曱甴怕甜定怕臭??

頭先傻Be 食完藥上床瞓覺, 當佢錫我一啖時, 我發現佢個嘴仔仲係甜嘅, 我叫佢快快抺嘴, 如果唔抺, 啲曱甴會爬入佢嘴巴,  佢抺完嘴返嚟之後, 就張開口俾我聞一聞, 然後問我 :

傻Be : ｢ 媽咪, 我個嘴巴臭唔臭呀?｣
媽咪  : ｢ 少少臭啦! 快啲合埋口.｣
傻Be : ｢ 臭呀!  咁啲曱甴咪唔敢爬入我個嘴巴囉!!｣ 
媽咪  : ｢ 吓! 唔係喎...  曱甴鍾意臭... 好鍾意匿埋喺臭地方喎... ｣
傻Be : ｢ 哦...  曱甴鍾意臭嘅... 咁... 佢哋好似怕甜架喎... 如果我個嘴巴有甜味,  啲曱甴就唔敢爬入嚟囉... ｣  
媽咪  : ｢ 其實曱甴鍾意臭味、污穢、甜味同埋食物, 知唔知呀?? ｣ 
傻Be : ｢ 知道啦! 咁我個嘴巴要有咩味, 啲曱甴先怕呢?? ... ... ｣   (仲諗咩味??!!)

好彩,  傻Be 突然瞓咗! 如果唔係都唔知點講落去...我驚我會忍唔住打佢呀... (佢成日都瞓得好突然架, 話瞓就瞓...)

四眼怪~~ (這篇 blog 內容涉及驚嚇情節)

上星期六 ~ 警方發現一隻 ~ 有手有腳嘅 ｢四眼怪｣喺元朗區一棟村屋出沒

最後由｢捉怪｣專家 ~ mamemo 捉拿返家作檢查、研究

因 ｢四眼怪｣屬罕有動物, 所以暫時保密住處

｢四眼怪｣個人資料如下:
暫名 : 傻 Be
身高約 120cm
體重約 23-25 kg
年齡約 5.5歲

▼
▼
▼
▼
▼
▼
▼
▼
▼
▼
▼
▼
▼
▼
▼
▼

｢四眼怪｣容貌密絕曝光

｢四眼怪｣ 朦豬 look


｢四眼怪｣ 扮精靈 look


mamemo 無聊完畢, 多謝收看!! 

童言 ~ 爸爸出差記

超爸每年需要出trip約兩、三次, 每次都會離港約五至十日.  以前超爸出trip 對ah Be嚟講無咩感覺 (佢癡mami 筋嘛...), 爸爸喺唔喺度都無所謂.  不過自ah Be 四歲起, 情況有轉變嘞~~  佢開始好享受同爸爸相處嘅時間  每次爸爸出 trip, 佢都會好唔捨得, 會掛住爸爸嘅~~~

星期一 (28/5), 爸爸要去峇里五日, 個傻 Be由星期日晚開始, 不停同我講會好掛住爸爸, 又會問點解爸爸要去開會開咁耐? 

星期日晚臨睡前, 傻Be問我又同我講以下對話 :

傻Be : 爸爸會唔會返唔到嚟架...
mamemo : 爸爸去開會幾日咋, 唔係去打仗, 梗係會返嚟啦~~ 傻瓜! (◎_◎)
傻Be : 哦... 真架?? 真係會無事??

星期一朝早, 傻Be 特登7點起身同爸爸講bye bye, 仲要飲泣咗好耐添... 話唔捨得爸爸飛咁多日喎...  我唯有叫爸爸啜佢一啖啦~~

父子兩人幾癡纏~~ 一早起身牙都未刷、臉都未洗就視像傾偈~~

K3幼稚園畢業禮~~

各位姐姐、妹妹、哥哥、弟弟 ~ ah Be 幼稚園畢業啦~~~

今日早上9:30 返班房集合做準備.
0:10 入禮堂坐定定 (考眼力 ~ 見唔見個傻Be 喺邊呀??)
*無計啦... 我坐超等位, 係影得咁上下 ~ 細.... 嘻嘻...

10:30 畢業禮開始 ~ 校長致詞 + PTA 家長致詞. 
然後校長向班代表頒畢業證書. 
再頒加許狀俾品學兼優生、代表學校攞獎嘅同學們等等...

跟住係代表學校出賽嘅同學表演 ~~ 中、英文朗誦+唱遊同口風琴
(嗱...嗱...嗱... 見唔見有個頭呀??)

我哋坐超等位已經睇得唔多清楚... 

但呢位先生每每有新表演上台或影合照時, 佢都企定定影相... 

我以為佢係紅館出面賣相嗰個！個個出場都關佢事...
佢已經坐超等第一行, 又有腳架架啦... 都仲要咁...｢自私魚｣囉...   

真係好想同佢講 : ｢先生, 俾條生路嚟行啦！我張張相都有你架!!｣

行完禮, 回班房影大合照~~
(現場超混亂... 三十幾個學生+六十幾個家長+超過六十部相機/攝錄機...)

扮鬼扮馬佢最叻~~

自製畢業帽 ~~ 型嗎??

班主任頒畢業證書俾 ah Be ~~ 多謝老師!!

我嘅至愛 ~ 蘇同學 (佢真係超高, ah Be 拍埋去即變小矮人~~)

玩到癲晒~~ 完全控制唔到~~

一班好友合照~~
佢哋長大後, 仲會唔會記得曾經有過一班咁好嘅朋友?? 佢哋會唔會繼續做好朋友??!!


留咗三年腳毛嘅地方, 好快會離開... ah Be 同 我都好唔捨得... 

後記 : 班房壁報係由各小朋友的自畫像組成, 每人自畫像嘅胸前都有一張心心咭, 小朋友會寫上｢我的志願｣. 而 ah Be 的志願係 ~~

K3畢業禮彩排篇之 ~ 成功登車

今朝, 我哋7點已起身, 無經過吵鬧過程~~~

ah Be 一叫即起, 無典床, 算唔錯架啦 (要求好低...) ~~

當係為小一預習~~

今日成功登上校車!!

我肯定了三年前的決定是正確的

為小李選讀下午班, wakakaka! 

早上上學~來日方長~~

(自圓其說中~~)

K3畢業禮彩排篇之 ~ 瞓過籠

今個星期六(26/5) 就係ah Be 幼稚園畢業典禮嘞~~  所以學校安排下午班同學喺今日同聽日 (24, 25/5) 轉早上返學, 跟上午班同學一齊全體畢業典禮彩排.  媬母車安排咗呢兩日要7:55上校車返學.  

我同ah Be 諗住今朝早起身, 所以尋晚好就早上床 ,  瞓到6:40, 我同ah Be 都微微醒咗, ah Be 仲喺我耳邊同我講 : ｢媽咪, 我好緊張呀!｣(佢驚遲到...)  我見時間尚早, 所以叫佢瞓多一陣  ~~  點知... 唔瞓由至可.... 一瞓領晒野...  我哋兩母子瞓到好似死咗咁... 鬧鐘都聽唔到... 我一扎醒已經係 7:43....  死啦... 即係趕唔到媬母車啦... 於是, 咋咋林叫ah Be 起身出門口, 由我帶佢返學...  好彩, 最後都無遲到~~~

除咗K1頭兩日由我哋帶佢返學之外, 佢一直都係坐媬母車... 估唔到第三次帶佢返學係兩年半後嘅事~~  企喺站到, 個樣幾醒神!!

time files~~ 呢張相係K1第一日返學影嘅~~~ 2009年9月1日 (真係好懷念BB 的 ah Be...)

由地鐵站行返學校都要成20分鐘架.... 行多一個半月咋~~~ ah Be 要好好珍惜呢份感覺呀~~


返到學校書包都未放底, 老師就帶佢哋去排洗嘞~~

返禮堂後, 排排坐點名, 然後開始彩排~~

波仔近況~~之生病篇

多謝大家對波記嘅關心~~

波記已經睇咗醫生喇~~ 証實佢無被虐待, 只係患皮膚病 ~ 毛嚢蟲 (放心晒~~)

開咗消炎藥, 將會食埋杜蟲藥.  希望佢快啲好番啦!!!

波記最近好曳曳, 捉佢睇醫生會發脾四, 又唔肯入籠~~

仲有呀!! 唔吃乾糧, 要食罐頭貓糧 (真識食~~).  唔俾罐頭貓糧佢, 佢會發爛渣添呀!! 

臭當到死呀~~ 佢~~ 真曳曳!!

遲啲再 post 佢嘅靚相啦~~~

~~ 報告完畢 ~~

p.s. 今朝見到佢, 發緊爛渣~~ 扭計要食罐頭貓糧~~ meow~~

波仔近況~~

最近波仔好乖, 成日都返嚟報到+食飯.  有時我同ah Be行開行埋, 佢都會喺草叢邊 "喵~~" 我哋. 我諗佢認得我哋啦~~  同佢傾偈都有回應架~~

佢啲毛毛已經長番晒出嚟, 啲爛肉都好番晒.  不過, 我就覺得佢唔多精神... 無嚟神氣... 連 "喵~~" 聲都細聲咗...

對眼都無咩神...

hand made 手錶

話說尋日同超爸睇完中醫之後去接 ah Be 放學, 媬娒車叔叔向我哋同A同學嘅爸爸話講, A同學喺學校咬 ah Be 隻手一啖, A同學爸爸即時同我哋講唔好意思... 到晚上, A媽媽打電話俾我道歉, 仲同 ah Be 傾咗兩句, ah Be 同姨姨講: 唔緊要啦, 我已經原諒咗佢~~  (講得咁得體嘅....  好大個仔呀... )

臨瞓前我再同佢傾偈, 問佢點解俾人啖? 佢話喺課室排隊放學時, A同學插隊企喺佢前面, 於是佢同A同學講: 你唔好插隊, 去後面排隊啦 (我估計當時佢啲語氣應該係麻麻哋...),  跟住A同學就出口咬落去.  佢話佢忍唔住喊... 其他同學即刻叫老師, 老師即時訓話A同學同埋耍A同學道歉.  所以佢已經原諒咗A同學. (好彩ah Be由細到大都無咩記性同埋無所謂...加上我一路都同佢講玩得就唔好怕受傷, 有時都會有損傷.  如果俾人打唔好還手, 避開佢, 然後話俾老師同爸爸媽媽聽.)

隻衰野仲話隻手錶好大隻喎~~ 

由上星期三起，我連續兩日喺ah Be書包入面發現佢喺學校準備的母親節咭，每一次發現張咭時，佢就好緊張咁話: ｢秘密｣~~ 然後再一次 ｢收埋｣ 啲｢秘密｣... 但佢啲｢秘密｣都係不停俾我發現囉.... 媽咪真係好想同你講 : ｢BB, 你可以收埋得好一點嗎？｣ 

救命呀！！喺星期六晚，我再一次喺ah Be 房內嘅某一個角落 (地下)，發現 ah Be「收埋」的咭！阿仔，你知唔知「收埋」係點解？其實呢啲係「pad 埋一邊」囉！ 

  

終於喺星期日朝早，呢兩張 ｢抽象｣ 母親節咭 ~ 到手啦！話說星期日早上九點正，ah Be企喺我床邊拍醒我，然後指向床頭櫃上嘅咭，冷冷的說：｢媽咪，早晨！送俾你架!｣  然後上床繼續爆瞓！   (其實我都好感動架~~ 佢特登起身送咭俾我喎...)

左手邊嗰個張睇唔睇得明係咩?? 其實我都睇唔明架... 根據ah Be嘅解釋, 原來係佢隻手揸住束花~~ (真係唔講唔知...)

哈哈!! ah Be 手中母子自畫像~~ 仲有畫咗波仔上去添 (左邊嗰隻抽象貓).  估唔估到右手邊嗰個好似傷殘人士公仔係咩嚟嘅?? 原來係化妝品嚟架~~~ 小朋友嘅小宇宙... 真係超乎大人嘅想像~~~

 雖然兩張咭內容都有少少錯漏，但第一次自制咭，無所謂啦！wakaka 

ah Be 從 mamemo 病中長大了

我入院頭兩晚, ah Be 都係返婆婆屋企瞓, 方便超爸早出門嚟醫院探我, 而ah Be 每晚離開醫院時都好堅強咁同我講bye bye.  不過, 臨睡時就會 喊住咁打電話俾我, 同我講有幾掛住我、想同我返屋企等等... 每次都要講超過十五分鐘先收線, 有時仲要再打電話嚟, 真係好鬼痴纏~~

呢兩個星期佢大個咗好多(當然都曳咗好多啦~~) 今次就講下佢有咩行為大個咗吖~~

1.  佢會多啲幫手做家務, 例如 : 開枱食飯、傳餸、傳飯、搬衫褲出入洗衣機、曬衫收衫等等

2.  食飯時會夾餸俾我, 又會話 :  ｢媽咪, 你貧血呀, 好番未呀?? 食多啲棻吖!｣

3.  如果我沖涼, 佢會耐唔耐拍門叫我, 睇下我有無回應, 知道我無暈底咗喎

4.  有校車同學仔約佢落車後去小公園玩一陣, 佢拒絕同學仔嘅邀請, 同同學仔講:  ｢唔得呀, 我媽咪病咗, 要喺屋企休息三個星期, 我要早啲返屋企照顧佢呀! 遲啲先玩啦!｣  (係 ah Be 話我知嘅)

雖然以上所講嘅例子係啲好小嘅事. 但喺我眼中, 我覺得佢大個咗, 同埋佢學識咗點樣關心人、照顧他人~~ 希望佢可以繼續從生活中學習做人嘅道理啦~~