圖表

上星期四做完天灸, 帶咗ah Be 返公司執埋少少手尾.

當時我做緊呢類圖表, ah Be 指住高位話 : ｢媽咪, 呢點係升喎! 呢個跌咗好多呀! ｣(指住低位...)

我個心驚一驚... 

心諗 : 吓... 阿仔千其唔好做媽咪呢行... 真係夕陽工業... 賤過地底泥... 零尊嚴呀... (又陷入妄想中... 唔怪得我架... 壓力大吖嘛... 如果睇唔開, 好易有妄想被迫害症... )

跟住ah Be 叫返我個魂魄返嚟, 問我攞紙畫公仔

ah Be 畫咗無耐... 我聽到佢講野... (唔好驚, 唔係講"怪"野...)

ah Be 口中唸唸有詞 : ｢中國海洋跌兩毫子, 跟住升五毫... (下删數十字) ｣ 一邊畫線

ah Be開始畫第二條線, 又唸唸有詞 :  ｢中國痕河跌五毫子, 然後升三毫... (下删數十字) ｣

就係咁... 佢好忙咁畫 + 唸唸有詞... 

完成圖... 嘩!! 我偶像 ~ 方展博呀!!!!    點解 ah Be 會變方展博架!! (我又癲咗...)

小學Be 小一生活~第一天

登 . 登 . 登 . 凳~~~ 經過幾個月嘅反覆思量, 加上國民教育科嘅因素... 我哋決定咗讀 ｢高記｣.  我寧願佢俾主洗腦囉....

今日係 ah Be 第一次著起校服返學校, 幾靚仔 (我覺得.... 又在妄想中~~)


一早九點出發坐地鐵去灣仔轉校車 (好體貼... 有校車安排~~)

返到學校差不多十點半, ah Be 跟老師返課室, 我哋就上禮堂. 

最後十一點齊人, 校長開始講解小一生活同埋家長點樣幫助小朋友適應小一生活

校長表明學校係屬香港天主教教區 (所以我哋選佢...) 所以唔會有國民教育科.

令我放心晒~~

約十二點三, 安排家長去課室接回小朋友

嘩!! 好靚嘅壁報板呀!!! Back to school~~

是日 ah Be 坐位~最後排 (跟學號坐)

我哋十二點半離開學校.  

離開時, ah Be 話好鍾意新學校, 但佢又話好驚好快會唔記得 ｢蘇浙幼稚園｣

我話唔驚, 你一定唔會唔記得 ｢蘇浙幼稚園｣架, 傻仔~~

**下個再下個星期一... 我 (mami) 就要... 讀小一啦... 

仲要六點幾起身... 好大壓力呀...

學習游泳篇

8月11日下午, ah Be 同 Joshua 又再見面 (短聚)~~  今次係玩水

地點 : 喺燒姨姨屋企個天台嘅吹氣泳池

起初, ah Be 堅持個頭唔濕水.  後尾佢見到 Joshua 哥哥游水游咁好, 加上小龍嘅鼓勵, 終於佢肯踏出第一步 ~ 試閉氣入水.  ah Be 聽住小龍口述如何閉氣入水 + Joshua 從旁鼓勵, 好快就學識閉氣潛水嘞~~ 

ah Be 游嘅泳式係 ~~ 狗仔式 ~~ 去片~~

**多謝小龍同Joshua~~

Joshua哥哥回港篇

ah Be 日望夜望都想再見返佢好鍾意嘅 Joshua 哥哥... 終於喺一年半之後嘅8月4日, Jim 豬帶咗Joshua哥哥返香港.  小龍提出接 ah Be 返屋企小住兩日(原本小龍係想佢住三日架, 不過隻衰野驚自己喺其他人屋企瞓唔著, 所以佢想住兩日試下先喎~~ 最弊又後悔唔玩三日... 真麻煩 )

8月9日朝, 我約咗小龍喺公司附近交收人質~~

ah Be, Joshua 重遇嗰剎那間... 啲花火大到呢~~ 仲嚟一個大擁抱~~ (非筆墨可以形容...)

短短兩日, 佢哋好遊客地去咗好多地方~~

海洋公園

太空館

坐渡海小輪~~

可惜Joshua返得嚟十日就要走... 唔知幾時再見啦~~~  希望好快可以再見面~~

**頭先佢哋兩個 facetime 呀~~ 好搞笑~~

續... 釣魚台對話

mami : ｢ah Be 去日本旅行啦!!｣

ah Be : ｢我唔去日本! ｣

mami : ｢咁... 我哋去日本, 去捍衛釣魚台, 好唔好??｣

ah Be : ｢好呀!! 好呀!! 去釣魚台捉返啲警察... ｣ ... 當時的 ah Be 壯志盛盛 ....

**當時, 佢mami ~ 我真係想死... 頭上有隻烏鴉由左至右飛過 + 滴汗....

釣魚台 + USB (飛虎)

釣魚台

尋日 (18/8)下午, 我哋一家三口喺 ｢一風堂｣食拉麵, 超爸講起免費機票換領期限到, 要快啲換!  超爸提議目的地 ~ 東京 (我家亂談時間, 唔代表真係去東京架~~). 
於是, 我問吓ah Be :

mami : ｢ah Be, 去唔去日本旅行呀??｣

ah Be : ｢我唔去日本喎!  ｣

mami : ｢...吓... 點解唔去日本呀?｣

ah Be : ｢日本好曳架... ｣ ... mami 有十萬個問號喺頭上....

ah Be 再續 : ｢日本成日扮釣魚台扮係自己架... ｣

mami 試探中 : ｢哦... 日本將釣魚台扮係自己嘅..., 咁其實... 釣魚台係邊個架? ｣

ah Be : ｢係我哋中國架囉!!  ｣  你哋無睇錯, 我亦無打錯, 佢真係用"我哋中國"... 成個愛國大叔咁...

**個人感想 : 其實阿吳局長使乜咁急強推國民教育, 慢慢嚟都得啦!!! 而家啲小朋友都已經好愛國啦~~ o徒氣!!

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡ ♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦

USB (飛虎)

食完 lunch, 我哋要去玩飛虎體驗... ah Be 入課室受訓完之後, 佢第一句同我講嘅說話係 :「我係USB！」

我心裡即時大笑... + 想講 :「係SDU呀！傻仔~~」wakakaka...

有朋友將 "USB" 翻譯為 ~ Unexpected Smart Boy... (我覺得用呢個名詞套落 ah Be 度... 有啲牽強囉... ...)

我的結婚花球

工作友好夥伴 ~ 海玲將會喺10月結婚.

我呢, 會幫佢做結婚花球同長者用嘅襟花

為咗加強佢對我嘅信心, 我搵咗啲我做嘅花球俾佢睇

而其中一個樣本, 就係當年 (2003) 我註冊結婚時用, 又係我自己做嘅花球嘞

個花球樣都ok 嘛...  

當年我自己好鍾意架....

生肖...

喺ah Be 未出世之前, 我已經知道千萬唔好同小朋友講你嘅真正生肖係咩東東.  如果唔係佢哋知道咗就"大近視" 啦~~ 好快... 識你同唔識你嘅人都會知道你嘅生肖 (即係知道你幾多歲啦...).  佢哋真係會唔理任何場合, 會爆俾人知你屬咩生肖....

今朝, 我同ah Be 搭車時, 同佢傾傾吓偈... ah Be 突然話自己係狗....

ah Be : ｢我係一隻狗!  ｣

mami : ｢...吓... 狗???  咩狗?? 唔好話人係狗呀! 好侮辱人哋架, 好無禮貌架...｣

ah Be : ｢哦, 知道.  不過我屬狗架喎, 所以我係一隻狗! ｣ ... mami再一次滴汗....

mami : ｢...哦... 原來係咁... 下次表達得小心啲呀, 知唔知? ｣

ah Be : ｢知嘞~~ 咦! mami, 你屬貓架喎, 咁你咪係 "貓"mi 囉 ｣  (哈! 哈! 我係咪好聰明呢... 咁都俾我諗到~我係屬貓嘅... kaka~~ 沾沾自喜中~~  )

mami : ｢係呀! 係呀! ｣

ah Be : ｢咁爸爸係屬龍架喎! 佢可以叫佢龍爸囉... ｣

mami : ｢係呀! 係呀! ｣ ~  陪笑中...

ah Be 在小巴中再揚聲講 : ｢以後呢, 我叫 "狗 B", 你叫 "貓 mi", 爸爸叫 "龍爸" 啦!! 好唔好呀?? ｣

mami : ｢好... 好... ｣ 登時... 頭上有隻烏鴉由左至右飛過 + 滴汗....

天灸

ah Be 由出世到而家, 一直俾鼻敏感+氣管敏感纏繞

上星期有位中醫師話天灸 (穴位敷貼療法) 應該可以幫佢改善敏感問題

(註 : 三次為一個療程, 最好效果係全年最熱嗰三日貼)

不過我哋錯過咗其中最熱嗰兩日

所以, 只可以喺第三個日子 ~ 上星期二 7/8 立秋, 貼第一伏 (醫師話唔跟最熱嗰三日, 效果會差少少)

今晚係貼第二伏


ah Be 對天灸反應 : 

第一伏, 只係貼咗四十五分鐘, 就嗌晒救命!! 要除出嚟.  第二朝, 出現傷風徵狀...
(醫師話ah Be身體迫咗啲風寒出嚟) 

第二伏, 可以貼到一個鐘頭三個字.  未有不適...

成效未見到, 有待觀察~~

下星期貼埋最後一伏藥再報告~~

唔通開咗門??

幾年前, 聽過一個師父話...

農曆七月, 嗰度門唔一定係七月初一開架...

可能喺初一嘅前前後後開...  

佢話開門嗰晚, 係會嚴重打雷...

自從聽完師父講之後,

呢幾年我都發現...

臨近農曆七月...

都有一兩晚會行雷行到 ~ BOOM BOOM 聲!!! (突然無知婦孺上身... )

尋晚,

瞓瞓吓... 突然扎醒...

跟住... 聽到一個好重嘅嘅雷聲!!

心即時諗 : 吓 !! 開門嗱???

哦... 跟住好快瞓返...


** 唔係導人迷信, 信則有不信則無...

*** 希望ah Be 同我, 今年咩都聽唔到, 咩都睇唔到... 大步欖過~~

與海馬對話...

最近見到一則報導 ~ 因為環境+人類濫殺海馬, 所以有專家估計海馬將會喺數年內絕種... (好可惜...)

尋晚喺藥房執藥時見到啲海馬乾, 於是同 ah Be 講呢段報導

ah Be 問 : ｢咩係絕種? ｣

媽咪答 : ｢絕種即係解.... (下刪數十字....) ｣

ah Be 答 : ｢哦... 啲海馬好可憐呀... 俾我哋殺死晒... ｣

媽咪答 : ｢係呀... 我哋要.... (下刪數十字....) ｣

*** *** *** *** *** *** *** *** *** *** *** *** *** *** *** *** *** *** *** ***

對話完之後, 大家又繼續等...

喺呢個時候, 我見+聽到ah Be 望住玻璃櫃入面一盤海馬乾講嘢...

ah Be 問 : ｢海馬仔, 你哋好嗎?  你哋喺度住咗幾耐?  仲未有人帶你哋返屋企呀?? ｣

等咗兩秒, ah Be 再答 : ｢吓... 無人呀? 咁我下次嚟見到你, 帶你返大海住啦, 好唔好?? 乖乖... ｣

 媽咪答 : ｢傻豬, 呢啲係海馬乾, 唔可以返大海架! ｣

ah Be 問 : ｢媽咪, 佢哋死咗嗱? ｣

媽咪答 : ｢係呀, 無得復活lu... ｣

ah Be 答 : ｢佢哋好慘呀...｣

I so love you

頭先同 ah Be 睡前親子talk完 (其實晚晚都要傾一傾...), 我要出房做少少家務, 要 ah Be 自己瞓先~~

轉頭我入房睇吓佢有無踢被.  果然踢被~~ 

當我幫佢蓋被時, 佢朦朦鬆鬆地講咗一句 : ｢唔該媽咪! ｣

我打咗個突  ... 然後我邊拍拍佢個屁股, 邊話 :  ｢唔使客氣!  乖仔,快啲瞓!! ｣

個傻佬 Be 又邊笑邊瞓, 好細聲答 :  ｢I so love you! ｣

我話 :  ｢吓! 咩話?? ｣

個傻佬 Be 再好細聲答 :  ｢I so love you... ｣

我話 :  ｢吓!  哦... ｣ 其實我都係聽得唔多清楚... 仲係估估下... 我諗佢當時係半夢半醒狀態...

個傻佬 Be 再答 :  ｢我超愛你呀! 媽咪... ｣, 一講完, 再陷入半昏迷狀態...

我真係想...

** 我要即刻寫低佢... 我真係驚我會唔記得... (我真係會唔記得架...) 都係嗰句, 呢個 blog 係留俾將來嘅 ah Be 睇嘅.  如果我同超爸 / 我自己老來無人陪, 超爸/ 我都可以慢慢重溫, 細看回味吖嘛... (雖然而家嘅 ah Be 好識做, 話咗佢大個之後會點... 點... 點對待我哋兩老.  不過, 我哋老來都要識做, 要有自己嘅生活 (呢段係留俾自己老咗睇嘅...).  唔通要佢做個裙腳仔咩...)