開學喇! 開學喇!! K1生涯立即展開 ~ 第一天

今日係小Be K1 開學日, 上午我喺屋企同佢準備開學用品、沖涼等...  約 12 點 9, 小Be 食過我煮嘅愛心粟米通心粉之後, 我哋就出門口去鰂魚涌會合爸爸, 一齊去學校上課.  約 1 點 45分去到學校, 我哋見到迦希同佢媽媽, 但呢兩位小朋友拒絕合照... 跟住我哋去搵課室同坐位,  報到同交底書本後, 我同小Be 就留喺課室, 爸爸喺走廊等.  喺未上堂前, 小Be 自己攞玩具玩, 玩完都識得放返原位.

約 2 點 15分開始上堂, 老師同家長講解注意事項同派發手冊、兒歌集同 CD.  跟住係點名, 小Be 唔肯舉手... 小Be 唔知係聽唔明普通話定係心散, 就算我翻譯老師嘅說話俾佢聽, 佢都拒絕回應.  唔知係咪放咗一個漫長嘅暑假, 佢已經將之前學過嘅校園生活俾返晒老師...  喺課室入面大部分時間都不受控制...

 我真係想講一聲 ~ 你唔係嘛!!  上咗半個鍾頭後, 開始排隊去洗手間, 點知出現人籠 (係有幾條隊喺洗手間口嗰隻), 如果小朋友真係好急就大近視!!

  排洗完, 入房前小朋友雙手要消毒, 然後就食茶點.  今日嘅茶點係 ~ 迷你蛋糕一個 + 清水半杯.  小Be 食咗半個蛋糕 + 一杯水之後, 就自己收拾杯、碟 (要俾個 good 佢先, 好彩佢記得 N1 時都係咁做), 仲識得抺嘴添.  跟住就係唱落堂歌放學. 

今日學校安排有啲混亂, 校車遲到, 去排洗又有人籠... 仲要係頭兩日係每班分兩節, 即係話只係得一半人返學都咁亂... 如果一次過返齊咪大混亂!!! 我諗出年唔會咁掛... 放學後, 我哋去咗食下午茶.  小Be 同我講佢唔鍾意大大間 (依家呢間學校)學校, 佢鍾意細細間學校 (以前間學校), 佢想去細細間學校返學...

 我諗... 我要花少少時間同佢做心理輔導先得, 但又唔可以太強迫佢... 真係要好小心處理... (*´ｪ`;)

小Be 自我介紹佢已經係K1 學生                                 http://hk.video.yahoo.com/video/video.html?id=1686489 (睇唔倒, click 呢條 link 啦)

食完茶點, 自己收拾食具情況                                    http://hk.video.yahoo.com/video/video.html?id=1686515 (睇唔倒, click 呢條 link 啦)

食完通心粉要換衫喇!!

件衫 over size 咗少少, 不過都好靚仔吖!! 嘻嘻!!

坐地鐵喇, 好緊張呀!!!

同姐姐試路, 睇吓佢識唔識路去搵爸爸

眨下眼就到學校喇!!                   

呢間係小Be 嘅課室喇 ~ K1J

小Be 個坐位呀~

開始有少少眼瞓嘅小Be ~~

食茶點喇!!

放學 lu!! bye-bye!!

是日晚飯於九龍灣大榮華酒樓

新書推介

最近睇咗一本書, 令我覺得書中人俾我有一種幸福嘅感覺, 一路睇會一路笑, 有時又會感動到流眼淚  真係笑中有淚!!! 真係好想睇第二、三、四集... ... 期待中...

估唔估到邊本書???

就係.... 也加子@橫濱 (呢個封面係再版嚟架!! 我嗰本唔係咁樣架!! )

媽媽的災難日 ~~ 囧囧囧

朝早原訂同 Sue 晨操於西貢... 但小Be 仲有少少燒... 所以我哋爽約.  中午同小Be 去睇何醫生, 燒都退咗, 仲好精神添.  跟住, 我揸車實習一次由屋企去瑪麗醫院再返我公司. 

途中去如姨媽屋企落腳, 如姨媽提議去我哋兒時去嘅公眾游泳池玩水... 天氣實在太熱... 我哋都舉腳贊成.   一、二、三動身.   去到泳池, 嗰度有好多小型水滑梯, 小Be 上次同契爺、契媽去泳池時唔係好敢玩呢種小型水滑梯. 玩咗一陣水, 小Be 見駿駿表哥同橋橋表妹 "sir" 得咁開心, 都肯試吓 "sir" 小型水滑梯  玩吓水, 晒吓太陽, 真爽!!!

見小Be 開始接受小型水滑梯, 嗰度有一個大型水滑梯, 約八、九呎高, 問小Be 玩唔玩? 佢話玩, 不過要我同佢玩.  我見佢咁有興趣, 咪咋咋淋同佢上去玩喇... 其實... 陷阱就喺我哋前面 我抱住小Be 去到滑梯口時, 小Be 好驚, 有少少扭計, 扭嚟扭去.  突然一跣... 我成個人向後一撻... 救命呀!!   後腦、頸、膊、背脊、腰同 pet pet 依次序撻落地...  滿天星斗... (唔使驚... 小Be 無事... 我仲係攬實佢, 佢喺我身上面!!)  好彩威姨丈拉一拉我, 平衡咗一下先 "sir"落去, 同埋撈得住我個眼鏡!! (係呀! 撻到眼鏡飛埋出嚟... 喺同一時間, 爸爸同如姨媽喺出口度都聽到一聲巨音响...  ).   一 "sir" 到出口, 爸爸拖我哋埋岸邊... 小Be 就臉青青... 我就... 痛死我喇!!! 嗰種痛... 真係非筆墨可是形容... 強忍住痛... 繼續同佢哋玩... 個頭... 仲痛...!!! 有種爆烈嘅感覺!!! 囧囧囧囧囧 

唔講喇... 真係好痛... 要瞓覺抖抖!!!(真真真... 係好好好痛...)

當父母的你, 你有想過自己的孩子是怎麼樣嗎?

朋友Yo Yo post 咗一篇好有意思嘅文章出嚟, 內容如下 : ｢你想要一個怎麼樣的孩子? 我相信你的腦裡一定會想, 要乖啦, 聽話啦, 唔好曳啦, 讀書叻啦, 有禮貌啦, .......一籮好好好好的東西, 但是, 你有沒有想過, 你以上的要求 (是你的要求), 是你的孩子嗎? 難度他們做不到以上的種種你的要求, 他就不是你的孩子嗎? 可能你會覺得, 可需太嚴重, 我只是希望"姐", 係你問我, 想要一個怎樣的孩子嗎? 對呀, 其實你有沒有細心去欣賞, 你孩子的眼,耳, 口, 鼻. 我聽過, 有人會說, 孩子為何你沒有雙眼皮呀? 為何你的皮膚那麼黑呀? 為何你的耳是兜風架? 為何你的咀那麼大呀, 還有你的鼻又不夠高呀? 你試想想, 誰製造孩子出來的哦? 你也不懂欣賞, 試問誰懂欣賞. 世上是沒有一個完美的人......多謝｣.

 

睇完之後, 感受好深... 即刻喺度諗... 我對小Be 有無要求呢???有無欣賞過佢嘅優點同缺點呢?? 我諗唔多唔少都有啲要求架!! 只係視乎有幾多要求... 我對小Be 要求係 ... 有良好品格、思想正面、懂得與人溝通、有堅持、讀書真係唔需要叻.  而欣賞佢嘅優點方面, 我欣賞佢尚有童真、有愛心、開朗、永遠起床時第一個表情係 ~ 微笑 , 有堅持.  缺點有, 固執 (我覺得都係優點嚟架!!), 有時太專注, 有時又太過懶散 (特別係佢無興趣嘅東西) ...

其實講都底... 咪就係有要求囉!!! 所以, 我盡量由佢自由發揮, 喺安全情況底下, 俾佢自己處埋自己嘅事、自己解決問題.  除非, 佢向我求助, 否則我係唔會理佢架!!

 

老實講, 我最想樂熙一世快樂! 無憂無慮!! 讀書唔需要叻! 最緊要係心地善良!! 為人正直!!  有愛心!! 佢眼大單眼皮, 皮膚黑黑實實, 好man. 身型又fit, 似足石油氣罐, 型!! 腳板肥嘟嘟, 好似燙斗仔. 手仔肥嘟嘟, 好得意!! 有時撒嬌嘴嘟嘟, 見到開心笑.  我最最最最欣賞小Be 嘅係 ~ 佢起床時第一個表情係 ~ 微笑住起身嘅!!

 

一句到尾 : ｢我真係好欣賞我個仔架!!! 一秒係仔, 一世都係我個仔!｣(語氣有啲似 ~ 黑x會啊!!)

平時喺屋企玩嘅情況, 幾投入, 幾專心!!!

詭異事件 ~ 夜．．．半．．．剪．．．髮．．．

今朝清晨時份(接近五點時)，發生咗一件詭異事件．．． 就係 ~ 夜．半．剪．髮．

話說小Be 喺睡夢之中, 突然尖叫同喊我一抱起佢, 就聽到佢話 : ｢出去呀! 出去呀! 我唔要喺房呀!! ｣ 我同爸爸不停地安撫小Be, 試圖拍佢清醒, 同佢講唔使驚, 叫佢醒一醒, 但小Be 仍然癲狂地叫同喊!!! 出到廳, 我聽到小Be 不停喊住話 : ｢啲頭髮好長呀! 我要剪頭髮呀!! ｣ 邊用手掹住自己啲頭髮. 我唯有攞住把較剪, 喺佢頭頂同耳仔邊不停郁, 發出｢軋、軋｣聲, 扮同佢剪緊頭髮. 佢真係停止唔喊, 變得好安靜.  仲係跪喺地上, 合埋對眼仔架, 好似下哂圖嘅案件重演嘅狀態 (其實係得第一張相係似當時嘅小Be ) ...

最弊嘅係, 我一停手唔郁把較剪, 無咗啲｢軋、軋｣聲, 佢又大喊兼大叫 : ｢啲頭髮好長呀! 我要剪頭髮呀!! 媽咪快啲剪頭髮呀!!!｣ 點算呀?? 咁我咪又繼續扮剪頭髮囉!! 如是者, 扮咗數分鐘之後, 我又停一停.  佢又大吵大鬧, 一邊用手掹住自己啲頭髮, 再用另一隻手扮較剪, 一邊叫我好似佢咁剪落去... 我唯有用個 ｢較剪抦｣扮較剪剪佢啲頭髮, 有扯頭髮嗰種感覺, 我先過得骨咋... 又剪咗幾分鐘... 中途仲要同佢講 : ｢小心啲! 唔好郁呀!! 如果亂郁會剪到耳仔架!!｣ (我係咪好入戲呢!! 做戲做全套嘛!! 囧．囧．囧．．．) 最後, 我同佢講 : ｢bebe, 啲頭髮已經剪到好短喇, 好靚仔喇!  瞓覺啦, 好唔好?? ｣ 佢居然答 : ｢好! 我要返房瞓覺!! ｣(*´ｪ`) 返到房扭咗幾下之後, 佢攰到頂唔順瞓咗... 我一睇時間 ~ 5:02am   ...我諗... 成件事擾攘咗大約十五分鐘倒.... 

P.S. 有人見自己無咩參與性, 居然提出返入房瞓先!!! ... 然後返房瞓... 

今朝, 我同爸爸問小Be 點解尋晚半夜要剪頭髮, 佢話啲頭髮好長, 所以要剪頭髮囉!  我哋再問, 邊個叫佢剪頭髮, 佢又嘟起個嘴話 : ｢唔知喎!! ｣...

。。。。。。。。。。。。。。。。。。。。。。。。。。。。。。。。。。。。。

講完啲詭異嘢, 去睇返啲開心相先 ...