小Be入院記 ~ 第一天

小Be由15日(星期二)晚起發燒，喺16日(星期三)晚我哋發現佢左邊頸生咗塊硬硬哋嘅野，圓周有乒乓波咁大，於是即刻去睇醫生，但何醫生當日放假，唯有睇當值醫生，醫生話佢似係淋巴腺發炎，所以要食抗生素．

但到咗今日小Be仍然持續發燒，朝早仲嘔黃膽水tim，粒乒乓波無細反大，於是我哋去見何醫生，何醫生話小Be好嚴重，要寫紙入院接受治療，

我同爸爸帶小Be去佢出世嘅醫院 ~ 瑪麗醫院，去到急症室登記後，好快有得睇醫生，醫生話要照X-ray同入院，當爸爸帶小Be去照X-ray時，聽到小Be大叫媽咪mo，爸爸mo，"驚驚" 同 "我好驚驚" + 大喊，我個心當堂"實晒"，好唔開心!!  

過咗十幾分鐘後，小Be終於出返嚟，即刻攬住我叫媽咪mo，驚驚同大喊． 到上病房，仲要檢查同抽口腔分泌物，鼻水（抽到流晒血）同 "vv"，最後一環係～抽血，由五位姑娘捉住小Be＋五花大綁．．．小Be超級驚恐＋狂喊叫媽咪mo，但我只可以企喺房外等＋心痛．．．

有位清潔嬸嬸勸籲我同爸爸去食個tea，因為可以聽唔到小Be嘅求救聲，二來可以食飽啲，有排都無得食．於是我同爸爸turbo腳去canteen．後尾返到病房，小Be已經抽完血，仲好乖無喊同醫生玩緊．然後我留守陪佢，爸爸就返屋企攞日用品．其間小Be不停咁問”爸爸嚟呀？”到８點幾爸爸返嚟買飯我食，小Be爸爸玩．到９點小Be飲完支奶奶就覺覺豬．真乖乖!!

入院前一晚的大頸 look

鐵窗... 呀唔係... 係鐵床生涯原是... 悶!!!