2012 義工日@育賢學校

唔好誤會, 唔係 ah Be 做義工, 而係我公司每年一度義工日(我都幾欣賞我公司呢種回饋社會嘅精神架!!).  今日, 我哋兵分一路, 一路係踏單車, 另一路係幫學校粉飾校園.  今次籌到嘅善款會捐俾｢仁人家園｣.    而我...  係揀咗服務學校啦.  今次嘅服務單位係上水區嘅 ~ ｢育賢學校｣, 我哋拍住 ｢仁人家園｣為育賢學校大變身!!!
朝早十點鬆啲到達, 入禮堂聽｢仁人家園｣負責人講解今日工作細節同分工.

由校長介紹學校歷史 ~ 原來學校有七十年歷史, 因為資源唔係好足夠, 所以需要我哋同一眾學生幫忙粉飾學校.  (我見個校舍係平房式設計, 課室唔多, 只有幾個.  應該係一年級一班, 人數唔多, 電腦室都係半露天式. 好有以前啲學校感覺.)

聽完分組分工後, 開工!! 其間, 啲同學依舊上體育堂~~

有同事同同學仔一齊做園藝~~ 好投入吓喎!!!

有高大外國同事油鐵閘~~

有同事油外牆~~

而我嗰組係要同啲同學仔喺其中一幅外牆度設計壁畫同上色.... 都幾趕時間架... 雖然有｢仁人家園｣幫我哋執手尾... 但得三個鐘頭... 我哋都唔想留手尾俾佢哋... 一開始我哋同啲同學仔喺張大紙上起草圖, 然後用粉筆喺牆身上再畫一次~~  

然後上顏色~~ 我哋盡量用口同示範如何上色、用顏色 (因為用磁漆, 比較難上色...), 等佢哋用自己方法去完成幅畫, 佢哋個個都好聽話, 有商有量, 一有唔明即刻問我哋, 大家都好投入去畫呢幅壁畫 (我都中咗幾下招... 幾個油漆印喺身... ) 喂... 就夠鐘喎... 點解無人畫埋隻雞嘅??

既然無人畫隻雞... 咁我畫啦... 好趕呀...  要召集啦!!! 暫時完成作品... 希望校長收貨啦...

園藝組都完成任務喎!! 其中一個花圃...

入禮堂頒過感謝狀之後, 出操場影張大合照先!!

兩點鬆啲出發去白石會合單車組同事一齊BBQ, 真係又凍又落雨... 玩到五點散會~~ BYE BYE~~

ah Be 長大了~~ \(^0^)/

最近呢兩個星期ah Be 嘅思想好似成熟咗好多, 講嘢有紋有路咗好多!! 好似好懂事、好關心別人嘅感受 (唔包括發緊癲同曳緊嘅時候....)~~  我要慢慢記底佢, 真係好驚會唔記得佢良善嘅一面.

事件一
上星期一朝早, 我嘅腸痛又嚴重咗, 所以諗住請半日假休息一下.  所以叫佢乖乖, 跟爸爸去婆婆屋屋.  佢嗰朝又真係特別乖喎, 唔扭擰、唔吱吱咗咗.  佢臨出門前, 坐喺我床邊攬住我, 一邊拍住我個背脊、一邊同我講 : 媽咪, 你瞓多啲呀! 不如唔好返工, 瞓多啲.  記得睇醫生同食粥呀!!  我答: 哦... 知道.

事件二
超爸呢排有工作壓力, 加上超忙, 所以我同ah Be 講爸爸好忙, 唔好太嘈同騷擾爸爸.  星期六朝早, 超爸好攰所以無叫佢一齊去食早餐, ah Be 一起身我就同佢講爸爸唔多舒服要休息多啲, 唔好嘈醒爸爸.  跟住我哋快手快腳出門口. 
ah Be : 爸爸唔舒服呀?? 佢有病? 
媽咪 mo : 爸爸無病, 只係多野做, 好攰唔多舒服
ah Be : 哦... 媽咪, 我食完早餐去上堂, 你快啲買大快活早餐俾爸爸食啦!
媽咪 mo : 爸爸應該唔食大快活早餐喎!
ah Be : 爸爸唔舒服, 食粥有益啲喎!!
媽咪 mo : 係咩? 食粥有益啲??
ah Be : 係呀, 食粥落肚可以捲走肚入面啲污穢野喎...
媽咪 mo : 哦...
講真, 佢見到爸爸星期日喺屋企做公司野, 佢都好擔心爸爸唔舒服仲要做野... 不停喺我身邊問爸爸辛唔辛苦... (佢又唔敢問爸爸, 驚嘈住爸爸喎... 點解佢唔驚嘈住我架呢...)

事件三
有日, 我接佢回家途中, 佢話我知佢啱啱食咗蘋果.
媽咪 mo : 食蘋果?  邊個切俾你食?
ah Be : 姐姐切俾我食架!
媽咪 mo : 吓... 姐姐切?  唔係婆婆切咩??
ah Be : 唔係婆婆切蘋果架! 如果婆婆切, 好容易切親隻手, 兩隻手都跛晒好慘架... (有無咁誇張呀... )

註: 婆婆係半邊身傷殘

小小義工日@賽馬會復康中心篇(1)

今日跟Sue 姨姨+一個有三隻狗醫生嘅義工團隊嚟到｢東華三院賽馬會復康中心｣某一個病院做老人探訪.  今次服務對象係一群視力有啲問題嘅老人家 (時間: 1500-1430). 

ah Be 與老死 ~ Fluffy (不過 Fluffy 唔係狗醫生嚟架!! 佢嚟見識吓架咋!!)

義工團隊介紹緊三位狗醫生俾一班老友記認識.

ah Be 好嘆咁坐喺到聽義工姨姨講笑話~~

喺一班老友記食緊糖水時, 我問ah Be可唔可以唱吓歌俾老友記聽呀? 如果唱, 佢哋會好開心架!!  ah Be諗咗一諗, 點頭話可以!!

交咪啦!! ah Be 緊張到呢... 成個人僵硬晒...

第一首係朗讀 ｢新春到｣~~

朗讀完 ｢新春到｣, 好評如潮.  大家都想 ah Be 唱多一首歌, 於是 ahBe 決定表演校歌.  (佢呢排喺學校好忙, 忙於彩排體操表演同埋畢業禮, 老師狂操小朋友記校歌)

｢新春到｣+｢校歌｣

今次, ah Be 一共表演咗三首歌, 仲有一首係 ｢親愛的主耶穌｣(聖誕歌, 無辦法啦... 佢怕醜, 唔肯唱 ｢年少無知｣, 仲話表演俾老友記聽, 要唱學校啲歌喎...) 

跟住輪到狗醫生出場, 我哋又四圍同老友記傾吓偈...

呢個係胡婆婆, 佢好好人架~~

眨吓眼, 個半鐘頭就過咗, 我地要同老友記講 bye bye lu~~  下次再見!!

農曆新年假期功課

由K1 起, ah Be 每一個長假期 (暑假、聖誕、新年、復活) 都會有一本假期習作.  由今年K3起, 每個長假期嘅功課, 會再加數版 ｢幼稚園全科精要習作｣, 版數多少是乎長期內有幾多個週末, (平日每週末要做3版).  今個新年假期共有12日, 內有2個週末, 所以要做6版.  今個假期嘅功課連工作紙有成50版... ... ... 做到我喊咁滯...   原本帶埋功課去韓國做, 但行程太緊密, 最後都係返嚟先做... 剩返5日咋... 每日都好趕... 好趕...  開行 turbo 做... 好彩年初八趕起晒

工作紙 ~ 有深、有淺.  呢張係淺嘅!


呢張唔深、唔淺, 通識野, 不過要幫手上網搵啟用日期...

K3 要睇統計圖... 我接受唔到囉... 淨係解題... ah Be 都唔明... 解到我... 

ah Be 與爸對話

星期一晚 (9/1), 小龍返咗嚟. 我哋四姊妹出嚟食團年飯 (聖誕我哋都無見面...). 超爸就回家湊 ah Be.  第二日超爸同我講, 尋晚佢執緊自己啲衫時, ah Be 走埋去同佢講咗一番話, 內容大至如下 :

ah Be : ｢爸爸, 你喺到做咩?? ｣ 
超爸 : ｢執緊衫. ｣
ah Be : ｢哦... 咁你要留起啲衫, 等我第二時著喎!!｣ 
超爸 : ｢吓! 點解要留俾你?? 點留呀??｣
ah Be : ｢係呀, 等我大個咗咪可以著你啲衫囉, 唔會浪費囉... ｣ 
超爸 : ｢哦, 好呀!! 留俾你啦!! ｣
ah Be : ｢爸爸, 仲有喎, 你要幫我留起我啲衫, 第二時俾我個仔著喎...｣ 
超爸 : ｢吓! 留俾你個仔著 ?? ｣
ah Be : ｢係呀!! 好似我會著你啲衫, 我個仔會著我啲衫咁囉... ｣ 
超爸 : ｢哦... 留俾你! 留俾你!!! ｣

根據以上對話, 呢兩父子感情又邁進一大步~~ 

恭喜!!恭喜!! (註 : ah Be 由細到大"癡媽筋" 癡到癲, 同爸爸無兩句架... 自四歲起開始有改進嘞!! )  

同時我覺得 ah Be 開始有環保概念.  多得各方親朋好友捐出咁多二手衫褲俾 ah Be 著!! 呢五年幾嚟, 啲二手衫多到著唔完, 真係幫我慳唔少 ...  (一星期, ah Be 平均有70% 日子係著二手衫褲, 只有星期六、日去街先著返我哋買嘅衫)  所以, 佢對用一般二手用品或循環再用用品係無抗拒, 只係每一次用時, 佢都會話: ｢要環保啲, 要愛護地球伯伯!!｣ 

ah Be 的新寵物

ah Be 養咗新寵物??!!   哈哈!!  其實隻新寵物就係喺 Moses 嘅生日會攞返嚟嘅氫氣球囉!! 個傻豬帶咗一隻恐龍 + 一隻狗嘅氫氣球返屋企~~  ah Be 由細到大都好想擁有一個氫氣球 (我都好想擁有一個 ... 到而家都係... ), 但我同超爸一路都覺得貴, 幾十蚊一個玩得兩日, 真係好唔抵囉... 所以一直都無買氫氣球俾佢玩.  加上佢又好鍾意小動物, 成日都好想養貓貓或狗狗.  但我哋都無時間照顧小動物,.. 唔養得住...  所以, 今次呢兩個 動物氫氣球可以一次過滿足 ah Be 兩個願望!!  佢真係好開心、好興奮!! 

一返到屋企, 佢二話不說就拖住恐龍喺屋內遊咗一圈, 一邊介紹邊度係睡房 、厨房 、厠所同設備, 嚇到我同超爸目瞪口呆 超好笑!! 跟住我叫佢介紹埋俾狗狗知道, 佢又即刻拖狗狗遊一圈, 我即時錄低佢.  我執咗一段出嚟分享吓   

呢幾晚, 個傻豬晚晚拖佢哋入房瞓覺, 朝早仲拖佢哋出廳坐添!! 又一齊睇電視, 真係養寵物一樣!!! 

充滿生日會嘅星期六

同學仔 Moses 邀請ah Be 參加佢六歲嘅生日會, 一去到會場就見到好多氫汽球呀~~ ah Be 搵咗佢至愛嘅汪汪狗~~


仲有熊貓~~

另一同學仔 ~ 卓毅

嘩!! 仲有好多其他動物呀!! 又有跳彈床~~ 去到未夠半個鐘, 已經成隻濕水雞咁...

另一遊戲 ~ 扑糖糖, 真係幾好玩架喎!!

幾開心~~ 扑 . 扑 . 扑 .

流浪漢執到金, 笑到見牙唔見眼 ~~


可憐嘅恐龍仔 ~ 俾班小朋友扑到肢離破碎~~ 隻腳都甩埋... ah Be 仲執恐龍仔隻腳俾我兼同我講 : 媽咪, 有隻鳳爪跌咗呀!!

咦... 咁乖嘅, 全部小朋友坐定定嘅??

哦... 原本係睇緊小丑先生表演!!

小丑先生同小朋友玩咗成個鐘頭互動遊戲, 填完顏色可以憑顏色紙換小丑先生扭扭氣球一個!  小丑先生仲讚 ah Be 填得靚添!!

話咁快就玩咗三個幾鐘, 要切蛋糕啦!!


同主角 Moses 影返張相先!!! happy birthday~~~

跟住去另一場桄叔叔生日飯嘞~~ 桐桐姐姐大個咗好多, 名副其實嘅小學雞!!

ah Be 至愛 ~ Bun 叔叔~~

三個小朋友嚟一張合照~~ 一 . 二 . 三. 笑~~~ 咔擦~~