ah Be 學鋼琴了 ~~

經過一波幾折, ah Be 終於學鋼琴了 ~~ 由今個星期三 (27/7/2011)起, 易老師會逢星期三嚟我哋屋企教 ah Be 彈琴.  可能 ah Be 由好細已經識易老師, 所以佢好快就好投入, 有問有答...  一啲都唔怕醜

下面呢幾相係偷偷地影嘅... ah Be 都算好投入上堂...

第一堂學咗高音姐姐、低音哥哥、C 伯伯 (middle C) 同看豆豉數拍子.  暫時佢都好肯練琴... thanks god!!! ah Be, 加油呀!!!

撞鬼!!!

撞鬼囉!!!撞鬼囉!!!

我最近好似時運低... 撞鬼兼食咗...C咁... 近視深咗、散光深咗、仲有老花添.... 近乎盲...

四肢出現衰退... 周身骨痛... 連左邊｢蘿友｣都可以扭傷... 痛處可以扯到落左腳... 真係無奇不有... 七勞八傷... 連頭痛都返嚟探我... meow~~ 

語言能力衰退... 發音唔正 (莫講英文... 中文都咬唔到音... 有鄉音...) 口、腦不協調... 有時唔知自己講咩... 語無倫次... 

記憶力衰退... 過目即忘係我嘅強項... 唔記得啲物件放喺邊、唔記得啲 login 同 password、唔記得自己有無做過某一件事, 真係似 Eason 話... 記憶力好似貓咁 ~ 只有三十秒...

手、口、腦嚴重不協調...

工作方面... 工作效率奇低... 有愧老闆...

家庭方面... 冷淡對待超爸... 小Be... 和老媽...

終日迷迷茫茫、魂不附體、唔想活動... 連小Be 嘅開心 blog 都唔想寫...

希望過咗呢個農曆七月會好啲... (搵借口中...)

Happy Birthday to Ah Be~~

 Happy Birthday to Ah Be~~

Ah Be 生日快樂!!

mamemo 祝你一生健康、快樂!!

給 ah Be 的信

親愛的 ah Be,

眨吓眼你已經五歲啦!! 我好懷念BB時期的你, 嗰時嘅你真係好得意同好乖!! (依家都唔差... 只係多口啲、曳啲、懶啲、惡啲囉...)  我好慶幸有你呢個咁乖嘅囝囝, 令我可以做一個開心又輕鬆嘅新米(手)媽咪.   呢五年, 我有好多你同超爸嘅開心事要記住, 我要好努力咁一一記錄, 我唔知你將來會唔會睇番, 但到我老來都可以睇番, 回味一下, 打發下時間嘛!! 唔使捉住你陪我嘛 

 雖然你承諾過到我老咗, 你會帶住我四圍去, 唔會掉低我哋倆老... (心都甜晒 ) 但mamemo老咗都唔想成日阻住你囉.  你知唔知你成日會喺睡前都眼濕濕咁同我講, 你唔想我同超爸會老... 同死... 每次一講完, 你就會情不自禁... 好傷心咁流眼淚... 可能公公嘅離開令你好傷心... 接受唔到老和死亡... 但呢個係人生必經過程, 你要珍惜眼前一切人和事, 享受過程已經足夠.

仲有, mamemo 好想講你知... 我對你咁嚴厲同惡, 唔係要你做成功人士、有大成就, 我只係想你將來做個好人 ~ 一個有熱誠、愛心、品格良好嘅人. 我有信心你一定係一個好人. 

無論你將來有無細佬或妹都好, 你喺媽咪心中都係我最愛的ahBe
  
I  U so much!!!  Happy Birthday!!!

學習進度篇~ah Be 識睇日曆啦!!

ah Be 一路對何年、何月、何日、星期幾係一樣都唔識... 解釋過好多次都唔明.  喺早兩個星期, 老師開始教呢個課題, 開始時 ah Be 都好混亂吓... 一次過學晒年、月、日、星期, 佢都幾吃力... 經不停做習作紙同練習, 呢個星期開始有文有路!!

今晚, 睡前親子時間時, 佢突然同我講, 今日係7月22日, 聽日係... 後日係... 一路數到下星期二, 係7月26日, 係佢嘅生日.  ah Be大個仔啦!! 識得數日子啦... 我真係好開心呢!!

好有型!!

ah Be 戴完頂帽之後, 同我講 : 戴埋太陽眼鏡仲有型呀!!!   唔係嘛...

見到婆婆時, 仲要同婆婆合照... 真係當自己係明星咁喎... 囝... 唔好咁啦...

ah Be 五歲在校生日會

今日, 學校安排咗七、八月出生同學的生日會, ah Be 好開心佢個生日會又到喇!! (佢好知足架!! 佢已經覺得自己開咗生日會架啦!!) 

諗返起舊年生日會當日, 學校安排咗園會表演同埋可以上課室同小朋友影相留念... 但今年好似無咩聲氣話有園會... 於是, 我睇睇 ah Be本手冊, 好迷茫 ... 

年曆表上係有園會, 但老師又無再通知家長有關生日會同校園事宜... 我知 ah Be 係好重視呢個生日會, 所以我都唔理咁多, 叫埋爸爸去學校幫佢影幾張生日會嘅相.  但我同爸爸去到課室, 只見老師同小朋友影緊班相.  老師同我哋講因某原因取消咗園會表演, 所以只有生日會... 仲要係... 已經影咗生日蛋糕 ...  我同超爸放低一包珍寶珠... 帶住失望心情準備離開... 點知 ... 老師邀請我哋同小朋友一齊影班相!! 

 張班相影得好靚呀!! 不過, 不對外公開... 留待咱家欣賞... 呢張係老師幫 ah Be 影嘅生日相! 超 like!!!

Pre-Happy Birthday to ah Be!!