與 ah Be 一段窩心對話

超爸出差一個多星期 (5/12-13/12), 只有我同ah B e喺屋企. 當ah Be 知道超爸要出差, ah Be 即時高興得喺我耳邊講, 好野! 我可以同你一齊瞓!!! (開心到佢呢~~~) 點知, 到超爸出差嘅第一晚睡前,  ah Be同我講, 其實爸爸唔喺屋, 佢係好唔開心架.  仲話平時爸爸整蠱佢, 佢扮嬲... 其實佢係好開心架 (文法上可能有錯, 但我只係將ah Be 嘅原文記錄底) 超爸聽到實冧晒啦!!!

話說星期二晚, 我同ah Be煮水餃+公仔麵時, 佢喺旁邊不停幫手.  食完麵又幫手執枱.  到我洗碗時, 佢企喺我旁邊幫手將洗好嘅碗放喺碗架上.  我哋對話如下 :
ah Be: ｢mami, 我幫你手洗碗吖?｣
mamemo: ｢唔使啦, 你唔識洗, 等你大個啲先.｣
ah Be: ｢大個啲? 係咪即係6歲呀?｣
mamemo: ｢係呀. 你幫我放啲碗喺個架度啦. ｣
ah Be: ｢好呀! mami 呀, 第二時你老咗, 我都會幫你洗碗同做家務架!｣
mamemo: ｢吓!! 真架? 你會幫我手? ｣
ah Be: ｢係呀! 我好鍾意陪你做家務架! ｣ (嘿... 嘿...  到你大個咗... 你就要老婆唔要老媽啦... 不過依家聽到都好開心...)
mamemo: ｢哦. 不過第二時我哋唔一齊住, 你點幫我家務??? ｣
ah Be: ｢我哋會一齊住架, 我仲會請個工人姐姐俾你, 幫你手囉... 好似姐姐幫婆婆咁...｣ (嘿... 嘿...  到你大個咗... 同我住?? 你會無老婆架喎... 真係冧C我啦~~ 阿仔~~)
mamemo: ｢嘩, BB 你對我咁好, 我真係好開心呀!! ｣
ah Be: ｢係呀! 我真係好鍾意你架, 我仲會帶你哋去旅行, 好似我哋同婆婆去旅行咁. 我哋第時一齊去英國、日本、美國、泰國.... ｣
mamemo: ｢好呀 BB, 多謝你呀!! ｣ (個心甜到糖尿病咁滯... 

喺呢個時候, ah Be 攬住我隻肥腳實一實!! so sweet ~ 我!! keke  


*** 思念在遠方(我的) 爸爸...

快樂的一天開始了~~

人生有一個童年, 但只有短短數年, 一閃即逝~~ 我希望ah Be 有一個快樂的童年. 何謂 ｢快樂的童年｣?? 喺我嘅定義係佢嘅快樂係來自心靈上, 例如佢感受到父母嘅愛和關心及懂得愛和關心別人、享受與人分享、不計價、無機心、容易與人相處. 呢幾點, ah Be 都能做得到.  最近, 當每次我聽著 ah Be 唱以下呢一首歌時, 我都覺得佢嘅童年仍然係開心快樂嘅!! 因為我感受到佢 ｢真｣ 尚未受到污染... 仲有童真... 希望佢呢份｢真｣仲可以保持一段時間.

希望你哋每一天都由呢首歌嘅內容開始啦!! ~~快樂的一天開始了~~

小一面試結果(三)

今日, 最後一間學校 ~ 神小 ~ 公報結果嘞!!!

登 ~ 登 ~ 登 ~ 凳~~~~ 結果係 ~~~~ 取錄!!! 

有交代! 有交代!!!

總結 : 共考7間小學, 被3間取錄, 有交代! 有交代!!!

煩惱又開始嚟嘞~~原小好? 定神小好?? 如果接受神小, 就要放棄津/官校嘅大抽獎...  點算呢???...  苦惱中

K3 秋季大旅行

大家估都估唔到K3 嘅 ah Be, 居然係第一次參加家教會辦嘅大旅行!! (因為前兩年都家有白事... 係呀!! 仲要係俾咗錢之後有白事, 仲仲仲要係兩次都撞正白事嘅守夜日添, 邪到不得了... )  雖然今次嘅旅行目的地係 ｢嶺南之風｣同 ｢濕地公園｣.  今次集合地點喺一個幾唔就腳嘅地方, 唔近地鐵站, 所以我哋 ｢飛的｣去, 準時喺08:45 到達!!  今日共有17部旅遊巴!! 待老師點名同派水、百力支同小禮物 (小朋友) 之後就出發嘞!! 我哋坐8號車出發!!

出發前, 同同學影張相先啦!!

話咁快就去到荔枝角公園嘅｢嶺南之風｣~~ 嘩! 成個場景都好熟口面喎!!! 我認得啦!! 無記啲古裝片喺到拍架!! 成套 ｢萬凰之王｣都喺度拍架!! 無記真係慳水慳力!!

巧遇N斑時的同學 ~ Anson 兄!! 佢真係好 cool 呢~~ 咪睇佢大大隻呀~~ 細 ah be 兩三個月架~~

有亭台樓閣唔行, 偏偏向烈日當空下的草地喪跑~~ 真係大汗搭細汗...

喪跑一個鐘後, 11:40 我哋出發去荃灣嘅熊貓酒店食自助午餐.  當然唔好對呢個自助午餐有好高要求啦!! 每人消費$150大洋, 包車費、自助午餐同濕地公園入場費...  我哋一家主力食菜同炒飯, 味道都唔錯!! 
呢度就係我哋食自助午餐嘅場地.  點呀!! 圍數係咪好浩瀚呢!! 其實仲有兩大排枱影唔到!!! 

跟住13:30 出發去濕地公園, 當我哋落車時, 突然 boom 咗一聲兼架旅遊巴震盪咗一下!! 原來有架車撞咗埋嚟我哋架車度... 佢隻耳(倒後鏡) 都爛埋...   點解佢會撞埋嚟嘅??!!!

公園前一照~~ 成兩年幾無嚟呢度啦!!  濕地公園~~ 好耐無見~~~

同佢個 best friend 楠楠一齊遊濕地~~

成班反斗星喺到做咩東東??

紅樹林 ~~ 好刺激呀!!

嚟過濕地三、四次, 今次最多嘢睇!! 我哋見到 ~ 彈塗魚、同紅殼蟹呀!!

呢班反斗星趴喺地上做咩?? 睇魚魚囉!! ah Be 真係曳曳仔!

同場加映 ~ K1-K2 班主任 ~ Y老師 (ah Be 都幾鍾意佢~~)

K3 現班主任 ~ C老師 (C老師好嚴厲, 不過都好好人)

K1-K2 班主任 ~ L老師 (佢好好人, 好鍚 ah Be 架!! ah Be 都幾鍾意佢~~)

K3 現班主任 ~ 小C老師


我哋約17:00返到北角, 上咗朋友屋企整野食.  ah Be 同我合作做嘅 ~ 蟹柳沙律~~ yummy yummy!!

超爸整嘅焗黑豚扒, 大菇同上圖右下角嘅煎鵝肝~~ 好好味呀啲豬扒!!! (不過我無食鵝肝, 因為太唔人道嘞!!!)

是晚ah Be 真的好疲累~~ 我哋十點鬆啲就打道回府~~ 

Ah Be 人生首個親手做的閱讀報告

Ah Be 咁努力... 喺度做緊咩呢??? (其實... 教佢嗰個 ~ 我 ~ 仲努力同仲嘔血呀... )

咪就係 ~ 閱讀報告囉!! 真係｢嘔心瀝血｣咁做架!!!  雖然唔係做得好好, 我哋會努力架!!

小一面試結果(二)

又係時候報告一下小一面試結果...

1. 保小 ~ 取錄了~~  (不過已放棄學位)

2. 九小 ~ 不被取錄... 未能進入第二輪面試

3. 罐小 ~ 不被取錄... 無緣進入300強 (2nd interview) 

4. 傳小 ~ 不被取錄...

又係嗰句... 平常心... 剩下神小尚未揭曉結果...

小一面試@神小 (第二輪)

估唔到有意外驚喜... 有第二輪面試... 時日裝束仍是 smart casual ...面試@神小 (第二輪)今日嘅面試時間係11:30, 我哋一家11:15到達, 一去到校門就見到 ther 姨媽喺度等返學校做英文大使嘅諾諾表哥返學.  我哋仲運咗姨媽入學校見諾諾表哥, 咁啱嘅係諾諾表哥係註守我哋去嘅班房, 我哋仲要用英文談話添...

等咗一陣, 我哋被帶到另一個課室進行面試, 一家人連成一排坐, 小朋友坐中間位, 大家問好完, 面試正式開始 ....1. 老問 : 請問小朋友有無恆常課外活動? 如有, 有咩活動?
    媽答 : 有, 學琴同畫畫
2. 老問 : 有無一啲係親子嘅活動?
    媽答 : 有, 會一齊去公園、圖書館同埋一齊去做義工, 探訪啲老人家...3. 老問 : 點解會揀我哋學校?    媽答 : 我對學校有好深嘅認識, 校風淳樸... (下刪百字... )
    爸答 : 因為係天主教背景... (下刪百字... )

問完後, 家長先行回 waiting room, 小朋友留下同老師傾談.  約十多分鐘後, ah Be 由大哥哥帶回 waiting room.  我哋同諾諾表哥講再見之後同姨媽去咗 tea 一 tea, 搞到姨媽遲咗返學校接表哥...
面試內容 (由 ah Be 提供, 可信性 ~ 50%)
1. 老師問ah Be 個名, 幾多歲同喺邊到讀書
2. 問 : 你住喺邊度?
答 : xxx
問 : xxx喺邊度?
答 : 新界
3. 問 : Today is the day of the week?
答 : Saturday (咁都俾你撞中...)

根據兩位姨媽話... 兩位表哥都無考英文架喎... 又深咗... 我聽其他小朋友講, 有考普通話添...
無論收唔收 ah Be 都好, 賺咗一次嘅面試機會!! (阿Q 精神又嚟啦!!)