怪物(蚊難)小王子: 6月 2011

2011年6月25日星期六

ah Be 攞咩獎??

喺上星期五, 收到老師通告話六月廿四日有頒獎禮, 要著整齊校服... 我諗咗好耐都諗唔起舊年有無呢個頒獎禮

...

於是問吓 ah Be 啦, 佢又話唔知... 最後, 我嘅疑團終於喺今個星期二由小柔媽同另一張通告到解開嘞... 原來 ah Be 係有獎攞, 所以有通告通知家長要幫學生"執正啲" 個攞獎 look!!!

喺今日, ah Be 一早起身, 話我知佢要去攞獎!!! 我同佢講, 快啲瞓多陣, 係下午先返學攞獎呀!! 我同超爸攞齊全屋嘅相機 (其實都係得兩部咁多...) 去頒獎禮影呢個歷史性一刻... (唔知幾時至再有機會嘛... keke) 起初... 現場秩序都 ok (家長們), 但開始頒獎禮無耐... 家長們又開始失控...

我都明嘅... 係人都想影低自己囝囝、囡囡最珍貴嘅一刻... 但都唔好影完又唔走... 或未到又霸住個位先得架... 校方已經留咗最前位置做攝影區架啦!! 唔使下下都爭最前嗰行影架... 次次學校有 function 都好似｢搶包山｣咁, 真係冬天都會標汗架... ... 真係辛苦啲老師... 佢哋都攔截唔住啲家長...

唉... 啲小朋友見家長們咁無秩序... 佢哋心諗... 爸爸媽媽都唔守秩序嘅??!! 佢哋又點會聽大人講要有秩序、要排隊同整齊呢... 其實大家明唔明咩係｢身教｣呀!!

我又忍唔住發o勞o蘇... 講返正題... 今日係頒 2010 - 2011 多元智能獎

未上台前, 偷側哋影咗幾張相

到 ah Be 上台啦... 我都影得好辛苦... 因為迫唔到入人群之餘, 仲要俾個高我一個頭嘅男家長一路用佢手臂近乎腋下嘅位置夾我個頭!!!

(因為佢又係影緊佢個仔) 我一縮, 佢個腋下就伸過啲... 我縮... 佢又過啲... 我最後忍唔住同佢講 : ｢你可唔可以唔好再夾我個頭呀?? ｣頂!! 真係佛都有火!!

好彩我部相機個 zoom 功能強勁... 先影到呢幾張朦朦鬆鬆嘅上台相... 又好好彩 ah Be 見到我隻好似遇溺中嘅手 (向佢揮手), 佢即刻對住我呢邊笑!!

可惜, 我連佢攞獎嗰刻都影唔到... 泣...

阿媽! 我得咗啦!!

臨落台影多張啦! 無幾何...

多謝邱老師指導!!

仲有獎狀架!! 一望... 哦... 原來係禮貌獎!!!

雖然事後知道全班有一半人攞唔同嘅獎... 但都好吖!! 算係一點點鼓勵嘛!! 我愛豬肉獎!!

2011年6月23日星期四

游泳班試堂

ah Be由兩歲到四歲都好怕水, 一帶佢去游泳池游水, 佢都好驚... 唔肯自己用水泡玩, 要我哋拖住佢同埋唔準我哋整濕佢啲頭髮喎... (

即係唔係游水啦!!)

喺今年踏入夏天, 將近五歲嘅佢突然開竅... 要求學游水喎!!! (因為佢知道好多朋友仔都學緊游水, 所以好想同大家一齊游呀!!)

我哋約咗游泳教練喺星期三 (22/6) 去試堂, ah Be都學得好開心!! 睇下, 有個潛水鏡印喺眼睛到呀!!!

本來試完堂想俾訂金, 但最近猩紅熱病肆虐... 穩陣起見... 都係過咗暑假先學...

2011年6月22日星期三

申請小一入學學生相 (2)

點解有第二集?? 咪係我打完第一集之後... 望吓... 望吓... 諗吓... 諗吓... 覺得有啲唔多妥... 張相好似唔多 formal... 所以搵我啲表姐攞意見... 最後定案 ~~ 著校服再影過!!!

喺前晚 (20/6), 咋咋淋同超爸趕放工, 喺 FOTOMAX 關門前一刻同小 Be 衝入去 (店員以為我哋打劫... (*´ｪ`)), 因為小 Be 套校服係白色, 所以我哋試咗粉紅色同藍色做背景. 小 Be 好想用藍色做背景, 不過睇完實相之後, 我同超爸都覺得粉紅色背景嘅效果好啲, 所以我哋揀咗呢一張, 靚唔靚呢??

多謝俾過意見我嘅 Ter 姨媽、小清姨姨同小柔媽!! 感淚...

2011年6月21日星期二

2011 父親節

回帶到 19-6-2011

Happy Father's Day to CHIU BABA!!!

爺爺, 父親節快樂!!!

超爸一起身, ah Be 立即端上由 mamemo+ah Be 自家制嘅咭, 送俾超爸, 加上一句 : ｢Happy Father's Day !!｣ + 香吻一個!!

一張簡陋嘅自家制咭, 送上我同ah Be嘅濃濃心意

原定同爺爺飲茶, 但最後都取消咗... 我就話不如去見一見公公啦!! 於是我哋齊齊出發(連婆婆), 我仲買咗三色花俾老豆添!!

老豆, 你鍾唔鍾意呀?? I love you!!!

公公, ah Be畫咗幅畫俾你呀!! 靚唔靚呢?? 鍾唔鍾意呀??

探完公公, 返歸休息+溫習功課. 近黃昏, 我哋再出發去會合桐桐姐姐一家食晚飯!!

ah Be 同佢身上隻 monster 圖案好相似架!!

是晚的桐桐姐姐 ~ 好 lady 啊~~

2011年6月11日星期六

申請小一入學學生相 (1)

終於... 都到我哋啦...

眨吓眼... ah Be喺九月會係一個 K3 學生啦!! 即係話我哋要準備考小學喇!!! 要為做｢小學雞｣作好準備!!

因為ah Be 讀呢間幼稚園唔需要每年交學生相 (都幾環保同慳錢架!!), 佢一直都係用緊兩歲幾時影嘅學生相(N1), 所以我喺星期二帶佢去影近照, 作申請小一入學用... ah Be 好緊張, 佢知道係用嚟考小學 (佢好驚而家間學校唔收佢讀小學...) 所以臨影相前, 佢自己都有練習過用咩笑容好啲 , 仲問我 O 唔 OK添!!