身體overload？

呢幾個月...

我勁爆瘡...

爆瘡位置

由耳珠旁一直沿住腮邊落到下巴...

爆完右邊

爆左邊...

而家左邊循環式咁爆

好似放炮仗咁...

咁大個女...

第一次放炮仗式生暗瘡... 

(平時... 一年都無兩粒... 一次過追返之前的...)

仲要留疤...

我唔制呀!!! 

【身體overload？6個暗號要知道】 ←_← 睇完早兩日生果日報

6個暗號中4個...

超爸都中2個...

唉... 幾時可以無壓力呢??

天呀!!!

*** *** ***

瘡都未爆完...

又嚟拗柴...

我有慣性拗柴...

但今次... 唔簡單...

因為花展人多

追住隻臭Be

睇唔到微微一石級

中招... 唔郁得...

出發去旅行前

喺公司樓下睇咗一次跌打+針灸 (急救)

好番...

一個月後

行行下越行越唔妥

上星期五返媽媽家附近睇跌打

師父話... 上一次睇得唔清

而家傷咗軟骨

要睇多幾次呀!

哦...

毛記電視【更新】

一路都好愛睇黑紙、100毛

同林日曦、陳強、阿Bu 開過幾次會後

好欣賞呢三位年輕人

敢言、有重點、諷刺時弊

我喜歡

*** *** ***

早兩日

佢哋喺 Facebook 宣佈 :

《100毛》申請免費電視牌照

「毛記電視」5月18日正式成立

自家制呢幾條 Trailer 好好笑 

方健儀【特別新聞報道】 

【毛記節目巡禮：六點半左右新聞報道】

【六點半左右新聞報道：吳檸儁篇】

【六點半左右新聞報道：𡁻海珠篇】


【六點半左右新聞報道：周嘉鹽篇】

【六點半左右新聞報道：55555家謙篇】

【六點半左右新聞報道：利君牙篇】

【六點半左右新聞報道：男秉權篇】

【六點半左右新聞報道：東方昇篇】

【六點半左右新聞報道：黃碗曼篇】

好期待毛記電視嘅節目

*** 追加 ***

又玩抽水遊戲... 笑死我!!!

將來的家、辦公室

尋日臭Be 放學

話有禮物送俾我

然後由書包拿出呢張紙俾我

我打開張紙一看

臭Be : 媽咪, 呢個係我哋一家三口將來的家, 你鍾唔鍾意呀. 媽咪?

WOW... 作為媽媽嘅我

確實... 有點... 感動~~ 

我 : 臭Be, 我好鍾意呀! 多謝你!

跟住, 我哋一齊討論下點樣再修改下

*** *** ***

呢張係上星期畫嘅

臭Be 介紹我知

呢個係佢將來間公司嘅圖則

*** *** ***

呢兩張都係上星期畫嘅

應該係複式單位

地下 (左上角應該係車房)

 

一樓 (目不識丁嘅佢... 又寫錯字... 1數....)

型

今日買餸

見鮑魚仔平平地

又悶悶地

買咗四隻

當我洗緊鮑魚仔時

有個細路死唔溫默書

係我附近支支左左。。。

我：「你仲唔溫書，聽日係咪唔使默書？」

細路：「要呀！不過我想睇洗鮑魚仔。」

我：「你默洗鮑魚仔？」

細路：「唔... 係... 其實我覺得...你洗鮑魚嗰時...好 ....型，所以忍唔住想睇耐啲。」

真係忍不住反眼

細路：「媽咪，真係架！你唔信我？」

心底的一句 ~ 你可唔可以喺學業上發揮你呢個小宇宙??????

大時代

1992年10月5日

踩完通宵單車

回大圍時

被個 low B 精

攔腰炒埋嚟

人向後翻

為防撞後腦

側身卸力

最終膊頭首先落地...

即時聽到... 啪! 

心知... 領嘢!

左邊膊... 十級痛

半邊身唔郁得

*** *** ***

但好眼瞓...

所以返屋企大覺瞓先

瞓到晚上七點半自然醒

一開電視

畫面出現呢個開場

校鬧鐘都無咁準

睇完開場十分鐘

決定坐定定睇埋佢...

(睇完, 嗱嗱林碌去睇跌打... 原本左膊尖裂骨(裂成吋半長... )

完場後

愛上了

之後8星期

星期一至五擔櫈仔坐定定

瘋狂愛上方展博 

(孖仔孖心肝時已經好鍾意佢)

方進新、玲姐、丁蟹、龍紀文、陳萬賢、陳滔滔、葉天、龍成邦、邦濟哥、華姐、賤婆、方芳、方敏 

(個個都好戲, 其實阮梅都好, 不過我鍾意龍紀文多啲, 佢夠癲!)

仲有一個唔好戲, 但都鍾意 - 丁孝蟹 (型吖嘛...)

好記得丁蟹捉方婷企上木箱上教訓佢講 :

做人要多角度去睇...

真係好諷刺!

真係好愛呢套戲!

即場造句

尋日Be 放學後

心情麻麻

發咗陣皮四

後尾自己鬼拍後尾枕

行埋嚟道歉

然後講出心中話

原來佢上中文堂時被同學取笑

Be 喺堂上被老師㸃名即場造句

題目：雖然。。。但是。。。

Be ：雖然張老師對我們很惡，但是她有時對我們很好。

老師話佢作錯

同學大笑

(所以佢好唔開心)

於是

Be 重作

Be  ：雖然張老師很努力地教導我們讀書，但是我們仍然目不識丁。

老師當場七孔出煙。。。(Be 講的)

同學繼續大笑

但Be 好開心

因為Be 好滿意呢句重作句子!!

*** *** ***

講到呢度

又到我同佢說教嘅時候

首先唔好介意同學點笑你.... (下前刪百字...)

你而家明白俾人笑有幾難堪係咪? (下前刪百字...)

Be : 知道... (下前刪數十字...)

所以

如果下次有同學/朋友做錯/唔識一啲嘢

你仲會唔會大大聲笑人?? (下前刪百字...)

Be : 唔會... (下前刪數十字...)

抗逆小童

Be 由出生到而家

都算係一個開朗嘅小朋友

天跌落嚟當被衿

喺逆境時

都可以鬆容面對

佢嘅抗逆能力遠超我同超爸嘅想像...

*** *** ***

例子 : 一

最近

我家的一位飯腳同事好友

因病去世

由佢病發至離開不足一年

由年初一晚收電話

趕往醫院見最後一面...

至三月初佢離開...

雖然我哋有心理準備

但一想起佢

心都有一點點陣痛

Be 一直有去探望佢 (佢哋好老友架)

算明白佢發生咩事

當我同Be 講佢已經離開我哋時

Be 有點黯然回答 : 吓! 大x係我好朋友嚟架... 點解咁架? 以後無得同佢玩lu....

幾日後

我同Be 講大x 嘅身後事

Be 提出要去大酒店同大x道別

我有啲咽住喉...

Be : 媽咪, 其實大x 只係隱形咗, 佢無走到, 你見佢唔到之嘛!

我 : 你點知?

Be : 我知架! 大x 好似阿公咁, 只係隱咗形. 我知佢哋喺度架!

我 : 又講鬼故?

Be : 唔係呀!  真係架! 有時我坐喺度, 阿公會嚟搭我膊頭架!!

我驚訝嘅係... Be 用大x 隱咗形嚟安慰我...

*** *** ***

例子 : 二

兩年前一次外遊

途中出現一啲事故

Be 被單獨送到保護兒童中心

我同超爸到場接佢時

佢都有喊咗一陣

未算激動

佢冷靜下來後

我再問佢詳情

佢都可以講返出嚟...

佢話出事後被送去兩間警局

佢每到一間警局

佢都特登大喊

引起警察注意

然後將我寫低聯絡嘅紙仔遞俾警察

(每次出門, 我都會喺佢啲外套、跟身袋內放低佢個人資料同聯絡電話)

仲同警察叔叔講 : please call my mum

當然...

係無人搵我啦...

直至去兒童中心至有人睬佢囉...

佢都算冷靜...

*** *** ***

例子 : 三

而家Be 俾我鬧完

佢沖涼嘅時候

就會大大聲高歌減壓

佢近期嘅歌曲 :

1. 越難越愛

2. 一加一

3. I'm yours