我的母親

如果我娘小時家境好

可以讀多幾年書

佢一定會係一個好成功嘅人

佢係一個新思維嘅人

永遠走在最前

世事總被佢看透

高品味

佢結婚年代人人著裙褂、手握劍蘭

佢呢? 著婚紗、手握玫瑰

從舊相睇到佢一身型女打扮

我同細佬小時著嘅衣服

大部份都係來佬貨

佢專等百貨公司大減價

減價前一定睇定心水衣服

減價日就出動~~

所以我同細佬細個啲衫都係靚靚的~~

我娘怕我同細佬見識少

佢平日好慳家

但成日會帶我同細佬參加好多活動

例如去郊遊、食西餐、睇西片

仲會買刀叉返屋企

煮西餐 ~ 煲羅宋湯、煎扒、意粉、煮西式早餐俾我哋食

在家學餐桌禮儀

去餐廳實習餐桌禮儀

到我哋長大後

佢一直報讀一啲課程

由小一讀起、家務助理

2002 年車禍後再中風

佢被無Heart醫生診斷為永久失去自理能力

要佢即時出院

我爸當時不同意!!

多得其他物理冶療師、職業冶療師、其他醫生幫助下

加上佢打不死精神

人人睡午覺

佢就一停練習下

好快已經可以行同說話

令無Heart醫生再無機會趕佢出院

病房所有病人同工作人員都好佩服佢嘅堅毅

*** *** ***

而家回頭看

我慶幸有一個管教極嚴厲嘅媽媽

無佢管束我呢個野孩子

我無法想像而家嘅我會變成點... ...

所以好感恩我有一個好媽媽

令我哋擁有一個窮得嚟又有一點點見識的童年

*** *** ***

到咗今日

7X歲 + 行動不便嘅佢

依然活潑好動

我哋嘅角色好似有少少對調咗

昔日佢帶我去郊遊

今日我帶佢去旅行啦~~

嚟緊我一家會同佢衝出亞洲

同阿媽去澳洲旅行~~

對大家嚟講係一個大挑戰~~ 

我好有信心一定會順順利利

*** *** ***

以下係我同佢嘅一則親子對話：

女：媽，你要唔要唱啲澳幣去旅行用？

媽：唔使唱！我屋企有呀！

女：嘩！咁犀利有澳幣。

媽：唔係澳幣，係美金呀！

女：吓！美金用唔到喎⋯⋯

媽：吓！唔得架？

女：嗯...... 應該唔得... ...🤣🤣

愛上同一個人

今日難得假期

齊齊食飯睇電視

睇｢與諜同謀  ｣

劇情講兩父子愛上同一人... ...

我:｢有無可能兩父子愛上同一個人呢?? 編劇諗多咗... ...｣

我突然靈光一閃... 

我問 : ｢Be, 你會唔會同爸爸愛上同一個人架?｣

兩父子表情係 ~ 。。。( ☉_☉) 問呢啲!!!

然後... ...

我同爸爸齊齊看住Be 等答案

Be 碌大眼... 諗咗一秒答 : ｢會呀! 嗰個咪係你囉!｣

我同爸爸齊爆笑!! 

爸爸撘一撘佢膊頭 : ｢醒目!｣

故事創作 ~ 小人國奇遇奇

 今次作文開正Be嗰瓣......  老作...

配合佢唔多鍾意寫字嘅性格

係有點求其... ...

我好鍾意 ｢心想... 壁虎嗰段｣

佢完全投入星戰世界... 有白兵出現...

可惜... 老師唔多欣賞... ...

雞年前的準備

恭喜發財!!

今年過年前

媽媽跌親

入院住咗個多星期

好彩係大礙

只係右手食指骨裂咗.......

加上無車同佢出入

所以今個雞年從簡

只係留超爸、我媽同二姑姐家拜年

年廿九

Be 喺屋企寫揮春

不停寫

要送俾自己一家、婆婆、爺爺、六伯伯同契媽一家....,,

今年揮春金句：一覺好瞓

寫完揮春自己執床

幫手換床單、入被單

然後叫我幫佢同公仔影全家福

年廿八深夜蒸蘿蔔糕

今年年花係~~

寸寸金 

年廿四喺花墟買 $380 十支

同契媽一人一半

靚靚水仙

年廿七喺西營盤覆診時同路邊婆婆買

同媽子一人一盆

$70 一盆 

盛開時~~ 真係靚靚

縫補補伯伯(下)

經過四個星期後

縫補補伯伯已經補好兩件毛衣啦~~

老豆件 B記毛衣右肩胛位底蛀穿咗個大姑窿

依而個大窿已經補咗

了無痕跡... ... 

高手

超爸呢件 Uniqlo針織外套

右前幅心口對落穿咗個大姑窿 ~ 手指第一節咗大

補完之後

肉眼睇... ... 完成搵唔到傷口!

近距離望真啲 + 手摸!

摸到啦! 衫底比較厚

伯伯真係手工一流

係咪唔圈睇唔出呢?!

伯伯好認真架

真係走去配線色

雖然其實呢件衫好平 (最近做特價$99)

比起買件新衣

我寧願俾多幾十元

欣賞下呢門傳統手藝

巴膠巴士博物館 (上)

呢排巴膠 Be 又有新玩意

就係... ... 喺自己間房開巴士博物館

搞巴士展覽

正確嚟講係 ~ 2D 巴士圖展覽

佢將巴士圖分開兩邊

呢邊係展示 ~ 現役巴士

巴膠 Be 製作好認真架! 真係搵金色木顏色填金巴

佢準備咗啲目的地/ 指示牌可以隨時貼喺唔同嘅巴士上

另一邊係展示 ~ 退役巴士

佢仲有其他展品... ... 下回再續

加德里奧

喺好耐好耐以前

有一位好靚嘅公主....

鏡頭中著住和服嘅加德里奧轉身過嚟~~

望一望... 真係俾佢嚇親... ...

What's Michael 係我其中一部鍾意嘅卡通片

好愛主角 : Michael同加德里奧

＊＊＊　＊＊＊　＊＊＊

其實我家以前都有一隻貓

佢個名叫 :　加德里奧

１９８７～２００６　

佢好靚女架～～

佢有時好似一隻狗

每當佢聽到我哋嘅鎖匙聲開門時

佢就會喵～～住企喺玄關位等我哋入屋

佢隔度門係認到我哋架

如果隔離屋鄰居開門佢係無反應嘅～～

佢走嘅時候。。。　好唔捨得我哋。。。

嗰晚係２００６年１０月７日～追月夜

佢辛苦咗好多日。。。　始終唔肯吞嗰啖氣。。。　

媽媽覺得佢太辛苦

所以要我哋一一同佢道別

然後一家人離家。。。

令佢安心上路。。。

果然。。。　我哋離家後。。。

佢就靜悄悄咁離開咗。。。

真係好唔捨得佢。。。　但佢真係病咗兩個幾月。。。

幾唔捨得都要放手。。。

永遠懷念。。。

＊＊＊　＊＊＊　＊＊＊

呢位係～ｍｏ仔

２００２年９月的某日

一個八號風球的日子

細佬喺鰂魚涌工作時

見到佢自己一個喺街上撲風

所以帶佢返屋企

佢好活潑、跳皮

扎扎跳、四圍走

連加德里奧都怕鬼佢。。。　。。。

佢哋唔使兩日已經可以一齊食、一齊瞓。。。

可惜。。。

三幾日之後嘅一個黃昏

　ｍｏ仔突然抽筋。。。

我同細佬即刻帶佢去睇醫生

醫生檢查完確診貓瘟。。。

嗰時嘅ｍｏ仔。。。　全身僵硬。。。　好辛苦

細佬要求救得幾多得幾多

醫生表明唔會救得番

只係延長佢嘅痛苦。。。

我只可以勸告細佬放手

俾佢解脫。。。

最後同意安樂死。。。

永遠懷念。。。

返到屋企

細佬入房療心傷

我９秒９立即抺地消毒

防止加德里奧受感染

＊＊＊　＊＊＊　＊＊＊

自此。。。　我仲未可以再養貓貓。。。