19/2/2021 星期五
中午同家人食完飯，返到公司無耐開始肚痛。
我以為食錯野，瀉咗一次。
個人好唔舒服，開始胃痛。
一到六點，即刻返屋企。
情況好似上年九月，胃炎一樣嘅唔舒服。
即時食返胃炎藥，有少少舒緩。
但瞓得好差。
第二日，都仲係唔舒服，肚脹。
21/2/2021 星期日
頂唔住去搵何醫生
何醫生話如果食咗佢嘅藥無好轉
聽日要返去睇專科
（上年9月胃炎，佢介紹一位好嘅專科醫生俾我，順道做咗身體檢查）
星期一病假抖咗一日（無咁痛）
23/2/2021
返公司開會
連續2日0930～1800
老細見我面青青叫我唔好返
第二朝要做presentation
點能夠唔返呢 （香港人真係好鍾意返工？ ！🙄 做咩咁有責任心？！）
24/2/2021
朝早present完，發覺胃痛處轉移到右邊。
食完中午飯，入返會議室
出現發冷手震，覺得有啲古怪... ...？！
即時打電話約專科醫生。
同姑娘講我好唔舒服叫佢俾個明天快期我
1800開完會， 9秒9搭的士返屋企。
呢幾日當然俾Chiu ba 日哦夜哦...... 叫我睇醫生。
第二朝11:00去到見洪醫生
一入房，洪醫生話已經重溫左上一次嘅驗身報告。
佢話我應該唔係胃痛！！
即時幫我檢查，問我今日有冇食嘢同飲咗幾多水？
佢話我應該係個膽有事。
叫我出返去等，姑娘幫我安排入院
提我千祈唔好再食嘢、飲水......
姑娘安排好我入院，即刻去醫院
一落的士，又再出現發冷手震。
入醫院之前，
要做一次快速測試，要等兩個小時...
好彩只係等咗一個鐘頭就收到SMS證明無武肺🎉
唔知係咪人一到醫院，即刻鬆懈左...
病徵浮晒出嚟！
登記入院時，突然發燒🤒️
登記員即時拒絕我入院，要我去急症室。
我已經辛苦到唔想再郁，賴死唔走...
我話因為我炎症會發燒，所以醫生叫我入院
叫佢打電話俾洪醫生，佢不情不願😡
（我到而家都好想投訴佢）
去照肺，確定無花。
最後佢聯絡洪醫生
因為我發燒，唔可以住大房
洪醫生擔心我負擔唔起住單人房嘅價錢
（所有費用要加55%附加費）
我話冇問題！（當時已經辛苦到唔想再郁）
洪醫生承諾，如果驗完血證明我嘅發燒係因為炎症會即時幫我轉返四人房。
最後由中午12點幾搞到3點先至上到房... ...
上房之後，
一邊種豆吊鹽水、抽血，一邊Con call同一個 teams meeting （依家諗返起都覺得癲！）
晏啲再落去照超聲波。
5點幾洪醫生到，睇完我個驗血同超聲波報告
佢話我係急性+慢性膽囊發炎同細菌入血、腹腔，
佢要轉介我睇肝膽胰專科—林醫生，
林醫生做緊手術，佢一陣間會嚟睇我。
約7點林醫生嚟到睇完我啲報告，同我講我要做手術，叫我考慮。
等Chiu ba 到，同佢商量，跟住林醫生話其實冇得揀，因為細菌已經入咗血。
我仲天真地問林醫生係咪聽朝早做手術？
佢話唔係，係而家即刻幫我搵手術室做手術。
佢仲同一時間幫我安排轉四人房，等我唔需要負擔55%附加費。
跟住姑娘入嚟安排我做手術嘅事宜。
最後夜晚9:00入手術室12:00零出返嚟......
入到病房，迷迷糊糊叫Chiu ba 幫我洗咗臉丶換口罩。
跟住佢就返屋企。
成晚啲姑娘不停嚟同我做檢查，
因為腹腔細菌感染，脹到好硬。
姑娘們都好好奇🙄
第二朝，洪醫生以私人性質嚟睇我
第一句係話: 「xx, 你知唔知你係敗血病，你好危險。遲多半日，你真係會死。下次唔好忍痛啦！你應該唔係痛左兩日咁簡單！下次乖啲啦！唔舒服唔好拖，快啲睇醫生。」
跟住到林醫生巡房，第一句「xx, 你知唔知你係敗血病！會死架！點解咁遲先至睇醫生，你嘅痛唔係一兩日咁簡單，起碼痛咗五、六，都唔睇醫生？今次真係好好彩冇事！」
最後住咗五日四夜，吊咗五日鹽水丶四日抗生素。
出院後，食咗10日抗生素。
休息咗差不多三個星期先至返工。
Chiu ba已經警告我
休息期間唔可以睇公司email，否則幫我遞辭職信。🤭（之但係，而家返工做到嘔凸🤮）
其實到依家身體仍然未康復，好容易疲倦、傷口會痛、血液未回復正常，瞓得好差。
今次死過翻生，我真係要好好善待自己。
![[書呆子]](https://blogger.googleusercontent.com/img/proxy/AVvXsEhczd05L7aMw8F9lwFdRFCQUlnTh4ip2PbVQI9Piyx3ocAlb4z1CxKoyc-Zc3_Eb8K3c90Uw2PpOVnzlYVkTlmvjYceQ8vVtErT8l1fXuMSpzKKksuxulgkBHrFqqcVCf42No_QTuzMLCO1c117jIDpRv1CyF5HPvRT6mAqyeepPueb5i3K7UIG1nGDQrc=)
