怪物(蚊難)小王子

2009年9月9日星期三

回憶 ~ 於小Be一歲時

初生至一歲大嘅小Be係一份天賜的禮物.

點解?? 易湊囉!!!

1. 喺屋企, 係唔需要抱佢架!! 只要放佢喺梳化、搖搖椅、床或學行車, 佢就會自己娛樂自己喇!!

2. 唔夠半歲大, 佢已經自己揸奶樽飲奶奶. 喺無刻意戒夜奶嘅情況下, 差不多兩個月自行戒咗.

3. 夜晚瞓覺覺豬唔需要人抱住, 只要飲好奶奶同換好尿片, 然後放佢上床同熄燈, 佢就會自行覺覺豬.

4. 瞓覺能力一流, 可以由晚上十點零瞓到第二日中午十一、二點, 間中會朝早九點零起身飲支奶, 然後再瞓返.

5. 打針、食藥 (西藥、保嬰丹、涼茶)、探熱 (肛探、耳探) 同睇醫生係唔會喊嘅, 只係坐定定唔郁, 任我哋舞. 打針時, 一定唔可以捉實佢, 一捉實就會大喊. 反而扶一扶佢, 佢仲鎮定添.

6. 由佢學扶住企開始 (約九個月大), 公公就教佢點樣由梳化落地嘅技巧, 所以佢係無試過跌落地架. 又由嗰時起, 我係會放佢喺企缸到, 俾佢扶住櫈仔企喺度, 然後, 我用花灑同佢沖涼 (冬天除外) 不過, 唔可以淋頭架喎!! 佢到依家都未克服到花灑淋頭 ...

7. 從無手多多摸 / 搶抱佢嘅人嘅眼鏡

8. 識坐之後, 可以同我哋坐定定食飯, 可坐成3個鐘都無詐型架!! (依家緊係唔得啦!!)

。。。。。。。。。。。。。。。。。。。。。。。。。。。。。。。。。。。

不過, 人係無十全十美嘅, 小Be 都有難湊嘅一面架!!

1. 第一項頂級難湊嘅 ...

就係 ~ ｢癡 ~ 媽 ~ 筋｣喇!! 唔好心邪!! 我意思係佢癡得我好緊要, 喺屋企要喺佢視線範圍, 如果唔係會喊死佢. 只要我喺度, 無論去到邊, 我同小Be 係會癡實, 佢唔會俾其他人抱 (包括爸爸、婆婆、公公同姐姐都唔得

) 一出街... 真係抱到我手斷架...

2. 我夜晚未返屋企, 佢係唔會瞓... C唔斷氣咁... 不停飲泣... 一見到我, 我一抱起佢, 佢即刻安樂晒... 即瞓!!! 死未!!!

3. 一出街就會痾大大篤｢K｣俾我哋嘆!! 仲要係大篤到上晒背脊嗰種!!! 次次都搞到我 "呢咁hea"... 佢兩個月大時, 同佢去濕地公園, 佢又係痾到大大篤上晒背脊, 抺完個背脊, 都要喺露天洗手盆沖一沖先乾淨咋!!!

4. 一發起皮四上嚟, 真係唔係人咁品!! 喪喊到震... 無人搞得佢掂... 多數係我可以安撫到佢咋...

小Be 最近成日要扮初生嗰時咁, 要我哋抱住佢飲奶... 真玩嘢!!!

佢仲要玩埋扮掃風添 ...

2009年9月8日星期二

話說喺7月時, 好朋友 ~ Connie 打電話俾我, 話我知佢喺屋企樓下嘅藥房見倒小Be 個｢蜘蛛俠｣廣告, 係 2D 掛畫 (bunting) 同埋 3D 掛畫 (所謂嘅3D, 其實係一個三角形嘅掛畫). 佢即刻厚住臉皮同老闆講, 可唔可以落畫後留俾我呢? 點知老闆話無問題, 8月嚟攞啦!! (因為張廣告合約係一年 ~ 8 '08 - 7' 09, 所以7 月尾一定要落畫). 於是一到8月, Connie 真係去攞, 而老闆又真係俾佢喎!!! 多謝大家!!!

擺咗喺 Connie 屋企成個幾月, 懶惰的我, 卒之喺尋日嘅｢擇日不如撞日｣約會下, 順手攞埋返屋企.

Connie 姨姨, 真係唔該晒你呀!!!

藥房老闆, 唔該晒!!!

呢個就係2D 掛畫 (bunting) 同埋 3D 掛畫個 layout 喇!

3D 掛畫個實物, 有3面圖案架!!

個3D箱有幾大?? 等小 model 併埋去俾你哋睇下有幾大啦!! 話大唔大, 話細唔細咁囉!! 都唔易收埋架!!

咁呢舊嘢擺喺邊鼠好呢??

2009年9月2日星期三

K1生活 ~ 第二天

今日爸爸帶小Be 返學先, 我約 2 點鬆啲先到. 今日小Be 嘅表現好咗好多, 雖然佢反應唔算好好, 起碼佢可以自己坐喺位度上堂, 肯同爸爸出去同老師一齊唱歌、跳舞. 到排洗時, 都主動出去排隊. 所以我要讚一讚佢先!!

http://hk.video.yahoo.com/video/video.html?id=1687495 (睇唔倒, click 呢條 link 啦)

到食茶點時間發生咗段趣事, 是日茶點係 ~ 1 片梳打餅 + 半杯水 + 半隻香蕉. 小Be 首先食咗梳打餅, 然後食香蕉. 佢同我講佢唔識搣蕉皮, 叫我幫佢搣 (我坐喺後排). 佢行緊嚟我身邊時發生咗... 唔係嘛...

佢突然揸住半隻蕉當 mic 喺度唱歌 ~ 唱小時候!!!

對面位嘅太太忍唔住爆笑出嚟... 真失禮!!

http://hk.video.yahoo.com/video/video.html?id=1687486 (睇唔倒, click 呢條 link 啦)

食完茶點, 佢都識得執拾, 同埋收埋自己條毛巾同盒入書包 (雖然有少少論盡, 但都要俾個 good 佢嘅

) 到英文老師出埸, 佢同小朋友唱咗兩首英文歌之後, 又風塵僕僕咁飄走咗. 小Be 都算 ok, 有拍下手、嘴郁郁咁囉. 相比起尋日已經好咗好多 lu. 好快又落堂喇!! 一出操場, 佢要我幫佢同啲校車影相. 我哋又去咗食下午茶, 傾下偈, 佢話今日鍾意返學喎.

謝天謝地!!! 聽日同後日會由爸爸同佢返學, 不過無得陪課, 唔知佢o 唔 ok 呢! 我諗應該無問題, 講到底, 佢都係一隻門口狗!!

小Be 加油呀!! 媽咪支持你!!!

扮扯線公仔??

扮 cute?? 唔係嘛 !!!

唱完歌, 食隻香蕉, 潤潤個喉嚨先!!!

抺好嘴, 執好啲嘢!

車癡堅持同泊喺操場嘅每一架校車影相...

問你驚唔驚!!

喺學校門口前影返張相先!!

Bye-bye!!!

2009年9月1日星期二

開學喇! 開學喇!! K1生涯立即展開 ~ 第一天

今日係小Be K1 開學日, 上午我喺屋企同佢準備開學用品、沖涼等... 約 12 點 9, 小Be 食過我煮嘅愛心粟米通心粉之後, 我哋就出門口去鰂魚涌會合爸爸, 一齊去學校上課. 約 1 點 45分去到學校, 我哋見到迦希同佢媽媽, 但呢兩位小朋友拒絕合照... 跟住我哋去搵課室同坐位, 報到同交底書本後, 我同小Be 就留喺課室, 爸爸喺走廊等. 喺未上堂前, 小Be 自己攞玩具玩, 玩完都識得放返原位.

約 2 點 15分開始上堂, 老師同家長講解注意事項同派發手冊、兒歌集同 CD. 跟住係點名, 小Be 唔肯舉手... 小Be 唔知係聽唔明普通話定係心散, 就算我翻譯老師嘅說話俾佢聽, 佢都拒絕回應. 唔知係咪放咗一個漫長嘅暑假, 佢已經將之前學過嘅校園生活俾返晒老師... 喺課室入面大部分時間都不受控制...

我真係想講一聲 ~ 你唔係嘛!! 上咗半個鍾頭後, 開始排隊去洗手間, 點知出現人籠 (係有幾條隊喺洗手間口嗰隻), 如果小朋友真係好急就大近視!!

排洗完, 入房前小朋友雙手要消毒, 然後就食茶點. 今日嘅茶點係 ~ 迷你蛋糕一個 + 清水半杯. 小Be 食咗半個蛋糕 + 一杯水之後, 就自己收拾杯、碟 (要俾個 good 佢先, 好彩佢記得 N1 時都係咁做), 仲識得抺嘴添. 跟住就係唱落堂歌放學.

今日學校安排有啲混亂, 校車遲到, 去排洗又有人籠... 仲要係頭兩日係每班分兩節, 即係話只係得一半人返學都咁亂... 如果一次過返齊咪大混亂!!! 我諗出年唔會咁掛... 放學後, 我哋去咗食下午茶. 小Be 同我講佢唔鍾意大大間 (依家呢間學校)學校, 佢鍾意細細間學校 (以前間學校), 佢想去細細間學校返學...

我諗... 我要花少少時間同佢做心理輔導先得, 但又唔可以太強迫佢... 真係要好小心處理... (*´ｪ`;)

小Be 自我介紹佢已經係K1 學生 http://hk.video.yahoo.com/video/video.html?id=1686489 (睇唔倒, click 呢條 link 啦)

食完茶點, 自己收拾食具情況 http://hk.video.yahoo.com/video/video.html?id=1686515 (睇唔倒, click 呢條 link 啦)

食完通心粉要換衫喇!!