iphone 17... iphone 4??

每每有新一代 iphone 面世, 上一代iphone 就好似同新iphone 有心靈感應一樣, 會陸續出現毛病... 我而家呢部iphone 4又同之前嗰兩部一樣, 一出新一代就 ~ ｢神神地｣, 真係準到不得了... 我都考慮緊轉唔轉換三星.  ah Be 聽到我同超爸對話, 佢好誠懇咁問我...
ah Be : ｢媽咪, 如果你換電話, 可唔可以留部 iphone 4 俾我呀?｣

媽咪 : ｢你要部iphone 4 嚟做咩?｣
ah Be : ｢玩遊戲...｣
媽咪 : ｢唔得喎... 校長講過小朋友唔可以有電話架...｣
ah Be : ｢咁我唔用嚟打電話啦...｣
超爸 : ｢等你大個仔, 出部 iphone 17 俾你啦!｣

ah Be : ｢爸... 爸... 我唔要 iphone 17 呀!  我淨係想要 iphone 4 咋喎...｣ (ah Be 個樣係好誠懇同無奈...)
超爸 : ｢你咁細個, 唔可以有電話架!｣

媽咪 : ｢乖仔啦, 小朋友唔需要用電話架.  大個啲先啦~~｣

ah Be : ｢咁好啦... 我唔要嘞...｣ (即時 dup 低頭無晒心機嘅樣....) 

屎撈人

尋晚, 姐姐話ah Be 件校服有屎屎, 所以喺婆婆屋企洗咗. 

ah Be 話佢喺小息時急poo poo, 所以即刻去洗手間.  去完poo poo 有抺乾淨 pat pat, 但唔知點解啲條褲會沾咗啲 poo poo.  我覺得有啲奇怪... ah Be 喺屋企都係自己抺 pat pat, 都唔會整污穢條褲.... 點解會咁架呢...   再問多兩句, 佢話佢係用學校啲厠紙 (質地麻麻地... 好易爛), 我唯有叫佢下次用自己帶嘅紙巾.

個傻豬仔仲話, 佢一出洗手間, 啲同學仔笑佢好臭... 我問佢啲同學笑佢有無唔開心?有無叫佢哋唔好笑佢??  佢話無唔開心, 無出聲!! 因為佢覺得佢已經自己學緊自己清潔, 遲啲唔會臭.  所以唔多理佢哋講嘅嘢.  (有進步... 有啲位唔使理人點睇~~ 好開心佢係一個簡單小朋友, 我有少少欣賞佢嘅情操...  不過佢嘅好勝心都仲係好強, 要繼續調節一下先~~)

♦♫⁺♦･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟﾟ･*:..｡♦♫⁺♦*ﾟ¨ﾟ･*:..｡♦♫⁺♦*ﾟ♦♫⁺♦･*:..｡♦♫⁺♦*ﾟ¨ﾟﾟ･*:..｡♦

今晚 ah Be 又同我講今日上英文堂時又去poo poo...  我問佢點同老師講要去洗手間?  佢話佢舉手, 然後同老師講 : ｢Miss Kam, 我想去大便.｣  (點解講中文嘅?)  佢仲揞住半邊嘴陰陰笑話 :  ｢媽咪, 唔使講英文架... ｣  我覺得...我想去大便... 呢句說話好核突...   ah Be 話今次用自己帶嘅紙巾, 但係條底褲仲有有少少C... 我同佢講唔好太介意, 已經有進步, 至少啲衫褲無沾到.  下次會再好啲. 

跟住我再放我隻手指喺佢個 pat pat 度 (隔住褲架...), 俾佢感受下抺pat pat 時應該喺邊一個位置有感覺.  佢應該明白下次點樣抺會好啲. 

跟住隻衰野又揞住半邊嘴陰陰笑話 :  ｢我痾完poo poo 返課室, 啱啱上完英文堂.｣ 吓...   我話下次要盡量忍到小息至去, 上堂唔可以隨便去洗手間.  遲啲老師唔俾去架.  佢話知道啦!  (真係懶人多屎尿...)

苯蛋? 定復活蛋??!!

回帶到今年四月的某一個星期六晚~~ 

某電視台首播｢那些年... 我們一起追過的女孩｣.  

我同超爸坐定定睇, 

而 ah Be就斷斷續續、邊玩邊睇.  

有一幕講柯敬騰同沈佳宜互相罵 : ｢苯蛋! ｣時,

ah Be 睇到眼定定~~ 入晒神... 

第二日朝早, 我突然聽到ah Be 大嗌 : ｢你是個復活蛋! ｣(普通話)

我立刻望住佢, 當時嘅ah Be 係用柯敬騰嘅神情+情感+語調再講一次 :  ｢你是個復活蛋! ｣(普通話)

我忍唔住大笑, 話: ｢你是個苯蛋! 呀苯蛋!! ｣(普通話) 

ah Be 即時露出尷尬嘅笑容+" R "頭, 回答: ｢係咩.... 苯蛋??｣

小一新生活...

點解咁耐無update??  一個字 ｢忙｣...   真無忙到甩轆...  每日大與小(我與Be) 都趕頭趕命...  趕返學、趕返工+放工、趕溫習、趕對功課、趕瞓覺.... (希望唔使趕投胎...)

ah Be 的轉變1.  由之前瞓十個鐘縮至九個鐘
2.  瞓覺時間十點零 -> 九點前 (希望一直保持得到....)
3.  六點三起床, 六點九出門, 七點上校車
3.  每天用半小時自己做功課 (有時要婆婆 / 姐姐幫手)
4.  每天用四十五分鐘溫書
5.  喺學校食午飯
  * 第一天 (9月10日) ~ 添咗兩次飯, 因為碟飯好細碟
  * 第二天 (9月11日) ~ 添咗一次飯, 姨姨已經俾多啲飯, 不過都係唔夠食....
  * 第三天 (9月12日) ~ 食熱狗, 無得添...
  * 第四天 (9月13日) ~ 唔夠餸... 無得添.... (做佢生意, 真係蝕大本...)
  * 第五天 (9月14日) ~ 碟飯大碟咗, 所以唔使添.... (定係佢已經失去新鮮感??)
6.  玩嘅時間大切一半... 唔夠一個鐘.... 
7.  少見咗超爸... 好慘呀...

.
mamemo 的轉變
1.  每朝六點起床... 七點半返到公司... (真係攞命...)
2.  準備少爺嘅早餐
3.  每晚七點半前要趕住返屋企... 同ah 對功課+溫習... (每日嘔十擔血... 真係命都短幾年...)
4.  盡量十一點半上床.... (唔早啲熄燈... 我驚好快冚旗...)
5.  無晒自己時間... 好慘...

其實超爸有提議過ah Be 上功課附導班, 不過我想試吓俾佢自己試下自動波先, 唔得先考慮俾佢上附導班...  其實去到最壞打算係我唔返工 / 轉兼職, 睇住+照顧佢囉....

** 喺香港讀書真係迫人... 小朋友同家長真係有沉重嘅壓力.... 我真係唔鍾意/ 想咁樣囉...

保母車閒談

ah Be 上咗小一, 好自然地轉咗保母車.

而家新坐位係司機位後面個位.

坐隔離位嘅係一個大哥哥(應該係小三學生).

大家無咩交流.

尋晚, ah Be 同爸爸講, 坐隔離嘅哥哥同佢講嘢.

超爸梗係問下佢傾啲咩...

哥哥 :  ｢吓! 又係你坐我隔離??｣

ah Be :  ｢係呀!! 坐咗一次, 就要日日坐架嘛...｣

哥哥 :  ｢哦... 係呀... ｣

** 我同超爸都覺得... ah Be 答哥哥嗰時, 應該係用平音, 俾人覺得佢有啲寸寸貢...
(唔好又話係似我呀... )

遲早呢... 佢都要俾人教訓一次...