申請小一入學學生相 (2)

點解有第二集?? 咪係我打完第一集之後... 望吓... 望吓... 諗吓... 諗吓... 覺得有啲唔多妥... 張相好似唔多 formal... 所以搵我啲表姐攞意見... 最後定案 ~~ 著校服再影過!!!

喺前晚 (20/6), 咋咋淋同超爸趕放工, 喺 FOTOMAX 關門前一刻同小 Be 衝入去 (店員以為我哋打劫... (*´ｪ`)), 因為小 Be 套校服係白色, 所以我哋試咗粉紅色同藍色做背景. 小 Be 好想用藍色做背景, 不過睇完實相之後, 我同超爸都覺得粉紅色背景嘅效果好啲, 所以我哋揀咗呢一張, 靚唔靚呢??

多謝俾過意見我嘅 Ter 姨媽、小清姨姨同小柔媽!! 感淚...

2011 父親節

回帶到 19-6-2011

Happy Father's Day to CHIU BABA!!!

爺爺, 父親節快樂!!!

超爸一起身, ah Be 立即端上由 mamemo+ah Be 自家制嘅咭, 送俾超爸, 加上一句 : ｢Happy Father's Day !!｣ + 香吻一個!!

一張簡陋嘅自家制咭, 送上我同ah Be嘅濃濃心意

原定同爺爺飲茶, 但最後都取消咗... 我就話不如去見一見公公啦!! 於是我哋齊齊出發(連婆婆), 我仲買咗三色花俾老豆添!!

老豆, 你鍾唔鍾意呀?? I love you!!!

公公, ah Be畫咗幅畫俾你呀!! 靚唔靚呢?? 鍾唔鍾意呀??

探完公公, 返歸休息+溫習功課. 近黃昏, 我哋再出發去會合桐桐姐姐一家食晚飯!!

ah Be 同佢身上隻 monster 圖案好相似架!!

是晚的桐桐姐姐 ~ 好 lady 啊~~~

申請小一入學學生相 (1)

終於... 都到我哋啦...

 眨吓眼... ah Be喺九月會係一個 K3 學生啦!! 即係話我哋要準備考小學喇!!! 要為做 ｢小學雞｣作好準備!! 

因為ah Be 讀呢間幼稚園唔需要每年交學生相 (都幾環保同慳錢架!!), 佢一直都係用緊兩歲幾時影嘅學生相(N1), 所以我喺星期二帶佢去影近照, 作申請小一入學用...  ah Be 好緊張, 佢知道係用嚟考小學 (佢好驚而家間學校唔收佢讀小學...) 所以臨影相前, 佢自己都有練習過用咩笑容好啲 , 仲問我 O 唔 OK添!!

唔係嘛!! 咁都瞓到??!!

以下內容涉及驚嚇, 敬請留意...

剛剛準備入房移動 ah Be 返自己房瞓... 一開房門...

唔係嘛!! 咁都瞓到??!! 條頸以上嘅頭係倒吊喺床邊喎!!! ah Be 你係咪想嚇C mamemo 呀???

▼

▼

▼

▼

▼

▼

▼

▼

▼

▼

▼

▼

影完呢兩張相, 即刻搬佢返自己張床仔... 安全晒...  好彩及早發現, 唔係又有個冬瓜頭跌落...

註 : 唔好話我變態呀! 咁都影相... 我只係想幫 ah Be 留底 ｢珍貴時刻｣, 等佢第時大個咗都知道 (睇番) 自己小時嘅點滴... (重點係 ~ 留俾我自己睇番... 以我嘅記憶力... 我諗我好快已經唔記得晒 lu....)

窩心的餅碎!!

尋晚放工接小Be 時, 佢一見我, 就送上食物盒 + 對我講 : ｢媽咪, 呢盒餅乾係我俾你聽朝做早餐食架!!｣

我 : ｢嘩! 好開心呀!! BB, 多謝你呀!!!｣

小Be : ｢你記得食呀, 知唔知道!!｣

我 : ｢知道, 多謝你呀!!!｣

我今朝開蓋一望 

 ~~ 餅碎!!! 其實啲餅乾係小Be尋日學校啲茶點嚟架, 不過佢食唔晒啲餅乾, 所以攞返嚟同我分享, 但又攞得唔小心, 變咗餅碎... 雖然只係餅碎. 但我都覺得好窩心囉...

小小義工日@2011

一年一/二度嘅義工日又到嘞!! 我哋同心家相約一齊食 lunch, 然後一齊出發!!!

去到中心, 等緊收 briefing!! 玩陣先!!

收到個服務對象 file 啦!! file 面有探訪指引 ~

仲有義工秘笈添呀!!!

最後係有服務對象嘅資料, 今次係有五位對象 (上幾次係三位, 今次多咗兩位)

又係呢個 backdrop, 只係日期唔同咗...

今次個禮物包多咗少少嘢... 就係一包仔 ~ 米...

因為今次禮物包多咗米同多咗兩位服務對象, 所以都幾重下!! 因為超爸有少少腸胃炎, 佢都嚟參與, 所以我幫佢攞兩大袋!!

禮物包中的禮物

ah Be 都有幫我攞架... 不過實在太重嘞... 好快俾返我!!!

今次要去嘅目的地有少少遠... 所以我哋決定坐車!!

兩父子尋路中~~

約兩個鐘頭, 我哋探訪完四户, 五位老人家.  見到佢哋開心, 我哋都好開心!!  五點幾離開中心, 我哋去咗九龍城逛咗一陣, 然後去咗食晚飯.

ah Be 碟面隻熊貓係咪好似 ah Be 呢?? 我覺得好似呀!!!

感想 : 今次服務對象嘅生活條件 (根據眼見生活環境) 比上幾次的老人相對富裕, 但係從閒聊中知道佢哋嘅心靈都係好寂寞... 子女長大, 各有生活, 可能一星期都見唔到一次面... 有位婆婆甚至一年先同女見面幾次 (因為個女已經移民, 所以每年個女返港見媽媽, 都好有心啦..)  每次講起子女, 佢哋就會好開心架!! 我哋素未謀面, 見到我哋嚟探訪, 佢哋都好熱情同開心, 攞啲飲品、小食出嚟俾我哋食! 好好招呼架!! 希望佢哋生活愉快同身體健康!! 

巧遇 TV Buddy~有下文呀!!!!

話說上幾篇blog 寫過喺 4月17日, 小Be ｢巧遇 TV Buddy｣... 仲有TVB 週刊個攝影哥哥幫小Be 同 TV buddy 影咗張相嘅事... 早兩日突然醒起呢件事!!!

靈機一動, 喺度諗... 要登喺 TVB 周刊嘅話... 應該係呢一期喎!!! 咋咋淋去搵吓先!!

咦!! 點解封面女郎俾人遮咗一半嘅??

揭到唔知第幾十頁, 卒之搵到有三版印有 ｢資料由客戶提供｣ 嘅活動報告 (post event coverage), 入面搵到1/16版嘅TV buddy 相, 仲有手指尾甲咁大嘅小 Be 頭出現!!! 嘩!! 發達啦!! 無端端見報呀!! (又自娛中... 手指尾甲咁大... 都懶開心...)

▼放大啲睇吓!! 同我影嗰張一樣樣架喎!!

我帶本書返屋企俾小Be 睇, 小Be 直情睇唔到自己個頭, 只係話 ｢TV buddy 呀!! ｣.  到我哋指俾睇佢個頭時, 佢問 : ｢媽咪, 點解呢本書有我嘅?? ｣   因為呢幾版印有 ｢資料由客戶提供｣, 所以我將呢篇 blog 列入｢廣告篇｣!!! wakakakaka (又在自娛中... 我啲妄想症無得救架啦!!)