小一面試結果(二)

又係時候報告一下小一面試結果...

1. 保小 ~ 取錄了~~  (不過已放棄學位)

2. 九小 ~ 不被取錄... 未能進入第二輪面試

3. 罐小 ~ 不被取錄... 無緣進入300強 (2nd interview) 

4. 傳小 ~ 不被取錄...

又係嗰句... 平常心... 剩下神小尚未揭曉結果...

小一面試@神小 (第二輪)

估唔到有意外驚喜... 有第二輪面試... 時日裝束仍是 smart casual ...面試@神小 (第二輪)今日嘅面試時間係11:30, 我哋一家11:15到達, 一去到校門就見到 ther 姨媽喺度等返學校做英文大使嘅諾諾表哥返學.  我哋仲運咗姨媽入學校見諾諾表哥, 咁啱嘅係諾諾表哥係註守我哋去嘅班房, 我哋仲要用英文談話添...

等咗一陣, 我哋被帶到另一個課室進行面試, 一家人連成一排坐, 小朋友坐中間位, 大家問好完, 面試正式開始 ....1. 老問 : 請問小朋友有無恆常課外活動? 如有, 有咩活動?
    媽答 : 有, 學琴同畫畫
2. 老問 : 有無一啲係親子嘅活動?
    媽答 : 有, 會一齊去公園、圖書館同埋一齊去做義工, 探訪啲老人家...3. 老問 : 點解會揀我哋學校?    媽答 : 我對學校有好深嘅認識, 校風淳樸... (下刪百字... )
    爸答 : 因為係天主教背景... (下刪百字... )

問完後, 家長先行回 waiting room, 小朋友留下同老師傾談.  約十多分鐘後, ah Be 由大哥哥帶回 waiting room.  我哋同諾諾表哥講再見之後同姨媽去咗 tea 一 tea, 搞到姨媽遲咗返學校接表哥...
面試內容 (由 ah Be 提供, 可信性 ~ 50%)
1. 老師問ah Be 個名, 幾多歲同喺邊到讀書
2. 問 : 你住喺邊度?
答 : xxx
問 : xxx喺邊度?
答 : 新界
3. 問 : Today is the day of the week?
答 : Saturday (咁都俾你撞中...)

根據兩位姨媽話... 兩位表哥都無考英文架喎... 又深咗... 我聽其他小朋友講, 有考普通話添...
無論收唔收 ah Be 都好, 賺咗一次嘅面試機會!! (阿Q 精神又嚟啦!!)

小一自行分配學位

今日係小一自行分配學位公佈日.  

超爸一早起身眼屎都未抺就上網睇結果 ~~ 結果係 ~~ 無被選中!!! 

其實都預咗... ah Be 嘅身份係首名子女、無宗教、無父母舊生分, 喺世襲+宗教嘅教育制度下只能有十五分... (基本十分+首名子女五分) 真係人有我有, 至在參與... 不求成果嘅首輪~小一自行分配學位大抽獎!!! (十五分嘅中獎機會等如 sogo 聖誕、新年大抽獎嗰啲機會率囉... 聊勝於無!!!) 得嗰十五分... 真係做鬼都唔靈啦!!! 

今次我都仲係抽一般嘅官校 ~ 北官小~~ 首輪共七十五個位, 有一百二十人抽... 都唔中... (其實世襲都佔咗60-70%......)

唔通... 真係要讀私小??!! 負擔都幾大... 成五千幾銀 (學費+車費+飯錢)... 未計其他雜費、課外活動同補習費喎!! 咁以後嘅課外活動係做義工啦!! 唔使用錢又可以幫到人!! 仲可以有品德+價值觀培育, 真係一舉三得!! (又在自我妄想中...)

小一面試結果(一)

眨下眼, 又到出小一面試結果嘅時間...

1. 同小 ~~ 不被取錄... 無緣進入400強 (2nd interview)

2. 神小 ~~ 成功爭取入2nd interview  (扮區議員啲 banner)

其他學校尚未出結果...  等~ing...

無聊親子話~~

有一晚, 我同ah Be 睡前嘅親子話~~
mamemo : ｢喂, 好快啲瞓, 聽日要早起身!｣
ah Be : ｢吓? 早起身? 你要開會呀? ｣
mamemo : ｢唔係開會, 最近媽咪公司好多野做, 早啲返工做野, 希望可以早啲放工返嚟陪你嘛!｣
ah Be : ｢哦... 點解咁多野做嘅?? ｣
mamemo : ｢你唔記得呀? 媽咪年年呢個時候都好忙...｣
一邊碌床一邊講嘅 ah Be : ｢哦... 唔記... 你叫xx 姨姨唔好開咁多會, 你咪無咁多野做｣ (註:xx 姨姨係我老細)
mamemo : ｢都話唔係要開會呀... 快啲瞓啦!!｣
ah Be : ｢哦... ... 咁你早啲返嚟陪我啦...｣ 

面試@香港兒童合唱團

一路都想俾 ah Be 試下去 ｢香兒 ｣學唱歌, 不過我一路都懶懶閒, 無行動... (因為唔係必須嘛, 同埋要滿四歲至可參加唱歌班) 到8月, ah Be 個朋友仔心悠個媽媽通知我 ｢香兒 ｣開始報名, 咁我就決定去碰碰運氣!

今日面試時間係下午2:20, 我哋十二點零出發! 我同超爸都唔多熟何文田嘅路 (我至憎...去何文田...), 諗住信 google map 啦~~ 點知... 領野!!! 兜咗成個鍾頭都去唔到我哋要去嘅地方!! 最後超爸自己靠記憶搵路, 好快就到...  早知唔鬼信 google map 啦... 坐到暈車浪咁濟...  不幸嘅係... ah Be 真係暈車浪 一到目的地, ah Be 話 : 媽咪我唔舒服... 一講完佢就... 我兜都兜唔切... (註: 我坐車頭所以轉唔使身... 佢都好乖, 用佢"多肉"嘅手接住) 一身連車坐位都係...   好彩嘅係 ~ 上衫無污穢到.  我同佢落車清潔, 即同佢入商場睇吓有無氣褲仔買嚟更換.  點知個商場只得一千零一間童裝店... 不過無咩款式... 求其買咗條短牛仔褲著... (真無唔多size揀...)去到面試現場, 衣香繽影~~ ah Be 只係 smart casual (自己打完場~~ ^.^) 好快就到我哋入場登記, 跟住等叫名...
約十人一組, ah Be 話入房後跟老師 "meow~~" 咗幾聲 (我諗係唱 key..), 然後逐個小朋友唱一首自選歌就走得! 前後唔使二十分鐘, 真係快過打針!!  ah Be 自選一首學校嘅兒歌｢我來教你跳舞｣(連埋舞步)ah Be 嘔完都無扭計, 仲要精神斗斗去面試, 所以面試完之後, 我哋就去咗附近好出名嘅快餐店~｢天馬｣食個下午茶輕鬆下先 (其實我哋一家未食早餐架... ah Be 都只係飲咗支奶咋! 原本諗住早啲到喺到食埋個 lunch 先去面試...) 下圖個羅宋湯真係好好味呀!!