媽媽的災難日 ~~ 囧囧囧

朝早原訂同 Sue 晨操於西貢... 但小Be 仲有少少燒... 所以我哋爽約.  中午同小Be 去睇何醫生, 燒都退咗, 仲好精神添.  跟住, 我揸車實習一次由屋企去瑪麗醫院再返我公司. 

途中去如姨媽屋企落腳, 如姨媽提議去我哋兒時去嘅公眾游泳池玩水... 天氣實在太熱... 我哋都舉腳贊成.   一、二、三動身.   去到泳池, 嗰度有好多小型水滑梯, 小Be 上次同契爺、契媽去泳池時唔係好敢玩呢種小型水滑梯. 玩咗一陣水, 小Be 見駿駿表哥同橋橋表妹 "sir" 得咁開心, 都肯試吓 "sir" 小型水滑梯  玩吓水, 晒吓太陽, 真爽!!!

見小Be 開始接受小型水滑梯, 嗰度有一個大型水滑梯, 約八、九呎高, 問小Be 玩唔玩? 佢話玩, 不過要我同佢玩.  我見佢咁有興趣, 咪咋咋淋同佢上去玩喇... 其實... 陷阱就喺我哋前面 我抱住小Be 去到滑梯口時, 小Be 好驚, 有少少扭計, 扭嚟扭去.  突然一跣... 我成個人向後一撻... 救命呀!!   後腦、頸、膊、背脊、腰同 pet pet 依次序撻落地...  滿天星斗... (唔使驚... 小Be 無事... 我仲係攬實佢, 佢喺我身上面!!)  好彩威姨丈拉一拉我, 平衡咗一下先 "sir"落去, 同埋撈得住我個眼鏡!! (係呀! 撻到眼鏡飛埋出嚟... 喺同一時間, 爸爸同如姨媽喺出口度都聽到一聲巨音响...  ).   一 "sir" 到出口, 爸爸拖我哋埋岸邊... 小Be 就臉青青... 我就... 痛死我喇!!! 嗰種痛... 真係非筆墨可是形容... 強忍住痛... 繼續同佢哋玩... 個頭... 仲痛...!!! 有種爆烈嘅感覺!!! 囧囧囧囧囧 

唔講喇... 真係好痛... 要瞓覺抖抖!!!(真真真... 係好好好痛...)

當父母的你, 你有想過自己的孩子是怎麼樣嗎?

朋友Yo Yo post 咗一篇好有意思嘅文章出嚟, 內容如下 : ｢你想要一個怎麼樣的孩子? 我相信你的腦裡一定會想, 要乖啦, 聽話啦, 唔好曳啦, 讀書叻啦, 有禮貌啦, .......一籮好好好好的東西, 但是, 你有沒有想過, 你以上的要求 (是你的要求), 是你的孩子嗎? 難度他們做不到以上的種種你的要求, 他就不是你的孩子嗎? 可能你會覺得, 可需太嚴重, 我只是希望"姐", 係你問我, 想要一個怎樣的孩子嗎? 對呀, 其實你有沒有細心去欣賞, 你孩子的眼,耳, 口, 鼻. 我聽過, 有人會說, 孩子為何你沒有雙眼皮呀? 為何你的皮膚那麼黑呀? 為何你的耳是兜風架? 為何你的咀那麼大呀, 還有你的鼻又不夠高呀? 你試想想, 誰製造孩子出來的哦? 你也不懂欣賞, 試問誰懂欣賞. 世上是沒有一個完美的人......多謝｣.

 

睇完之後, 感受好深... 即刻喺度諗... 我對小Be 有無要求呢???有無欣賞過佢嘅優點同缺點呢?? 我諗唔多唔少都有啲要求架!! 只係視乎有幾多要求... 我對小Be 要求係 ... 有良好品格、思想正面、懂得與人溝通、有堅持、讀書真係唔需要叻.  而欣賞佢嘅優點方面, 我欣賞佢尚有童真、有愛心、開朗、永遠起床時第一個表情係 ~ 微笑 , 有堅持.  缺點有, 固執 (我覺得都係優點嚟架!!), 有時太專注, 有時又太過懶散 (特別係佢無興趣嘅東西) ...

其實講都底... 咪就係有要求囉!!! 所以, 我盡量由佢自由發揮, 喺安全情況底下, 俾佢自己處埋自己嘅事、自己解決問題.  除非, 佢向我求助, 否則我係唔會理佢架!!

 

老實講, 我最想樂熙一世快樂! 無憂無慮!! 讀書唔需要叻! 最緊要係心地善良!! 為人正直!!  有愛心!! 佢眼大單眼皮, 皮膚黑黑實實, 好man. 身型又fit, 似足石油氣罐, 型!! 腳板肥嘟嘟, 好似燙斗仔. 手仔肥嘟嘟, 好得意!! 有時撒嬌嘴嘟嘟, 見到開心笑.  我最最最最欣賞小Be 嘅係 ~ 佢起床時第一個表情係 ~ 微笑住起身嘅!!

 

一句到尾 : ｢我真係好欣賞我個仔架!!! 一秒係仔, 一世都係我個仔!｣(語氣有啲似 ~ 黑x會啊!!)

平時喺屋企玩嘅情況, 幾投入, 幾專心!!!

詭異事件 ~ 夜．．．半．．．剪．．．髮．．．

今朝清晨時份(接近五點時)，發生咗一件詭異事件．．． 就係 ~ 夜．半．剪．髮．

話說小Be 喺睡夢之中, 突然尖叫同喊我一抱起佢, 就聽到佢話 : ｢出去呀! 出去呀! 我唔要喺房呀!! ｣ 我同爸爸不停地安撫小Be, 試圖拍佢清醒, 同佢講唔使驚, 叫佢醒一醒, 但小Be 仍然癲狂地叫同喊!!! 出到廳, 我聽到小Be 不停喊住話 : ｢啲頭髮好長呀! 我要剪頭髮呀!! ｣ 邊用手掹住自己啲頭髮. 我唯有攞住把較剪, 喺佢頭頂同耳仔邊不停郁, 發出｢軋、軋｣聲, 扮同佢剪緊頭髮. 佢真係停止唔喊, 變得好安靜.  仲係跪喺地上, 合埋對眼仔架, 好似下哂圖嘅案件重演嘅狀態 (其實係得第一張相係似當時嘅小Be ) ...

最弊嘅係, 我一停手唔郁把較剪, 無咗啲｢軋、軋｣聲, 佢又大喊兼大叫 : ｢啲頭髮好長呀! 我要剪頭髮呀!! 媽咪快啲剪頭髮呀!!!｣ 點算呀?? 咁我咪又繼續扮剪頭髮囉!! 如是者, 扮咗數分鐘之後, 我又停一停.  佢又大吵大鬧, 一邊用手掹住自己啲頭髮, 再用另一隻手扮較剪, 一邊叫我好似佢咁剪落去... 我唯有用個 ｢較剪抦｣扮較剪剪佢啲頭髮, 有扯頭髮嗰種感覺, 我先過得骨咋... 又剪咗幾分鐘... 中途仲要同佢講 : ｢小心啲! 唔好郁呀!! 如果亂郁會剪到耳仔架!!｣ (我係咪好入戲呢!! 做戲做全套嘛!! 囧．囧．囧．．．) 最後, 我同佢講 : ｢bebe, 啲頭髮已經剪到好短喇, 好靚仔喇!  瞓覺啦, 好唔好?? ｣ 佢居然答 : ｢好! 我要返房瞓覺!! ｣(*´ｪ`) 返到房扭咗幾下之後, 佢攰到頂唔順瞓咗... 我一睇時間 ~ 5:02am   ...我諗... 成件事擾攘咗大約十五分鐘倒.... 

P.S. 有人見自己無咩參與性, 居然提出返入房瞓先!!! ... 然後返房瞓... 

今朝, 我同爸爸問小Be 點解尋晚半夜要剪頭髮, 佢話啲頭髮好長, 所以要剪頭髮囉!  我哋再問, 邊個叫佢剪頭髮, 佢又嘟起個嘴話 : ｢唔知喎!! ｣...

。。。。。。。。。。。。。。。。。。。。。。。。。。。。。。。。。。。。。

講完啲詭異嘢, 去睇返啲開心相先 ...

開心 ~ 其實可以好簡單

柴九話齋 : 人生有幾多個十年? 最緊要痛痛快快活一場!! 喺呢十鬆啲年裡面, 經歷咗數次經濟逆境, 亦經歷咗好幾次嘅裁員潮.  隨著人嘅成長, 對於逆境時嘅心理質素, 亦有好大分別.  自踏入社會, 第一個逆境係喺1997年, 幸運嘅係 ~ 當時我只係一個｢ 黃毛丫頭 ｣ 無本事有任何損失.  而2001年 同 2003年呢兩年嘅經濟逆境, 特別係 03年, 因為適逢家庭巨變, 心態上同經濟上都比較大壓力... 所以迫得太緊... 令自己困喺一個無路可走嘅掘頭巷, 患上｢返工恐懼症候群 ｣.  最後, 喺2004年12月選擇轉換環境, 甚至願意減人工、扣福利, 誓要令自己心靈回復健康.

眨眼幾年之後, 逆境再來, 心態上隨著結婚 、產子加上不同嘅煉歷之後, 心情比以前放鬆了, 覺得凡事只要盡力而為, 問心無槐已足夠... 唔想再去想太多... 特別係, 我已經有一個完整嘅家庭 (超爸爸同小Be ~ 係我大部份嘅財產), 父母又健在, 夫復何求呢!!! 所以年幾前決定回巢, 我已經將心態調節好, 將工作視為生活嘅一少部份, 自老闆離開之後, 工作壓力比以前重咗好多, 心理上同生理上嘅壓力都比之前(老闆未走前)大好多.  不過經過幾個月嘅磨練, 情緒已經可以調節好.  總之, 一踏出公司門口, 我就會將公事拋諸腦後.  雖然我未能完全做到. 但起碼都做到有 90% 踏出公司門口唔想公事先喇!  一返到屋企就見到老爺同少爺, 我咩都唔記得lu... !!! 好窩心!!! 開心 ~ 其實可以好簡單!!! (￫ܫ￩) 佢哋開心, 我就開心!!!

佢哋幾開心!!!        

小Be受傷了【更新】

今日小Be 喺婆婆屋企跑嚟跑去, 唔小心扑咗喺梳化椅扶手度 (木制).  額頭正中間位置有啲紅咗、腫咗同埋左邊 ｢雲青｣損咗, 情況唔好嚴重.  小Be 仲同我講撞咗落櫈度... 真係唔知真定假??

其實, 小Be 喺16個月大嘅時候, 都發生過好嚴重嘅家居意外.  事發當日 (2007年12月2日) 小Be 應該係出緊 ｢玫瑰疹｣, 有啲唔係好舒服, 加上爺爺等人到我家 BBQ, 所以佢有啲扭抱.  喺我抱住佢沖緊茶嘅時候, 小Be 突然伸出佢隻仔手, 我縮都縮佢唔切, 大家試想吓我當時個心幾 ｢慌 ｣, 因為小Be 俾滾水淥落隻豬手仔之後, 痛到佢張大口(見倒喉嚨掟嗰種喎... )發唔倒聲 (持續10秒上), 嗰一幕情景, 依家仲係深深咁記喺我腦海入面 ...  平時 (我係指當時) 好少喊嘅佢... 喊到 ｢頭歷 ｣咁, 心情久久不能平伏.  其實個傷口(左手中指) 真係好痛, 睇到都覺得痛...  我都有影底咗啲相, 今晚摷咗出嚟睇吓... (啲相可能會令各下情緒不安...) 

今日嘅傷勢 : 見唔見? 條痕打橫喺額頭正中間! 小Be 話好痛喎... (又係唔知真定假??)                  

昔日嘅傷勢 : 呢張係出緊 ｢玫瑰疹｣嘅病 look, 事發後影嘅相... 陰公豬...

睇下... 個水泡幾大... 成隻手指仔3大粒水泡呀! 陰公豬... 真係心痛死我...

兼腫脹咗成倍 + 水泡1大粒 (指甲底)...

睇完啲驚嚇嘢, 我要重溫下小Be16個月大時嘅可愛 look!!!