突然長大了??

今晚同小Be 路經商場, 見到大x活塊燈箱牌, 小Be 突然停低要我幫佢影一張相  搞咩呢???                                             

返到屋企, 小Be攞咗大Pooh Pooh 出嚟玩, 仲係要有對白嗰隻... 例如 : 小Be講 : Pooh Pooh, 小心啲呀!! 小Be扮Pooh Pooh 答 : 知道!

我突然間覺得小Be大個咗好多, 有好多事情佢都應該明白... 加埋佢拖住 Pooh Pooh 時, 發現佢高咗好多, 之前佢矮過Pooh Pooh 同攬唔晒Pooh Pooh, 但依家小Be 真係唔同晒囉... 佢依家會同我傾偈, 問我問題, 有問有答 (雖然佢有時九唔答八) 但真係有交流架.... 兩年半前嘅今日, 我諗都諗唔到小Be會變成咁... 哈哈!!

大家見唔見到小Be左眼頭損咗兩點?? 婆婆問佢點解損咗, 小Be答 : 同學仔, 搣我呀! 到我問老師, 老師話係佢自己弄損... 真係唔知邊個講真話...

自家+契家同樂日+DC 離奇失竊案!!

今日係~情人節, 所以小Be好忙.  因為佢嘅情人除咗媽咪同爸爸之外, 仲有公公,婆婆.  今年再加契爺同契媽o忝... 一早我同爸爸去咗學校見老師, 攞上學期嘅學習報告, 老師同我哋講小Be喺學校好乖, 好聽話...唔係 fa ... 有啲咁嘅事???? 老師仲話佢好慢... 做咩都好慢... 明明係第一個做, 佢都係最後完成... 唉... 小Be搞咩呢???  

中午同公公, 婆婆飲茶, 飲完返屋企瞓晏覺...

下午契爺同契媽喺4點零嚟搵小Be, 小Be即刻彈起身 (明明係瞓嘅覺...)!! 玩咗一陣, 我哋就去咗科大食tea 同玩吹波波!! 不過今日天氣好差, 又大霧又落毛毛雨... 所以好快我哋又返屋企... 差不多8點, 我哋去咗布袋澳吃海鮮! 食完之後, 契爺同契媽又返嚟同小Be玩, 因為小Be唔俾佢哋走, 要佢哋玩多一陣.  喺11點零鐘, 當契爺同契媽要走時, 佢哋先發現部 DC 唔見咗??!!?? 喺邊呢??? 我哋搵晒成間屋都唔見!!! 喺邊鼠唔見架呢???!!!

拜年賀詞之彩排

由上星期六開始, 我就教佢小Be 講一啲新年恭賀嘅說話.  為農曆年做好準備.  我唔係迫佢做一啲佢唔鍾意嘅嘢, 而係教佢唔同時節有唔同嘅說話同做唔同嘅應節準備.  小Be喺呢方面都好受教 (可能佢喺學校都學到呢啲內容加上我嘅配合), 第一日教佢已經識講 : 恭喜發財!! 星期日再教佢講 ~ 身體健康!  到今日小Be已經可以拱手講 : 恭喜發財!! 身體健康!!! 所以今晚臨瞓前再教佢講 ~ 龍馬精神! 但佢講咗 : 圓眼精神!  佢搞咩鬼呢?? 糾正咗2次佢先講到 ~ 龍馬精神!我突然心血來潮錄底佢, 留俾佢大個自己睇返, 一定好攪笑!! (我又一廂情願覺得小Be會受落我今日為佢做嘅一切tim )

喺呢度, 小Be 想同小龍拜個早年 ~ 小龍記得睇呀!!  

我upload 咗呢條片俾大家睇睇, 請欣賞!!!         

http://hk.video.yahoo.com/video/video.html?id=1393337

廣告篇 ~ 第二輯

喺兩個星期前, 有啲好好人嘅同事, 朋友話我知小Be 嘅廣告喺東鐵車門同各站沿線出現, 仲影埋相俾我o忝, 多謝晒各位!! 喺尋日下午(星期六), 爸爸好返啲嘅時間, 我決定帶小Be 去東鐵睇佢自己嘅廣告.  又可以同廣告影返張相.  我哋一到九龍塘站就見到個ad, 小Be 好開心, 指住個ad 叫xx (自己個名).  跟住企喺度影相, 叫佢跟相入面嘅笑容笑一次, 但已經笑唔返以前個樣 lu.  然後, 我哋一家三口企喺月台度睇車門, 我睇都睇到個ad, 不過影唔到囉... 今日企喺月台度差不多一個鐘頭, 我同爸爸睇 ad, 小Be 就睇佢最愛嘅火車, 仲唔肯走o忝 !!! 我哋就去咗沙田新城市廣場行街街, 最後去咗又一城食晚飯.

成長篇~嘔奶

小Be 已經大個仔lu, 佢會喺一啲位表現到佢已經長大.  好似今朝咁, 小Be 飲咗支奶奶後, 同我講 : 媽咪, 我要嘔嘔.  跟住我問佢係咪真, 佢話係.  我立即拖佢出廳, 同佢講可以嘔, 佢答 : 唔係呢度呀! 然後拖我入洗手間, 嘔入厠所裡面, 我問佢得未? 佢答 : 未得! 然後再嘔... 嘔完之後, 小Be 同我講 : 媽咪, 得啦! 我走同佢洗手, 抺嘴. 走出洗手間.

經過今朝, 我肯定小Be 已經成長, 開始獨立,懂事.  我要再放開一點, 令佢可以學多一點點...

聖誕節目之六幕@西貢

今日唔使上playgroup, 於是同爺爺飲茶, 跟住返屋企瞓覺覺豬.  黃昏時, 桄叔叔嚟接我哋去西貢食飯, 同桄叔叔補祝生日嘅. 小Be 好開心可以同桐桐姐姐玩.  食完飯, 我哋就返屋企lu, 因為聽朝要返工同返學lu... 眨吓眼, 4日聖誕節假期就過咗, 好期待除夕假期啊...