落實公公的新居

眨吓眼, 公公離開咗我哋半年... 喺呢半年入面, 我同小Be 都好掛住公公.  特別喺夜蘭人靜時 (臨瞓前), 我同小Be 會互相傾訴一下對公公嘅思念.  個傻豬仔會突然好感性地講一句 ｢我好掛住公公呀!! ｣.  嗰刻... 我真係好感動... 估唔到佢哋兩公孫喺短短三年間暗暗培養出深厚嘅感情... 感淚...

尋日, 係公公上位嘅大日子.  公公嘅新住址係喺柴灣佛教墓園嘅骨灰龕大樓嘅地下近大門口位置, 個位都幾開揚架! 可以望到街景架!! 

我哋一點鐘到達墓園會合法師、殯儀經紀,  然後做咗一埸簡單嘅法事, 公公就正式遷入新居喇!!  我哋燒完衣紙返回公公靈位前執拾祭品時, 小Be 突然對住公公靈位問 : ｢公公, 你收齊啲嘢未呀??｣ 小Be 真係好好笑, 佢之所以咁問, 係因為燒衣時, 大家叫公公收嘢.  所以佢臨走時同公公確應一下係咪收妥晒啲嘢囉!! 乖乖!!

其實公公呢個靈位都買得幾曲折架... 我哋一家幾口都頻撲咗好幾次先排到呢個靚位, 原來冥冥中真係有主宰嘅...

17/4 ~ 超爸爸同婆婆去佛教會買位, 但無帶公公、婆婆婚姻証明, 所以超爸爸問清楚職員有關所需文件, 然後去咗墓園睇位同抄底靚位嘅號碼 (係輪位制, 無的自己揀), 等星期一再去買位.

18/4 ~ 公公、婆婆婚姻証明突然唔見咗, 搵極都搵唔倒, 唯有聽日同婆婆去婚姻登記處補領.

19/4 ~ 同婆婆、小Be 坐的士出去金鐘婚姻登記處途中, 去到觀塘警署時, 小Be 無端端嘔奶, 嘔到我一身都係, 唯有原車折返屋企換衫.  然後再出金鐘.  點知結婚証明書無得即時補領.  我再打電話去佛教會問職員仲有咩辦法, 佢哋話有民政處宣誓紙都得... (之前問過, 又話唔得... 真係玩死人...

)  跟住我哋又即刻趕去民政處做宣誓 (因為有時段限制).  再趕去佛教會.  啱啱輪過晒啲靚位, 到 53號位, 係個唔靚嘅位 (個位低過水平線).  婆婆諗住算啦! 唔靚就唔靚, 輪到都無辦法... 點知佛教會嘅職員又話我哋欠帶張骨灰紙... 唔係嘛!!! 上次問所需文件時又唔講, 今次又話要... 係咪玩我哋呀!!!! ... ... 

20/4 ~ 婆婆送完小Be 返學, 然後去佛教會買位.  好嘢!!  買到 58號位呀!! 靚位嚟架!! 公公, 下次你想要咩位, 報夢俾我哋知咪得囉!! 唔使要我哋騰咁多轉嘛!! 唔該...

24/4 ~ 同婆婆去公公新居睇環境同去墓場附近搵石碑廠做石碑.

20/5 ~ 原本鐵定今日上位, 但兩日前婆婆發現個日子好似唔係咁好, 所以改期喺 29/5 (今日) 先上位.

希望公公喺度住得開心啦!!!

小Be~K1下學期之學習活動評估家長會

今朝10:45 趕到學校, 參加小Be 嘅K1下學期之學習活動評估家長會.  今日見我哋嘅係劉老師 (ah Be 好鍾意佢架).  原來今日無評估報告收, 只係同老師互相溝通一下學生在校/ 在家嘅情況.  以下係總結咗劉老師俾小Be嘅評語 :

1.  整體表現比上學期好, 已經適應咗呢間學校嘅生活.  日常大部份普通話對話都聽得明白及能夠表達/ 講得到.  讚

2.  勇於舉手回答問題, 無懼答錯, 投入學習氣氛. 讚

3.  不過, 小Be上英文堂嘅表現就唔係咁好喇!!  因為佢聽唔明白英語, 所以唔多投入, 經常同隔離位同學傾偈 (但小Be係講廣東話, 隔離嗰位同學就講英文, 仲要傾到嘻嘻哈哈... 連老師都覺得好搞笑 ), 佢哋連手指都玩埋咁滯...

4.  基本上性格開朗、活潑、健談, 仲有啲古靈精怪.  如果劉老師喺英文堂坐喺 ah Be 隔離, 小Be會用｢射喱眼 ｣ 斜視老師... 同老師玩, 要老師移動佢個頭返正常方向聽書先得...

5.  劉老師提到小Be 揸筆時唔夠手力.  我諗係因為小Be 本身係左撇子, 但老師要佢用右手, 所以佢用左手做做下功課時, 會話轉手, 話老師話要用右手揸筆... 我諗係有啲混淆咗囉.  我同老師講完呢個 Point, 老師話唔會再迫佢用右手... 等佢自然發展.  (我都幫小Be 報咗紙黏土班, 訓練一下小雞肉 (小肌肉), 等佢揸筆夠力啲)

6.  小Be 喺填顏色同畫功方面都有啲進步架!!  起碼畫出界都無出得咁離譜!! (mamemo 又自我安慰 )  喺油顏色方面, 佢都花多咗啲心思, 起碼會襯下啲顏色.  因為揸筆唔夠力, 所以比較其他同學做工作紙做得慢咗啲, 好在小Be 都會完成埋工作紙先起身玩.  老師都話佢有責任感架!! 讚

7.  劉老師話小Be 好鍾意唱歌, 一到唱遊部份, 佢就全情投入!  老師仲試過喺洗手間聽過小Be 唱歌... 但係, 係唱大人歌... 首歌好熟悉 ... 不過唔記得咩歌. (我諗係 Eason 嘅歌 e.g. 陀飛輪...)

8.  最近小Be 經常同兩位同學仔排隊時爭做第一名, 要老師諗方法要佢哋輪住做第一.  好彩小Be 都受控制...

今次老師嘅評語都好正面, 比上學期好好多.  希望小Be上K2之後, 嘅表現會再好啲啦!! ah Be, 加油呀!!!

Be's Gallery (1)

一路以來, 我哋都以為 ah Be 無咩藝術家天份... 不過... 而家好咗啲啲啦...  所以我哋為咗鼓勵 ah Be, 我哋會喺呢度幫佢開個 gallery, 令佢啲自信心返番嚟.

登、登、登、凳 ~ Be's Gallery 揭幕啦!!!

第一堂 (17/4/2010) 作品 : 復活蛋 ~~

第二堂 (24/4/2010) 作品 : 燒雞 ~~ (有少少抽象... 請俾啲幻想力) 

第三堂 (8/5/2010) 作品 : 三文治 + 沙律 ~~

第四堂 (15/5/2010) 作品 : ?? 俾啲幻想力啦 (我都睇咗好耐... ) ~~~ 係搖搖馬呀!

正確示範 : 心悠作品

第五堂 (22/5/2010) 作品 : 鐵板燒 ~~ 有雞蛋、腸仔、牛扒、意粉、西蘭花同蕃茄.  見唔見? 仲有刀叉架... (似唔似紙紮品??)

上畫班情況

不經不覺小Be 上咗五星期畫班, 佢由唔多愛上呢間畫班到而家好好愛 ~ 愛到欲罷不能嘅地步!!!  平時上畫班嘅造型 ~ 斜揹畫班環保袋!!

臨上堂, 先玩玩玩具 warm up 一下!!

上堂時, 謝絕參觀!! 不過, 我遙遠望到, 小Be 都畫得好投入, 不時舉手答問題、問問題 (其實係製造問題) 或口多多咁...

每次上完堂, 佢件畫衫都好似俾人淋完油咁... 成件衫五顏六色... (但其他小朋友件衫乾淨好多架... )

超爸飯局

為咗同 Sue 叉叉電, 所以安排咗個 ｢超爸飯局 ｣.  由超爸煮啲簡單嘅食物, 振作一下悶悶的 Sue Sue.  仲邀請埋契爺、契媽一齊吃添.  契爺、契媽未到, 超爸又準備緊材料, ah Be 唯有同佢個 friend ~ Fluffy 玩掉 ｢麵包｣ 遊戲 .  一玩可以玩成個鐘頭架喎...  

契爺、契媽一到, 開餐 lu ~~

第一道菜~ 鮮蝦生果沙律

第二道菜 ~ 煙肉磨菇意粉

第三道菜 ~ 牛油白酒煮大蜆  (最後一味, 無架啦)

一路食、一路傾! 爽!!

食完飯, ah Be 即刻捉住契爺、契媽玩 ~ 醫生病人

玩到癲晒, 仲攞個接藍出嚟玩...  曳到不得了......

契媽仲同佢癲喎!!!

十一點, ah Be 飲完奶, 刷完牙.  自己碌入房覺覺豬是也!!