ah Be~K2生活學習進度 (二)

講完自理能力, 又講下ah Be 瞓覺習慣.  喺上年二月農曆 (2010) 新年開始, 佢已經有自己一間房, 佢有時都可以自己一個人瞓.  但... 唔知點解最近佢晚晚瞓到兩點零就走過嚟一齊瞓, 加上佢又大個咗好多同好反瞓, 攪到我同超爸周身骨痛... 我條腰痛到斷咗咁... 真係要諗諗計...

喺上星期二晚 (22-3-2011), 我同 ah Be 講, 佢大個仔嘞! 唔可以晚晚都同爸爸媽媽瞓, 媽咪條腰痛到好似斷咗, 爸爸又瞓得唔好無精神返工  如果佢可以自己瞓, 可以獨立啲自己照顧自己, 即係代表佢大個仔, 可以做大哥哥.  咁爸爸同媽咪可以嘗試... 睇吓可唔可以生多個細佬俾佢 (嘩... 真係玩得好大呀... 如果生唔到... 點算呢...).  佢即時點頭同話 : ｢我有信心!!!｣

不過... ah Be 下一句就同我講 : ｢咁你要同爸爸再結婚喎!! ｣

mamemo : ｢點解要再結婚?? ｣

ah Be : ｢因為要多個細佬嘛!!｣

mamemo : ｢吓... 爸爸同媽媽結咗喎, 唔使再結婚都可以生多個細佬架!!｣

ah Be : ｢唔得架... 一次呢... 一個BB架...｣

mamemo : ｢哦... 哦... 快啲瞓!! 媽咪一陣抱你返自己房自己瞓, 得唔得?? ｣

ah Be 好堅定咁答 : ｢得!｣

言歸正傳, 講返佢嘅獨自睡覺進度先 ~~

第一晚 (22-3), 瞓到半夜, ah Be 忍唔住過咗嚟... 不過, 碌咗幾分鐘之後, 同我講話佢要返自己房瞓, 叫我陪佢一陣! ok 無問題!! 佢好快喺自己房瞓返, 仲一覺瞓到七點幾!!! 真係要讚一讚!!

第二晚起, 晚晚喺自己房瞓覺, 一覺瞓到七點幾, 然後過嚟我哋房繼續瞓.  咁都好吖!! 已經有好大嘅進步嘞!! 不過, 都有零碎一晚半晚會過一過嚟我哋房碌一碌, 好彩最後佢都會返自己房瞓!! 我真係要俾 100 個 good  佢!! 叻仔!!!

ah Be, 希望你繼續努力!! 加油!!

報告完畢!!!

ah Be 自畫生日咭

Sue 同契媽係今日嘅, ah Be 話要畫生日咭俾佢哋!!

又係畫車... 真係悶... 悶... 悶...

畫咗個咭面喇!!

張咭有馬路、草、的士、長貨櫃車同短貨櫃車, 中間圓圓哋係士多啤梨蛋糕

ah Be 話, 台頭唔寫契媽, 要寫 JXXX!! 仲有花花添

除咗契媽, ah Be 仲畫咗俾小龍同 Sue ee, 因為未送到當時人手, 所以不便公開!!

ah Be~K2生活學習進度 (一)

我放長假嘅其中一個原因係 ah Be.   因為 ah Be 已經 K2, 我想趁機觀察一下佢日常生活嘅習慣同個性.  雖然平時佢喺我面前嘅行為都 ok, 唔係好曳.  喺屋企都好獨立.  但喺婆婆口中知道佢有時都幾曳同大脾氣!!

有時仲會蝦工人姐姐!!

其實佢真係好蠱惑吓架, 正一表面善良, 內裡蠱惑!!  所以我想留喺屋企自己照顧佢、矯正佢嘅道德價值觀同壞行為!!

今日會先講一下 ah Be 喺自理能力方面嘅進度.  喺日常生活上, 佢喺屋企都會自己換褲 (唔識換衫)、著鞋著襪、除鞋除襪、沖涼同幫手做少量家務, 如幫我執拾屋企、搬污穢衫入洗衣機、將洗好嘅衫由洗衣機搬出露台俾我曬衣服.

經過呢十四日嘅相處同訓練, ah Be 嘅自理能力又進步咗一大步!! 每日早、晚會自己擦牙、洗臉  (好彩之前同佢去做牙齒檢查時, 有牙醫配合. 牙醫同佢講佢大個仔自己擦牙先叻叻!! 自始, 佢就自己擦牙嘞!! 有時我都要幫佢補擦架!!)

一定要自己食飯 (有時喺婆婆屋企, 佢要扭姐姐餵食飯架...)

已經學識自己除衫同著衫

自己換褲著褲

仲會著襪著鞋

自己扣好外套扭

每次換完衫, 我都會要求佢自己摺好剛除低嘅衫褲, 同埋擺番啲摺好嘅衫褲入自己間房.  雖然佢仲未掌握到摺衫技巧, 不過都摺到個雛型, 算佢啦!

除此之外, ah Be 依家啲手尾都好咗好多, 佢食完茶點會放好食具、做完功課智放好書簿筆袋等等...  佢仲會幫我手煮飯, 幫手到雪櫃取出雞蛋、肉類等等... 希望而家教佢嘅自理能力佢會一路跟住落去啦!! ah Be, 你要加油呀!!!

三月生日會+園會

唔遲唔早, 啱啱喺我放假嘅第二日, ah Be 學校就有園會表演兼三月生日會!! 送咗 ah Be 上校車, 出去同超爸食咗個 lunch, 然後出發去 ah Be 學校睇表演.  上到學校唔遲唔早時間啱啱好!! 睇咗兩班就到 ah Be 嗰班表演.

但係... 今日個位咁遠嘅??? 無咗拍攝區嘅???!!! 我已經盡量 zoom ... 都係得遠睇... ah Be 去咗邊?? 咪係由左起第四個頭嗰位大頭仔!

唱完兩首歌, 準備落台

表演完畢, ah Be 班等緊返課室

返到課室準備唱生日歌同食蛋糕, 所以攞條濕手巾出嚟

去完手洗手間嘅 ah Be

課室門外偷拍嘅ah Be, 好似好開心咁喎!!

嘩!! 有生日禮物包呀!!!

等到佢放學, 我哋就開開心心去買餸同去金舖買BB金手鐲睇小兔弟, 然後坐巴士反屋企!!

K2上學期之學習活動評估家長會

今朝... 我一臉 ~ 無水洗臉嘅表情坐底...  心想... 今次真係凶多吉少...  點知...  邱老師一開口就讚 ah Be 有進步

仲要係對比起 K1, 佢有好大嘅進步!!!  我即時瞪大眼 ~ 一個難以置信嘅表情望住邱老師... 
邱老師好肯定咁再講一次 : ah Be 進步咗好多呀!!   普通話對答能力都唔錯!!  呢一刻真係好喜出望外呀 ~~ 再睇真啲! 今次學習活動評估嘅評分都唔錯呀!!

我同老師講佢嘅專主力都係低...  邱老師居然話 ah Be 仲細, 專主力低少少係正常嘅...  (我另一個 surprise!!) 另外, K2 起開始學做句, ah Be 未 pick up 得好好, 不過都係正常嘅!! 同埋佢仲未適應課室內不同學習區嘅規舉, 不過都係正常嘅!! (唔係嘛!!!)

今次表現評分嘅19個項目中, 有4個表現3分, 其他15個項目係4分滿分.

喺英文堂方面, 因為排成四十幾人先見面... 所以我無見 Mr Ian 呀!! 不過睇評估表就發現 ah Be 嘅英文相對比較差啲!! ah Be 依家已經惡補英文中, 希望佢下學期會好好多啦!! ah Be, 你要加油呀!!! 爸媽會支持你!!!

ah Be 上堂時情況!! 好似好專心咁喎!!!

結婚7週年

今日係我同超爸結婚7週年

2003年12月27日 ~ 係我同超爸結婚嘅大日子!!

當年我哋嘅結婚儀式一切從簡, 只係喺雙方親屬+幾位要好朋友 (不過都有成40個親屬喎...) 見證下結為夫婦!! 沒有現今嘅大大隻求婚鑽戒、沒有浪漫嘅求婚過程、更加沒有世紀婚禮... 一切隨當刻想做的、簡簡單單的... 完成我哋既好開心又好完滿, 但又好趕嘅婚禮 (真係好趕呀!! 有證婚人同親屬遲大到囉!!).  雖然婚禮只係短短十分鐘內完成, 但當刻嘅感覺好實在、好感動同好幸福!!!  到七年後嘅今日, 仍然歷歷在目!! 希望我哋呢段感情可以細水長流地到老!!

2001年認識超爸時, 我真係無諗過眼前呢個死o靚仔 (我哋係老妻少夫...) 會係我兩年後嘅老公!!!

不過, 熟落咗之後, 又發覺佢思想都幾成熟架喎 (有時應該係扮大個囉...) 又有耐性 (唔發火時).  而我嘅性格又比較衝動、又火捉鬼 (心急), 真係可以互補不足架喎!!

大家嘅興趣都好相似, 鍾意行街、買嘢、講嘢、睇戲同埋飲飲食食等等 ... 唯一最大差距係我個人比較衝動、火爆 (可能喺大女啦... 都幾難相處存架!!).  而佢係家中細仔, 佢相對地比較慢吞吞、憂柔寡斷 (食咗十擔豬油)...  所以, 好多時面對一啲家庭問題 (特別係相方家族嘅事) 上, 大家睇嘅角度同處理手法都有好大差異, 唔容易有共識架!!! 好彩, 幾經磨合, 大家都有咗共識, 就係有啲嘢唔係太過份, 對方都唔會講太多囉!!  講太多... 對身體無益架嘛!!

  

真係好多謝超爸喺過去嗰10年, 陪我渡過我幾個人生嘅難關.  唔係你, 我唔會有個咁得意嘅ah Be 同埋有個咁開心嘅屋企!!

超爸, I  U!!!!

聖誕假期前的一天!!

Merry Christmas!!!

去咗五日旅行, 無咩時間買聖誕禮物俾公司啲同事仔, 唯有喺台北掃咗我好愛嘅 ｢Afternoon Tea ｣ 嘅文具同一啲可以做小手工嘅 postcard 送俾大家, 小小思意!! 答謝大家喺2010年對我嘅工作支援!!! 希望大家鍾意啦!!

今日返工可以話係 hea 住做!! 啲客又放假... 下午無無聊聊, 同陳屎先生合資 (當然係佢70% ; 我30% 啦) 搞咱家 team 迷你抽獎!! 每個組員用 $20 買一張有號碼 bank cheque, bank cheque 寫明獎金!! 獎金數目一定比$20 多, 人人有獎.  詳情如下 :

各位隊員 :

為慶祝普天同慶嘅聖誕節, 我哋準備咗一個”人人$20, 抽大獎”遊戲!!!  抽獎遊戲方法好簡單, 每人只需交 $20 到我處, 擴大彩池!!!  務求大家得到嘅獎金比付出嘅大!!! 獎金係人人有份, 永不落空!!

以下係獎金派彩表 :

頭獎 (二注) : 每注派 $200

二獎 (四注) : 每注派 $100

三獎 (三注) : 每注派 $80

大部分善款 ($580) 由陳屎太平紳士贊助, 另外善款由無名氏($320)贊助.  抽獎時間喺今日下午六時十五分舉行.

多謝大家支持!!!

到7:30, 即同公司朋友仔坐校巴去打邊爐也!!!