校外課堂

回帶返1月10日星期四, ah Be 班會去香港動植物公園上校外課堂.  早喺上年11月, 學校已經發通告俾家長, 誠徵家長義工幫手喺呢堂維持秩序.  ah Be 要求我做家長義工, 佢話我可以同佢一齊上堂, 佢會好開心~~ 我都覺得要珍惜佢仲好癡我嘅時間, 所以我就請假一天陪佢.

當日啲小朋友都好乖同好聽話, 唔百厭, 只係鍾意跑同埋傾偈 (我哋大人都鍾意傾偈啦! 更何況佢哋只係6歲人仔呢~~~)  仲有... 仲有... 班小男孩keep 住一路跑一路跳 Gangnam Style 囉...  (ah Be 未喺屋企睇過條片... 但都識識地跳...... 好驚嚇囉...)  相反班小女孩 (唔多過10個) 真係定好多, 好淡定架!! (更顯得班男孩子... low B...)

原來動植物公園係有一個教育中心, 仲安排咗有一位導賞員喺中心內嘅課室講解何謂哺乳類動物/ 爬行類動物.  然後帶小朋友去睇動物, 邊行邊講解.  仲會有問答遊戲, 令每一位小朋友都要聽書同埋有小禮物 (就係右下角嘅小動物手指套嘞! 可惜烏龍Be 回校後即日已經唔見咗...) ~~

一班小朋友上校外課堂上得好開心~~ 極度興奮~~ 回程時各人不停討論哺乳類動物/ 爬行類動物嘅分別~~  真係一個好開心嘅學習~~

今次做完家長義工之後, 感覺都好 OK. 可以知多啲 ah Be 嘅校園生活, 可以瞭解多啲.  啲家長都好好人呀!! 大家都好客氣, 又唔使勉強搵野講.  我鍾意呀~~