公公身後事 (一)

公公 (爸爸) 已經離開咗兩日, 心情尚可... 但仍然好唔捨得...   尋日下晝收到醫院電話, 公公嘅死亡證明已經出咗.  今朝一早就同超爸爸去醫院攞死亡證明, 然後去辦理正式嘅死亡證.  下晝約咗婆婆 (媽媽) 同三姨喺紅磡食飯兼傾下婆婆想點辦公公嘅事.  多得三姨嘅幫助同解釋, 知道公公有同婆婆講過下身後事, 所以我哋好快有大方向.  跟住就去咗搵殯儀經紀, 好快我哋就落實咗場地同套餐, 會以佛教形式舉行 (唔使驚... 唔係破地獄嗰種), 不過因為無火爐期同日子唔夾, 所以出殯日子定咗喺 2010年1月10, 11日舉行.  到咗嗰日, 就係見公公最後一面嘅日子... 真係捨不得... ... 泣... ...