2008 日本之旅 ~ 第四天

行程 : 品川 ->東京迪士尼樂園 -> 品川

今日去嘅遊點係呢次旅行重點之一 ~ "凳,凳,凳," 東京迪士尼樂園 ~ yeah!!! 一早起身, 約10點到達樂園, 但天氣認真麻麻哋, 天陰可能有雨, 個唔專業嘅導遊離晒譜, 游說我哋天氣唔好早啲走 (6點), 我同爸爸決定唔跟佢(又一次離大隊, 哈哈!!).  未入樂園小Be 已相當興奮, 周圍走, 完全失控!! 喺大門口我哋見到木偶! 梗係影返張相先啦! 到正式進入樂園, 人流都幾多,

第一個遊戲係 "小小世界", 小Be 坐船仔睇得好開心! 跟住玩旋轉木馬, 去Toonland 到逛吓, 呢度排吓隊, 嗰度 hea 吓, 食吓雪條. 到12點零就食午餐, 午餐就係食 - 熱狗!!  小Be 食得好開心, 因為有佢最心愛嘅 ~ 薯條囉!!

下午我哋去玩 Adventureland坐火車,坐船船, 令小小Be 早早入睡 (因為佢今日好扭計又頑皮, 唔肯行,唔肯坐BB車, 好麻煩). 趁佢瞓著咗就諗住食番個tea, 點之 ~ 小Be 好似聞到飯香, 立即醒咗! 跟住玩"白雪公主"抖一抖 ~ 點之原來好鬼恐怖架! 啲場景有90%以上係巫婆做主題... 嚇到小Be 大喊一輪, 仲叫驚驚 ~~ 下一場我哋去咗 Shopping.

小Be 今日超扭計, 唯有同佢玩多次旋轉木馬, 又去 Toonland 坐超低b嘅 Toon car... 仲喺Toonland 玩咗個遊戲, 然後我哋去咗睇 Parade, 小be睇得好開心, 仲話靚靚 tim~~

但似乎小Be 已經到咗極限, 唔肯玩 Winne the Pooh ... 當我哋坐喺架 Pooh Pooh 車嘅時候, 小Be 唔肯坐低同攬到我實一實, 大喊叫"驚驚", 成車人望住我哋一家三口, 我同爸爸咪面朦朦咁落車囉 ... 最後去咗樂園入面嘅 UCC Cafe 食晚餐, 小Be 食晒成個晚餐 (甜品除外)

10 點鐘, 當然係坐小Be 最鍾意嘅"鐵鐵"打道回府 . . . (明天待續.....)

在樂園內遇到嘅卡通人物

影夠未呀!! 仲要等 ...

世界真細小...小...小... 小得真奇妙...妙...妙 ...

轉轉轉, 好好玩

媽咪mo, 條雪好凍喎 ...

Pooh Pooh ~ 我篤~篤~篤~~

爸爸, 我要食呢隻特特...長熱狗, 好味道!!!

食完薯條喎, 點呢!?

小Be 學大人做嘅 ok 手勢 ~ 超搞笑!!

米奇下午茶, 好味道!!

明治奶奶, 好味道!!

型唔型?

呠呠~~

Disneyland 嘅 UCC Cafe 兒童餐

2008 日本之旅 ~ 第三天

行程 : 品川 -> 五反田 -> 品川 -> 渉谷 -> 代官山 -> 新宿 -> 品川

今朝一早（7:00am）爸爸人肉速遞自己到酒店，小Be 被噪醒咗，佢見到爸爸以為發夢，所以直刻瞓返．我哋成十一點先出門口，然後去 Mc奴奴 食我最鍾意嘅蝦漢堡，小Be 食魚柳飽，至於爸爸呢～同我一樣囉．跟住我哋就去咗五反田車站嘅 Akachan shopping啦，不過今次我都好控制我自己，只係買咗好少嘢 (其實係４月喺大坂嗰時買咗好多)，今次我哋無用到送貨服務，所以要攞啲嘢返酒店．下一站我哋就去咗涉谷慢慢行去代官山，途中小Be 仲好嘆咁瞓咗個晏覺．我就趁呢個機會去買衫．等小Be 起身我哋就食咗個好好味嘅tea，跟住四處行，hea到７點幾就下山，我諗住橫豎都留咁多日，咪行咁多要留力，所以早啲返新宿，但因為約咗幾位 shopping 小姐9點去Don Don食烤肉，唯有早啲去等位啦，點知都要等到９點半先有位～～Don Don真好味！！

蝦漢堡～～Yummy Yummy!!

在Akachan 店內玩玩具

超級戀上JR

代官山 ~ 超好味下午荼

漫遊代官山

濠哭於代官山

嚴重癡戀火車類的交通工具

奇怪的睡姿 ~ ~

2008 日本之旅 ~ 第二天

行程 : 富士山河口湖 (靜岳溫泉酒店) -> 和平公園 -> 御殿場 Outlet -> 河口湖 -> 水晶&花館 -> 富士山觀景台 -> 新宿 -> 品川

我同小Be成晚都瞓得唔好, 啲床舖又硬又嗅, 間房又臭.  一早就要起身(7:00am 嗰隻), 無無聊聊咁食早餐, 跟住去咗富士山腳嘅和平公園觀光, 然後就去咗個outlet shopping, 不過我就唔敢買太多, 因為o黎緊仲有8日溜溜長, 驚買到傻 ..... 所以只係同小Be 周圍逛吓, 買少少.  跟住又去咗食飯, 嘩! 俾$24,000 yen, 居然俾隻無味嘅魚生船我哋, 當 我哋係水魚呀!! 千其唔好跟 "永X旅遊" (如果唔係公司團, 真係"產爆"佢).....

跟住啲咩舖到睇水晶同花, 又去咗富士山腳影富士山相囉~~ 跟住又長途跋涉咁坐車出新宿, 去到新宿已經係5:00pm 啦!  當然係一落車鳥四散啦! 同jasmine去咗行伊勢丹, 小Be去到玩具部, 居然攞咗個購物籃掃貨, 佢嘅奸計當然唔會得逞啦!

9:00pm 我哋7個人就去咗食shabu shabu, 味道都ok 啦! 一定好過嗰啲所謂團餐啦. 然後返品川嘅酒店.

型嗎?

喺和平公園同姐姐走..走..走...

喺和平公園門口買粟米湯 (人哋入錢佢等找錢!!)

嘩! 媽咪mo, 妳買咁多嘅!!!

喺咩水晶舖門前嘅靚相 (my friends)

喺富士山腳影嘅富士山相

喺伊勢丹入面嘅百厭相
 

喺新宿歌舞伎町一番街嘅相

   

2008 日本之旅 ~ 第一天

行程 : 香港國際機場 -> 東京成田機場 -> 富士山河口湖 (靜岳溫泉酒店)

今日係我帶小Be去東京旅行的第一日 , 好有挑戰性呀! 因為爸爸因工作關係要喺後日 (7號)先飛過嚟join 我哋! 好刺激呀! 好彩有我嘅同事們幫手, 我可以順利帶小Be到成田機場. 

今朝清晨5:45就要同仍睡夢中嘅小Be著衫著鞋, 跟住爸爸幫我哋攞行李上的士, 6:45我哋就到達機場, 辦好所有手續, 就去食早餐同周圍 hea , 8:45上機, 跟住小Be 就覺覺豬~豬至差不多落機. 到達成田機場, 馬上去便利店買糧食補給, 小be仲喺我俾錢嘅時候, 遞上一套飛機玩具, 盛惠1,700yen, 唔該! 諗唔到小Be 人仔細細, 一到步就識得shopping. 跟住一行廿幾人又上旅遊車坐3粒鐘車去~富士山溫泉酒店.  去到間溫泉酒店簡直係嚇咗一跳, 以為自己返咗20年前, 舊到嚇死人!! 好彩小Be 唔驚, 仲識周圍走, 如果唔係~我實覺得有 ~~ 怪呀 

攝於溫泉酒店飯堂

攝於溫泉酒店外的斜坡

三號風球的日子

今朝一起身已經掛緊三號風球, 以為小be唔使去interview, 我都打咗個電話去幼稚園reconfirm 一下, 原來個interview 不能改, 於是我哋一家三口浩浩蕩蕩咁喺大風雨底下起發, 非常 "le hea".  到達學校後, 小be只需要行行企企同玩吓, 老師就同我嚟一個 interview, 除咗問我有關小be嘅日常生活習慣同表現, 仲問我對學校嘅教學有咩期望同要求 ... ... 半個鐘頭之後, 我哋就去酒樓同公公,婆婆飲茶, 然後就返屋企小休一陣, 跟住去apm join ah Sue, 一齊去買餸煮飯仔．玩到成十點幾先捨得返屋企．

喺學校行行企企的時候

飲茶的食相！！

剪髮日記

上星期六小Be 咗要interview 之外, 下午有另外一個節目, 就係要 - 剪~頭~髮, 今次係小Be 第五次剪頭髮, 一如以前, 佢都好乖咁坐定定, 唔係點郁咁俾伯伯幫佢剪頭髮, 今次佢手揸車玩, 連伯伯都讚佢乖!! 有相為証架!

玩車車

完成!