成長篇~嘔奶

小Be 已經大個仔lu, 佢會喺一啲位表現到佢已經長大.  好似今朝咁, 小Be 飲咗支奶奶後, 同我講 : 媽咪, 我要嘔嘔.  跟住我問佢係咪真, 佢話係.  我立即拖佢出廳, 同佢講可以嘔, 佢答 : 唔係呢度呀! 然後拖我入洗手間, 嘔入厠所裡面, 我問佢得未? 佢答 : 未得! 然後再嘔... 嘔完之後, 小Be 同我講 : 媽咪, 得啦! 我走同佢洗手, 抺嘴. 走出洗手間.

經過今朝, 我肯定小Be 已經成長, 開始獨立,懂事.  我要再放開一點, 令佢可以學多一點點...

聖誕節目之六幕@西貢

今日唔使上playgroup, 於是同爺爺飲茶, 跟住返屋企瞓覺覺豬.  黃昏時, 桄叔叔嚟接我哋去西貢食飯, 同桄叔叔補祝生日嘅. 小Be 好開心可以同桐桐姐姐玩.  食完飯, 我哋就返屋企lu, 因為聽朝要返工同返學lu... 眨吓眼, 4日聖誕節假期就過咗, 好期待除夕假期啊... 

聖誕節目之三幕@Home BBQ

今日四點爺爺同各姑媽們, 伯伯們, 表姐哥弟一家嚟我哋屋企BBQ... (今個月第3次啦!!) 除咗BBQ, 仲有壽司食同抽獎 tim. 小Be 好好彩, 抽中兩次tim... 玩到10點零散場.  要快啲執屋, 準備迎戰聽朝迪迪尼之旅... yeah!!! 開心死小Be lu....... 

K1面試@斷鬚+星光

今日小Be 有最後兩個interview, 分別係 12點30分嘅斷鬚同2點20分嘅星光.  

小Be 今日嘅狀態唔好幾好, 因為佢嘅鼻敏感由入冬開始纏擾到依家, 個鼻不停流鼻水. 見到都心痛死我.  

第一場斷鬚, 入到課室老師同佢玩串 "pooh pooh" 積木, 佢玩得好投入, 直情唔想放手, 好專注咁玩.  

到玩生果, 有一個雪梨同蘋果, 老師問小Be鍾意食邊個? 佢答鍾意食蘋果, 仲咬咗個蘋果一啖 

跟住老師又攞咗一個puzzle出嚟叫小Be砌 (小Be嘅弱項... ...) 小Be當然係砌得一撻糊塗, 仲係有老師提水嗰隻... 

轉頭又話要玩 "pooh pooh" 積木... 

最後老師問Be 跟唔跟老師出去睇下學校係點嘅樣?  小Be 點頭, 跟住老師拖住小Be出走廊, 小Be 好乖咁拖住老師, 好安靜咁睇操場啲小朋友玩.  interview完, 小Be喺操場玩咗一陣, 但一路都玩唔到車車, 最終係痛哭離埸... 

好趕咁食咗麥奴奴, 就去星光interview.  

小Be喺星光嘅表現好差, 開始時睇video都ok, 但到入課室時唔肯行去擺滿書嘅枱, 老師唯有帶佢玩煮飯仔.

小Be 都唔係好肯講嘢, 老師都忍唔住問我佢係咪唔識講嘢... 

後尾佢肯講嘢, 老師就叫小Be 攞隻香蕉俾佢,  小Be居然俾咗隻雞脾老師, 仲同老師講 : 呢隻係香蕉 ... (真玩嘢...) 

到小組遊戲時間, 小Be堅拒參與, 要繼續玩煮飯仔... 

最後仲大喊收場... 所以應該係考唔到星光lu.

睇到小Be呢個look 就知佢今日狀態有幾唔掂啦!!!  新登場 ~~ 憂鬱小生"be"先生

一連兩封拒絕信

今晚朋友們紛紛打電話俾我話貓記有通知啦

好趕急返屋企睇下有無信

返到去發現有兩封信

分別係貓記同創價

我滿懷希望咁拆信 (天真地以為取錄先有信收...) 

但結果係兩間都唔收... ... 算啦! 

爸爸講得啱

我哋都無力谷小Be

其實有兩間收佢都已經好好啦!!! 

第一次學校冬季大旅行

行程 : 9:15分學校集合 -> 粉嶺香薰園 -> 元朗吃自助餐 -> 馬灣公園 -> 16:30回程

今日係小Be 第一次學校冬季大旅行, 好期待!! 原本我哋心情好興奮, 但差不多到達香薰園時, 小Be 突然嘔吐, 嘔到我右邊身至大腿全濕 ... ... 唔使驚, 小Be 有衫換, 係我無囉, 去到香薰園我9秒9沖入洗手間 "沖衫", 然後喺太陽底下晒乾... 跟住同小Be 喺薰衣草園影相, 餵魚魚(仲餵到忍唔住攞魚糧食tim) 同睇羊咩咩, 而婆婆就坐喺小食部等我哋.  中午去到元朗食簡單自助餐, 小Be 同婆婆食得好開心!! 跟住我哋就去馬灣公園, 不過小Be 不敵睡魔喺車度瞓著咗, 去到馬灣我哋揾咗度地方坐俾小Be 瞓.  小Be 今日好扭計, 唔知係咪今朝嘔完唔係好舒服呢. 小Be 瞓咗一陣就起身.  我哋只係周圍行下, 婆婆就坐定定唔郁. 到4點半就回程.  仲返婆婆屋企同公公一齊"打邊爐" tim. 

同學仔合照   

拖婆婆去洗手間~真乖!!       

 

• 生活記敍, 
• 男

K1面試@創業

今日嘅 interview 係喺朝早9點正, 由於小Be 尋晚疲勞過度, 起唔倒床, 所以我要 "移動"起佢, 幫佢搵衫 (記住 : 小Be仍然喺睡夢中), 我同爸爸好似走佬咁攞埋包維他奶 (糧餉) 再搬埋小Be上的士.  

8點55分到學校, 小Be 都起咗身, 去等候室報到之後, 小Be 就飲咗包維他奶, 跟住同佢去洗手間, 小Be 見到牆上好似開籠雀咁不停講,不停講. 連喺門口位老讚小Be講得好.  到入課室面試, A老師開始問小Be問問題. 問題如下 :

A老師 : 小朋友, 你叫咩名呀??

小Be : 小Be

A老師 : 你幾多歲呀??

小Be : 兩歲

A老師 : 今日邊個帶你嚟呀?

小Be : ... ... ... (沉默不語... 次次interview 問呢條問題, 小Be 都唔答架! )

A老師 : 咁佢係邊個呀 (指住爸爸)? 咁佢又係邊個呀 (指住我)?

小Be : ... ... ...  (仍然沉默不語... 次次interview 問呢條問題, 小Be 仍然唔答架! )

A老師 : 呢啲係咩嚟架? (生果盆 - 有apple, orange, banana)

小Be : apple 呀 (但佢係指住個橙囉 ...) apple 呀! banana 呀! (正確! 當時佢係指住蘋果同香蕉架!)

A老師 : 咁你鍾意食邊樣呀??

小Be : apple 呀 (但佢又係指住個橙囉 ...明明識橙叫orange, 都要話apple, 明玩我哋啦...)

A老師 : 好, 我哋收埋佢, 玩第二樣啦!

小Be : 姐姐, 唔該切咗佢 (咁都得...不過老師聽唔明, 要我哋講佢聽)

A老師 : 呢度邊度嚟架? (攞咗本圖書出嚟, 主題係遊樂場)

小Be : 公園

A老師 : 小朋友做咩呀? (指住滑梯)

小Be : "sir"滑梯 (跟住小Be 自己 "sir" 咗落枱底.... 激死人啦!!!)

A老師 : 小朋友做咩呀? (指住韆鞦)

小Be :  um... 做運動 (小Be 從未打過韆鞦, 所以唔識.  不過, 佢識執生喎!)

A老師 : 哦, 小朋友做運動呀! 咁你鍾唔鍾意做運動呀?

小Be : 鍾意呀!!

A老師 : 咁呢個係咩嚟架?? (指住隻狗)

小Be : 狗狗呀

A老師 : 好啦! be你自己玩住積木先

小Be : 好呀! (自己喺度玩積木)

跟住老師問左我同爸爸以下幾個問題:
(1) 你最欣賞be啲咩? 爸爸答
(2) 點解揀呢間學校? 媽媽答
(3) 揍小朋友遇到咩困難? 媽媽答

跟住走得, 小Be仲執拾積木同泊齊啲櫈.

下午上完playgroup, 我哋同Sue,  小龍同 Sil 姨伉儷去大埔郊遊 (其實係食,食同食).  小Be就同Sil 姨隻老狗玩.