Pacific Coffee = 湯湯

喺小Be 心目中Pacific Coffee 嘅logo 係等如"湯湯". 因為每一次經過Pacific Coffee, 佢都會指住個logo 叫"湯湯" 呀! 今日我哋同佢去咗嗰度食tea.  因為小Be 仲有啲咳咳, 所以佢只係飲咗少少tea 同食自擕嘅提子飽, 不能食佢最愛之一嘅 cheese cake.

喺爺爺度食完飯, 我哋去咗taste到入貨. 入咩貨?咪就係通心粉囉!! 不過, 無減價, 所以只係買咗2包.

悶悶不樂星期六

小Be今日出現悶悶不樂同唔知自己想點嘅情況, 事源今日爸爸有job在身, 不能陪我哋. 朝早爸爸同我哋去咗科大間麥奴奴食早餐+lunch, 跟住送我同小Be去上海髮廊 (小Be要剪髮)後, 就走咗lu  小Be剪完髮返到屋企唔肯白白豬! 攪咗好耐先肯洗白白.  跟住就瞓覺啦,

瞓醒咗又話要飲奶奶, 飲完奶奶又話要食粟米, 食完粟米仲大件事. 佢同我講 : 媽咪, 去迪士尼睇"miu miu" 呀 (miu miu 即係小小世界), 跟住仲攞鞋仔著tim... ... aiya!!! 點解佢今日咁扭計架!!! 哄咗好耐小Be先唔去迪士尼, 不過就話要去商場, 但因為佢仲未病好, 所以唔想同佢去, 又哄咗佢一陣.  最後要請佢食蝦餅先平息佢嘅奇怪念頭!!!

到7點幾, 爸爸仲未返, 小Be邊拉我入廚房邊同我講 : 媽咪, 煮飯呀!煮飯俾熙熙食呀! 煮通心粉俾熙熙食呀!  (咁都識講!!!).  但屋企啲通心粉已經食晒, 唯有煮粟米佢食同飲粟米湯啦!  到爸爸8點幾返嚟, 小Be又同我哋一齊食飯盒 (小Be嘅驚人食量又返嚟啦, 我諗佢差不多康復啦!!) 食完飯又扭我拆份新嘅thomas玩具佢玩, 我唔肯, 佢就勁喊十五分鐘, 最後佢自己話去瞓覺, 不過唔肯擦牙同洗臉囉!! 好百厭的一天!!!!

等車去科大食早餐, 小Be心情仲好好架!

有無見過人用"蘭花手"截車呢???

yo! 到科大lu!!    

我唔客氣啦!!       

食甜粟米, 食到個人都甜啲架!! 唔相??? 有辨你睇喎!!!

冬季校服

呢幾日開始涷啦! 學校喺星期一先派冬季校服, 但過大啱唔著要換.  喺星期二同三小Be發燒 (如小Be所願) 無返學.  到今日星期四先返學, 我同佢換上新季校服, 小Be覺得好新鮮... 周圍走... 哈哈!

扮model 喎!                                                   

但好快出現疲態, hehe!                              

媽咪mo, 開門走啦! 慢吞吞... ...                            

• 生活記敍, 
• 男

K1面試@循理

小Be in 咗循理, 表現都唔錯(我覺得).  

interview 時間喺下午2:30, 係小Be午睡時間, 我都有啲擔心. 

去到學校, 登記完去咗interview房玩, 我同小Be坐喺一張有火車玩嘅枱度, 小Be好聚精會神咁玩火車同切生果. 玩咗一陣老師行過嚟請小Be過枱. 

老師自我介紹叫黃老師, 小Be只叫:老師早晨! 

玩火車時, 老師問顏色? 小Be當然係咩都答紅色. 

玩完火車, 老師攞咗啲生果樂器出嚟, 小Be自己講 : apple 蘋果, orange 橙, banana 香蕉, 同粟米 (仲將個假粟米當真食)

當老師叫佢搖生果樂器, 小Be 就搖, 老師叫停, 佢就停兼大笑

跟住老師又攞咗啲上鍊公仔叫小Be選出3隻代表我哋一家各人, 然後帶返屋企.  

小Be挑選咗大嘴鳥俾爸爸, 小雞俾我同小鴨俾自己.  

到最後小Be同老師講再見時, 居然講 : bye bye 黃老師! 哈哈! 真係好意外呀!! 仲識泊埋張櫈tim.  

我覺得小Be嘅表現好好呀! 小Be, 媽咪mo 俾你一百分!!! yeah!!  

K1面試@食糧 + 昂平360

今日上午11:45到食糧面試, 去到學校時小Be有啲怯場, 唔肯自己行入遊戲室. 

入到遊戲室就見到哲哲, 哲哲好乖咁俾車車小Be玩. Warm up 完老師叫名排隊上等候室, 喺等候室睇video~學生表演, 小Be睇得好開心、好投入。

等咗一陣，老師又叫名排隊分組面，５人一組。但今次唔同哲哲一組。

入到課室土老師要小Be自己揾一樣玩具，小Be揀咗一架運牛車，又將啲牛羊搬上搬落，小Be一直唔肯聲。到老師攞咗啲套積木出嚟同佢玩，小Be唔係好肯玩，老師問佢咩顏色? 小Be又答: 紅色。老師都好就佢，特登攞個紅色問佢tim。玩完呢兩樣玩具後，小Be都有擺放好，再玩木火車後同老師講bye-bye。

我哋再到另一間課室等校長，又重遇哲哲。今次係考小朋友耐性，坐喺度等校長。小朋友圍大圈坐，一位家長企小朋友後面，我哋等咗約十五分鐘校長就入口口一咗嚟，跟住校長就同班小孩玩唱遊。

唱遊完，校長會同每一個學生講bye-bye同傾偈做評分。

到小Be時，小Be突然指住自己對腳話 : 無腳趾嘅? 跟住又指住我對腳話 : 媽咪無腳趾嘅? 於是校長伸出隻腳問小Be有無腳趾 (露趾鞋)，小Be答 : 校長有腳趾嘅，最後小Be同校長同各老師講bye-bye。

呢間學校係我同爸爸都覺得幾好，希望小Be有機會入讀啦!!

面試完，我哋同七七、Kate姐姐飲荼，然後去咗昂平360，小Be好興奮咁指住纜車叫Cable car 車車。

坐纜車時小Be都有啲驚，唔肯自己坐要我拖實佢先得。上到市集，小Be好開心四圍走，不過好大風好凍，行咗個圈食埋碗豆腐花就回程。

喺我哋去食飯途中(八點)，小Be忍唔住瞓咗，十點零起身飲咗支奶又瞓返lu

K1面試@貓記

小Be 嘅第一個K1面試係喺貓記.  係由爸爸帶小Be去interview.  Interview 時間係下午4:00, 爸爸帶小Be準時到達, 登記完就到遊戲室玩兼等候.  

爸爸話小Be有啲唔開心, 因為佢想玩嘅玩具俾其他小朋友攞咗, 佢又唔敢搶, 唯有垂低頭唔出聲企喺度... 

到interview時, 老師門佢叫咩名? 佢話 : 陳豬仔

老師再問佢幾多歲? 佢已經唔望老師答 : 兩歲...  

到第三條問題, 邊個帶你嚟呢? 小Be 拒絕回答, 仲亂嚟話媽咪搭鐵鐵, 婆婆坐巴士... ...  (死未!) 

老師邊指住爸爸再問 : 咁佢係邊個呀? 小Be 無睬老師, 仲叫車車, thomas... ... 

老師俾啲有顏色嘅積木佢玩兼問佢咩顏色? 小Be 答親都係紅色 ... ...  

轉玩咭紙matching 時, 配到錯晒... ... (養不教... 父(母)之過... ) 

最後一個環節係睇一幅公園圖 (有一班小朋友, 一隻狗, 有滑梯等等... )

老師指住班小朋友問小Be佢哋做緊咩? 小Be答 : 跳跳虎  (真係對著幹...)

跟住老師又指住個滑梯問小Be咩嚟架? 小Be 唔答,  老師唯有引導佢, 問佢係咪slide ... (佢鬼知咩係slide 咩), 小Be 繼續無反應

當老師想放棄之際, 小Be 突然爆出 "sir 滑梯"... 

老師又指住隻狗問小Be咩嚟架? 小Be答 : 汪汪狗!!! yeah!!!! bingo!!!

接住, 老師問爸爸對學校有咩期望同平時帶小Be去邊?? 爸爸回答: 我認為呢 .... .... .... (刪略一百字上)

時日行程畢!! 結果得唔得都唔緊要, 因為我同爸爸都唔鍾意呢間學校嘅  當採排呀!! hehe

小Be出門七件事

小Be每日出門都有七件事會做嘅, 內容如下 :

第一件事 : 問我佢今日要唔要返學, 如要返學, 就會問我係咪要返工

第二件事 : 玩腳趾唔見咗 (著襪仔)

第三件事 : 嚴謹地挑選一架車車外出, 然後同所有玩具講 (pooh-pooh, doramon, bear bear, 狗狗, 車車) ~ bye bye!

第四件事 : 望天睇下有無落雨, 不過佢成日都話有落雨呀

第五件事 : 睇吓見唔見士多舖隻貓貓, 同貓貓講 ~ bye bye!

第六件事 : 提議我哋坐咩交通公具, 例如 : 坐鐵鐵 / 的士 / 小巴 / 巴士 / 舅父車... ...

第七件事 : 同爸爸(如需要) / 士多舖伯伯, 嬸嬸 / 小巴站肥叔叔 / 小巴/ 的士司機講 ~ bye bye!