大冬瓜跌落床

小Be 由細到大, 人生三件事 ~ 食、瞓、拉都非常之好, 完全無問題 (touch wood...)!! 特別係瞓覺, 每每入睡後, 佢會進入忘我境界!!!

例子一 : BB 時, 喺姨媽家中, 小Be 可以睡在麻雀枱旁瞓晏覺, 約一個半鐘頭 (各姨婆同公公牌照打!!)

例子二 : 上年(2010)年廿八零晨三點零, 超爸居然喺入睡中嘅小Be 隔離揼+電批上書架同櫃!!! 但小Be 仍然係瞓到扯鼻鼾!! 真係有少少佩服佢!!

昨晚小Be 又發生爛瞓事件!! 就係 ~ 大冬瓜跌落床!!! 話說昨晚我陪小Be 喺我張床到覺覺豬 (我瞓前先移動佢去佢自己張床!!). 佢瞓著咗之後, 我出咗廳睇電視.  睇咗一陣, 我聽到 boom 一聲!!! 有巨物跌咗落地呀 !!

咋咋淋入房一睇...

OMG!!! 點解呢個小朋友跌落地都唔醒架!! 我唯有抱起佢左檢查、右檢查, 捽捽佢個頭邊問哩度痛唔痛、嗰度痛唔痛, 佢只係迷迷糊糊答我唔痛就無再理我嘞!! 

到今朝我同佢講番件事, 佢堅稱係佢自己爬落床! 唔係爛瞓跌落床!!! 真係一個要臉子的人!!!

超爸離開咗我哋??!! 啋!啋!啋!

今日下午超爸起程去沙巴開會, 要下星期二至返嚟.  所以我喺早兩日開始, 我耐唔耐提 ah Be 要乖乖陪多啲超爸, 因為爸爸會去沙巴開會, 嚟緊有幾日爸爸會唔喺屋企, 見唔到爸爸, 要下星期二先見到架!! ah Be 完全收到我嘅意思!!

到咗今晚, 飲完奶佢... 倦意正濃... 開始發眼瞓癲之際... 突然雙眼通紅... 一對水汪汪的眼睛望住問我... 

ah Be : ｢媽咪, 爸爸已經離開咗我哋... ｣

mamemo :  ｢吓... ｣ (唔知點回應之際...)

ah Be : ｢點解爸爸唔會再返嚟嘅?? 佢唔要我哋嗱?? ｣

mamemo :  ｢啋!啋!啋! 爸爸去咗第二度開會, 呢幾晚唔返嚟瞓之嘛!! 唔係唔再返嚟呀!!｣ (忍唔住大笑

)

ah Be : ｢哦!!｣ (破涕而笑!!)

mamemo :  ｢快啲上床瞓覺, 你真係好眼瞓!!｣

跟住佢乖乖上床, 九秒九瞓咗!!!

ah Be~K2生活學習進度 (二)

講完自理能力, 又講下ah Be 瞓覺習慣.  喺上年二月農曆 (2010) 新年開始, 佢已經有自己一間房, 佢有時都可以自己一個人瞓.  但... 唔知點解最近佢晚晚瞓到兩點零就走過嚟一齊瞓, 加上佢又大個咗好多同好反瞓, 攪到我同超爸周身骨痛... 我條腰痛到斷咗咁... 真係要諗諗計...

喺上星期二晚 (22-3-2011), 我同 ah Be 講, 佢大個仔嘞! 唔可以晚晚都同爸爸媽媽瞓, 媽咪條腰痛到好似斷咗, 爸爸又瞓得唔好無精神返工  如果佢可以自己瞓, 可以獨立啲自己照顧自己, 即係代表佢大個仔, 可以做大哥哥.  咁爸爸同媽咪可以嘗試... 睇吓可唔可以生多個細佬俾佢 (嘩... 真係玩得好大呀... 如果生唔到... 點算呢...).  佢即時點頭同話 : ｢我有信心!!!｣

不過... ah Be 下一句就同我講 : ｢咁你要同爸爸再結婚喎!! ｣

mamemo : ｢點解要再結婚?? ｣

ah Be : ｢因為要多個細佬嘛!!｣

mamemo : ｢吓... 爸爸同媽媽結咗喎, 唔使再結婚都可以生多個細佬架!!｣

ah Be : ｢唔得架... 一次呢... 一個BB架...｣

mamemo : ｢哦... 哦... 快啲瞓!! 媽咪一陣抱你返自己房自己瞓, 得唔得?? ｣

ah Be 好堅定咁答 : ｢得!｣

言歸正傳, 講返佢嘅獨自睡覺進度先 ~~

第一晚 (22-3), 瞓到半夜, ah Be 忍唔住過咗嚟... 不過, 碌咗幾分鐘之後, 同我講話佢要返自己房瞓, 叫我陪佢一陣! ok 無問題!! 佢好快喺自己房瞓返, 仲一覺瞓到七點幾!!! 真係要讚一讚!!

第二晚起, 晚晚喺自己房瞓覺, 一覺瞓到七點幾, 然後過嚟我哋房繼續瞓.  咁都好吖!! 已經有好大嘅進步嘞!! 不過, 都有零碎一晚半晚會過一過嚟我哋房碌一碌, 好彩最後佢都會返自己房瞓!! 我真係要俾 100 個 good  佢!! 叻仔!!!

ah Be, 希望你繼續努力!! 加油!!

報告完畢!!!

ah Be 自畫生日咭

Sue 同契媽係今日嘅, ah Be 話要畫生日咭俾佢哋!!

又係畫車... 真係悶... 悶... 悶...

畫咗個咭面喇!!

張咭有馬路、草、的士、長貨櫃車同短貨櫃車, 中間圓圓哋係士多啤梨蛋糕

ah Be 話, 台頭唔寫契媽, 要寫 JXXX!! 仲有花花添

除咗契媽, ah Be 仲畫咗俾小龍同 Sue ee, 因為未送到當時人手, 所以不便公開!!

ah Be~K2生活學習進度 (一)

我放長假嘅其中一個原因係 ah Be.   因為 ah Be 已經 K2, 我想趁機觀察一下佢日常生活嘅習慣同個性.  雖然平時佢喺我面前嘅行為都 ok, 唔係好曳.  喺屋企都好獨立.  但喺婆婆口中知道佢有時都幾曳同大脾氣!!

有時仲會蝦工人姐姐!!

其實佢真係好蠱惑吓架, 正一表面善良, 內裡蠱惑!!  所以我想留喺屋企自己照顧佢、矯正佢嘅道德價值觀同壞行為!!

今日會先講一下 ah Be 喺自理能力方面嘅進度.  喺日常生活上, 佢喺屋企都會自己換褲 (唔識換衫)、著鞋著襪、除鞋除襪、沖涼同幫手做少量家務, 如幫我執拾屋企、搬污穢衫入洗衣機、將洗好嘅衫由洗衣機搬出露台俾我曬衣服.

經過呢十四日嘅相處同訓練, ah Be 嘅自理能力又進步咗一大步!! 每日早、晚會自己擦牙、洗臉  (好彩之前同佢去做牙齒檢查時, 有牙醫配合. 牙醫同佢講佢大個仔自己擦牙先叻叻!! 自始, 佢就自己擦牙嘞!! 有時我都要幫佢補擦架!!)

一定要自己食飯 (有時喺婆婆屋企, 佢要扭姐姐餵食飯架...)

已經學識自己除衫同著衫

自己換褲著褲

仲會著襪著鞋

自己扣好外套扭

每次換完衫, 我都會要求佢自己摺好剛除低嘅衫褲, 同埋擺番啲摺好嘅衫褲入自己間房.  雖然佢仲未掌握到摺衫技巧, 不過都摺到個雛型, 算佢啦!

除此之外, ah Be 依家啲手尾都好咗好多, 佢食完茶點會放好食具、做完功課智放好書簿筆袋等等...  佢仲會幫我手煮飯, 幫手到雪櫃取出雞蛋、肉類等等... 希望而家教佢嘅自理能力佢會一路跟住落去啦!! ah Be, 你要加油呀!!!

三月生日會+園會

唔遲唔早, 啱啱喺我放假嘅第二日, ah Be 學校就有園會表演兼三月生日會!! 送咗 ah Be 上校車, 出去同超爸食咗個 lunch, 然後出發去 ah Be 學校睇表演.  上到學校唔遲唔早時間啱啱好!! 睇咗兩班就到 ah Be 嗰班表演.

但係... 今日個位咁遠嘅??? 無咗拍攝區嘅???!!! 我已經盡量 zoom ... 都係得遠睇... ah Be 去咗邊?? 咪係由左起第四個頭嗰位大頭仔!

唱完兩首歌, 準備落台

表演完畢, ah Be 班等緊返課室

返到課室準備唱生日歌同食蛋糕, 所以攞條濕手巾出嚟

去完手洗手間嘅 ah Be

課室門外偷拍嘅ah Be, 好似好開心咁喎!!

嘩!! 有生日禮物包呀!!!

等到佢放學, 我哋就開開心心去買餸同去金舖買BB金手鐲睇小兔弟, 然後坐巴士反屋企!!

K2上學期之學習活動評估家長會

今朝... 我一臉 ~ 無水洗臉嘅表情坐底...  心想... 今次真係凶多吉少...  點知...  邱老師一開口就讚 ah Be 有進步

仲要係對比起 K1, 佢有好大嘅進步!!!  我即時瞪大眼 ~ 一個難以置信嘅表情望住邱老師... 
邱老師好肯定咁再講一次 : ah Be 進步咗好多呀!!   普通話對答能力都唔錯!!  呢一刻真係好喜出望外呀 ~~ 再睇真啲! 今次學習活動評估嘅評分都唔錯呀!!

我同老師講佢嘅專主力都係低...  邱老師居然話 ah Be 仲細, 專主力低少少係正常嘅...  (我另一個 surprise!!) 另外, K2 起開始學做句, ah Be 未 pick up 得好好, 不過都係正常嘅!! 同埋佢仲未適應課室內不同學習區嘅規舉, 不過都係正常嘅!! (唔係嘛!!!)

今次表現評分嘅19個項目中, 有4個表現3分, 其他15個項目係4分滿分.

喺英文堂方面, 因為排成四十幾人先見面... 所以我無見 Mr Ian 呀!! 不過睇評估表就發現 ah Be 嘅英文相對比較差啲!! ah Be 依家已經惡補英文中, 希望佢下學期會好好多啦!! ah Be, 你要加油呀!!! 爸媽會支持你!!!

ah Be 上堂時情況!! 好似好專心咁喎!!!