米奇老鼠妙妙屋

今晚, ah Be 嚟我公司接我放工, 但我又未走得... 我老闆搵咗啲史前玩具(佢囝囝細個玩嗰啲) 出嚟俾ah Be 玩. 應酬一下佢~~  登... 登... 登... 凳~~ 就係呢頂帽嘞~~ 

個傻Be 一戴上米老鼠帽之後, 好似鬼上身咁, 嘟起個嘴. 扮米老鼠把聲, 口中唸唸有詞咁唱 : 開心玩! 開心笑! 米奇老鼠!  齊齊在這裡一起... (米奇老鼠妙妙屋首主題歌...) 真係名副其實嘅~~ 老翻米老鼠~~ wakakakaka~~~  爆笑~~~ 好彩我有錄底咗, 等佢大個自己睇番一定超爆笑!!  佢好鍾意頂帽, 成晚拎住/戴住唔放手!!

睡相

呢個星期每晚都喪開OT... 無十一點半都無得走... 可憐嘅 ah Be 要每晚喺婆婆家呆等... 佢又唔肯喺婆婆家覺覺豬.  唯有叫超爸盡量早放工返去湊佢啦 (其實 ah Be 都唔多想超爸湊佢, 不過好過無啦~~ 脆脆地... 要咗佢...)  呢個星期, 佢成個樣變晒落晒型, 成隻熊貓咁... 個黑眼圈又大, 眼肚又大... 真係慘慘豬...  鬼咩! 晚晚等我等到十二點... 囝. 你唔好等媽咪啦!! 早啲瞓啦, 心痛死我啦.... 

星期二晚, 佢等我等到忍唔住瞓咗... 我返到屋企開晒燈, 一邊拍佢一邊搖佢一邊講 : ｢bb, 媽咪返嚟啦! 錫啖先瞓啦!! ｣  好無人性耶~~  嘻嘻!!  之但係佢真係無反應囉!!  跟住忍唔住影咗張相.   望真啲... 嘩!! 大個仔咗咁多嘅?? 個身咁長嘅?? 有成110 cm 高 (我諗...) 仲生鬚添...

尋晚十點幾, ah Be 打電話俾我, 一邊喊一邊問我幾時帶佢返屋企... 喊到死死下, 最後仲發爛渣話唔睬我 ( 眼瞓癲...) 

我即答: ｢好吖, 咁你以後唔好搵我.｣講完即刻收線!   我最憎啲人恐嚇我架嘛!!（￣へ￣）眼瞓咪瞓, 唔明點解要發脾四呢?? 我真係嬲架!!  不過, 嬲還嬲, 都係要繼續做野架...  隔咗三分鐘, 個衰 Be 打返電話嚟, 喊住講 ｢sorry 媽咪... 我下次唔會發脾氣... 你原諒我啦, 好唔好??｣(重覆講咗好幾次...)  我真係怕咗佢 (阻住我做野)... 於是, 是是但但咁原諒咗佢, 佢亦好合作地收聲唔再喊, 然後收線.

ah Be 生怪病!!!

快將踏入6歲嘅 ah Be 再唔係一舊飯, 任我哋搓圓撳扁... 反而係好有自己想法, 嘴啫啫, 講唔停, 煩個不停... 最近我發現佢生咗一個怪病 ~~ 就係 ｢王子病｣... 唔知點解佢會有呢個病...  自問我家家規都比較嚴+獨立, 但佢最近成日都做咗一啲好有 ｢王子病｣病徵嘅行為....

例子一
某天晚上, 我哋一家同契爺、契媽食飯時, 當契爺準備挾餸 (剩餘3舊餸), 有個細路突然嘴裡含住舊餸叫 : ｢我要食哩個同嗰個, 留返俾我食!!｣   佢居然做出啲咁無禮貌嘅事!!!! 太過份啦!! 佢嘅下場當然係無得食｢哩個同嗰個｣ + 歸家後嘅飯後甜品 ~ ｢滕條炆豬肉｣+訓話啦!!!


例子二
有日出街著鞋時, 又有個細路伸出隻腳連鞋, 大叫: ｢幫我綁鞋帶.｣  教咗咁耐你都唔識綁帶唔緊要, 可以再學... 但唔係伸隻腳出嚟叫人同你綁鞋帶囉 下場當然係俾我剷到上天花板... 含住泡眼淚... 學綁帶啦!


無論喺個人品行同功課上, 其實我都教佢教到好勞氣同好忟 , 有時真係幾火燒心架... (我係一個心急、忟憎人... 簡單啲講~燥底囉... ) 好彩超爸成日提醒我, 叫唔好咁惡對ah Be, 如果唔係 ah Be 會跟我一樣大脾氣... 所以我要不停提自己.... 心平氣和.   我而家教 ah Be 時, 會軟 、硬功一齊出, 好多時都係硬功先 (訓話 / 少少先體罰), 軟功後 (冷靜咗之後, 我會同佢傾下佢嘅想法同原因, ,再話俾佢知, 佢咁唔乖會令我好傷心...), 等佢知道佢嘅行為會影響到別人嘅感受, 我覺得呢招 ~  ｢以退為進｣都幾有效架喎!!

自問教仔唔叻... 真係要好好學習一下點樣同佢相處 (教到佢又唔傷二人感情), 又可以教導佢個人品行, 灌輸正能量+正確價值觀+道德觀俾佢.  我而家明白當年老媽點解成擔心機教我哋... 我諗老媽真係嘔咗唔知幾多擔血... 多謝老媽!! 

請先讓車上乘客落車

自 ah Be 歲幾兩歲起, 我已經教佢坐公共交通工具時要注意嘅守則, 例如要讓坐俾有需要人仕 (老人、傷殘、孕婦、比自己細嘅小朋友....) 、要排隊上車、讓乘客落車先自己上車等等.   好多時ah Be 都會反問我點解其他人無讓坐 / 要排隊 / 讓乘客落車??   我唯有答佢唔需要理其他人做唔做, 只要自己有原則同肯去做就可以嘞!! 佢而家已經會做到以上守則. 

今朝我哋一家人坐地鐵返工、ah Be去婆婆家時, ah Be 做咗一樣令我好意外嘅事....  就係... 當我哋坐地鐵去到婆婆家站, 正準備落車... 車門啱啱打開之際, 啲人準備衝入車廂時~~ ah Be 突然大聲叫 : ｢嘟. 嘟. 嘟. 嘟. 請先讓車上乘客落車!｣(扮列車廣播... )  然後施施然 (陰陰嘴笑)行出車廂...   奇就奇在... 等車嘅人真係等佢落咗車之後先上車嘛...  我又忍唔住佢咁囂... 話咗佢兩句... 唔好咁張揚, 咁樣好無禮貌架.  佢話佢知道喎. 

我諗佢係用另類手法抗議啲人唔讓其人行先...  而家真係好難教啲小朋友...(*´ｪ`;) 

2012 義工日@育賢學校

唔好誤會, 唔係 ah Be 做義工, 而係我公司每年一度義工日(我都幾欣賞我公司呢種回饋社會嘅精神架!!).  今日, 我哋兵分一路, 一路係踏單車, 另一路係幫學校粉飾校園.  今次籌到嘅善款會捐俾｢仁人家園｣.    而我...  係揀咗服務學校啦.  今次嘅服務單位係上水區嘅 ~ ｢育賢學校｣, 我哋拍住 ｢仁人家園｣為育賢學校大變身!!!
朝早十點鬆啲到達, 入禮堂聽｢仁人家園｣負責人講解今日工作細節同分工.

由校長介紹學校歷史 ~ 原來學校有七十年歷史, 因為資源唔係好足夠, 所以需要我哋同一眾學生幫忙粉飾學校.  (我見個校舍係平房式設計, 課室唔多, 只有幾個.  應該係一年級一班, 人數唔多, 電腦室都係半露天式. 好有以前啲學校感覺.)

聽完分組分工後, 開工!! 其間, 啲同學依舊上體育堂~~

有同事同同學仔一齊做園藝~~ 好投入吓喎!!!

有高大外國同事油鐵閘~~

有同事油外牆~~

而我嗰組係要同啲同學仔喺其中一幅外牆度設計壁畫同上色.... 都幾趕時間架... 雖然有｢仁人家園｣幫我哋執手尾... 但得三個鐘頭... 我哋都唔想留手尾俾佢哋... 一開始我哋同啲同學仔喺張大紙上起草圖, 然後用粉筆喺牆身上再畫一次~~  

然後上顏色~~ 我哋盡量用口同示範如何上色、用顏色 (因為用磁漆, 比較難上色...), 等佢哋用自己方法去完成幅畫, 佢哋個個都好聽話, 有商有量, 一有唔明即刻問我哋, 大家都好投入去畫呢幅壁畫 (我都中咗幾下招... 幾個油漆印喺身... ) 喂... 就夠鐘喎... 點解無人畫埋隻雞嘅??

既然無人畫隻雞... 咁我畫啦... 好趕呀...  要召集啦!!! 暫時完成作品... 希望校長收貨啦...

園藝組都完成任務喎!! 其中一個花圃...

入禮堂頒過感謝狀之後, 出操場影張大合照先!!

兩點鬆啲出發去白石會合單車組同事一齊BBQ, 真係又凍又落雨... 玩到五點散會~~ BYE BYE~~

ah Be 長大了~~ \(^0^)/

最近呢兩個星期ah Be 嘅思想好似成熟咗好多, 講嘢有紋有路咗好多!! 好似好懂事、好關心別人嘅感受 (唔包括發緊癲同曳緊嘅時候....)~~  我要慢慢記底佢, 真係好驚會唔記得佢良善嘅一面.

事件一
上星期一朝早, 我嘅腸痛又嚴重咗, 所以諗住請半日假休息一下.  所以叫佢乖乖, 跟爸爸去婆婆屋屋.  佢嗰朝又真係特別乖喎, 唔扭擰、唔吱吱咗咗.  佢臨出門前, 坐喺我床邊攬住我, 一邊拍住我個背脊、一邊同我講 : 媽咪, 你瞓多啲呀! 不如唔好返工, 瞓多啲.  記得睇醫生同食粥呀!!  我答: 哦... 知道.

事件二
超爸呢排有工作壓力, 加上超忙, 所以我同ah Be 講爸爸好忙, 唔好太嘈同騷擾爸爸.  星期六朝早, 超爸好攰所以無叫佢一齊去食早餐, ah Be 一起身我就同佢講爸爸唔多舒服要休息多啲, 唔好嘈醒爸爸.  跟住我哋快手快腳出門口. 
ah Be : 爸爸唔舒服呀?? 佢有病? 
媽咪 mo : 爸爸無病, 只係多野做, 好攰唔多舒服
ah Be : 哦... 媽咪, 我食完早餐去上堂, 你快啲買大快活早餐俾爸爸食啦!
媽咪 mo : 爸爸應該唔食大快活早餐喎!
ah Be : 爸爸唔舒服, 食粥有益啲喎!!
媽咪 mo : 係咩? 食粥有益啲??
ah Be : 係呀, 食粥落肚可以捲走肚入面啲污穢野喎...
媽咪 mo : 哦...
講真, 佢見到爸爸星期日喺屋企做公司野, 佢都好擔心爸爸唔舒服仲要做野... 不停喺我身邊問爸爸辛唔辛苦... (佢又唔敢問爸爸, 驚嘈住爸爸喎... 點解佢唔驚嘈住我架呢...)

事件三
有日, 我接佢回家途中, 佢話我知佢啱啱食咗蘋果.
媽咪 mo : 食蘋果?  邊個切俾你食?
ah Be : 姐姐切俾我食架!
媽咪 mo : 吓... 姐姐切?  唔係婆婆切咩??
ah Be : 唔係婆婆切蘋果架! 如果婆婆切, 好容易切親隻手, 兩隻手都跛晒好慘架... (有無咁誇張呀... )

註: 婆婆係半邊身傷殘

小小義工日@賽馬會復康中心篇(1)

今日跟Sue 姨姨+一個有三隻狗醫生嘅義工團隊嚟到｢東華三院賽馬會復康中心｣某一個病院做老人探訪.  今次服務對象係一群視力有啲問題嘅老人家 (時間: 1500-1430). 

ah Be 與老死 ~ Fluffy (不過 Fluffy 唔係狗醫生嚟架!! 佢嚟見識吓架咋!!)

義工團隊介紹緊三位狗醫生俾一班老友記認識.

ah Be 好嘆咁坐喺到聽義工姨姨講笑話~~

喺一班老友記食緊糖水時, 我問ah Be可唔可以唱吓歌俾老友記聽呀? 如果唱, 佢哋會好開心架!!  ah Be諗咗一諗, 點頭話可以!!

交咪啦!! ah Be 緊張到呢... 成個人僵硬晒...

第一首係朗讀 ｢新春到｣~~

朗讀完 ｢新春到｣, 好評如潮.  大家都想 ah Be 唱多一首歌, 於是 ahBe 決定表演校歌.  (佢呢排喺學校好忙, 忙於彩排體操表演同埋畢業禮, 老師狂操小朋友記校歌)

｢新春到｣+｢校歌｣

今次, ah Be 一共表演咗三首歌, 仲有一首係 ｢親愛的主耶穌｣(聖誕歌, 無辦法啦... 佢怕醜, 唔肯唱 ｢年少無知｣, 仲話表演俾老友記聽, 要唱學校啲歌喎...) 

跟住輪到狗醫生出場, 我哋又四圍同老友記傾吓偈...

呢個係胡婆婆, 佢好好人架~~

眨吓眼, 個半鐘頭就過咗, 我地要同老友記講 bye bye lu~~  下次再見!!