病魔入侵 @ Halloween

原本今日小Be 要參加 K2 班舉行嘅 Halloween Party !! 仲相約咗佢嘅同學話會著 Superman T-shirt (佢兩個女同學話扮公主...). 

可惜, 佢由尋晚開始... 出現多次嘔吐...  三個鐘內在睡夢時嘔咗三次！

 仲要係有兩次嘔落我地張大床度... 枕頭、床褥全報 銷... 頭兩次, 我仲未返到屋企... 十二點鐘倒收到超爸電話, 話小Be 好唔舒服, 喺我哋張床嘔咗兩次, 速回!!! 我咋咋淋返屋企啦!! 坐的士時, 小Be 打電話俾我, 一邊喪喊、一邊大叫, 問我點解仲唔返屋企、係咪唔要佢之類嘅問題...

返到屋企開門...  嘩!! 全屋充斥著嘔吐味

  一望... 見到小Be 瑟縮喺梳化... 我一抱佢... 佢即刻喊兼講 : ｢媽咪, 對唔住... 我整污穢咗你張床呀... 嗚... 嗚... ｣ (好一個先下手為強!!! 自動投案!!! 等我都交吓戲先!!)  我摸住佢個頭仔話 : ｢唔緊要, 你唔舒服嘛!!! 乖豬!!｣ 最後, 我同超爸清潔到零晨兩點幾!!

今朝, 見小Be 好似無咩事, 加上佢期待咗Halloween Party 好耐, 所以決定俾佢返學.  其實佢嘅精神真係麻麻哋... 睇下... 個樣都好病下架!!!

呢張 ~ 扮晒好精神... 其實不知幾唔掂

約十點零, 婆婆打電話俾我, 話小Be 出現發燒同嘔吐... 婆婆即刻帶佢去睇醫生.  原來又中腸病毒... 可憐嘅小Be... 開學兩個月中兩次毒... 今次又參加唔到 party!!! 佢好傷心呀!!!