小心地滑

幾年前

Be 貼過一張 ｢小心地骨｣ 嘅告示俾婆婆

幾年後今日

Be 放學返嚟

拎住張紙同我講 : ｢Miffy, 今日小息時, 我個位附近有一灘水喺度, 我驚有人會跣親, 所以我畫咗張告示放喺灘水前面, 提啲同學要小心! ｣

我一望, 咦! 張告示係寫 ｢小心地滑!｣ 喎!

最搞笑係 ~ 畫咗個人講 : Hey ~~

喺非學術層面

Be 係一個幾得意嘅細路

我諗佢可以喺逆境求存嘅人... ...

十八年後。。。做番條好漢

喺好耐。。。好耐以前。。。

我有過捐血習慣。。。

但唔知點解中途中斷咗。。。

近呢幾年好想再捐返

但每次都擦身而過。。。

做唔到。。。

今日Ｂｅ考試早放學

同佢有機會見到流動捐血站

於是一股作氣。。。　捐血吧！！

雖然Ｂｅ只係陪我。。。　但佢極興奮。。。

太耐無捐過血。。。

心情有啲啲緊張

驗血紅素時。。。

男護一吱我隻手指

噴到成枱都係血。。。

我哋三人忍唔住小叫咗一聲。。。

阿男護都話篤咁耐手指第一次見咁多血。。。

我離枱時佢要抺枱。。。消毒。。。

然後見護士

一查之下。。。　原來停咗十八年。。。

估唔到十八年後。。。先做番條好漢

護士安慰我之前有１１次都算唔錯

叫我努力

以後繼續做

嗯！我會！

到插針喉時。。。　真係啲緊張架。。。

今次輕鬆啲３５０ｍｌ

（其實好鬼尷尬。。。瞓底先至知大鑊。。。個站設喺商場大堂中間，左右兩邊有扶手電梯

上落。。。二樓同扶手電梯上啲人眼仔碌碌望住你兼食花生。。。）

十幾分鐘搞掂～～

希望可以保持呢個習慣。。。

Ｂｅ長大後會有呢個意識

期待兩母子一齊捐血的日子～～

舊地重遊

小時家住西環

西環、上環、中環上學

呢十二年甩咗唔少腳毛喺路上

十年前陀Be 時

血糖測試有一次擇界

加上老豆, 嫲嫲, 姑姐們都係糖尿一族...

我一定係高危...

所以耐不耐我都會驗血糖

食清啲

近日搵返當年生Be 贊育封血糖測試報告

睇返... 原來可以繼續喺贊育做血糖測試 (當時湊Be 湊到癲咗, 未有細看內容)

即刻掛號... ...

而家... 搭地鐵好快... (但生態環境已被破壞... ...)

出口轉左...

我喺呢度出世

陀 Be 喺度做產檢 

我最怕嘅糖水...

空肚飲完... 不停反胃... 

抽兩次血... 

飲糖水前抽一次

飲糖水呆等兩小時後抽一次

姑娘手勢好到不得了!!

 做完血糖測試

叫咗老表出嚟短聚

食我老豆至愛嘅胡椒豬肚湯底粉 (去海味街必食)

食完粉同老表逛咗一陣就分手

我一人漫遊西營盤至上環

沿住中學時代上學路徑

重遊舊地

雖然桃花非依舊，面目已全非⋯⋯ 

但我仍然好享受喺我的回憶中～

～～我的快樂時代～～

交通黑點... 奪命長命斜

中秋燈籠聖地

國嘉醫院 

方展博細個學師舖頭

細個睇私家醫生嘅地方

已清拆...  

醫生養咗好多小動物 ~ 兔仔、鸚鵡、金魚... ...

沿途一路左捐、右捐 (細路嗰時又係左捐、右捐... keke)

同學住呢邊 

而家番新咗靚仔晒

以前勁舊勁陰森... ...

  

馳名嘅卜公公園 

醫學博物館~ 超靚仔... ... 眼到我心心眼... ... 

四方街... 變晒... ... 舊式棺材舖變... 西式鬼佬風格~~

游咗兩個幾鐘

慢慢行... 慢慢欣賞...

好開心、好滿足

真相大白

2009 嗰一年

老豆走咗

老媽要用結婚証書辦啲後事

所以清空銀行保險箱

終於搵到啦!!

大家拎住張幾十年前嘅紙

懷念過去... ...

好啦! 清完舊物... ... 懷念完過去... ... 掉完垃圾... ...

老媽先發現... 結婚証書... 唔見咗!!!

吓!!! 大可樂啦!!!

點搞後事呢?? (後話... ...)

老媽不停"醒"... 我...

話我整唔見佢張結婚証書... ...

到而家... 佢都耐唔耐... "哦"... 我整唔見佢張証書架... 

其實... 係... 我咩... 

*** *** ***

上星期二... 喺屋企執執吓嘢...

見到有袋 ~ 老豆留低一疊舊日首日封同郵票... ...

拎出嚟"嗒"下! 

咦... errrr... ...

中間 "zip" 咗張紙嘅... ...

一打開嚟睇... ...

嘩! 搵返啦!!! 終於搵返啦!!!

終於唔使俾少奶"哦"我啦~

好明顯係少奶自己... "zip"埋一邊... ...

我隻死貓... ... 終於可以復活了... ...

其實我好鍾意我老豆老媽張結婚証書同埋我自己出世紙

我覺得手寫字靚啲~~ 有感情啲~~

加埋皇家蓋章

成張証書 formal 啲, decent 啲

一個字 ~ 型!

　

撞車驚魂

尋日下午出城去攞兩粒 "馬拉果王"

食完晏返屋企途中

去到清水灣大廈附近

喺慢線轉個急彎落斜時

見到有棵樹瞓咗喺慢線

超爸想cut出快線又見架泥頭嚟緊

於是停車打死火燈

當架泥頭車經過時

突然... ｢嘭!｣ 一聲

全車向前衝咗一下

架車拋咗過隔離線...

超爸見到我同Be無大礙

就將架車駛回慢線

落車先發覺完來有架Jeep撞咗落我哋車尾

當時超爸驚後面有車再撞埋嚟

所以將路邊雪糕筒放响慢線轉彎同打999

好快有消防車 (原來係路過) 到場移走棵樹

我就撞完之後全身散晒

消防員幫我 Call 十字車去醫院檢查

我諗我之前睇咗成年脊醫都應該白費咗...

又要重新睇過...

超爸喺現場搞完一輪

安排埋架車拖走

先發覺條腰有啲痛

由小清同強強車佢去埋醫院檢查

（多謝老表、表姐夫到現場幫忙）

事後同超爸諗番起。。。　

如果後面架車無收油撞我哋出快線多啲啲

而架泥頭先出現

我哋一家都應該好大鑊

應該係。。。冚包散。。。

　

真係要多謝佛祖庇佑！

多謝老豆、奶奶响天上保祐！

好彩阿Be十歲仔都好鍾意坐 Car seat　（佢睇新聞話安全啲。。。）

所以佢話覺得好似過山車急停

一啲事都無

所以呢。。。　家長們

小朋友坐Car seat坐得幾大得幾大

今年流年叫超爸小心揸車

希望係應咗

而架車....

有人話要大整、有人話應該要換過架

我哋只係知道當車行職員打開車門

聞一聞

佢應該會話無得搞...

撞我哋嗰架車都好重傷架。。。 

今日去差館落完口供

返屋企食埋果王補補身

 

我有一對... ...

今朝 Be 起咗身之後

自己出廳搞搞震 (我聽到... )

到十一點佢入房睇我瞓醒未? 

(其實醒咗好耐... 但唔願郁之嘛...)

跟住佢瞓喺我隔離同我傾偈

Be : Miffy (我個新名... ,,,) 我 ... ... (下刪百字... ...)

我 : 頭先你喺度做咩??

Be : 無嘢做呀! 喺度坐, 等你囉... ... (語氣有啲心虛... ...)

我 : 坐?!... 😏 做咩講大話?? 你明明係玩緊!!!

Be : 吓... (真慌張樣) Miffy... 你點知架... ... 你明明瞓繄覺... ...

我 : 嘿嘿...  你知唔知你媽咪我... 對眼係會見到啲人哋見唔到嘅嘢架??

Be : 吓...  (假驚慌樣)... Miffy... 你睇到人哋見唔到嘅嘢架??

我 : 係呀! 

Be : (瞪眼)Miffy... 唔你通... 有陰陽眼??

我 : 吓 ... 陰陽眼 ... 

Be : 係呀! 你話你會見到啲人哋見唔到嘅嘢架嘛! 咪陰陽眼囉! 唔係陰陽眼係咩??

(真係... 一山還有一山高...  ... 佩服...)