頁...            

      

入到課室, 老師攞咗個精美文件匧出嚟...

老師 : ｢小Be, 整體表現都 ok, 有3分以上!  有4個項目有4分! 例如 ... ... (省略數十字...)｣

mamemo+超爸 : ｢哦... 咁平時佢返學時係點架??｣

老師 : ｢嗯... 佢專注力比較差, 唔係好專心!  上上吓堂都要捉一捉佢番嚟.  又或者有時見佢坐定定, 一睇就知佢飄走咗, 唔係聽緊書架喎! 咁我又要捉一捉佢返嚟! ｣[mamemo 心諗... 有幾多個三歲幾嘅小朋友係高嘅專注力架呢... ~ 死雞撐飯蓋中... 即係好似麥太搵緊啲藉口去解釋點解麥兜啲表現咁差咁囉... ]

mamemo+超爸 : ｢哦... 我哋都留意到佢嘅專注力比較差啲, 我哋都準備調整下佢呢一點! 我哋都報咗畫畫班俾佢試下坐定定, 專心啲畫. 希望咁樣可以幫到佢｣

老師 : ｢嗯... 係呀! 試下每次叫佢坐幾分鐘, 然後慢慢加時間上去, 可能可以幫到佢!  不過唔好一開始就要佢坐好耐架喎...  ｣

mamemo+超爸 : ｢小Be 喺學校仲有咩特別呢??｣

老師 : ｢嗯... 佢性格好開朗! 成日笑同埋成日同同學傾偈...｣ ~ 開朗 = 傾偈

mamemo+超爸 : ｢咁小Be 嘅語言能力 OK 嘛??｣

老師 : ｢嗯... 佢都聽得明日常嘅普通話指令, 只係唔係好識講一啲深少少嘅話句. 不過, 佢已經好好, 慢慢嚟!｣

跟住mamemo同超爸講多幾句之後, 大家出現｢死氣｣ (dead air)... 前後五分鐘鬆人!!

睇下! 佢行平衡木時雙眼向上吊, 係咪好搞笑呢!!

個體格記錄會唔會耐咗啲呢?? 兩個幾月前嘅事啦...(*´ｪ`) 不過, 我都唔弱, 小Be張相係兩歲時影架!! 

K1 '09 X'mas Party + 生日會概況

剛剛發現小Be 班主任 upload 咗啲聖誕 party 相, 同小Be 同學仔小型生日會嘅相!! 估唔到小Be 肯企定定同同學仔影相!  仲識得擺 pose 添!! 

聖誕 party ~ 17-12-09 (小Be 個pose 似唔似區議員 )

嘩!! 個party有咁多食物嘅!!!

小Be 同學仔 ~ 企夫嘅小型生日會  (真失禮... 小Be 咁哩啡嘅... 仲要做V手勢...)