獨自睡覺進度

HAPPY BIRTHDAY TO MY SISTER ~ SUE SUE

HAPPY BIRTHDAY TO 契媽 (From 小Be) 

眨吓眼 ・‥… 小 Be 自己一個喺自己房覺覺豬已經一個月多啲喇!! 佢嘅表現都算唔錯!! (我覺得...)  佢嘅進度可以話係分以下三個階段嘅  :

第一階段 : 頭兩日 ~ 可能唔知發生咩事, 所以一覺瞓到天光.  然後佢瞓醒會行過嚟我哋間房搵我 (只係頭兩日咋!!)

第二階段 : 第三日起至第一個月 ~  瞓到半夜會醒一醒, 喊一喊, 然後佢會同我講 : ｢我想同你瞓呀 ~~ 嗚...嗚... ｣, 跟住佢要攬住我喺佢張床度一齊瞓 (當然, 我會趁佢瞓冧咗之後返自己房瞓.)

第三階段 : 一個月後 ~ 基本上小Be 係會一覺瞓到天光, 每朝會喺七點零鐘醒一醒, 跟住佢會行過嚟我間房, 自己上床 "軒" 被衿.  有時, 我起身先知原來佢上咗我哋張床瞓 (仲要係瞓中間喎... ), 真係唔知佢幾時上床添  (其實, 我同超爸爸都係爛瞓一族... (*´ｪ`))

有時臨瞓前, 小Be 都會要求上我哋大床度瞓, 不過佢好好笑架! 會話瞓我哋張床 4分鐘! 果然, 佢喺我張床度碌咗一陣就話要番自己間房度瞓.  我扮嘢叫佢陪我瞓唔好走, 佢都堅持要番自己房

我成功咗啦!!! 小Be 習慣咗自己瞓啦!! 小Be, 媽咪俾8個 good 你
!!  (又忍唔住喺度自吹自擂讚自己個仔...)

小Be 成日都瞓得好冧架!! 以下幾張相係佢瞓著之後, 我開晒房啲燈影佢架!! 佢嘅睡姿都好騎哩吓架!! 不過, 呢幾張未算騎哩架喇 ...

窩心說話

今晚, 會同 Sue & 夢祝 Alice 慶祝生日, 所以放工後同同事仔一齊出中環嘅 Blue Duck Workshop度同佢哋食生日食飯, 好開心嘅一晚!! 不停食. 食. 食. 講. 講. 講. 笑. 笑. 笑!!!

十一點半, 一開門就見到小Be 由房間走出嚟叫媽咪! 跟住佢好熱情咁拖我入房, 叫我快啲搵衫同佢覺覺豬.  我哋一齊瞓喺床度, 佢同我傾偈...

小Be : ｢媽咪, 你咁夜放工嘅? 我好掛住你呀! ｣

媽咪 : ｢哦... 唔使掛住我啦!! 我哋只係夜少少先見, 唔使掛住我架!!｣

小Be : ｢咁... 你未食嘢架喎... 會好肚睋喎! ｣

媽咪 : ｢我唔係好肚睋....   ｣

小Be : ｢一陣我瞓咗, 你快啲食麵麵啦! 爸爸頭先煮咗菇菇麵, 好好味架!! ｣

媽咪 : ｢哦! 好吖, 咁你快啲瞓啦!! ｣

不消三分鐘, 小Be 已陷入昏睡嘅狀態

而我個心係異常內疚

... 因為我唔係 OT, 係出去玩嘛 ...  小Be 仲擔心我... 夜放工... 未食飯...

小Be, 媽咪聽到你講呢段說話, 覺得好窩心又內疚呢!! 將來你見倒呢篇日記唔好嬲媽咪先好呀! 知唔知呀?? 我要俾十個 good 你!! 

• 生活記敍, 
• 男

靈異事件...

小Be 耐唔耐都會發生一啲靈異事件!!  喺今晚... 又... 嚟喇...

  頭先喺屋企樓下發生嘅...

事源... 我開緊樓下大門時, 眼尾望倒小Be 剛剛踏上台階, 但隻手好似拖住一啲嘢 兼身體向後傾 (好似俾人拉住咁), 同一時間佢講嘢話 : ｢喂! 你唔好拉我啦! 我會趺架!!｣

我心諗... 你唔好嚇我啦!!! 仔... 我打開樓下大門之後, 我扮作若無其事咁叫佢入嚟 (我驚佢係整蠱我、嚇我吖嘛) , 小Be 急急腳走入嚟, 然後邊指住門外邊同我講 : ｢媽咪, 快啲關埋門, 唔好俾佢入嚟!! ｣

 邊個呀??  我唯有硬住頭皮問佢 : ｢唔俾邊個入嚟呀?? ｣ 小Be 再指住門外答 : ｢佢囉!! ｣ 我心諗... 唔係嘛... 唔好嚇我喎!!!

我哋倆母子唯有急急關門, 急急腳上樓... 其實我都唔知係咪真架... (*´ｪ`)

mamemo 重出江湖記 ~

今晚剩低我同小Be 你眼望我眼 (超爸飛走咗lu)... 同佢玩玩吓... 突然醒起... 老師有便條嚟話家長要幫忙搵啲有關花嘅資料、圖片、真花或自製花回校.  弊!!

夜夜媽... 臨時臨急去邊到買真花呢?? 就算買到, 到聽日小Be 攞返學校都變殘花啦!! 真係要諗諗計先得 ... ...    

諗到喇!!! 自小Be 出世後, 我都好耐無玩過手作仔呢家嘢啦!! 所以手痕痕玩 ~ "痴花花".  於是, 喺屋企搵到2卷唔同pattern 嘅厠紙., 其中一卷嘅 pattern 有啲特別 ~ 就係今年新年喺 apm 抽番嚟嘅開運厠紙喇!!  紅紅哋, 可以用嚟做玫瑰花喎!! 仲搵到當年插花用嘅鐵線!! 有得搞! 

剪剪... 橋橋...

▼

▼

▼

▼

▼

▼

▼

一朵小花已經誕生咗喇!!!

另一朵都出世喇!! 呢朵係康乃馨, 產自普通嘅皇冠厠紙喇!! 清清哋都唔錯吖!

小小小Be ~ 清早起床 ~ 提著花籃上市場 ~~~ (自買花姑娘曲)

k1 親子香港公園遊

每個學期嘅親子遊喺今日舉行.  行程如下 : 

未出發前, 小Be 校園生活 :