Be 家の新寵物

Ah Be 終於養到佢恨咗好耐、好愛嘅金毛BB 啦！

由 ah Be 未出世開始

每次同超爸行｢姨媽傢俬｣都見到佢...

我都好想帶佢返屋企~~

到 ah Be 出世之後

每次 ah Be 見到佢都會衝埋去抱佢, 攬佢同錫佢, 唔捨得放開佢~~

因為我地覺得養寵物要有好決心同責任

我地又無咩時間陪佢

唔可以玩玩下

所以一路都唔養貓/ 狗

卒之, 喺今晚同婆婆做完冬之後

行｢姨媽傢俬｣

決定帶咗佢返屋企~~

可以過下養寵物癮, 又唔使擔心無時間照顧佢

ah Be 仲幫佢改咗個名 ~ ｢樂生｣

我問點解叫 ｢樂生｣??

ah Be 話希望｢樂生｣可以快樂地成長同埋將來做個好醫生~~

(◎_◎) 哦~~

拉票區 @ 智叻網 GNet.com.hk

請投ah Be 作品神聖一票!!  (我居然學人拉票... 爆!!)

多多支持!!! 多謝~~

作品名稱 : 小紅帽送飯去 (雪中小紅帽 ~ 係另類咗啲, 希望大家支持~~ 多謝~~)

組別 : 小童組 Part A - 212

如欲欣賞其他作品/ 投票, 請到以下網址 : 

facebook voting

P1 聖誕趴地食物の準備

尋晚 (19/12), 接咗ah Be 之後, ah Be 話星期四係學校 X'mas party, 老師話可以帶啲party 食物返學校, 數量約廿人左右, 食物唔需要太多, 怕浪費...  ah Be 一直都想自己整食物返學校食 (記唔記得... 佢喺K2時已經要婆婆幫佢帶齋菜返學校開 party... )  

我成日都覺得帶食物返學校, 啲食物都凍晒, 凍冰冰唔多好食喎... ... 不過佢鍾意, 就試下整一次啦!  我哋一路行一路傾下帶咩食物好呢?? 

ah Be : ｢媽咪, 整菠蘿腸仔吖?｣ (佢一直都好想整呢味小食...)

媽媽 : ｢吓!! 實有人整菠蘿腸仔架喎!  上星期交通安全隊開 party, 你都話有人整咗! 不如再諗下啦!!｣

ah Be : ｢整啫喱?? 老師話食啫喱有益、有營養呀! 有維他命A、B、C、D、E、F、G、H、I、J、K..... Z ｣ ( 有無咁多維他命呀??)

媽媽 : ｢天氣咁凍, 會唔會食咗肚痛架??｣

ah Be : ｢應該唔會架喎.....  老師話食啫喱有益、有營養呀! 有維他命吖嘛...｣

媽媽 : ｢定係整燒賣??｣

ah Be : ｢我諗我啲同學唔鍾意食燒賣...｣ (係你唔想食之嘛... 屈同學唔鍾意... ...)

媽媽 : ｢一係整BB雞蛋三文治?? 又有益、又方便...｣

ah Be : ｢唔得呀, 老師話唔可以帶太飽嘅食物, 會罸架!  仲有呀, 食太多蛋白質唔健康架...｣ (吓... 蛋白質唔健康, 咁你又日日都要食雞蛋... ...)

媽媽 : ｢咁... 一係帶啲糖返去, 食唔晒, 可以每人帶啲返屋企｣

ah Be : ｢媽咪, 我唔想啲同學蛀牙喎...｣ (真係對同學好好喎... =.=')
 
媽媽 : ｢咁... 你想點呢??｣

ah Be : ｢媽咪, 我想整啫喱呀!! ｣

媽媽 : ｢OK, 去買材料~~｣

*** *** *** *** *** *** *** *** *** *** *** *** *** *** *** ***

實不相瞞... 我喺甜品方面... 真係無咩天份架... ... 超爸又忙... 我唯有頂硬上啦... 希望唔好失敗啦... 祝順順利利!!

買完材料, 跟手返屋企整埋佢~~

開始整啫喱!! (唔明點解ah Be 攞包啫喱粉攞到好似做 facial 咁... )

我開完水之後, 就由 ah Be 接力攪溶啲啫喱粉~~


攪溶咗啲粉, 將啲啫喱水攤凍之後, 放入雪櫃雪一晚~~

*** *** *** *** *** *** *** *** *** *** *** *** *** *** *** ***

第二晚 (今晚), 將兩底啫喱由雪櫃攞出嚟 (一底係黑加侖子, 另一底係杧果)

睇個樣 (我真係有啲驚架...) ... 都OK 嘅....

隻衰野喺我教緊佢揸刀同埋點切格仔時, 喺到整蠱造怪... ...


嘩!! 個樣好專注、好認真, 好 charm 呀~~
 

製成品~~~  個樣雖然衰咗啲... 希望佢啲老師同同學唔好介意, 食少少啦~~~

希望聽日嘅party, 大家玩得好開心啦~~ Have Fun~~~ (聽聞仲有攤位遊戲玩添~~ Enjoy~~)

2012.12.12 無聊話

2012 . 12 . 12

呢個日子真係有今生, 無來世~~ 要好好記住呢一日

*** *** *** *** ***

趁今日呢個特別日子, 記低幾則無聊事先~~

*** *** *** *** ***

某朝, 有位小朋友出門前,

望著熟睡中的爸爸問 : ｢點解爸爸咁爛瞓豬唔早啲起身嘅??｣

媽媽答 : ｢因為爸爸要返工賺錢養我哋, 好辛苦架... 所以要休息多啲, 瞓晏啲.｣

小朋友再問 : ｢媽咪, 你都要返工架喎...｣

媽媽答 : ｢我... 早放工, 早啲瞓吖嘛....｣

真係反應慢啲都死... (*´ｪ`;)

*** *** *** *** ***

某夜, 小朋友喺床上聽到門聲, 知道爸爸放工返來

小朋友問 : ｢爸爸返工真係好辛苦呀... 媽咪.｣

媽媽答 : ｢係架... 你要乖啲呀! 唔好激爸爸呀!!｣

小朋友 : ｢知道!  仲有呀, 第日爸爸老咗, 我一定會照顧佢架...｣

媽媽答 : ｢咁就乖喇... 快啲瞓啦~~｣

小朋友 : ｢哦! 媽咪你等一陣吓...｣ 邊講邊走出廳

然後再同爸爸講 :  ｢爸爸, 你早啲休息啦~~ 健康啲呀!!.｣

講完再返房續睡

*** *** *** *** ***

某朝早, 小朋友出門返學跟媽媽閒聊

媽媽問 : ｢我唔做野, 返嚟屋企照顧你好唔好?? ｣

小朋友 : ｢媽咪, 唔好啦! 繼續返工啦! 可以賺多啲錢呀!!｣

媽媽 : ｢吓... 我哋唔使要咁多錢喎... ｣

小朋友 : ｢我想你做個有錢嘅囡囡吖嘛!!｣

** 其實係驚我喺屋企鞭策佢做功課之嘛...（￣へ￣)
使唔使搵啲咁冠冕堂皇嘅藉口呢??!!

*** *** *** *** ***

某夜, 小朋友喺入睡中時, 突然攬住佢媽媽條頸話 : ｢親愛的媽媽, 我愛你!  我真係好愛你... ...  ｣

然後... 瞓著咗... ...

*** *** *** *** ***

某夜, 小朋友問 : ｢媽咪, 我幾時有弟弟??  ｣

媽媽 : ｢嗯... 我都想知... 媽咪都好想送個弟弟俾你, 不過可能會無弟弟喎... 呢啲係上天嘅安排架...｣

小朋友安慰地 : ｢算啦! 算啦! 媽咪, 我唔要細佬嘞... ｣

媽媽 : ｢我盡量啦... 希望有啦...｣

小朋友續 : ｢算啦! 算啦! 媽咪, 我唔想你個肚仔辛苦, 我唔要嘞!｣

家姐~~

一路以嚟, 大家都知道 ah Be 都好想有弟、妹...

可惜一直都無緣... 

係兩年前, 我契咗阿豬做契女

佢同我、ah Be 都好夾, 唔係成日見

每次見面都好 close

由佢BB期開始, 我都可以抱到佢 (佢都係癡媽筋, 唔係好多人抱到佢), 佢都肯跟我架!!

ah Be 同 阿豬一路都相處得好好, 佢哋一齊玩永無嘈交, 玩得好斯文.  佢哋好老友鬼鬼架~~

最搞笑嘅係, 阿豬有個妹叫~小魔, 又係好得意. 成日都跟家姐叫我契媽~~

哈哈... 唔通... 算命先生話我命中注定有三個子女... 就係咁解??!!

生日咭、心意咭

上一篇講過 ah Be 送咗一張自製生日咭俾我, 當我收到張咭時, 除咗好感動、開心之外, 仲打咗個"突"

咩事?? 考眼力

生日咭未收改前~~ 睇唔睇到呀??


▼
▼
▼
語句 : 你快生日了, 我愛你.  你快｢乞｣蛋糕...  ... 乞蛋糕!!??

咋咋淋叫 ah Be 加返個口字上去.  其實有ah Be 陪, 我係唔介意"乞" 架~~~ 
(有子萬事足~~)

生日咭嘅背後, 車癡 Be 畫咗架 "黃老太 ~ 城巴" 送埋俾我~~


*** *** *** *** *** *** *** *** *** *** *** *** ***

最近, ah Be 成日都畫心意咭俾我同超爸~~

呢張係最新嘅~~

好 sweet  架~~ 句句都 I love you / 我愛你!!

佢真係好鍾意車囉... 張張咭都有車架...

呢架車似唔似 UFO??!!

佢試過畫過一架好似黑箱車送俾我同超爸添呀... 真係大吉利是....

重新振作

ah Be 上咗小一兩個零月, 表面上算適應咗小一生活, 一般功課同默書尚可應付.  基本上課程都有啲深 (對我而言...).

中英文科由九月底正式授課開始, 不停做閱讀理解, 用字都唔淺...

至於英文科, 啲文章用字都好深, 所以都幾吃力架!! (ah Be 0至5歲時, 我無谷過佢記生字...)

常識科, 都ok 嘅! 不過第二冊起係英文授課... 又開始有啲吃力囉...

數學科, 雖然有20% 係英文授課, 都算ok 啦!!

功課方面, 都係依賴我同佢一齊做...

最後為免佢太夜瞓同傷感情... 上星期四 (8/11) 開始上功課輔導班 (試下先, 如果佢可以跟得上進度就會停...)

因為下星期中開始考試, 所以近呢兩個星期學校不停出卷做評估, 但成績未如理想... (唔係我要求高... 真係唔多合格嗰隻...)

我發現啲試卷有好多空咗無答案... 我問 ah Be 點解?? 佢話有啲唔識, 有啲唔知點解係空嘅?? 我叫佢讀卷又有識大部份架喎...

最後定論係... 佢心理素質方面, 仲係保持住K3 生活... 無分數概念... + 日日發夢中... + 懶

我真係頭都痕晒, 好困擾... 

過去兩個星期我好似一隻 ｢暴龍｣... 

不停"哦"佢...

不停"鬧"佢...

 

不停"剷"佢...

佢都係無咩反應... 有時好似好驚咁囉...

喺尋晚同超爸傾完之後, 心情好咗啲, 加埋今晚同ah Be 傾過, 佢應承咗會改咗啲壞習慣, 例如: 發夢...

我哋勾過手指尾, 佢會改啲壞習慣, 我會變返一隻 ｢腕龍｣

我哋要喺開心氣氛下, 開心學習~~

今晚做得到~~

好希望日日都做得到~~~

重新振作~~~

我哋一家人要加油~~~

*** 勾過手指尾, 一定做得到 ***

森巴草蜢大戰軟硬 Fans 演唱會 + McDonald's kidathon

十月三十一日, 我哋膽粗粗帶ah Be 去睇 ｢森巴草蜢大戰軟硬 Fans 演唱會 ｣(膽粗粗 ~ 係因為ah Be 上小一 (唔係第一次睇 concert), 要平日帶佢去睇 concert ... ... 真係唔應該嘅... )

今次個舞台好靚 + 軟硬嘅表演令我重拾  ｢那些年｣嘅感覺~~  (佢哋對上一次  ｢Long time no see 演唱會｣我啱啱坐緊月 (仲要係生咗幾日咋... 陰公...) ... 真係... 傷心死我... )

軟硬一出場, ah Be 就笑到見牙唔見眼 !  睇到差不多十點, ah Be 敵不過草蜢嘅悶場 ~ xx恩仇錄... 去咗搵周公 ....  而我都差啲跟埋佢去... 真係悶到我... 暈吓... 暈吓架

十一月三日, 應契爺邀請參加麥勞勞喺馬場舉行嘅 ｢兒童愛心馬拉松 ｣, 為 ｢麥當勞兒童之家｣籌款.  今次任務係跑馬場一個圈~~

等開幕... 無所事事... ...


等起步之際, 軟硬同一眾商台DJ 坐喺我哋前幾行, ah Be 見要軟硬佢哋, 即時好興奮, 不過 ah Be 太怕醜, 唔敢同佢哋影相.  到夠膽叫佢哋影相時... 已經太遲... 因為"實Q" 已經唔俾人埋佢哋身嘞...

我本人超鍾意軟天師 ~ 阿葛~~  幾靚仔~~~ 真係瘦咗好多囉... 我仲同佢影咗張合照添!!  (合照私人珍藏~ing)


起步後, ah Be 一支箭咁跑咗去, 追到超爸氣咳... (我... 當然係慢步行啦...) 話時話, ah Be 真係 keep 住跑... 就算等我哋, 佢都係keep 住急跑行, 無停底架...
我哋覺得好似生咗個｢阿甘 ｣囉 (Forrest Gump) ... ...

經過我巧妙安排, ah Be 都有同軟硬合照(下圖左上角)~~ keke

下午一點零完成馬拉松, 食完午餐就返屋企繼續溫習lu....

Happy Halloween 2012

(20/10) 前個星期六, 喺屋企溫完書(吊頸), 出咗尖沙咀食飯(抖氣)

順便行吓 "斗斗城"~~ 見到哈囉喂臉具~~

攞咗嚟試帶, 造型照~~

我最愛佢把長髮~聶風昰也~~


(28/10) 星期日中午返畫班上免費 "哈囉喂筆筒班", 個作品都幾靚喎~~
(個傻Be 話送俾我~~  我覺得個筆筒靚, 我好鍾意~~)

隻蜘蛛有好多隻腳, 多到呢...  畫班姐姐撳住傻Be 唔好再加腳...

嗰隻三眼南瓜同大眼鬼都好得意~~ I like it so much~~

同場加影 ~ 時日 Halloween party 造型~~ keke 

小一首兩次中、英文默書報告

由十月第二個星期開始 (十月十、十一日一連兩日), ah Be 展開佢人生默書生涯~~ 我就重拾默書生涯~~ (慘過自己默... )

第一次默中、英文嘅ah Be, 喺溫習時好唔專心、懶懶閒, 踢三腳, 郁一下... 成個十.一假期就用咗兩日溫書. 

喺中默方面, 佢好快就掌握得到~~ 好快已經KO 咗篇課文. 

至於英默... 我真係 咗唔知幾多擔血... 串字串到我暈... 佢嘅狀態反反覆覆, 啲生字一時串到, 一時唔記得晒... 我真係氣絕生亡咁滯...

十月十日, 冒住食蛋危險英默 ,,, 結果係 70 分  ~~
(其實佢合格, 我已經收貨 ~~ hehe... )

十月十一日, 中文讀默第五課 ~ 小草 ~ 95分
(我好開心呀~~ , 嗰5分係錯喺個 ｢撐｣字, 錯咗筆劃喺個 "牙" 字到...)

第二次, 英讀默 ~ 99分
(我超開心囉, 估都估唔到... 5句句子全對, 只係錯咗Kowloon 個 K 字寫咗細楷, 所以扣咗一分~~) ah Be 有少少失望  攞唔到 100分... 佢話佢下次會小心啲... 我唯有鼓勵下佢, 同讚下佢.  等佢有推動力繼續努力啦~~

第二次, 中背默第六課 ~ 小磨菰 (全課背默,連標點背) ~ 100分!!
我同 ah Be 超超超開心囉~~ 其實佢都有一個唔小心位錯咗, 就係個 ｢沒 ｣字, 漏咗頂部嗰一小勾.  老師好好人, 俾咗100 分俾佢, 鼓勵下佢.  佢自發性地話佢以後會注意啲筆劃位.  

希望ah Be 可以維持住呢個默書 mood 啦~~

又要為下星期默書繼續努力了~~~ ah Be, 加油~~ 媽咪一定會身體力行地支持您架~~~