ah Be 甩掉第四隻乳齒

今朝十點幾

又有個細路一邊嗌、一邊跑

過嚟同我講 :

｢媽媽, 我隻牙終於甩咗啦!!｣

哦...

原來... 

甩左下側門牙...

哈哈!!! 無牙仔呀~~

甜蜜 Memo

Be 最近好鍾意學大人寫 memo

爸爸收一張

我呢... 有五一張...

超爸, 你唔好嬲喎... 

佢仲要好鬼馬地將寫好字嘅 memo

放喺不同嘅地方

令 memo 被我發現

雖然...

memo 內容都係嗰幾句話

但我都覺得 sweet 爆...

唔知佢大個咗睇返呢個 blog

佢有咩感受呢??!! 

連繫

上回講到我同老豆有連繫...

係咩連繫??

問米? whatsapp? QQ 定 ICQ??

全部都唔係

其實所謂嘅連繫

係... 好單向嘅...

我只知佢喺我身邊

但係見唔到、聽唔到...

我老豆係一位洗腎病人

佢身體會自然散發出一股獨特藥味

所以佢在世時

我一家已經聞慣聞熟~~

*** *** ***

第一次

佢走咗之後嘅第一個星期六

Be 瞓咗、超爸沖涼

我一個人坐咗喺廳度發呆

突然佢"朕除"由窗飄入

股味好強烈

喺我身邊停留約2-3分鐘

我仲對空氣問 : 老豆係咪返咗嚟呀??

(當然... 唔會有回應啦...)

*** *** ***

第二次

佢舉殯前一日 (又係星期六)

我同老媽坐喺四方飯枱度傾佢出殯事宜

突然我又聞到佢"朕除"

但當刻我醒唔起 (傾得太投入...)

我問老媽 : 做咩你啲口氣突然咁大??

(我諗我老豆實嬲到飛起...)

老媽 : 無口氣...

跟住我同老媽繼續傾

但真係好有味...

我再問老媽 : 你聞唔聞到呀?? 

老媽點點頭答 : 聞到呀~~

我哋不約而同望住我哋隔離個枱角

我對空氣講 : 老豆, 放心啦! 聽日嘅野禮數十足, 企企理理, 一定唔會失禮你

(潮州佬一直係一個有堅持、義氣、講禮數的人

 所以家族各人紅、白二事
佢都俾人捉去籌劃

自己嗰場一定好高要求

親自監督係好合理嘅)

我老媽話 : 下次再聞到佢, 唔好出聲呀! 咪嚇走佢.

我 : 哦...

*** *** ***

之後呢幾年

我都聞到老豆返嚟

無十次都有八次

*** *** ***

最近一次

係上星期一

老媽手術前一日

我探完老媽返咗屋企

細佬喺媽身邊打電話俾我

同我講醫生講咗手術程序

跟住

我同老媽講幾句之際

老豆又回來了

一定係擔心老媽

所以嚟聽聽我哋搞咩鬼

*** *** ***

仲有... 佢農曆C忌嗰日

佢同我出咗去買齋囉!!!

講真...

佢"朕除"淡咗好多

我好驚有一日

佢"朕除"無咗

我唔知佢返咗嚟...

壓力爆煲

今次考試

Be 嘅狀態好差

明明識嘅課本

做練習都係會錯...

讀極都讀唔入腦...

因為咁

我都好掹... 同好燥...

(我知我係唔啱... 但真係忍唔住...)

聽日係考試最後一日

要考 GS 同 Composition

所以,

今日我同佢作最後衝刺

 點知... 隻臭 Be 不停錯...

喺我又掹, 佢又燥之際

突然

佢聲嘶力竭地 ~ 呀!!!! 

臉紅紅, 露出青筋, 發狂咁大嗌

我拍拍佢佢都無反應...

佢大嗌咗兩三分鐘後

我問佢咩事?

佢一輪嘴講 : 你哋都唔鍾意我嘅! 你哋都唔關心我嘅! 你哋都唔愛我嘅!

續 : 你哋好憎我架! 你哋成日講電話!! (講電話?? 佢有幻覺??)

再續 : 你哋咁唔鍾意我, 我要去死呀!! 我死咗你哋最開心呀!!!

佢不停重複講呢段說話

不停講... 不停講...

我問佢咩事覺得我哋唔關心佢?

Be : 上次我手足口呀, 你哋成日講電話, 你哋都無關心過我呀??

(心諗 : 我哋真係無講電話喎...)

約二十分鐘後

Be 冷靜咗落嚟

我慢慢同佢傾

佢先無事... 平靜返...

佢應該係有好大壓力...

一次個爆發出嚟...

我自己都要檢討一下

喺溫習時

俾咗好大嘅無形壓力佢...

真係要一齊減壓至得...

唔可以為咗學業輸咗個仔...

Be, 其實爸媽係鍾意你! 好關心你! 好愛你架!!!

四年

老豆出走已經四年 ...

耐唔耐喺街上見到啲似佢嘅身影

我都會望多兩眼...
(仲會幻想係佢...)

近呢兩年

老爸返少咗嚟...
(唔好以為我傻架... 我同佢真係仲有連繫...)

我諗佢一定係好放心我哋

加上佢有媽媽+妹妹同佢一齊

佢一定好開心

我都希望佢生活得好同無牽掛

*** *** ***

有日

老媽來電 : 阿妹, 聽日係你阿爸死忌呀!!

我 : 吓! 十二月XX喎...

老媽 : 十月XX至啱!!

我 : 我計新曆, 你計舊曆之嘛... 有咩分別...

老媽 : 不如你聽日去XX買碟齋, 我叫新抱去買大包返嚟拜佢啦!

我 : 無問題, 聽日見~~

*** *** ***

第二日

買完齋返老媽家

我同老豆講 : 老豆, 今次你將就啲, 食住咁多先.  下次姐姐到咗, 再整好嘢你食. 仲有呀, 碟芥蘭我炒架~~ 你食多啲.

*** *** ***

人與人之間嘅緣份好奇怪

好似我家咁

堂堂一個潮州佬

最錫嘅仔女係個女

而典型潮州婆

最錫嘅仔女係個仔

好彩一人錫一個

如果唔係

我已變了一位邊青...

我老豆真係好好好好錫我架~~

我都愛死佢~~

至於潮州婆 - 老媽

少時, 我同佢關係OK 啦

到十一年前佢交通意外後

我同佢關係親密咗好多~~

老來...

始終女係會同自己親密啲嘅...

謝皮的一週

上星期日

超爸飛咗

星期三晚至返

*** *** ***

星期一朝送完 Be 上校車

即碌去老媽屋企

接佢去食早餐

然後送佢入院 (佢要做個小手術)

辦好入院手續

安頓好佢

九點出發返工

Be 約五點放學...

去"吉吉家" 買咗兩個雞飯+一個牛飯去探老媽

好彩 Be 由細到大習慣探病

所以佢可以自己一個喺病房外等

因為未到探病時間

我只可送飯

不可逗留...

唯有送完飯

躝返出病房外等

老人喺病房食到"吱吱"聲

一中一嫩喺病房外咬住啖飯呆坐

一夠鐘

我即碌入房同老媽洗白白

洗完白白

推咗老媽出去見 Be

一老一嫩笑到見牙唔見眼~~

半鐘頭後返歸溫習

*** *** ***

星期二

Be 放學後喺屋企溫習

到探病時間

我託鐘點姨姨代看 Be

自己一人去睇老媽
(好彩住得近)

老媽精神好好
(精神過我...)

一啲都唔似全身麻醉過

同老媽+細佬吹吹水之後
(仲飲埋老媽嘅豬潤湯... keke...)

返歸煮飯俾隻衰野食

*** *** ***

星期三中午

老媽由弟婦接出院

我就同臭Be 作戰中...

聽日開始考試啦~~~

要努力做卷啦~~

其實隻衰野要考試合格唔難
(我... 要求真係好低... 唔使跑高分... 但... 品格同視野一定要有同好囉...)

之但係... 佢啲不小心 (careless mistakes) 真係好得人驚...

每張卷可以扣十分以上...

由合格變唔合格都得...

所以一到測試... 考試... 我就會變身 "嫦娥"...

小心呀! check 卷呀!! 睇實呀!!!  知唔知呀????  (心中仲會不停講 : 頂!!)

而佢... 就... hea 住溫...

機械式點頭... + "哦... 哦... 哦..."

(超爸成日話Be 係我嘅翻版, 我同Be 場戲好好睇, 簡直係 "mamemo 大戰 (vs) mamemo")

*** *** ***

星期四至今日(星期六)

都仲係作戰中...

埸仗要下星期二至打完...

我就死啦...

游泳

Be 由歲半起

極度怕游水 (沖涼除外)

一落泳池

濕咗個頭

佢就依嘩鬼叫

亂叫亂跳

(游水點會唔濕頭呀??)

我都唔多頂得佢順

前年(5歲)

Joshua 回港

同 Be 玩咗幾日兼一齊玩水

Be 終於克服到心理障礙

可以潛到幾下水

*** *** ***

上年發生船難事件後

超爸同 Bun 叔下旨

Be 要盡快學識游水

今年7月中正式學游水

估唔到佢由起初有少少抗拒學游水

到依家有少少鍾意咗游水

(可能有成功感... )

不過佢話剩係鍾意喺呢間游泳學校度游水

終於喺11月8日

學識游自由式

游緊水嗰個就係 Be (只見手同少少頭嗰位)

Be 依家落水要有游泳三寶

泳鏡、泳帽、泳衫連褲

無是但一樣會變機械人

唔識游水架...

@中國好聲音 + 追憶林振強音樂會

11月2日

撇開 Be 

兩支公同朋友們一齊去睇 

中國好聲音音樂會

原本都覺得幾好睇...

可惜...

XX有份主辦...

多過三份一時間

俾咗超級巨聲獻唱...

重點係... 仲有泳兒囉...

頂!!!

好彩買平飛...

個位好靚喎

平飛第一行 + 對正台~~

 唔知點解... 有幾位好聲音...要唱廣東歌囉...

'R' 晒頭...

第二季

我最愛的 ~ 孟楠

佢唱 ~ 領悟

真係好聽到不得了

好有感情、有唱功

堅!!

1128 喜愛的 ~ 鍾偉文

呢位叔叔好有朝氣~~

*** *** ***

尋晚

11月16日

一家三口去咗 ~ 追憶林振強

(超爸好想睇, 千叮萬囑我要去班飛... )

打頭陣 ~ 林子祥 ~

我個人自小唔多鍾意佢 (因為佢有鬍鬚... )

不過, 佢都係一個唱得之人

我細個好鍾意 ~ 三人行呢首歌~~

阿 Lam 一次過唱咗八首歌

~ 劉美君 ~

除咗唱自己歌 ~ 最後一夜

仲唱咗 ~ 壞女孩 + 細水長流

~ 傻女陳慧嫻 ~

走出嚟唱 ~ 傻女 + 千千闕歌

~ Sandy ~

依然、哭 (聽一次喊一次...)、多謝...

~ 倫永亮 ~

休止符 (愛死~~ 又係聽一次喊一次...)

我成長期的超級偶像 ~ 學友

親親、每天愛你多一些、愛是永恆...

笛子姑娘

開場時有 Eason 講嘅獨白

中埸有 Whyman 同 夕爺嘅獨白

呢個思念音樂會都幾好睇

真係要多謝兩協插刀幫我班飛嘅人~~

某某, 多謝你 ~~

*** *** ***

散場後

我哋一班人去咗吃 "麻甩(辣)雞煲"

見到都流口水~~

麻甩 Be 食到 lam lam 嘴

(佢食嗰個係胡椒豬肚酸菜雞煲) 

今次係第二次嚟食 ...

仍然都覺得好好食 

(我唔鍾意食雞...)

第一次嚟仲誇張 ...

六大一小食咗四個煲...  吃驚...

(共兩隻雞+其他邊爐料...)

Be 眼中的 ~ 貓

 Be 自小都好鍾意貓狗

佢畫貓都有一手架喎!!

(係我鍾意嗰種~~)

今日 Be 喺畫班返嚟

佢帶咗個自己設計嘅書包返嚟

有佢心愛嘅火車同埋貓貓

貓 : 喵~ 我得唔得意呀?? 喵~ 喵~~

創意

Be 而家好鍾意喺畫畫方面

加上自己嘅創意

加一啲佢自己覺得靚嘅嘢上去

(佢嘅畫功就... 見仁見智... )

喺正常情況下

我都唔會干涉佢嘅創意

(功課上除外...)

有次, 佢做 GS 工作紙時...

佢想將隻狗仔填上藍色

我叫佢讀一次條大題目

睇清潔指示先好填色

Be : ｢... ... colour the correct picture with suitable colours｣

我 : ｢嗱嗱嗱... 仔, 個重點係 "with suitable colours"｣

Be : ｢我喺街度真係見過藍色嘅狗架...｣

我 : ｢... 咁隻狗係咪天然天生係藍色先?? 如果係, 你就填藍色啦!｣

Be : ｢唔係天生嘅...｣

跟住佢死死地氣咁填上正常色...

(唔好以為我要求好高呀! 如果佢填藍色, 老師真係會俾交叉佢...)

佢好好笑架!

GS 填色時,

佢見到有貓狗圖

佢會喺啲貓狗身上加啲唔同嘅花紋

令佢地好似有生命咁~~

填色比賽佢都會自己再加啲花臣上去架~~

我的志願 ~ 巴士車長

ICC + 放煙花~~

自印手掌變身 - Iron Man ~~

人生階段... 快啲...

踏入11月

第一學期死期就殺到

(11月2x日起考試...)

Be 校自九月尾起

一直持續評估 + 默書

氣都抖唔到咁濟...

早兩日溫習 General Studies

講緊 growing stage

有個小朋友又開始發表佢嘅論點...

Be : ｢媽媽, 你知唔知人生分咗五個階段??｣

我 : ｢請問邊五個階段??｣

Be : ｢BB、小童、後生、大人、老人｣

我 : ｢哦... 原來係咁嘅, 我而家係大人嚟架喎!｣

Be : ｢係呀! 到我大個咗, 你就係老人家嚟架!  媽媽, 我會照顧你架! 你唔好擔心!!｣←_←''

雖然佢又係講嗰"三幅被"

但我都仲係好冧嘅

正當我仲係陶醉喺佢嗰"三幅被" 嘅時候

有一把冷冷嘅聲將我叫醒...

Be : ｢媽媽, 可唔可以溫快啲?? 我好眼瞓...｣

我 : ｢吓... ... !@#$%^&*()_+｣

Be : ｢媽媽, 我真係好眼瞓... 快啲...｣

我 : ｢哦... 哦... ｣

祈禱

星期二

Be 上完宗教課

有一項功課長達一個月

就係 ~ 

為亡者祈禱

讓最愛嘅亡者可到天父身邊

(俾婆婆知道... 實俾佢鬧死... 佢一定話 : 我哋拜神架喎...)

每晚睡前祈禱

然後記錄喺作業到

當 Be 知道後

第一時間喺祈禱卡上寫上

收件人 ~ 公公同嫲嫲

佢仲同我哋講 :

｢公公成日返嚟搵我

同我傾偈

帶我去公園打千秋、sir 滑梯

睇巴士

仲同我一齊去游水呀!!｣

(我不由自主... 流淚... 中...)

我 : ｢吓! 游水??!! 公公著咩衫游水??｣

Be :  ｢白色嘅底褲啦, 有時係黑綠色嘅, 好似爸爸嗰條咁 (泳褲...)!｣

Be 續 : ｢佢有時會返嚟同我一齊瞓架!! 我哋會傾好多嘢架...｣

其實 Be 久唔久會講呢啲公公返嚟搵佢嘅事,

估唔到事隔幾年

Be 仲將佢同公公嘅事記喺心

再轉化成發夢境

當真嘅一樣...

希望公公會知道Be (仲有我) 一直都好掛住佢啦~~

其實Be 都有話見過嫲嫲一兩次

嫲嫲, 你唔好呷醋呀!!

我會叫 Be同你傾多啲偈~~