出現2條線之後
開心唔夠三日
醫生都未約到
就發現分泌物異常
帶有血絲
頭兩日不以為然
到第三日發現越來越多
嗰晚去完洗手間
同baba講我想去睇急症
Baba 話好近，行過去（十五分鐘）
我忍唔住碌大對眼👀話：仲行？你係咪整古我呀！（皮質醇爆升）
Baba : 咁... ... 搭.... 搭的士... ...
去到急症室講咗已懷孕
即時入診症室（公院）
問咗啲基本資料，如對上一次幾時嚟經等
然後吱gel喺肚皮
一落超聲波
女醫生：太太，你「副偈」有啲大，比正常大！
我同Baba 😳😳：點解呢？
女醫生：嗯... ... 可能你比較大隻，所以比正常大！
（吓！我五呎三吋高，12x磅，唔算好大隻... ... 啦！）
女醫生繼續邊皺眉頭、邊幫我照超聲波
女醫生：太太，搵左咁耐都見唔到有BB喎！有冇驗孕？
我同Baba 碌大對眼👀，嚇呆咗😱😱😱😵😵😵
我話：梗係有啦！醫生.......
女醫生：咁... .... 而家有3個可能性
1. BB太細未照到佢
2. 可能宮外孕⋯⋯
3.根本係從來都無！
我同Baba 再碌大對眼👀，再嚇呆咗😱😱😱😵😵😵
女醫生：其實照「內超」係會清楚啲
Baba：咁可唔可以幫佢照？
女醫生：可以嘅。不過，急症室嗰支壞咗，婦產科嗰支無人識用，所以今晚同聽朝都冇得照。
再一次吓！！！😵😵😵（我已經六神無主、靈魂出竅... ...)
Baba：咁我地可以點做？
女醫生：今晚可以留院觀察
Baba : 點觀察？淨係臥床？如果係，就唔留院嘞！
女醫生：係呀！咁我寫幾日假俾你，喺屋企瞓床啦！如果再大量出血就返嚟！
我同Baba 😳😳：哦⋯⋯
回家後囉囉攣入眠⋯⋯
（當年實在太單純、無知....... 居然去咗間出名唔多掂公院😂😂, 仲要無過睇私院）
其實我本人由細到大都喺QMH睇醫生
所以唔多信私院....... (到而家都係....... 固執mode上身)
*** *** ***
即打電話去公院、私家醫生預約
希望快啲有得睇
最快都要兩星期後😢😢好㿗⋯⋯
跟住⋯⋯急電我表姐們
佢地帶我去睇相熟女醫生
陳醫生：以我估計BB 應該仲係好細，約4週，超聲波照唔到唔出奇，唔好急！唔好驚！你照唔到「內超」都唔係壞事。同埋你未必係作小產，可能係清緊啲舊經。就算作小產，現階段都做唔到嘢！放鬆啲，返屋企休息多啲，兩星期後做產檢就可以睇清楚晒！知道未？
個心定咗好多
唔敢同爸、媽講
自己留喺屋企休息
但因為工作關係（又唔講得🤐🤐）
休息咗兩日之後嗰3日都返半日工⋯⋯的士來、的士去... ...
有心水清同事估到
幫我頂減啲工作（感激😭😭）
返到星期五後
之後開始放大假
説好了的泰國之旅（抽獎的禮物）都要泡湯了😖😖😭😭
留在家囉囉攣
打電話俾宅男中醫
話佢知我真係有咗
順便問佢可唔可以去睇佢安胎
中醫話：唔好嚟住，如果個胎係唔健康， 保住佢都無用。免強保得住，但佢唔健康，到時苦了BB。所以到個胎無事先至嚟安胎
聽完佢講覺得佢講得好啱
突然釋懷，輕鬆晒... ...
～ 待續 ～
