公公身後事 (一)

公公 (爸爸) 已經離開咗兩日, 心情尚可... 但仍然好唔捨得...   尋日下晝收到醫院電話, 公公嘅死亡證明已經出咗.  今朝一早就同超爸爸去醫院攞死亡證明, 然後去辦理正式嘅死亡證.  下晝約咗婆婆 (媽媽) 同三姨喺紅磡食飯兼傾下婆婆想點辦公公嘅事.  多得三姨嘅幫助同解釋, 知道公公有同婆婆講過下身後事, 所以我哋好快有大方向.  跟住就去咗搵殯儀經紀, 好快我哋就落實咗場地同套餐, 會以佛教形式舉行 (唔使驚... 唔係破地獄嗰種), 不過因為無火爐期同日子唔夾, 所以出殯日子定咗喺 2010年1月10, 11日舉行.  到咗嗰日, 就係見公公最後一面嘅日子... 真係捨不得... ... 泣... ...

不能忘記的一天

今日 ~ 2009年12月8日下午2時4分 ~ 我一生中不能忘記的一天...  

我最敬愛嘅爸爸喺呢一刻正式離開我 ... 亦係我最後一次捉住佢隻手 ...

呢兩日, 雖然佢無任何反應, 我仍然不停同佢講我好愛佢、好錫佢、好尊敬佢、好唔捨得佢、會好掛住佢同不停鍚佢... 唔知佢聽唔聽到同感覺得到呢?? 我諗呢一切都唔重要... 最重要係我仲可以同佢講我想講嘅說話, 無悔喇! 

我最安慰嘅係 ... 爸爸離開嘅方式可以話係無咩大痛苦, 只係唔舒服咗幾分鐘 (醫生話嘅) 跟住就瞓覺覺豬... 雖然佢無講任何說話就走咗... 我諗 (亦希望) 佢應該無任牽掛同遺憾... 樣貌亦好安詳... 所有嘅至親都趕到見最後一面.  多謝大家!!

呢兩日, 小Be 一見到公公, 都會好大聲叫公公起身, 又唱 "有仔雀仔跌落水" 同 "太陽伯伯" 俾公公聽... 又問我公公幾時起身... 等等...  小Be 同公公好有緣, 小Be 係公公嘅心肝命掟, 而小Be 都好錫公公, 佢哋二人感情好深厚... 

小Be 嘅學前日子, 公公佔咗好重要嘅位置, 公公每日教小Be 上落梳化、學企、學行、每日同小Be去散步, 每一日都好有規律.  到上學前班時, 公公風雨不改接送小Be 返學同放學.  公公曾經同我講過, 佢好開心小Be 喺佢生命中出現, 雖然係短短幾年, 但佢都好開心同珍惜每一分一秒.  佢話如果唔係小Be... 佢一早已經放棄佢嘅生命... 而小Be 呢幾日都成日同我講 : 我好掛住公公、我好鍾意公公、公公幾時出院??  公公嘅離開亦令小Be 嘅生活出現咗一啲講唔出嘅變化 (下回分解) ... 

我哋 (公公、小Be、我) 三人最後一張合照... 公公, 再見喇...            

公公 : 其實我同超爸爸都好多謝您呢幾年咁俾心機照顧小Be (仲有婆婆), 令佢有一個開心又溫暖嘅幼年期.  我好肯定, 小Be 一定唔會忘記您!!!

Hydro Boost ~~

有日, 小Be 去咗做 facial, 敷咗個 Hydro Boost Mask. 

材料 : 鼻涕、口水加口罩 = 保濕           

▼

▼

▼敷 mask 途中, 基因突變... 

▼

▼

▼最後進化成以下臉容 ...

特別嗚謝 : 海玲姐姐嘅特技效果!!