"佢"... 係邊個呀??

早排

每當我同Be 回家時

不分早午晚

Be 都要我同佢一樣

唔可以發出任何聲音

例如 : 無腳步聲、無鎖匙聲、無開門聲

邊行邊催促我行快啲

開門開快啲...

當我唔小心發出咗啲聲音

佢會即時"o殊"我... 

仲要壓把聲同我講 : ｢媽咪, 唔好俾佢聽到呀!  ｣　

我一問邊個佢??

Be 即時閉嘴...

一入屋佢九秒九關門... 

仲要補句 : ｢好彩佢入唔到嚟... ｣

真係俾佢嚇到鼻哥窿都無肉... 

*** *** ***

佢日日歸家都係咁

不過

如果有超爸同行就無事

係咪好驚嚇先??

於是

我日日問佢係邊個"佢"?

Be 開頭唔答我架...

問咗成個幾星期之後

Be 就好含糊咁答... 唔知呀...

再問多個星期

佢就喺我手掌上/ 門上寫字...

但我又唔明Be寫咩喎...

有日

我終於忍唔住

俾咗張紙佢寫

要Be 寫低"佢"係邊個

疑團...

終於解開啦~~~

Be 寫低咗三個大字...

就係....

UFO  (大爆!!!)

Be 再答多句 : ｢外星人呀!! 媽咪｣

我...

投降...

無嘢講啦... 

慳家仔

Be大叔自小被灌輸"慳"的概念

(我驚佢好似我咁大洗...)

好多時啲用品爛咗先同佢換新嘅

所以到佢而家大咗

要佢用新文具/ 用品會好勞氣

例如: 啲顏色筆/鉛筆已經用到短支支 (用咗一年幾)

叫佢換過啲新嘅

佢死唔肯換

我話會寫壞手

佢至焗住換

但用唔夠兩日

又轉返啲舊筆

我投降了...

到短無可短佢自己換啦...

霉過梅菜嘅

八達通套

都用咗差不多五年 (佢第一個八達通套)

啲膠開始爛了...

佢而家嘅口頭禪係 "環保啲"

希望佢大個都會有慳得就慳

不過

唔好係一個 "孤寒人哋, 闊佬自己"嘅人囉!

佢阿媽至憎呢種性格!!! 

火燒心!!!

因有調動

工作空間有多餘位

所以有些微調動

本人抱住返半日工

盡量唔移勳嘅心態

(個位再比之前大咗)

可免則免

但最後

都係要移勳....

唔緊要

我會配合

你可以定個日子俾我

我自動遷徙!!

但我剛剛返到嚟

見我所有工作、私人物件都被移勳到新位囉!!!

我真係嬲  到震囉!!!!

我已經好少為咗公事嬲到震

我已經練到可以「皮笑肉不笑、皮嬲肉不嬲」

我今次真係上晒火!!!

我真係好想同嗰位人講 :

請問。。。「禮貌」呢兩個字你識唔識??!!

我要減壓

今日放監啦 ~ ~

Be 考埋今日

終於考完試

近呢個月

我忽然好大壓力

壓力來自 : Be 的學習態度 + 品行

學習態度 : 好 hea... 求求其其... 是是但但 (我唔係睇成績, 係態度問題)

品行 : 軟皮蛇, 駁嘴駁舌... (激到我一日嘔幾擔血...)

諗到我頭都爆... ...

*** *** ***

唯有搵方法自我減壓

1. 跳 funky dance

每星期三 lunch time 跳一個鐘

2. 睇韓劇

從來唔睇韓劇嘅我

好怕韓劇嘅哭哭啼啼、婆婆媽媽

我居然踏出第一步

原因 : 全智賢囉!  

我都幾鍾意佢架!

第一套 - 來自星星的你

由一月忍到二月中至開波

拖長嚟睇

唔想中毒

點知... 我係睇完至中毒...

中到... 癡咗...

估唔到... 金秀賢都有戲架喎!! 讚!!

全知賢... 真係做得夠爛! 夠放!!

(雖然有人話佢係做返自己... 但我覺得... 都要夠膽做得出俾人睇先得架...)

加上靚人靚景

真係賞心悅目~~

(大台, 學吓嘢啦!! 連我呢個電視精都放棄你啦!!!)

第二套 - 主君的太陽

男、女主角 : 蘇志燮、孔曉振

兩位主角唔係賣樣

係賣戲呀!!

配角 : 徐仁國、金釉利、崔政宇等都好好戲呀!!

故事內容好吸引我

講... 鬼架!!! keke

啲鬼都幾鬼下!!

節奏快!!!

我覺得好好笑、好好睇!!!

誠意推介

以上啲男主/配角都係 ~ 單眼皮架~~

I like it~~ keke~~

*** *** ***

好彩...

我今次減壓成功...

如果唔係...

癲都有份!!!

壓力... ... ...

一向爛瞓如泥嘅Be

每朝

起床都會同周公搏鬥一番

我每日拍佢起床嘅時候

佢第一句說話

一定係 : 媽咪, 送多我5分鐘!!

19日 (考試前的一天)

佢嘅第一句說話係 : 媽咪, 我做緊第五題. 好快... 等一等...

無言... ... ...

平時 hea 讀嘅佢

原來都有壓力架...

ah Be 甩掉第五隻乳齒

Be 又再甩牙啦

今次係甩右邊大門牙

呢隻牙鬆咗好幾個星期

最近呢個星期鬆到

Be 食嘢要避開佢

因為隻牙比其他牙長

成日頂住好唔舒服喎

隻衰野鬼殺咁嘈...

成日投訴!!!

*** *** ***

今晚

一家同老表們碌咗去九龍城食泰菜

食食吓飯

臭 Be 叫咗一聲

跟手遞咗隻牙俾我

然後同我講 : ｢媽咪, 我自己扯咗佢出嚟!!｣

然Be不停 "ee 牙牙" 話點解有血...

俾佢煩死...

*** *** ***

無牙仔!!!

佢依家講說話嘅聲音好好笑

漏風架!!!

聽落 "索索" 聲...

勁攪笑~~

提神

估下呢個係咩嚟嘅??

▼

▼

▼

▼

▼

一個又霉又皺嘅糖紙袋

*** *** ***

上兩個星期

我在 Be 校褲袋搵到

我正要掉咗佢時

Be 阻止我

同我講唔掉得

如果掉咗佢

佢上堂會恰眼瞓架!!

原來佢上堂時

要手插褲袋

捽住個糖紙袋 ~ 提神!!!

真係估佢唔到!!!!

*** *** ***

哦...

明白晒~~

我都無堅持要佢掉咗個糖紙袋

佢工時 (返學時間) 咁長

我應該要體諒吓 Be 嘅~~ 

想當年...

學校生活... 唔易過...