護身符

有日

Be 突然走埋我度

放咗啲嘢喺我手中

然後講咗一句

Be : ｢媽咪, 我送呢個俾你, 你要去度邊都要帶住佢.｣

我 : ｢哦... 咩嚟架? 有用架?｣

Be : ｢呢個係我送俾你嘅護身符.  聖誕老人會保護你, 如果你想要咩禮物, 寫張紙放喺入面, 聖誕老人就會送俾你架. ｣

我 : ｢哦! 多謝你!｣

Be : ｢記得要日日帶住佢呀!｣

我 : ｢知道!｣

直到而家

呢個護身符仲喺我個袋入面

日日跟住我

Be 耐唔耐都會問我有無帶住護身符

知唔知呢個護身符嘅原身係咩嚟架??

其實佢係一個曲奇袋...

學校 X'mas Party 中

同學送俾 Be 嘅 Ginger Bread Cookie

我之前講過

呢個鹿仔袋好靚

所以佢食完塊餅

就送咗個袋俾我囉~~

keke

Happy 10th Anniversary

2003年9月嘅某一日

有兩個怪人

行行下街

有人問 : 不如結婚咯?

有人答 : 好吖!

(真係唔記得邊個問?邊個答?)

各自歸家向父母請示

*** *** ***

星期六

去金鐘登記

隨意選咗一日... 

回家後通知父母

媽媽好快回覆 : 妹呀! 嗰日係大破日呀!!  改過第二日好唔好??

(哦... 原來係大破日... 唔怪之得... 全日時間任揀啦!)

我 : 好! 有無日子俾我呢?

媽 : 有呀! xx, xx, xx, xx 同 xx 啦!

*** *** ***

一星期後

二人俾錢再改

年尾流流

好日子全滿...

點算??!!

突然

哥哥仔話 : 你想要嘅其中一個日子, 有人改期, 有個時間, 係細房, 要唔要??

好! 要呀! 唔該!!

*** *** ***

2003年12月

註冊當日

好蝦碌...

時間好緊湊...

証婚人遲到...

(好彩, 新郎搭地鐵... 如果唔係... 會遲到架...)

註冊時間到... 

未齊人...

正要開始行禮時

有位太太抱住兩個仔撞門衝入嚟

場面異常爆笑!!

行完禮

影吓相

兩家人... (約50人...)

去附近飲茶後各自回家

*** *** ***

年半後的一天

超老媽對超爸 : 我想喺走之前, 食埋你正式嗰餐飯...

我回家請示過父母

佢哋都覺得係時候要請親戚食飯

*** *** ***

我老媽搵咗個最快嘅吉日俾超老爸最後審核

我同超爸極速搵場, 搵衫, 搵酒等

(我都租咗套褂著架!  keke)

十圍嘅晚宴

喺十日後誕生...

嗰晚

大家都好開心...

早知... 

我開多兩圍... 

我老豆會仲開心~~

*** *** ***

之後嘅事

就係超老媽喺個半月後走咗

一年幾後小怪人出世

四年後老豆走埋...

*** *** ***

2003 - 2013

係我人生好重要嘅十年...

人生大事都喺呢十年

我會好好記住

有套一戲我好鍾意

"每當變幻時"

每次睇

都好有 feel~~

*** *** ***

十年啦!!

 Happy 10th Anniversary 

Y! blog回憶

今日(26-12-2013)

Y! blog 正式落幕...

我都有啲唔捨得...

不竟... 五年多嘅感情...

留低七百幾條腳毛(篇日誌) 喺 Y!...

99% 係 Be 歲半至七歲嘅童年回憶...

*** *** ***

當年 (2008)

因為朋友仔為兒子開 blog

叫我去撐場

撐撐下

喺4月

我自己開埋 blog 添...

一寫就寫到而家

中途都有諗過放棄架...

不過...

我又想盡啲綿力

錢... 我就無得留俾 Be...

只可以留起啲 Be 嘅童年點滴

留俾佢(我)將來睇

*** *** ***

因為 Y! blog

我識咗幾位(應該係)啱/似嘴型嘅 bloggers

(我係怪人嘛... 唔易搵朋友...)

同佢哋說話唔多

簡單溝通

已經明晒

已經好滿足~~

可能係同一條路... (我覺得...)

起碼搬到嚟呢度

大家都仲會保持聯絡

得閒搭下訕...

真係笑呵呵~~

又時超爸都以為我傻的嗎...

望住個 "芒" 偷笑...

*** *** ***

Y! blog

永遠懷念你~~

多謝你完成歷史任務!

永遠埋葬喺時間巨輪下

安息吧!

冬至澳門遊

今年第二次去澳門

七月因公事去咗兩日...

但無咩點玩過就走...

十月超爸見 Sheraton Macau

做緊特價

於是問問我家老表們有興趣嗎??

各家庭湧躍參加

鐵定十二月廿日至廿二日

來一個冬至澳門遊

我哋又一行廿幾人

分三批登陸濠江

我一家係第一梯隊其中之一 

六點到酒店攞房之後

我哋即刻去飛的去黑沙環嘅林記燒烤

大鄉里的我們...

個個仲以為林記仲喺... 黑沙灣...

而家澳門飛的都好高消費架...

因我哋人多

回程時我哋坐巴士去碼頭轉酒店車返歸

一上橋就見到放煙花

原來係澳門回歸呀!!

因慶賀回歸

我房中的 Be 為表祝賀

佢都安排咗特備節目...

九次煙花... 

+ 嘔三次...

其實食晚飯途中

佢已經開始肚仔痛...

返到酒店

自己去厠所扣喉

(有次腸胃炎教佢嘔唔出扣喉, 所以佢識去扣囉...)

我成晚就係瞓一陣就俾 Be 叫起身陪佢去厠所

** 放煙花 **

Be 都係不適而去澳門...

次次都...  

到第二日

佢嘅情況已經好咗好多

全日只係放咗三、四次煙花

嗰幾日

Be自己都好乖好聽話

佢食得好清同好少

(喺病同受傷嘅情況底下, 佢係一個好自制嘅小朋友)

*** *** ***

第二日十時出發

大家好想去飲茶

坐酒店車出新馬路

但可惜... 成個澳門人山人海...

無茶飲...

照原定計劃

食葡菜

今次去 Escada

我鍾意佢環境清優

味道唔錯~~

食完之後

突然有團友想去 ~ 大三巴

有部份團友 (如我家...) 去到大三巴腳...底... 已却步...

真係好很多人...

好似去咗聖城朝聖咁...

好快我哋又急急脚落山...

趕下一個景點...

終於到達此行重點節目 : 澳門科學館

呢個時候

第二、三梯隊都嚟到會合 ~ 齊人!!

成班細路開心興奮到咩都摸、咩都玩...

玩到五點半

即坐巴士出返新馬路食晚飯

途經齒香

例牌入去買鹹濕嘢... 

喺陶陶居食完晚飯

明姨丈有項超級工程要做

所以我哋各人要等一等

呢三位年紀最小嘅團友喺度做咩??

佢哋表面係睇緊龍蝦同魚

實質係... 當有龍蝦、魚被師父撈起時...

佢哋三個會立即雙手合十

為被撈起嘅龍蝦、魚祈禱...

等咗一陣

明姨丈終於完成佢嘅 ~ 超級工程

就係成功買到... 明記牛什啦!!

唔知點解...

大家明明話好飽...

但兩盒牛什、魚旦、蘿蔔...

不消十分鐘就... 落晒肚...

(呢個算係我家族嘅特點, 永遠都係一呼百應... 唔單只係食咁簡單...)

大家又喺十月初五街附近到逛下、買下嘢

跟住我又去咗食我至鍾意嘅碗仔翅

(難得唔使排隊... 近幾年每次經過都排到癲... 

所以無食好耐... 已經無以前咁好食啦...)

返到酒店房

感到好 warm 呀~~

啲衫摺好放喺一邊

樂生好乖咁瞓喺被窩度架

簡單刷洗完

我哋有部份人去咗威尼斯人嘅 ~ 飄雪樂園

*** *** ***

第三日

瞓到自然醒

十二時準則到達 Galaxy 嘅 Festiva 食 Brunch~~

大人 $218 + 1 

用 BOC 卡有九折

咩美食都有

只係無生蠔

抵過喺香港食

Hea 到差不多三點

坐四點船

回家做冬啦~~

P2 X'mas Party

一年一度聖誕節又快到啦~~

Be 學校喺今日開  X'mas Party

每個學生可預先通知班主任

將會帶什麼小食回校

今年 Be 俾咗兩條路我揀...

一揀 : 啫喱糖

二揀 : 菠蘿腸仔

今次我揀 ~ 菠蘿腸仔

*** *** ***

喺尋日下午

喺屋企同 Be 佈置聖誕樹

同埋

佢要自己包小禮物

送俾曾經被佢邀請嗰12位同學仔

棵樹靚唔靚?? 

小禮物包有: 餅s、一支鉛筆、一塊擦子膠 

夜晚

同Be 一齊篤篤

完成啦~~ 靚唔靚呀?? 

多得吉吉島 $12蚊店啲音符籤 

小朋友真係好簡單～～

區區一盒菠蘿腸仔

Be同我講：「媽咪，你好勁呀！」

唔知佢聽朝見到同學仔帶嘅媽咪牌 cupcakes、cookies lollipops、ginger breads之後

佢仲會唔會覺得媽咪好勁呢? (下圖)

今日放學返嚟

佢得到好多救濟品~~

有無數嘅餅s + 糖s...

又可以慳好多下午茶錢 

慶生~~

從來同媽媽慶生

都係用新曆

今日至知佢舊曆係幾時

今晚做冬

順便同佢做生日

因為一到年尾

係媽媽齋期

佢好少肯出街食飯

因為無姐姐

我要求出街食飯

今晚媽媽好開心

全晚笑咪咪

從佢同兩個孫仔嘅合照睇到

佢真係好開心

(係呢四年嚟最開心嘅相)

祝媽媽 : 身體健康! 心境開朗!! 心想事成

B 從哪裡來??

又係尋日...

做功課前...

Be :「媽媽, 我知我係點樣出世嘅!」

我 :「嗯, 點出呢??」

Be :「我係由你粒卵子加爸爸粒精子撞出嚟架嘛!」

。。。(☉_☉)

我 :「咁... 你都知... 」

Be (不以為然...) :「係呀! 老師講架!」

然後...

佢一邊摸我個肚

一邊講 :「bb, 你快啲出嚟啦~~ 哥哥等咗你好耐啦...」

再錫咗我個肚一啖... 

我... 又再無言...

 *** *** ***

到埋位做功課

隻衰嘢又喺度支支佐佐

扭扭擰擰

我忍唔住拍咗一下枱

我 :「你快啲... 啦...」

(自小一起, 我每日至少講十次...)

佢碼上接 :「嗱... 媽咪, 你咁嬲... 生唔到卵子架... 我會無細佬架...」

我真係俾佢... 激... C... 啦!!!

聖誕 BBQ 活動

十二月十日

一名小二學生

未經家長同意

私自在校內籌備聖誕 BBQ 活動

仲自備參加者名單

日期 : 十二月十四日

地點 : 自家天台

節目 : BBQ, 玩遊戲, 抽獎, 講鬼故 (唔知點解...)

仲要喺星期五之前發聖誕卡 

(內容有邀請事宜...)

我... 好想知...

屋企點裝你十幾個同學+超過十個家長呀？

我唯有同佢解釋

佢想開 party 無問題

但要事先得我哋同意

+

大家商量好細節 (日期, 地點等...)

跟住

再傾吓可唔可以改期

最後決定...

要改期.../ 取消

因為唔想俾佢覺得話有就有咁容易

佢仲提議屋企載唔到四十人

可以訂 Pizza Exprexx/ Pizza Hxt/ California Pixxa

(我真係反晒眼...)

同佢講 : 要好多錢架...

*** *** ***

晚上

收到兩三個家長查詢 BBQ party...

我唯有硬著頭皮...

同家長解釋咗件事

大家都覺得好搞笑

明白晒...

*** *** ***

今日 (十二月十一日)

Be一落校車

Be 幽幽的:「媽媽，我同同學講咗聖誕party要臨時取消, 所有同學都問我點解要取消⋯ 連無邀請嘅同同學都問⋯ 我話因為有急事, 所以要取消。佢哋又問我咩急事, 我話係急事囉。」

我:「唔一定係取消，可能係改期，今個星期六太急，唔夠時間準備。盡量12月內，OK?」

Be 幽幽的:「um... 如果12月內開唔到，咁以後都唔使搞⋯」

(恐嚇我!!! )

我（臉色一沉...）:「因為要搵場地⋯（再解釋⋯ 籌備活動需要時間、金錢... 下刪百字⋯）」

Be: 「媽媽，你做咩黑臉？你教過我俾人打係唔可以還手㗎嘛！所以你唔可以黑返我臉，我知我黑臉都唔啱！我地原諒大家啦！好唔好？好唔好？？」

(我... 更加... )

我 :「好... 好... 好...）敷衍了事...

劇情去到呢度⋯ 我⋯ 欲哭無涙⋯ 

如果 Be 能夠將呢個 IQ轉數放一點在學業上

前途肯定無限⋯ (ｰｰ;)

呢張就係 Be 寫俾同學填名嘅 Party 報名紙

(其實, 我同超爸有少少欣賞佢嘅統籌能力架...)