Happy Halloween 2012

(20/10) 前個星期六, 喺屋企溫完書(吊頸), 出咗尖沙咀食飯(抖氣)

順便行吓 "斗斗城"~~ 見到哈囉喂臉具~~

攞咗嚟試帶, 造型照~~

我最愛佢把長髮~聶風昰也~~


(28/10) 星期日中午返畫班上免費 "哈囉喂筆筒班", 個作品都幾靚喎~~
(個傻Be 話送俾我~~  我覺得個筆筒靚, 我好鍾意~~)

隻蜘蛛有好多隻腳, 多到呢...  畫班姐姐撳住傻Be 唔好再加腳...

嗰隻三眼南瓜同大眼鬼都好得意~~ I like it so much~~

同場加影 ~ 時日 Halloween party 造型~~ keke 

小一首兩次中、英文默書報告

由十月第二個星期開始 (十月十、十一日一連兩日), ah Be 展開佢人生默書生涯~~ 我就重拾默書生涯~~ (慘過自己默... )

第一次默中、英文嘅ah Be, 喺溫習時好唔專心、懶懶閒, 踢三腳, 郁一下... 成個十.一假期就用咗兩日溫書. 

喺中默方面, 佢好快就掌握得到~~ 好快已經KO 咗篇課文. 

至於英默... 我真係 咗唔知幾多擔血... 串字串到我暈... 佢嘅狀態反反覆覆, 啲生字一時串到, 一時唔記得晒... 我真係氣絕生亡咁滯...

十月十日, 冒住食蛋危險英默 ,,, 結果係 70 分  ~~
(其實佢合格, 我已經收貨 ~~ hehe... )

十月十一日, 中文讀默第五課 ~ 小草 ~ 95分
(我好開心呀~~ , 嗰5分係錯喺個 ｢撐｣字, 錯咗筆劃喺個 "牙" 字到...)

第二次, 英讀默 ~ 99分
(我超開心囉, 估都估唔到... 5句句子全對, 只係錯咗Kowloon 個 K 字寫咗細楷, 所以扣咗一分~~) ah Be 有少少失望  攞唔到 100分... 佢話佢下次會小心啲... 我唯有鼓勵下佢, 同讚下佢.  等佢有推動力繼續努力啦~~

第二次, 中背默第六課 ~ 小磨菰 (全課背默,連標點背) ~ 100分!!
我同 ah Be 超超超開心囉~~ 其實佢都有一個唔小心位錯咗, 就係個 ｢沒 ｣字, 漏咗頂部嗰一小勾.  老師好好人, 俾咗100 分俾佢, 鼓勵下佢.  佢自發性地話佢以後會注意啲筆劃位.  

希望ah Be 可以維持住呢個默書 mood 啦~~

又要為下星期默書繼續努力了~~~ ah Be, 加油~~ 媽咪一定會身體力行地支持您架~~~

ah Be 甩掉第一隻乳齒

兩個星期前, ah Be 話我知, 佢口腔下面前排中間右手邊(下正門牙)嘅小乳齒搖搖欲墜... 我同佢檢查時發現佢啲牙床開始擴大, 出現牙縫好疏... (特別係下咢...)

尋晚 (17/10/2012),  ah Be 食食下晚飯時, 突然大叫~~ 媽咪, 我隻牙甩咗呀~~ 你睇下??!!

佢好興奮, 佢仲將隻BB牙仔俾咗我, 叫我幫佢收起佢.

ah Be 而家變咗有個 "無牙風爐" 啦~~ (唔好怪我... 我真係有煲 ｢天梯｣架... keke...)

其實... 我見到 ah Be 換牙... 我有少少唔開心... 有少少失落... 因為開始意味住佢開始大個仔... 我真係唔捨得佢大個... 嗚... 嗚... (我又開始變態... 嘞...)

小學Be 眼中的媽媽

尋晚我要夜少少放工

所以拜託契爺、契媽代照顧住ah Be 先

由契媽教佢做英文功課同默書

我成十一點至返到契媽屋企接佢

佢已經瞓咗

契媽向我交代ah Be 功課情況

其中一樣係英文功課

因為老師教緊 tall / short / strong / slim / thin / fat / short hair / long hair

所以今日係要小朋友填上媽咪的外貌...

大家都睇到 ah Be 點形容我啦~~

契媽仲話

當ah Be 畫我個嘴巴時話 : ｢媽咪而家好 angry 咁鬧緊我, 所以個口要大少少 ... ｣

我聽完覺得好好笑

但個心又有啲酸... 

第二朝, 送佢去搭校車時 

我問佢 : ｢Be, 媽咪明白你寫我 fat, 但點解係 strong 呢??｣

ah Be 好鬼馬地笑住答 : ｢係呀媽咪, 你而家成日都好強壯地鬧我吖嘛! 所以咪 strong 囉...｣

 我成日都好強壯地鬧你??!!

阿囝, 媽媽會調節一下情緒, 唔要俾學習問題影響我哋母子深厚嘅感情嘅~~

p.s. 我真係一個燥底媽咪, 我真係要 ~ 心平氣和~~

2012 老友記秋季生日會@賽馬會復康中心篇(3)

ah Be 喺九月廿三日又出動嘞! 今次係同老友記開生日會 (1000-1400) ~~ 院方喺院舍擺咗幾圍賀慶生 因為佢哋係一班弱視/ 失明嘅老人家, 所以今次嘅任務係獻唱娛賓同埋幫手照顧老友記, 例如 : 夾餸、酙茶遞水等等~~

ah Be 獻唱咗唔同版本嘅生日歌.  因為佢發台瘟, 所以無唱其他歌.  只係周圍幫啲老友記影相.  成班老友記都玩+食得好開心!!

秋季生日會嘅 backdrop~~

好好味嘅蛋糕~~ Happy Birthday to 老友記ssss~~~~

今日識咗一個新伯伯, 佢叫關伯伯, 佢好健談同識好多電工知識,  佢仲邀請咗我哋一家人去佢個床位傾偈, 又分享咗一啲佢以前係大酒店(係真人住嗰啲) 做廚師時候寫嘅英文菜譜.

我又發現我童年時用過嘅舊牌子爽身份(而家都應該停咗產...) 即刻影低佢... 大家有無用過佢呀??

今次我帶埋老媽子去(佢坐埋一邊睇我哋), 佢都有得著架~~ 活動後, 佢突然同我講, 其實佢自己都好幸福, 原來有好多人好慘架... 我話係架, 起碼有家人同你住, 唔算憂柴憂米啦! 佢都忍唔住話係呀! 要珍惜~~

第一次 ~ 默書...

下星期三、四(10/10、11/10) 係 ah Be 人生第一次默書 ~ 英文同中文... 佢完全唔知係咩東東~~ 懶懶閒... 我就忍唔住喺咁幫佢溫習... 真係皇帝唔急太監急... 我已經不停叫自己放鬆啲... 但一諗起個默書範圍... 我就... 好困擾... 慘過工作上揹鍋...

係咪我過份緊張呢?? 我覺得唔係... 篇英默... (對小一而言...)  真係有啲難... (定係... 我程度低??)


篇中默... 都可以嘅... 我接受到... 


祝我好運吧~~

2012 中秋週雜記

九月廿七日公司請食飯.  我哋條 team 揀咗食日本菜.  我揀呢個四色丼 ~ 超好味!! 

☆*:.｡. o(≧▽≦)o .｡.:*☆

九月廿八日公司放下午假, 兩點幾同老細兩條友去食 lunch, 三點幾咋咋淋返屋企接 Be 放學. 
車一到, 見到爛瞓 Be 瞓到... 咯咯聲~~ .  保母姨姨話佢日日都係瞓到不醒人士架~~


返到屋企食咗個 tea, 然後 Be 又大覺瞓~~ 黃昏去咗朋友D屋企食馬拉榴槤月餅~~ 罪過! 罪過!
 - 黃色嗰個係 ~ D24, 朋友D介紹要食佢先 (其實都好好味...), 因為如果食另一隻 "極品" 先就會覺得佢唔好食架啦~~ (事後又覺得佢講得好啱喎~~)
 - 粉紅色係 "極品" ~ 貓山王... 罪過! 罪過! 一落口... 嘩! 真係好好好好味呀...  食完佢... 真係好難食返 D24囉... kakaka...

食完馬拉榴槤月餅, 我哋就同朋友D佢哋一齊去為九月之星s慶生打邊爐

☆*:.｡. o(≧▽≦)o .｡.:*☆

九月廿九早上 ~ 學畫畫
下午 ~ 屋企做功課 + 溫習
黃昏 ~ 去Pat 姨媽家同兩個表哥 ~ 駿駿 & 齊齊慶生 + BBQ Party
Happy birthday to 駿駿 & 齊齊~~


☆*:.｡. o(≧▽≦)o .｡.:*☆

九月三十早上 ~ 去花墟買花
下午 ~ 返婆婆家做節 + 逛一陣街
晚上 ~ 返爺爺家做節 + 回家做花球

因大姑媽今星期外遊, 所以一個星期前已做節.  爺爺忽然興致到, 以九十高齡入廚煮好野俾仔女食.  嘩! 真係好好餸架!!  個豬雜冬瓜湯~~ 好味到呢~~ 


☆*:.｡. o(≧▽≦)o .｡.:*☆

十月一日是日喺屋企溫習
晚上 ~ Be 同 超爸去睇煙花, 我去飲 ~ 海玲&占大婚之喜

可惜, 返到屋企知道發生海難... 個心唔舒服咗幾日... ><' 希望離開咗嘅人安息... 無事嘅人堅強生活下去... 知易行難... 加油呀!!!

十月二日
早上 ~ 溫咗一陣書
下午 ~ 去Bernice 家姐7歲生日會, 係一個 cooking class 嚟嘅~~ 有得玩, 有得食, 仲有得拎 (回禮禮物 & 自製鹹肉酥+甜品酥)
Happy birthday to Bernice

晚上九點, 準時熄燈瞓覺~~

眨下眼, 四日半假期就咁消逝~~ 好期待下一個長假期嘅來臨~~

海玲的花球

今日係海玲 + 占大婚之喜 ~ 恭喜! 恭喜!!

新鮮滾熱辣, 尋晚先做起...

海玲指定要白色馬蹄蘭做主花, 整個花球要有綠+黃.

主花 ~ 馬蹄蘭
其他碎花 ~ 桔梗、小綉球、蠟梅、BB草同埋唔知咩名嘅花

家長襟花 ~ 紅玫瑰、小綉球、蠟梅

今次襟花簡單啲, 唔用絲帶襯托.  我覺得都幾靚~~

今次做呢個花球有少少難度... 

因為長假期+中秋關係

花墟無咩新鮮花

白色馬蹄蘭得一間店有得賣

仲要唔多靚...

買兩扎十支得六支靚... 

所以做花球嘅時候要諗得好清楚

同埋個花球造型都局限咗...

希望海小組鍾意啦~~

**要準備去飲啦~~ bye bye~~