即場造句

尋日Be 放學後

心情麻麻

發咗陣皮四

後尾自己鬼拍後尾枕

行埋嚟道歉

然後講出心中話

原來佢上中文堂時被同學取笑

Be 喺堂上被老師㸃名即場造句

題目：雖然。。。但是。。。

Be ：雖然張老師對我們很惡，但是她有時對我們很好。

老師話佢作錯

同學大笑

(所以佢好唔開心)

於是

Be 重作

Be  ：雖然張老師很努力地教導我們讀書，但是我們仍然目不識丁。

老師當場七孔出煙。。。(Be 講的)

同學繼續大笑

但Be 好開心

因為Be 好滿意呢句重作句子!!

*** *** ***

講到呢度

又到我同佢說教嘅時候

首先唔好介意同學點笑你.... (下前刪百字...)

你而家明白俾人笑有幾難堪係咪? (下前刪百字...)

Be : 知道... (下前刪數十字...)

所以

如果下次有同學/朋友做錯/唔識一啲嘢

你仲會唔會大大聲笑人?? (下前刪百字...)

Be : 唔會... (下前刪數十字...)

抗逆小童

Be 由出生到而家

都算係一個開朗嘅小朋友

天跌落嚟當被衿

喺逆境時

都可以鬆容面對

佢嘅抗逆能力遠超我同超爸嘅想像...

*** *** ***

例子 : 一

最近

我家的一位飯腳同事好友

因病去世

由佢病發至離開不足一年

由年初一晚收電話

趕往醫院見最後一面...

至三月初佢離開...

雖然我哋有心理準備

但一想起佢

心都有一點點陣痛

Be 一直有去探望佢 (佢哋好老友架)

算明白佢發生咩事

當我同Be 講佢已經離開我哋時

Be 有點黯然回答 : 吓! 大x係我好朋友嚟架... 點解咁架? 以後無得同佢玩lu....

幾日後

我同Be 講大x 嘅身後事

Be 提出要去大酒店同大x道別

我有啲咽住喉...

Be : 媽咪, 其實大x 只係隱形咗, 佢無走到, 你見佢唔到之嘛!

我 : 你點知?

Be : 我知架! 大x 好似阿公咁, 只係隱咗形. 我知佢哋喺度架!

我 : 又講鬼故?

Be : 唔係呀!  真係架! 有時我坐喺度, 阿公會嚟搭我膊頭架!!

我驚訝嘅係... Be 用大x 隱咗形嚟安慰我...

*** *** ***

例子 : 二

兩年前一次外遊

途中出現一啲事故

Be 被單獨送到保護兒童中心

我同超爸到場接佢時

佢都有喊咗一陣

未算激動

佢冷靜下來後

我再問佢詳情

佢都可以講返出嚟...

佢話出事後被送去兩間警局

佢每到一間警局

佢都特登大喊

引起警察注意

然後將我寫低聯絡嘅紙仔遞俾警察

(每次出門, 我都會喺佢啲外套、跟身袋內放低佢個人資料同聯絡電話)

仲同警察叔叔講 : please call my mum

當然...

係無人搵我啦...

直至去兒童中心至有人睬佢囉...

佢都算冷靜...

*** *** ***

例子 : 三

而家Be 俾我鬧完

佢沖涼嘅時候

就會大大聲高歌減壓

佢近期嘅歌曲 :

1. 越難越愛

2. 一加一

3. I'm yours

STAND BY ME: 多啦A夢

今個農曆年

超爸買咗飛

初一晚睇

STAND BY ME: 多啦A夢

但往戲院途中

發生一點事

二佰大洋報銷...

唯有...

擇日再睇...

今晚... 終於... 有得睇啦!!

感唔感人??

我覺得感人架!!

睇到後段

聽到有個小朋友索鼻

我望一望佢

小朋友 : 我唔係喊... 我鼻敏感咋...

我 : 哦! 紙巾?

小朋友 : 好呀, 唔該

接過紙巾後...

我 : 咦! 眼濕濕嘅?

小朋友 : 我都話鼻敏感咯!

我 : 哦... 明白... 唔阻你...

*** *** ***

我細個嗰時

成日都好想有一個叮噹喺身邊

陪我/ 同我玩

佢嘅百寶真係好好玩...

我真係好羨慕大雄架!!!

超爸的禮物

今年超爸的生日禮物係 ~ 

生日咭乙張

+

神秘禮物乙份

生日咭呢...

製作單位陣容強勁!!

由 : 

抽象派畫家 - Be 

+

烏sir sir 大嬸 - mamemo

主理

咭內其中一幅畫

咭封面 ~ key 圖

真係key真樣架!!

原圖

我同Be 認為

呢張咭係超水準作品!!!

自吹自擂中...

keke!!

保安系統

我家喺上年年底

出現咗一個傻傻哋嘅保安主任

喺屋企唔同嘅地方

安裝咗呢個密碼門鎖...

密碼門鎖分佈喺... 佢自己張床、衣櫃、房門同埋我嘅房門

仲要有唔同嘅密碼...

呢個裝喺床入面

註明 -> '出口' 嘅按鈕

因有大量嘅密碼要記

我提出抗議

所以傻人保安主任幫我做一張保安咭俾我

方便我在家中出入

識咗幾耐??

聽日默中文

我煮晚飯時

邊煮, 邊讀

Be 坐喺厨房邊默

我讀讀吓

Be 默默吓

Be 突然講 : 哎呀!呢個字寫得咁肉酸, 要擦咗去, 費事俾人打呀!

跟手擦走個字

我: 係呀! 真係會打架! 你第一日識我?

Be : 係呀! 今年我第廿二日識你囉! 媽咪!

.... 烏鴉... 飛過中........ 

媽媽幾多歲?

早兩星期

超爸要向公司証明我、Be 同佢嘅關係

所以要交結婚証書同Be 出世紙副本

已經識字嘅Be 

發現枱面上嘅結婚証書副本 (超爸隨手亂放)

俾佢見到... 我當時嘅歲數!!!

登時問 : 媽咪, 點解唔係27歲嘅??

我的天呀!!!

佢對我起疑心啦!!!

希望唔好咁快懷疑我生肖就好 lu...

耍咗一輪...

都無正面回答過

*** *** ***

今晚

睡前悄悄話

Be : 媽咪, 你幾多歲呀?

吃驚!! 又嚟...

我 : 50!

Be (瞪大對眼) : 吓, 咁老? 呃人... 你幾多歲呀?

我 : 你估吓?

Be : 40?

我 : 唔係

Be : 30?

我 : 唔係

Be : 媽咪, 你話俾我知你幾多歲啦?

我 : 48囉...

Be : 吓, 48? 咁... 爸爸幾多歲呀?

我 : 爸爸50囉...

Be (再瞪大對眼) : 50歲!!! 媽咪, 記得叫爸爸去睇醫生

 我 : 吓...  點解爸爸要睇醫生?

Be : 因為 50歲以上人士好容易生蛇

 我 : 邊個講架??

Be : 電視廣告講嘅, 佢話呢如果出過水痘... (下刪百字廣告內容...)

我 : 嗯嗯.... 瞓啦...