怪物(蚊難)小王子

2011年12月10日星期六

Open day @ King's College

多得 Sue 嘅邀請, 令我可以參觀我由細到大都好鍾意嘅一間區內(西區 ~ 我由出世住到嫁人的地區...)名校 ~ King's College 英皇書院. 今年係英皇書院創校85週年, 加上校舍列入古蹟, 所以以古蹟為題作開放日. 由學生帶領嘅導賞團為我哋一一介紹古蹟位置同特色. 而我嗰團嘅黃同學, 佢表現得好好, 有問必答, 就算遇到同團團友嘅奇怪/挑剔問題時 (例如 : 點解呢間課室咁細, 唔整大啲?? 入門口位要落一級嘅? 好易仆倒喎, 叫人整好啲啦!!), 佢都會好有禮貌咁嘗試解答問題.

我哋去到學校, 朋友~Y校長介紹咗 King's 校長 ~ 陳校長俾我哋認識, 我哋傾咗幾句之後, 陳校長就要同我哋分開行嘞. 因為陳校長忙於招待一班1958 年嘅畢業生 (係呀! 係1958年呀!! 所以我係見到一班伯伯囉!!) 然後我哋就跟咗由黃同學帶領嘅導賞團遊學校嘞!!

呢棵無花果樹有成八十年歷史, 不過佢而家有病, 陳校長佢哋會盡力搶救佢架!! 有一點要講一講, 原身校舍(下圖紅磚牆身)部份已列入古蹟, 但花園噴水池因十幾年前改動過, 所以唔可以列入古蹟. 其實個花園好靚、好優雅~~

啲柱係對等架~~

呢啲圓拱型關位都係特色之一

呢位就係黃同學嘞!! 真係要俾個獎佢!!!! 講得好詳細同好 helpful!!!

學校大門都好型, 好 classic!! 我好鍾意呀!!

笑話一則 ~ 喺導賞時, 再遇校長時, 校長問 ah Be : ｢小朋友, 你鍾唔鍾意呢間學校呀?? ｣ ah Be 答 : ｢麻麻哋... ｣

唔係嘛....

囝, mamemo 好鍾意喎... 如果你中學考到入去, mamemo 真係要謝袓~~ 點解我咁鍾意呢間學校?? 我覺得佢係一間平民貴族學校, 大部份學生係內儉、踏實, 唔似一般貴族學校囉...

晚上, 我同 ah Be 去咗九龍城同我可愛嘅契女 ~ 阿豬一家打個邊爐~~ 三個小鬼好醒目, 一坐低低頭係咁食, 填飽個肚仔先話要一齊玩. 佢哋三隻野玩遊戲可以好簡單, 唔使四圍走, 淨係兩張櫈都玩咗一晚~~

佢哋真係開心玩、開心笑架!! 阿妹 ~ 小魔真係好得意~~

2011年12月9日星期五

植樹日 (27/11)

今次要回帶返 27/11 日, 喺呢個星期天嘅早上, 我哋倒塔咁早 (其實都係9:00) 去同心悠一家食早餐, 然後出發去清水灣道口嘅｢佐敦谷公園｣參加理大攪嘅｢植樹日｣活動.
嗰日天氣好好, 好曬同好熱!! 我哋一家三口曬到 (熱到) 口黑臉黑... 我... 真係唔多曬得... 因為一曬一熱就會超級頭痛

.... 怪病... (可能我燥底... keke)

喺阿教育局局長~ 孫局長主持開幕時 (如一早知佢會喺度, 我諗我會送佢臭蛋兩隻囉!!

), 我哋就影吓相, 打發一下時間...

差不多十一點開始植樹, 歷時一個多小時!! 辛苦晒 ~ 兩位小朋友嘅爸爸!!! 嗰日真係好曬架~~ 睇吓呢兩位小朋友嘅紅蘋果臉就知有幾曬~~

開始植樹啦, 每家人要種六棵植物!! 品種應該係大紅花嚟架! 倆父子密密撬~~ 要撬鬆啲泥~~

密密掘~~ 密密掘~~ 密密掘~~

最後梗係要超爸掘啦, ah Be 就搬定棵植物等種落地. 棵植物真係好重架!!!

ah Be 掘到大汗疊細汗, 成個地盤佬咁!!

心悠幾斯文~~ 好唔同 feel 囉...

終於都種晒六棵植物落地, 最後一個步驟係 ~ 淋水, 淋完水就大功告成!!

臨走前, 影返張相做紀念先~~

2011年12月8日星期四

與 ah Be 一段窩心對話

超爸出差一個多星期 (5/12-13/12), 只有我同ah B e喺屋企. 當ah Be 知道超爸要出差, ah Be 即時高興得喺我耳邊講, 好野! 我可以同你一齊瞓!!! (開心到佢呢~~~) 點知, 到超爸出差嘅第一晚睡前, ah Be同我講, 其實爸爸唔喺屋, 佢係好唔開心架. 仲話平時爸爸整蠱佢, 佢扮嬲... 其實佢係好開心架 (文法上可能有錯, 但我只係將ah Be 嘅原文記錄底) 超爸聽到實冧晒啦!!!

話說星期二晚, 我同ah Be煮水餃+公仔麵時, 佢喺旁邊不停幫手. 食完麵又幫手執枱. 到我洗碗時, 佢企喺我旁邊幫手將洗好嘅碗放喺碗架上. 我哋對話如下 :
ah Be: ｢mami, 我幫你手洗碗吖?｣
mamemo: ｢唔使啦, 你唔識洗, 等你大個啲先.｣
ah Be: ｢大個啲? 係咪即係6歲呀?｣
mamemo: ｢係呀. 你幫我放啲碗喺個架度啦. ｣
ah Be: ｢好呀! mami 呀, 第二時你老咗, 我都會幫你洗碗同做家務架!｣
mamemo: ｢吓!! 真架? 你會幫我手? ｣

ah Be: ｢係呀! 我好鍾意陪你做家務架! ｣ (嘿... 嘿... 到你大個咗... 你就要老婆唔要老媽啦... 不過依家聽到都好開心...)
mamemo: ｢哦. 不過第二時我哋唔一齊住, 你點幫我家務??? ｣
ah Be: ｢我哋會一齊住架, 我仲會請個工人姐姐俾你, 幫你手囉... 好似姐姐幫婆婆咁...｣ (嘿... 嘿... 到你大個咗... 同我住?? 你會無老婆架喎... 真係冧C我啦~~ 阿仔~~)
mamemo: ｢嘩, BB 你對我咁好, 我真係好開心呀!! ｣
ah Be: ｢係呀! 我真係好鍾意你架, 我仲會帶你哋去旅行, 好似我哋同婆婆去旅行咁. 我哋第時一齊去英國、日本、美國、泰國.... ｣
mamemo: ｢好呀 BB, 多謝你呀!! ｣ (個心甜到糖尿病咁滯...

喺呢個時候, ah Be 攬住我隻肥腳實一實!! so sweet ~ 我!! keke

*** 思念在遠方(我的) 爸爸...

2011年11月25日星期五

快樂的一天開始了~~

人生有一個童年, 但只有短短數年, 一閃即逝~~ 我希望ah Be 有一個快樂的童年. 何謂｢快樂的童年｣?? 喺我嘅定義係佢嘅快樂係來自心靈上, 例如佢感受到父母嘅愛和關心及懂得愛和關心別人、享受與人分享、不計價、無機心、容易與人相處. 呢幾點, ah Be 都能做得到. 最近, 當每次我聽著 ah Be 唱以下呢一首歌時, 我都覺得佢嘅童年仍然係開心快樂嘅!! 因為我感受到佢｢真｣尚未受到污染... 仲有童真... 希望佢呢份｢真｣仲可以保持一段時間.

希望你哋每一天都由呢首歌嘅內容開始啦!! ~~快樂的一天開始了~~

2011年11月14日星期一

小一面試結果(三)

今日, 最後一間學校 ~ 神小 ~ 公報結果嘞!!!

登 ~ 登 ~ 登 ~ 凳~~~~ 結果係 ~~~~ 取錄!!!

有交代! 有交代!!!

總結 : 共考7間小學, 被3間取錄, 有交代! 有交代!!!

煩惱又開始嚟嘞~~原小好? 定神小好?? 如果接受神小, 就要放棄津/官校嘅大抽獎...

點算呢???... 苦惱中

2011年11月12日星期六

K3 秋季大旅行

大家估都估唔到K3 嘅 ah Be, 居然係第一次參加家教會辦嘅大旅行!! (因為前兩年都家有白事... 係呀!! 仲要係俾咗錢之後有白事, 仲仲仲要係兩次都撞正白事嘅守夜日添, 邪到不得了...

) 雖然今次嘅旅行目的地係｢嶺南之風｣同｢濕地公園｣. 今次集合地點喺一個幾唔就腳嘅地方, 唔近地鐵站, 所以我哋｢飛的｣去, 準時喺08:45 到達!! 今日共有17部旅遊巴!! 待老師點名同派水、百力支同小禮物 (小朋友) 之後就出發嘞!! 我哋坐8號車出發!!

出發前, 同同學影張相先啦!!

話咁快就去到荔枝角公園嘅｢嶺南之風｣~~ 嘩! 成個場景都好熟口面喎!!! 我認得啦!! 無記啲古裝片喺到拍架!! 成套｢萬凰之王｣都喺度拍架!! 無記真係慳水慳力!!

巧遇N斑時的同學 ~ Anson 兄!! 佢真係好 cool 呢~~ 咪睇佢大大隻呀~~ 細 ah be 兩三個月架~~

有亭台樓閣唔行, 偏偏向烈日當空下的草地喪跑~~ 真係大汗搭細汗...

喪跑一個鐘後, 11:40 我哋出發去荃灣嘅熊貓酒店食自助午餐. 當然唔好對呢個自助午餐有好高要求啦!! 每人消費$150大洋, 包車費、自助午餐同濕地公園入場費... 我哋一家主力食菜同炒飯, 味道都唔錯!!
呢度就係我哋食自助午餐嘅場地. 點呀!! 圍數係咪好浩瀚呢!! 其實仲有兩大排枱影唔到!!!