親子時間 : 家務

自從改半日工作之後

每星期有三日煮飯

呢三日嘅煮飯時間

好多時都變咗親子活動

當我準備食材時

ah Be 就會主動幫我洗菜、摘菜蕊

有時會幫我打蛋或其他簡單任務

見佢咁主動幫忙

我緊係... 唔會... 拒絕佢啦~~

小朋友幫手做家務對身體好有益架嘖~~ 

洗菜小王子洗菜 look~~ 正呀...

1st ice hockey experience

自2009 年尾,

ah Be (3歲半) 喺軽井沢(輕井澤)

嘅冬季奧運會場

見過一班同齡小朋友打 ice hockey 之後

佢就深深愛上咗呢項運動

每次經過溜冰場時

見到有人打球時

佢都要求停低睇打球

一睇可以睇個幾兩個鍾

仲鬼咁肉緊...

握拳擦掌~~

睇得好鬼興奮 

耐唔耐仲會同我哋講

佢好想打 ice hockey.. 好想學...

可惜...

佢雙親出名 ~~ 超懶...

呢三年來

ah Be多次要求... 學 ice hockey

雙親一直一拖再拖... 

*** *** *** *** *** ***

直至兩星期前

dee dee 姨媽公司有個 ice hockey program 將會舉行

有兩個名額俾員工嘅小朋友試玩

至截止日~~

居然... 仲有一個名額剩!!!

dee dee 姨媽立即問問有關同事

姨甥仔可唔可以參加??

可以參加呀!!!

go go go~~~

今朝一早起身

準時十一時前到達~~

ah Be 變身啦 !!!



ah Be 個 ice hockey look 係咪好型先??

落堂後

ah Be 已經話一定要學啦~~

我睇過啲章程

如果真係學, 應該會係平日學

平啲吖嘛!!!

希望佢真係有機會學啦~~

怪癖

ah Be 已經六歲幾...

由佢識自己去方便起

(約兩歲尾..)

我哋發現佢有一個怪癖

就係~~

去厠所唔沖厠!!!!

( ☉_☉)

佢真係好奇怪...

如果佢去 pooh pooh

佢係會沖厠架喎!!

如果佢係 v v 嘅話...

佢一定唔沖厠架喎!!

我同超爸都 "R" 爆頭 

都唔明點解...

次次佢 v v 完都要我哋幫佢撳水

或提佢沖厠

每次佢都不情不願地沖厠

好似迫佢去c 咁...

佢仲要係一撳沖厠制

即刻標出厠所/ 厠格

問佢點解唔沖厠

佢都支支咗咗

唔多願講

我地兩老就歸咎佢 ~ 懶!!!

*** *** ***

大約喺年幾前

謎底...

卒之解開...

原來佢好驚沖厠聲... 

我哋點解會知??

有次出街食飯

超爸帶佢去厠所

聽到佢一邊撳沖厠制

一邊跑出厠格

一邊講 : 快啲走呀!! 啲怪聲又嚟啦!!!

哦... 原來係咁...

到咗今日...

都係唔掂囉...

人生第一球

回帶返2013年3月2日, 星期六.

ah Be 開始學網球

點解無啦啦學網球??

係如姨媽邀請ah Be同駿駿表哥、Q表妹一齊學網球

我哋見有伴同佢玩

就俾佢試下囉~~

已經上咗3堂

ah Be 都好鍾意~~

希望佢可以 keep 住玩呢個運動啦~~

呢一球, 係ah Be 人生第一球網球~~ 值得我記住~~

傻媽與鈍兒

呢幾日啲新聞真係好得人驚... 唔係弒父殺母, 就係斬完人之後, 自我了斷...  睇到心寒...

星期六晚睇完即時新聞, 傻傻哋嘅我...  向做緊卷嘅ah Be 問....

我 : ah Be, 你大個咗會唔唔覺得媽咪迫你讀書, 然後你會殺咗我架??

Ah Be 望向我, 拍拍我膊頭, 然後... 答...

Be : 唔會, 你唔好諗埋啲無謂嘢啦!

跟住, 我 : 哦~~ 咗一聲之後

佢就繼續做卷... + 陰陰嘴笑... 

佢個樣... 好... 魔鬼呀... (☉_☉)　

*** *** *** *** *** *** *** ***

每晚睡前親子時間, ah Be 成日迫我講我小時嘅趣事佢聽...

我 : 我讀幼稚園時呢... 咁咁咁... 咁咁咁... 同咁咁咁.....

Be : 媽咪, 我知你讀邊間幼稚園, 你係讀 "一朵小白花幼稚園" 嘅, 係咪??

我 : 唔係呀!  都話咗係爸爸讀"一朵小白花"咯...

Be : 係喎... 我又記錯咗添... 你個幼稚園係咩名??

我 : 係"明欣幼稚園" 呀! 記住啦吓!

Be : 喺邊度架? 同一朵小白花近唔近架?? (佢問過N次... 我答過N次... 好似失憶咁... )

我 : 唔近... "明欣"喺西環架... 下次返西環話你知喺邊度啦!

Be : 嘩! 仲未執笠喎...

我 : 唔係呀! 佢好似轉咗做老人院喎!!!

Be : 咁我哋下次返西環記得話我知喺邊度... 其實... 都係差不多... 一個係 "園" 字, 一個係 "院"字, 個音有少少唔同之嘛....

我 : 嗯... 其實... 有好大分別... 

Feb 2013 : Picture of the month ~ Dinosaur in the City

農曆新年, 小龍移居美前

歸港短聚 (年初七) 

ah Be 知道...

小龍唔會再密密返港

以後唔可以成日見小龍

ah Be 有啲唔捨得~~~

(佢即晚要我幫佢錄 video 俾小龍... 可惜... "三叔" 嘅 whatsapp 傳唔到video)

當日, ah Be 應承小龍

每月畫一幅畫俾小龍

然後 whatsapp 俾小龍睇

由小龍出畫嘅題目

二月畫 (第一幅) : Dinosaur in the city~~

點解幅畫有咁多字?? 

佢話Joshua哥哥唔係好識中文字

所以要寫多啲中文字俾佢睇

等佢學多啲喎...

(咁... 佢又... 唔學多啲... 英文??!!)

佢自己影嘅作品相...

同場加影, 填顏色比賽嘅參選作品~~

出試卷

估唔到... 我都有今日啦~~~

居然為ah Be 考試要出試卷俾佢做...

仲要出文字題俾佢做

(唔知點解... 而家小一啲數學有80%+係文字題... )

今個星期踏入考試週

我哋兩母子做咗 "拼命三郎"

 

喪做練習...

隻衰嘢唔係唔識... 答啲題目

而係超級大意...

好多 careless mistakes....

一份卷可以扣十幾廿分大意分...

我真係想死...

*** *** *** *** *** ***
頭先同佢做數學練習

發現佢對文字題嘅"數數題"同埋"比較題"有啲亂

所以要做一份卷佢再練習一下...

佢個衰人唔可以重複俾佢做同一份卷

因為佢會記答案架!!

真係佢精我都唔苯

我會修改內容俾佢做...

佢成日攞住改咗嘅卷向我投訴...

Be 投訴問 : 媽咪, 點解啲問題唔同咗嘅?? 我咪寫唔返啲答案囉....

我 : 我就係要你重新做過, 唔可以寫舊答案!!!!!

(仔, 媽媽就係想你用腦... 之嘛...)