小學雞小四旅行

消失咗成個月...

返嚟了...

尋日Be 考完今個學期嘅第二個試

今日係小學雞小四旅行日

是日午餐 ~ 今朝做咗 Salami+Chesse包

應該都好味呱...

今日天氣轉涼

口叫Be 執風褸入袋

最後當然無執入袋啦...

激死!!

*** *** ***

上年小三旅行日

烏瀡瀡的我...

居然帶漏咗Be個午餐盒...

臨上校車前

衝去聖nana 買包...

但聖nana 唔賣俾我... 因為仲欠3分鐘正式開門...

唯有去美金...

好彩店長見我趕校車

所以賣俾我... 感激萬分!!

*** *** ***

小二那年的冬天

有日

Be 拉唔到條褲嘅拉錬

叫我幫下佢

我好快咗一手執褲浪. 一手拉拉錬

拉完拉錬後...

見到Be 碌大眼望住我...

我問 : 拉錬又夾到你呀?

Be : 唔係... 媽咪... 你錬住咗我... J (好細聲...) ... 呀...

我 : Oh... sorry... sorry... 即刻鬆手....

 sorry... 又係我...

嘮蘇怕熱

尋日朝早叫人起床

發現嘮蘇跌咗落床

我 : 喂! 嘮蘇跌咗落床, 好慘! 快啲帶返佢上床!

答 : 吓! 佢唔係跌落床, 係佢尋晚話好熱, 要瞓地下! 唔關我事架!

我 : 佢話熱?

答 : 係呀! 佢話佢鍾意瞓地下多啲喎!

我 : 快啲執起佢!

答 : 下次唔好咁百厭瞓瞓下自己落地下瞓, 知唔知呀? (一邊摸住嘮蘇個頭, 一邊送佢返床)

其實... 佢真係來自"火星" 架... 

唔信?  睇下呢篇 -> 好友 ~ 林永星

私人重地

而家嘅 Be 好似準備踏日青春期

有時啲思想丶行為都幾情緒化...

有時又有啲怕醜

十分搞笑

今日俾我發見佢房內有個廢紙波波 (垃圾)

我執嚟睇下... 上火!!

心諗... 佢意思係咪叫我以後唔好入佢房? (之前鬧過佢)

今晚臨瞓前

我問佢係咪以後唔好入佢房?

佢即時爆喊話唔係

佢以為今日"奶奶表哥"會嚟我哋屋企

所以畫家張紙唔俾佢入房...

原來係咁...

地圖

最近 Be 英文課

教緊睇地圖

教緊 turn left丶turn right丶walk along丶go straight ahead丶walk through 等...

老師叫佢哋自己設計一張地圖

然後寫返條路線出嚟

畫地圖真係開正佢嗰瓣!

畫得好詳細吓!

一到寫路線...

精簡咗好多喎...

時事常識題

由今年起常識科測驗丶考試玩新嘢...

時事常識題不供詞填寫

即係識答案, 但唔識寫/ 寫錯字都無用... 無分嘅

今晚同佢溫一溫時事常識題

我隨口問

佢要寫答案...

問題有 :

1. 口問 : 香港現任行政長官係邊個?
    寫答 : 粱 _ 英 ( _ = 唔識寫) 仲要用口問 : 如果寫689 有無分架, 媽咪? @_@

2.  口問 : 香港現任政務司司長係邊個?
     寫答 : 林鄭月鵝

3.  口問 : 香港現任律政司司長係邊個?
     寫答 : 原國強

4.  口問 : 香港現任財政司司長係邊個?
     寫答 : _ _ 華

5.  口問 : 中國現任國家書記係邊個?
     口答 : 李克勤...
     寫答 : 李克強

6.  口問 : 邊個中國現任國家領導人去咗美/ 英訪問?
     寫答 : 習近平 (終於都啱一題...)

7.  口問 : 美國現任總統係邊個?
     口答 : 奧巴馬...
     寫答 : 奧斑馬

真係有圖有真相... 唔係作出嚟... 

有個咁可愛嘅仔

我真係三生有幸!!

轉會

Be 一直都係車癡漢...

所有人和事喺佢腦海中

都會轉化為車

由小一起連續三年

學校課外活動中

佢都係參加"交通安全隊"

佢一直自得其樂

活喺佢個汽車世界中

其實上年開學時

我同超爸已經游說佢轉會

轉去我哋兩個都參加過嘅"紅十字會"

佢一直拒絕...

今年開學

舊事重提...

超爸: 仲玩交通安全隊? 唔通你想牛龜咁大揸住支波板糖叫人過馬路... 真係會俾同學笑架! 

(下了刪百字...)

我: 不如你試吓玩紅十字會, 好好玩! 始終紅十字會係國際組織, 玩嘅嘢好唔同...(下了刪百字...)

Be : 但係... 我真係好鍾意做交通安全隊... 仲有... 如果我唔參加... 就會少多一個人... 到時個課室就會好空架啦!... 我唔想個隊無咩人呀! (爆喊中...)

哦! 明白了... 原來唔多人參加... 你又唔忍心離開佢哋...

我 : 唔緊要啦! 會有小一生加入架嘛! 你唔走, 人哋無位就無得試.  你試排紅十字會第一選擇, 唔一定收你.  排交通安全隊第二選擇.  咪得囉! 係咪? 

Be : 好啦! 我試下啦!

最後成功參加咗 "紅十字會"

*** *** ***

星期二

Be 放學回家

Be 好興奮!

Be : 媽咪, 今日上咗第一堂紅十字會活動.  原來真係好好玩架! 學啲嘢好有趣.  你無介紹錯呀! 媽咪.

心聲

假如我是一位小學生：

假期不曾屬於我！

比上學日子更難過

不曾在假期中享有真正休息

忙碌在沉冗的功課

準備假期後排山倒海的小測丶默書、寫作

閱讀已變成機械模式

非興趣、非喜愛

*** *** ***

作為家長的我：

開始討厭放假！

只希望幫助小兒盡快完成沉冗的功課和溫習

可以跟他出外走走看看

舒筋活絡

在既沉悶又追趕的日子添上光彩、歡樂

閱讀也變成討厭的東西！

我的一年級早上生活

從前有個一年班嘅小學生

每日早上

由爸爸帶返學

佢同爸爸會由屋企行路返學校

路程大約半小時

行程一開始會經過一處有山水流出嘅路

沿著大路行

一邊傾偈

會經過一間用大理石起嘅消防局

呢間消防局好大間、好有氣勢

再行多十零步

消防局旁邊有一個防空洞

防空洞口住咗一家三口

有爺爺、爸爸同孫仔

防空洞屋好簡陋

防空洞口只放咗一張床

有一度木欄門

門上有一個紅色鐵信箱

煮食(火水爐)同一張飯枱只可放喺防空洞外嘅小空地

(防空洞比行人路高出一個人嘅身高)

行人路旁 (防空洞下)有一個山水渠

佢哋一家三口會喺出水處取水用

喺嗰度刷牙洗臉同沖涼 (唔好驚, 佢哋係著住衫褲沖涼架)

佢哋好有功德心

會縮埋一邊做自己嘢

唔阻其他人 (呢段行人路好窄)

倆父女繼續向前行

去到一個直角路口

會過對面馬路去 747麵包店買麵包

因為爸爸驚囡囡小息肚餓

所以一定會買一條"車輪包"俾囡囡...

但囡囡... 真係食唔到... 所以會請同學仔食...

食到後期連同學都食到怕咗

爸爸聽囡囡解釋至肯買其他小麵包...

買完麵包過返馬路向右行約3分鐘

有個肥佬叔叔賣煎腸粉

爸爸會同佢買4條煎腸粉加蛋

要囡囡一個清晒佢!! 飽到呢...

食完之後

繼續向前行

見到路口轉右上山行十分鐘斜路就到學校啦!

臨到學校前

有各式各樣熟食小販檔

另有兩檔鐵皮檔

有各式各樣文具、小玩意、小食、飲品任君選購

上美術堂唔記得帶美術用品, 有得買!

連體育堂著嘅白飯魚都有得買! 

第一檔母子檔 ~ 有人情味, 價錢平, 唔夠錢可商量. 但貨架比較亂同未必好新款. 走大眾化路線

第二檔夫妻檔 ~ 市儈, 價錢貴, 價錢無商量. 貨架整齊同好新款. 走中產路線

爸爸有時會帶囡囡去母子檔買零食

小學一年級的那一年

係囡囡最開心嘅一年

因為爸爸每朝早可以同佢獨處!!

三十年後仍然歷歷在目

*** *** ***

呢個睡前故事

就係Be 經常要我講我嘅一年級生活俾佢聽

佢聽超過一百次都仲要聽...

佢希望佢可以講俾佢仔女聽

我都希望將來佢會記得啦!

Water... Car

剛剛喺FB

睇返2011年今日 (05-10-2011) 嘅 status

原來Be 有段咁嘅說話

"Ah Be 剛剛見到一架水貨車

同我講：媽咪，水貨車呀！

然後佢喃喃自語... Water... Car...

Kekeke... 囝，你的外語又進步了... -.-"

都真係幾無聊...

因為呢個 Blog 會喺將來送俾Be

所以無聊事都會盡量記低... 見諒!

頂心杉

我家有條頂心杉

開始進入反叛期

叫佢行東, 佢走西

駁嘴駁舌

目的係想激死佢阿媽... 我

*** *** ***

有晚食晚飯

冷氣涷

叫佢著返件外套

我 : Be, 冷氣涷, 快啲著返件衫

臭Be : 我唔涷, 唔使著

我 : 要呀! 如果唔著, 好快流鼻水

臭Be : 嗯... 媽咪, 人會流鼻水係好正常嘅事

我... 碌大眼望住佢

臭Be : 真係架! 人人都有鼻水, 流出嚟係好正常架!

我 : 係呀! 人人都有鼻水, 不過唔會隨便流出嚟! 病就會流鼻水.  著衫!

Be 死死地氣著返件衫

終於... 識踩單車啦!!!

Be... 終於... 

識踩單車啦!!!

過去個暑假

我都有帶Be去屋企附近

學踩兩轆單車

佢其實都識識地

不過成日隻腳上唔到腳踏

又成日發夢...

所以踩得麻麻哋

到咗今日

同佢溫完默書

超爸帶佢去踩單車

我午覺睡醒

佢已經識踩單車!!

佢開心到飛起

成功感返晒嚟!!

不停飛! 左穿右插!!

字典大比拼

Be 由上年小三開始

中文科要查字典

學部首、查註解

所以要買本字典看門口

我搵返我小四時用嘅中、英文字典出嚟睇

發現... 兩者有好大分別...

呢兩本中文字典嘅容量已經相差好遠...

Be 小一時

契爺契媽送咗本小學生英文字典俾Be

但係... 有好多字都查唔到...

咁啱, 超爸要考試

買咗本新字典

父子兩份用

睇下! 我四年級時本字典幾... 流....

講真...

而家小四同我以前嘅小四課程

真係相差好遠

呢篇係Be 小四第一篇英默...

老師唔會照書讀默

會臨場改句子讀默

讀得好快

所以Be 要聽的好清楚

(Be 試過錯咗8個生字, 其中6個係漏s, 兩個係錯大小楷同標點

我真係激到變咗"對穿牆")

仲要加unseen (小一已有unseen)

所以每次默書都要好小心...

相比起佢默書

我以前啲默書... 真係蚊脾一隻

牙醫

我最近又牙痛

要做咗杜牙根

真係越窮越見鬼... (慘過撞鬼...)

又跌錢...

打咗折都要兩千幾...

上星期四(10/9)

做完第一次杜牙根

晚飯時同超爸講起杜牙根價錢

超爸 : 做牙醫都幾好喎! 幫到人又搵到錢.  Be 不如大個咗讀牙科啦!

Be : 吓! 我唔做牙醫架!

超爸 : 點解? 你怕血? 點解唔做牙醫?

Be : 牙醫係醫人, 我咁論盡, 啲病人好危險.

超爸 : 到時大個咗, 你會無咁論盡.  你小心啲就ok.  你試下啦!

Be : 唔得! 牙醫同醫生一樣, 都係醫人. 人命嚟架! 我唔想害人

超爸 : 嗯... Be 其實唔只做醫生要小心! 大個咗做咩都要小心, 如果唔係, 會有意外, 傷害到人. 知唔知呀?

Be : 知到! 不過我會揀啲無咁容易害人嘅工作

(我同超爸忍唔住... 反眼...) 

*** *** ***

口甜吞滑嘅Be

同佢去下午茶

佢食緊米粉時

問我食唔食

我婉拒

佢卷起"注"米粉遞埋我口邊

Be : 媽咪, 快啲食, 呢個充滿好愛、愛、愛、愛、愛、嘅愛心米粉

我當堂打個凸 

有時真係頂佢唔頫...

小四生涯

轉眼間小學雞Be

由一位初小生成為一位高小生

已經小四啦!!

一如以往

我哋無為新學年添置好多新嘢

只係買咗新書、手冊套(之前嗰個用咗3年...)、一套運動服(西服、其他服由表哥轉手俾佢)

*** *** ***

因為上學年(小三)

學校教育課程有大改革

功課量大增、考試量增、整個遊戲玩法大亂...

各人 : 學生、家長、老師都好大壓力

(上年開學前後兩星期我居然失眠... 大近視...)

我哋兩母子唯有正面咁面對

好彩 Be 思想正面

我哋終於一齊跨過艱苦嘅一年

*** *** *** 

之前學校改革

加上初小上高小嘅課程係大躍跳

所以開學前要同Be做啲心理輔導

同Be傾過偈

內容大約 : 要努力溫習、專心聽書、自動自覺、唔挑戰別人, 都要挑戰自己! + 正能量+打氣

Be 都應承我!

*** *** ***

開學咗個幾星期

Be 嘅表現好好

進步咗好多

自動自覺自己做功課、執書包

仲要唔使我哋檢查

quiz 同默書都自己溫習

今日派咗份quiz 卷 (tenses table)

得分 : 28/30

開心C 佢

呢份禮物對佢嚟講係一份鼓勵!!

Be, 媽媽仍然會著陪你

又越過高山又越過谷

我地會一齊迎接新的挑戰

連褲腳

Be 契細佬 ~ FaFa B 出世差不多9個月

仍然未出得院

FaFa B眼仔大大

好得意

希望佢快啲出院

早日康復

我哋早日可以見面

可以同佢玩啦

早兩日契媽拎咗幾件蛤蜊衣過嚟

要改裝褲腳

佢已經剪晒啲褲腳

本來用衣車車

不過用衣車定咗

無晒彈性

所以我用手缝 

好快...

5件蛤蜊衣褲腳整好

大功告成!! 

手工... 過得去啦... 

日久生疏...

要重拾針線

要練習多啲!!

要多做自己嘅興趣嘅事

親子之旅後記

媽回港後...

腸胃仍然未有好轉

其實佢最近個幾月經常又吐又瀉 

最後喺星期一入院

我同Be 每日都去陪佢

今日出院

已經5日

仍然搵唔到病因

我估... 何醫生講中咗...

可能係情緒病...

我已經成日叫佢唔好諗太多

已經衣食無憂

有兒有女有孫玩

已經好有福氣

應該開開心心生活

希望媽早日康復!

2015新加坡親子之旅

今次親子之旅

主角係我媽!

我家三口同佢去旅行

自2012年暑假

我家同媽去過泰國旅行之後

因為媽一直心大心細去唔去日本

一直未再出發

其實一直知佢好想去日本同英國 (係呀! 佢好潮架!)

日本 ~ 因10多年前買咗機票同我去東京

點知臨出發前兩星期

媽撞車撞到大大鑊

住院一年...

所以佢心理陰影... 驚再計劃去... 會... 死喎...

英國 ~ 我都好想去... 好耐未返去...

但要有長假同要計劃好啲至得...

媽媽係想住2 、3個月嗰隻...

我可以同佢去玩兩星期

然後佢住阿姨屋企hea

但始終要人照顧... 阿姨年紀都大...  好吃力嘛...

真係要再諗諗...

*** *** ***

六月尾

媽突然話想去新加坡

咋咋林訂機票、酒店

鐵定8月21-25日新加坡親子之旅

*** *** ***

第一日

8月21日兩點半機出發!!

搭飛機都要一齊坐...

Be 幫手照顧婆婆

七點零到酒店

今次搵咗喺烏節路嘅 Somerset Service Apartment

地方都ok 嘅...

原本安排媽同Be 瞓圖中右手邊間房

媽喺房行咗一個圈

然後話佢瞓廳得嘞!

我話... 不如... 你同我瞓.... .... (下刪百字)

明白了... 之後幾晚唯有拍門借被...

媽瞓廳張加床

Be 要陪婆婆, 所以瞓梳發

然後出去 food court 食晚飯

第二日

瞓到自然醒

出發去食海南雞飯 

媽+Be 極愛食呢個油飯

然後出發去 Gardens by the bay

媽居然唔記得帶帽...

我唯有忍痛俾自己頂帽俾佢...

千其唔好曬親佢 

車癡漢一見車頭又跌入... 人車合一狀態... 

喺花園到

Be 推住婆婆又上又落

一時睇花

一時扮影相

哄到婆婆好開心 

黃昏時

貪方便... 去咗 Esplanada 嘅無招牌...

領嘢...

服務態度差

肉蟹賣晒 (訂位時唔講! 好唔老實)

叫我哋食阿拉斯加蟹 (傻的嗎? 浪費咗隻蟹囉!)

$360坡紙一隻, 仲話抵?!!傻的嗎?

最後喺好混亂情況下

(個侍應大嬸... 真係好煩同態度好差.  如果唔係同媽去, 真係唔食)

叫咗胡椒麵包 (應該唔叫蟹...)

食完一餐好難食又貴嘅飯之後

我哋沿住海邊散步 

跟住飛的士去 Night Safari

好彩媽都見到啲動物

睇埋表演差不多十一點

飛的士返酒店

點知... 喺臨到酒店時...

媽唔多舒服... 嘔...

第三日

又係瞓到自然醒

媽全日飲保礦力

出發去牛車水行吓!

成個旅程都係 Be 推車 

(過馬路同人多時, 就我哋推番) 

去到牛車水

一定會去南洋咖啡店食Be 最愛嘅 ~ 肉骨茶

行咗一陣

婆婆好攰

所以我哋一齊返咗酒店

見到個站名叫 '武吉士' 興奮到呢...

Be 要求留喺酒店陪婆婆

安頓好婆婆同Be

我同超爸出去逛逛

途中同Be 保持聯絡 (啲對話都幾無聊...)

超爸話要去食無招牌

我哋去返 Geylang 嘅無招牌

行過見到呢對貓貓拖鞋

大愛!! 買咗!!

五點幾食晚飯 @_@

佢哋係 ~ 最佳拍擋!!

嗱! 呢啲先叫胡椒蟹架嘛!!! 

呢個汁點白灼蝦! 無得彈!! 

旋風式食完個晚飯

食甜品 ~ 貓山王

唔知係咪季尾

味道只係 ok

喺新加坡買榴槤都幾貴架!! 二百幾蚊粒...

返到酒店都只係七點幾

Be 已經自己食緊杯麵

輪到我陪媽

Be 同超爸去咗圖書館同食雪糕

佢哋話... 超... 好味!!

第四日

行程最緊密的一日

我哋去咗 Universal Studio

第一個遊戲 ~ Jurassic Park

媽覺得好好玩

好彩有 Be 件外套... 如果唔係... 濕晒...

跟住Be 叫婆婆同佢玩 Jurassic Park 架車

點知個車速快到... 嚇親婆婆...

然後去睇 "水世界" 

Hi, Bob! Hi, Stuart!

為咗慳時間

我哋一家排 single ride 玩 Transformer 

一家坐由Be 揸嘅車 

媽見到佢, 即時話送俾我, keke

不得不讚 US 安排週到

基本上只要媽玩的機動遊戲

US 都會安排我哋一家排快線

連同Bob 影相都可以優先 (我都有早到排隊架)

媽媽真係玩得好開心!

我哋五點幾離開US

超爸帶Be 去玩 Skyline Luge 飛車

晚飯去返 Geylang 嘅無招牌

媽十分愛呢隻蟹!!

第五日

食完早餐

出機場啦!!

估唔到 CX crew 對傷殘人仕嘅服務好好!! 超讚!! 

回程了!!

 期待下一個親子旅行